“Mike Dudime Nenema”

TSƆE be yele lãmesẽfefewɔƒe aɖe si ameha siwo le mɔkpɔkpɔ me vevie yɔ tititi. Lãmesẽfefewɔlaawo zɔ va fefewɔƒea. Amehawo ƒe gbe de dzi sesĩe esime woƒe lãmesẽfefewɔla siwo dzi woka ɖo zɔ va tome. Ʋɔnudrɔ̃lawo li be woakpɔ egbɔ be wozɔ ɖe sewo dzi. Esi lãmesẽfefea nɔ edzi yim la, amesiwo ɖu dzi ƒe dzidzɔɣli kple amesiwo dzi woɖu ƒe konyifafa tsaka xɔ teƒea. Asikpe sesẽwo ɖi na dziɖulawo!

Menye míaƒe ɣeyiɣia me lãmesẽfefewɔƒe aɖee nèle o, ke boŋ esi wowɔ anye ƒe 2,000 enye sia le Korinto Ƒudomekpo dzie. Wowɔa Ƒudomekpo dzi Fefe xɔŋkɔawo ƒe eve ɖesiaɖe le afisia tso ƒe alafa adelia D.M.Ŋ. vaseɖe ƒe alafa enelia M.Ŋ. Hela-dukɔa katã ƒe susu trɔna ɖe wɔna sia ŋu ŋkeke geɖe. Menye lãmesẽfefe gbɔlo koe fefe siawo nye o. Lãmesẽfefewɔlawo nyea alesi dukɔa dzra ɖo ɖe aʋa ƒe dzɔdzɔ ŋui ƒe dzesi. Dziɖulawo—amesiwo xɔa bubudeameŋu gã aɖe eye wobua wo ame ŋkutawoe—xɔa fiakuku siwo wotsɔ aŋgba wɔe. Wonaa nu geɖe wo, eye dua nɔa ga gbogbo aɖe xem na wo vaseɖe woƒe kugbe.

Apostolo Paulo nya nu tso Ƒudomekpo dzi Fefe siwo wowɔna le teƒe si tsɔ ɖe Korinto gbɔ ŋu nyuie eye wòtsɔ Kristotɔ ƒe agbenɔnɔ sɔ kple lãmesẽfefewɔlawo ƒe kametete. Eƒo nu tso duƒulawo, kametelawo, kple kɔdalawo ŋu tsɔ wɔ hehe nyui xɔxɔ, agbagbadzedze le mɔ nyuitɔ nu, kple dzidodo ƒe teƒeɖoɖowo ƒe kpɔɖeŋui wòsɔ nyuie. Kristotɔ siwo wòŋlɔ eƒe agbalẽa na hã nya nu le fefeawo ŋu. Ðikekemanɔmee la, wo dometɔ aɖewo nɔ ameha siwo nɔ ɣli dom le lãmesẽfefewɔƒea la dome. Eyata kpɔɖeŋu siwo Paulo wɔ la gɔme anya se na wo bɔbɔe. Ke mí amesiwo li egbea hã ɖe? Míawo hã míele du aɖe ƒum—agbe mavɔ dua. Aleke nya siwo Paulo gblɔ le kametete mawo ŋu ate ŋu aɖe vi na míi?

‘Kametete le Se la Nu’

Nudidi siwo wobiana tso ame si le blemafefe mawo me sẽ ŋutɔ. Gbeƒãɖela aɖe ɖea lãmesẽfefewɔlawo fiaa nukpɔlawo ɖekaɖekae eye wòdoa ɣli biana be: ‘Ame aɖe nya nu le amesia ƒe nuvlowɔwɔ aɖe ŋu si wòatsɔ atso enuia? Enye fiafi, ame vɔ̃ɖi kple nutovowɔlaa?’ Agbalẽ si nye Archaeologia Graeca gblɔ be, “womeɖea mɔ na amesi nye nuvlowɔla xɔŋkɔ, alo be wònye amesiawo ƒe ƒometɔ [kplikplikpli] be wòaʋli hoa o.” Eye ne woda se siwo le fefea wɔwɔ ŋu dzi hã la, woɖea sedzidalawo le eme tsɔ hea to na wo vevie.

Nya sia kpe ɖe mía ŋu be míase Paulo ƒe nya sia me, be: “Ke ne ame aɖe le kame tem hã la, womaɖɔ dziɖuɖukuku nɛ o, negbe ɖeko wòate kame le se la nu hafi.” (Timoteo II, 2:5) Nenema ke le agbedua ƒuƒu me la, ele be míaɖo Yehowa ƒe  nudidiwo gbɔ, míazɔ ɖe eƒe agbenyuinɔnɔ ƒe dzidzenu kɔkɔawo dzi, abe alesi wole Biblia mee ene. Gake Biblia na míenya be: “Ame ƒe dzimesusu enye vɔ̃ tso ɖevime ke.” (Mose I, 8:21) Eyata esime míedze dua sisi gɔme vɔ gɔ̃ hã la, ele be míakpɔ nyuie be míayi edzi anɔ kamea tem ɖe se siwo le eŋu nu bene Yehowa ƒe ŋudzedzekpɔkpɔ nayi edzi anɔ mía dzi ale be míakpɔ agbe mavɔ.

Nu vevitɔ kekeake si akpe ɖe mía ŋu le nusia wɔwɔ mee nye lɔlɔ̃ na Mawu. (Marko 12:29-31) Lɔlɔ̃ sia aʋã mí míadi be míadze Yehowa ŋu eye míawɔ nu wòasɔ kple eƒe lɔlɔ̃nu.—Yohanes I, 5:3.

‘Ðe Nu Kpekpe Ðesiaɖe Ði’

Le blema duɖimekekewo me la, duƒulawo medoa awu alo kplaa nu kpekpe siwo ahe wo ɖe megbe o. Agbalẽ si nye The Life of the Greeks and Romans gblɔ be: “Ne wole du ƒum la, . . . zi geɖe duƒulawo nɔa amama naneke madomadoe. Awumadomado naa duƒulawo te ŋu ʋãna ɖe dua ŋu, woƒe lãme kɔna ɖe eŋu, eye woƒe afɔ tsɔna. Esi nu kpekpe aɖeke mele wo ŋu o ta la, wozãa woƒe ŋusẽ katã ɖe dua ƒuƒu ŋu. Anye nusiae nɔ susu me na Paulo esime wòŋlɔ ɖo ɖe Hebri Kristotɔwo be: “Mina míaɖe nu kpekpe sia nu kpekpe . . . ɖa, eye mina míatsɔ dzidodo anɔ dudimekeke, si woɖo na mí la dzi.”—Hebritɔwo 12:1.

Nu kpekpe ka ƒomevie ate ŋu axe mɔ na mí le agbedua ƒuƒu me? Wo dometɔ ɖeka ate ŋu anye didi be míali kɔ ŋutilãmenu siwo mehiã mí o ɖi alo be míanɔ agbe kɔkɔ. Ame aɖewo abu kesinɔnuwo be woawoe nye nusi ana yewoanɔ dedie alo woawoe ana dzi nadzɔ yewo. “Nu kpekpe” mawo siwo mehiã o dodo ate ŋu ahe duƒula la ɖe megbe ale gbegbe be mlɔeba la, Mawu magava nɔ vevie nɛ boo o. (Luka 12:16-21) Ava nɔ agbe mavɔ nɔnɔ bum be enye nane si le adzɔge ʋĩ. Amea ate ŋu abu ɖe tame be, ‘Xexe yeyea nya le vava ge gbeɖeka ya, gake míate ŋu anɔ xexe sia me nuwo zãm alesi míate ŋui gbɔ.’ (Timoteo I, 6:17-19) Ŋutilãmenukpɔsusu sia ate ŋu ana woatra mɔ bɔbɔe le agbedua ƒuƒu me alo ate ŋu axe mɔ na egɔmedzedze gɔ̃ hã.

Yesu gblɔ le Todzimawunyaa me be: “Ame aɖeke mate ŋu asubɔ aƒetɔ eve o; elabena ɖewo alé fu ame ɖeka, eye wòalɔ̃ evelia, alo aku ɖe ame ɖeka ŋuti, eye wòado vlo evelia. Miate ŋu asubɔ Mawu kple anyigba dzi nuwo o.” Eye esi wògblɔ alesi Yehowa kpɔa lãwo kple numiemiewo ƒe nuhiahiãwo gbɔ na wo vɔ eye wògblɔ kpee be amegbetɔ xɔ asi wu nusiawo la, exlɔ̃ nu be: “Eyaŋuti migaɖe fu na mia ɖokui agblɔ bena: Nuka míaɖu, nuka míano, alo nuka míatsɔ ata mahã o. Elabena nenem nusiawo katã tɔgbe trɔ̃subɔlawo dina; ke mia Fofo, si le dziƒo la, nyae bena, nenem nusiawo katã hiãa mi. Midi mawufiaɖuƒe la kple eƒe dzɔdzɔenyenye gbãgbiagbã, eye woatsɔ nusiawo katã akpe ɖe eŋuti na mi.”—Mateo 6:24-33.

‘Tsɔ Dzidodo Ƒu Du Lae’

Menye blemaduƒuƒuwo katãe nyea du kpui siwo woƒuna kabakaba ko tɔna o. Duƒuƒuawo dometɔ aɖe si woyɔna be doʹli·khos te ŋu didina dea kilometa ene. Enye du sesẽ aɖe si ƒuƒu ɖea ame ƒe ŋusẽ kple dzidodo fiana. Wotu xo be le ƒe 328 D.M.Ŋ. me la, esi duƒula aɖe si ŋkɔe nye Ageas ɖu dzi le du sia ƒuƒu me la, eƒu du yi keke wo de Argos ke va gblɔ eƒe dziɖuɖua ŋu nya. Gbemagbe nu vi aɖe koe susɔ wòaƒu du kilometa 110!

Du legbe si doa ame ƒe dzidodo kpɔnae Kristotɔwo ƒe dua nye. Dzidodo aƒu du sia aɖo  nuwuwu hiã bene Yehowa nakpɔ ŋudzedze ɖe mía ŋu eye wòana agbe mavɔ nunana la mí. Nenemae Paulo ƒu duae. Ɣeyiɣi kpui aɖe do ŋgɔ na eƒe ku la, ete ŋu gblɔ be: “Ʋiʋli nyui lae meʋli; mewu nye mɔzɔzɔ la nu, melé xɔse la me ɖe asi. Tso ekema dzi la wodzra dzɔdzɔenyenye ƒe dziɖuɖukuku la ɖo ɖi nam.” (Timoteo II, 4:7, 8) Abe Paulo ene la, ele be míaƒu dua ‘vaseɖe nuwuwu.’ Ne dzi meganya le dodom na mí o le esi wòwɔ abe ɖe dua didi wu alesi míesusui gbã ene ta la, teƒeɖoɖoa ato mía ŋu. (Hebritɔwo 11:6) Afɔku kae nye si wòanye, esi wònye be míete tu katsoƒea alea gbegbe!

Teƒeɖoɖo La

Wonaa seƒoƒotsihe siwo wotsɔ aŋgba wɔe eye wotsɔa seƒoƒo ɖoa atsyɔ̃ nɛ la amesiwo ɖu dzi le blema Helatɔwo ƒe lãmesẽfefewo me. Le Delphi Lãmesẽfefewo me la, dziɖulawo xɔa fiakuku si wotsɔ ati si nye laurel wɔe. Le Olympia Lãmesẽfefewo me la, woxɔa fiakuku siwo wotsɔ gbememitiŋgbawo wɔe, eye le Ƒudomekpo dzi Fefeawo me la, wotsɔa fiakuku siwo wotsɔ ati bubu si nye pine wɔe la naa wo. Biblia-nyala aɖe gblɔ be: “Be woade dzo lãme na lãmesẽfefewɔlawo la, wodaa fiakukuawo, si nye teƒeɖoɖo si woaxɔ ne woɖu dzi, kple deʋayawo, ɖe afɔti etɔ̃ zikpui, alo kplɔ̃ dzi le fefewɔƒea be duɖimekelaawo nanɔ kpɔkpɔm le lãmesẽfefeawo me.” Dziɖula la bua fiakukua ɖɔɖɔ bubu gã ŋutɔ aɖee. Ne etrɔ gbɔna aƒe la, edoa tasiaɖam aʋadziɖuɖutɔe gena ɖe dua me.

Esi nusia nɔ susu me na Paulo ta la, ebia eƒe agbalẽa xlẽla siwo le Korinto be: “Alo mienyae bena, amesiwo le dudime kem le dusiƒe la, wo katãe kenɛ hafi, gake ame ɖeka koe xɔa dziɖuɖufetu la o mahã? Mike dudime nenema, ne miaƒe asi nasu edzi! . . . Ame mawo wɔa nenema, bene woƒe asi nasu dziɖuɖukuku, si gblẽna la dzi; ke míawo la, esi megblẽna o la dzi.” (Korintotɔwo I, 9:24, 25; Petro I, 1:3, 4) Kpɔ vovototo gã si le wo dome ɖa! Teƒeɖoɖo si le amesiwo ƒua agbedua va ɖo nuwuwu lalam la magblẽ gbeɖegbeɖe akpɔ abe blema fefeawo ƒe fiakuku siwo gblẽna la ene o.

Apostolo Petro ŋlɔ le fiakuku sia si nyo wu ŋu be: “Ne alẽkplɔla gã la lado la, miaxɔ ŋutikɔkɔe ƒe fiakuku magblẽmagblẽ la.” (Petro I, 5:4) Ðe xexe sia me ƒe teƒeɖoɖo aɖe li si gogo makumakunyenye, agbenɔnɔ magblẽmagblẽ le dziƒoŋutikɔkɔe me kple Kristoa?

Egbea Kristotɔ duɖimekelawo ƒe akpa gãtɔ menye amesiwo Mawu si ami na be woanye yeƒe gbɔgbɔmeviwo o, eye agbenɔnɔ le dziƒo ƒe mɔkpɔkpɔ mele wo si o. Menye teƒeɖoɖo si nye makumakunyenye ƒe du sim wole o. Gake Mawu tsɔ teƒeɖoɖo aɖe si ɖeke mesɔ kplii o ɖo ŋkume na woawo hã. Eyae nye agbe mavɔ nɔnɔ le blibodede me le paradisonyigba dzi le Dziƒofiaɖuƒea ƒe dziɖuɖu te. Teƒeɖoɖo kae wotsɔ ɖo ŋkume na Kristotɔ duƒula o, ele be wòatsɔ tameɖoɖo kplikpaa kple ŋusẽ si de ŋgɔ wu lãmesẽhoʋlila ɖesiaɖe tɔ aƒui. Nukatae? Esi teƒeɖoɖoa magblẽ akpɔ o tae: “Ŋugbedodo, si eya ŋutɔ do na mí la, eya nye agbe mavɔ la.”—Yohanes I, 2:25.

Esi teƒeɖoɖo ma si ɖeke mesɔ kplii o ye le Kristotɔ duƒula ŋgɔ la, aleke wòle be wòabu xexe sia me ƒe amenublenuwoe? Ele be wòabu wo abe alesi Paulo bu woe ene, esi wòbe: “Mebu wo katã nu búbu le Kristo Yesu, nye Aƒetɔ nyanya, si ƒo wo katã ta la ŋuti, amesi ta meɖe asi le nusiawo katã ŋuti ɖo, eye mebu wo aɖukpo dzi nuwoe.” Esia ta Paulo ƒu dua sesĩe ŋutɔ! “Nɔvinyewo, nye ŋutɔ nyemebu ɖokuinye bena, nye asi su edzi haɖe o. Ke nu ɖeka ko menya: Nusiwo le  megbenye la, meŋlɔ wo be, hafi nusiwo le ŋgɔnye la, nyãm mele, mele dzesiɖoƒe yome tim yiɖase Mawu ƒe ameyɔyɔ le dziƒo ƒe dziɖuɖufetu la dzi le Kristo Yesu me.” (Filipitɔwo 3:8, 13, 14) Paulo ƒe ŋku katã nɔ teƒeɖoɖoa ŋu le dua sisi me. Nenema ke wòle be mía tɔ hã nanɔ edzii.

Míaƒe Kpɔɖeŋu Nyuitɔ Kekeake

Le blema lãmesẽfefeawo me la, wodea bubu dziɖulawo ŋu yia didiƒe ke. Hakpanyaŋlɔlawo ŋlɔa hakpanya le wo ŋu, eye nukpalawo kpaa woƒe nɔnɔme. Ŋutinyaŋlɔla Věra Olivová gblɔ be “wonɔa ŋutikɔkɔe gã aɖe me eye woƒe ŋkɔxɔxɔ dea didiƒe ʋĩ.” Wozua kpɔɖeŋuɖolawo hã na megbevi siwo ava zu dziɖulawo.

Amekae nye “dziɖula” si ɖo kpɔɖeŋu nyuitɔ kekeake na Kristotɔwo? Paulo ɖo eŋu be: “Mina míatsɔ dzidodo anɔ dudimekeke, si woɖo na mí la dzi, eye míakpɔ Yesu, si nye xɔse ƒe gɔmeɖola kple nuwula la ɖa: Amesi do dzi kpe [fuwɔameti] ƒe fu, eye mebu ŋukpe o le dzidzɔ, si woɖo ɖi nɛ la ta, eye wòbɔbɔ nɔ anyi le Mawu ƒe fiazikpui ƒe nuɖusi me.” (Hebritɔwo 12:1, 2) Nyateƒee, hafi míate ŋu aɖu dzi le míaƒe agbe mavɔ dua ƒuƒu me la, ehiã be míaƒe ŋku nanɔ míaƒe Kpɔɖeŋuɖola, Yesu Kristo, dzi ɣesiaɣi. Míate ŋui ne míexlẽa Nyanyuiawo me nuŋlɔɖiwo edziedzi eye míedea ŋugble le mɔ siwo nu míate ŋu asrɔ̃ eyama le la ŋu. Nusɔsrɔ̃ sia akpe ɖe mía ŋu míakpɔe be Yesu Kristo ɖo to Mawu eye wòtsɔ dzidodo ɖo kpe eƒe xɔse ƒe nyonyome dzii. Woɖo eteƒe nɛ ɖe eƒe dzidodoa ta, esi Yehowa Mawu kpɔ ŋudzedze ɖe eŋu eye wona mɔnukpɔkpɔ wɔnuku geɖewoe.—Filipitɔwo 2:9-11.

Gake Yesu ƒe nɔnɔme si ɖe dzesi wue nye eƒe lɔlɔ̃. “Lɔlɔ̃ gã wu esia megale ame aɖeke si bena, wòatsɔ eƒe agbe aɖo anyi ɖe xɔlɔ̃awo ta o.” (Yohanes 15:13) Ena gɔmesese deto wu va le nya “lɔlɔ̃” ŋu esi wògblɔ na mí be míalɔ̃ míaƒe futɔwo kekeake hã. (Mateo 5:43-48) Esi Yesu lɔ̃ Fofoa si le dziƒo ta la, Fofoa ƒe lɔlɔ̃nu wɔwɔ dzɔ dzi nɛ. (Psalmo 40:10, 11; Lododowo 27:11) Ne míetsɔ Yesu míaƒe Kpɔɖeŋuɖolae kple amesi ƒe nɔnɔme wòle be míasrɔ̃ le agbedu sesẽ si ƒum míele me la, aʋã míawo hã be míalɔ̃ Mawu kple mía havi eye míakpɔ dzidzɔ vavãtɔ le míaƒe subɔsubɔ kɔkɔea me. (Mateo 22:37-39; Yohanes 13:34; Petro I, 2:21) Na wòanɔ susu me na wò be Yesu mabia nusi míate ŋu awɔ o tso mía si o. Eka ɖe edzi na mí be: “Nye dɔme fa, eye mebɔbɔ ɖokuinye ɖe anyi le dzi me, eye miakpɔ dzudzɔ na miaƒe luʋɔwo. Elabena nye kɔkuti la le bɔbɔe, eye nye agba la le wodzoe.”—Mateo 11:28-30.

Abe Yesu ene la, ele be míaƒe ŋku nanɔ teƒeɖoɖo si wodzra ɖo ɖi na amesiwo katã doa dzi vaseɖe nuwuwu la dzi. (Mateo 24:13) Ne míeke duɖimea ɖe seawo nu, ne míeɖe nu kpekpe sia nu kpekpe ɖa, eye ne míetsɔ dzidodo ƒu duae la, míate ŋu aka ɖe edzi be míaɖu dzi. Taɖodzinu si le mía ŋgɔ la le mía tutum ɖo ɖe ŋgɔgbe! Edoa ŋusẽ yeye mí le dzidzɔ si wònaa míekpɔna ta; dzidzɔ sia naa mɔ si le ŋgɔ na mí la nya zɔna.

[Nɔnɔmetata si le axa 29]

Du legbe ye Kristotɔwo ƒe duɖimekekea nye—ebia dzidodo

[Nɔnɔmetata si le axa 30]

Kristotɔwo ate ŋu akpɔ mɔ be woana teƒeɖoɖo magblẽmagblẽ yewo, menye abe lãmesẽhoʋlilawo ƒe dziɖuɖukuku ene o

[Nɔnɔmetata si le axa 31]

Amesiame si ado dzi vaseɖe nuwuwu la axɔ teƒeɖoɖoa

[Nɔnɔmetata Tsoƒe si le axa 28]

Copyright British Museum