Agbemeŋutinya

Subɔsubɔ Tso Dzi Blibo Me Togbɔ Be Dodokpɔwo Li Hã

ABE ALESI RODOLFO LOZANO GBLƆE ENE

Wodzim le Mexico, le du si nye Gómez Palacio si le Durango Nutome la me, le September 17, 1917, dzi. Mexicotɔwo ƒe Tɔtrɔ Kpata la nu nɔ sesẽm vevie ɣemaɣi. Togbɔ be tɔtrɔ kpata sia va eƒe nuwuwu le ƒe 1920 me hã la, fuɖenamewo ganɔ edzi yim le nuto si me míenɔ me ƒe geɖe le ema megbe, eye esia na agbenɔnɔ sesẽ ŋutɔ.

GBEÐEKA si Dada se be aglãdzelawo kple dziɖuɖua ƒe asrafowo gagbɔna avu wɔ ge kple wo nɔewo la, etsɔ mía kple nɔvinyeŋutsu etɔ̃ kpakple nɔvinyenyɔnu eve ɣla ɖe míaƒe aƒeme ŋkeke geɖe. Nuɖuɖu vi aɖe koe nɔ anyi, eye meɖo ŋku edzi be mía kple nɔvinyenyɔnu suetɔ míebe ɖe abati te. Le ema megbe la, Dada tso nya me be yeakplɔ mí ayi United States, eye mía fofo nadze mía yome emegbe.

Míeva ɖo California le ƒe 1926 me, ɣeyiɣi kpui aɖe do ŋgɔ na Ganyawo ƒe Sesẽ Gã la si gblẽ nu le United States. Míetsa de teƒe vovovowo, afisi míanya kpɔ dɔ aɖe le awɔ ko, míede teƒeteƒewo abe San Joaquin Valley, Santa Clara, Salinas, kple King City ene. Míesrɔ̃ agbledɔwɔwɔ kple atikutsetse ɖesiaɖe ƒomevi kple agblemenu bubuwo gbegbe. Togbɔ be metso hloloe le ɖevime hã la, enye ɣeyiɣi si me mese vivi na agbe ŋutɔ.

Míeke Ðe Biblia ƒe Nyateƒea Ŋu

Le March 1928 me la, Biblia Nusrɔ̃viwo, si nye ŋkɔ si woyɔna na Yehowa Ðasefowo ɣemaɣi, dometɔ ɖeka va mía gbɔ. Enye ŋutsu tsitsi aɖe si ŋkɔe nye Esteban Rivera eye wònye Spaintɔ. Agbalẽvi si wòtsɔ na mí si nye “Afika Ame Kukuwo Le?” la ƒe ŋkɔ wɔ dɔ ɖe  dzinye ŋutɔ eye nenema ke nye emenyawo hã. Togbɔ be ɖevi koe menye ɣemaɣi hã la, medze Biblia sɔsrɔ̃ kpakple hadede kple Biblia Nusrɔ̃viwo gɔme. Mexɔ ɣeyiɣi aɖeke o nɔnye kple nɔvinyenyɔnu Aurora hã va zu Yehowa kafula dovevienuwo.

Le ƒe 1930 ƒeawo ƒe titina la, wotu Fiaɖuƒe Akpata aɖe ɖe San Jose na Eŋlisigbe hame si nɔ afima. Esi Spaintɔ geɖe wɔa dɔ le agbledzi le nutoa me ta la, míedze gbeƒãɖeɖe kple Gbetakpɔxɔ Nusɔsrɔ̃ gɔme kpli wo. Ðasefo siwo nye Spaintɔwo, siwo tso San Francisco, si didi kilometa 80 tso afima la va kpena ɖe mía ŋu. Esi ɣeyiɣiawo va nɔ yiyim la, amesiwo ade 60 va nɔa Spaingbe me kpekpeawo dem le San Jose Fiaɖuƒe Akpataa me.

Mlɔeba le February 28, 1940, dzi la, metsɔ nyɔnyrɔxɔxɔɖetsime ɖo kpe nye adzɔgbeɖeɖe na Yehowa dzi le takpekpe aɖe me le San Jose. Esi ƒe trɔ la, woɖom mɔɖelae, Yehowa Ðasefowo ƒe ɣeyiɣiawo katã ƒe subɔla. Eye le April 1943 me la, wobia tso asinye be mayi Stockton, si nye du aɖe si didi kilometa 130 tso mía gbɔ, be mayi aɖaɖo Spaingbe hame ɖe afima. Nyee nye dzikpɔla zimenɔla ɣemaɣi le Eŋlisigbe hame si nɔ San Jose la me eye meganɔ Spaingbe Ðasefowo hã subɔm le afima. Mewɔ ɖoɖo be ame bubuwo nakpɔ dɔ siawo gbɔ eye emegbe medzo yi Stockton.

Wodo Nye Nuteƒewɔwɔ Kpɔ

Tso ƒe 1940 me dzi yina la, wokplɔm yi amesiwo xɔa ame ɖe asrafodɔ me gbɔe zi geɖe, gake ɣesiaɣi si meyi la, wodea bubu nye nyametsotso be nyemaɖu asrafo o le dzitsinya ta la ŋu. Esi United States ge ɖe xexemeʋa evelia me le December 1941 me la, asrafoxɔlawo ƒe nyaƒoɖeamenuwo nu va sẽ ɖe edzi. Mlɔeba wolém de game le ƒe 1944 me. Esi menɔ ʋɔnu si woadrɔ̃m lalam la, wodem tomegaxɔ aɖe me kpe ɖe nuvlowɔlawo ŋu. Esi wose be Yehowa Ðasefoe menye la, wo dometɔ geɖe bia nya tso alesi nuvlo siwo wowɔ akpɔ ŋusẽ ɖe woƒe tenɔnɔ le Mawu gbɔ dzii ŋu.

Ðasefo siwo le San Jose da megbe nam be woaɖe asi le ŋunye gbɔ, anɔ ʋɔnudɔdrɔ̃ lalam. Los Angeles senyala aɖe si ʋlia amesiwo nu wotso ƒe dukɔmevinyenye ƒe gomenɔamesiwo ta na wo la lɔ̃ be yeaʋli nye nya la nam naneke maxɔmaxɔe. Ʋɔnudrɔ̃la la gblɔ be yeaɖe asi le ŋunye nenye be malɔ̃ aɖe asi le mɔɖeɖedɔa ŋu ava wɔ ŋutilãmedɔ, eye manɔ ɖokuinye ɖem fia dziɖuɖumegãwo dzinu ɖesiaɖe. Nyemelɔ̃ ɖe nyametsotso ma dzi o, eyata edem game ƒe eve  le McNeil Island gaxɔ me le Washington Nutome. Le nye afima nɔɣi la, mezã ɣeyiɣia tsɔ srɔ̃ Bibliae vevie. Mesrɔ̃ mɔ̃ƒoƒo hã. Mede ƒe eve o woɖe asi le ŋunye ɖe agbenyuinɔnɔ ta. Mewɔ ɖoɖo be mayi mɔɖeɖedɔa dzi enumake.

Nye Dɔwɔwɔwo Dzidzi Ðe Edzi

Le ƒe 1947 ƒe vuvɔŋɔli la, wode dɔ asi nam be mía kple mɔɖela bubu míawɔ dɔ le Spaingbedola siwo le Colorado City la dome le Texas Nutome. Gake vuvɔ nu sẽ le afima ale gbegbe be míeyi San Antonio, afisi xɔ dzo vie. Gake tsi nɔ dzadzam le afima ale gbegbe be ɖeko wògblẽa míaƒe ʋɔtru nu yi ʋɔtru nu dɔa me. Mexɔ ŋkeke aɖeke hafi ga vɔ le mía si o. Kwasiɖawo va yi abolo si me míede nui kple tii koe nyea nu míeɖuna. Nye zɔhɛa trɔ gbɔ va aƒe, gake nye ya metsi anyi. Esi Ðasefo siwo nye Eŋlisigbedolawo se nu tso nye ŋutilãmenuhiahiãwo ŋu la, wokpe ɖe ŋunye.

Esi adame ɖo la, metrɔ yi Colorado City, eye vivivi la, Spaingbe hame sue aɖe va ɖo afima. Emegbe meʋu yi Sweetwater, Texas, eye megana kpekpeɖeŋu le Spaingbe hame bubu ɖoɖo me. Esime menɔ Sweetwater la, mexɔ lɛta si wotsɔ kpem va Gbetakpɔxɔ Habɔbɔa ƒe Gilead Biblia Suku ƒe klass 15 lia, hena dutanyanyuigbɔgblɔ ƒe hehe xɔxɔ, si dze egɔme February 22, 1950. Esi wowu sukua nuwuwɔnawo nu dzomeŋɔli ma le dukɔwo dome takpekpe si wowɔ le New York City ƒe Yankee Stadium la, metsi Yehowa Ðasefowo ƒe xexeame katã ƒe dɔwɔƒegã si le Brooklyn dzinu etɔ̃. Wohem le afima na dɔ si wode asi nam le Mexico ƒe alɔdzedɔwɔƒe wɔwɔ.

Dɔwɔwɔ le Mexico

Meva ɖo Mexico City le October 20, 1950. Anye kwasiɖa eve megbe la, woɖom alɔdze dzikpɔlae eye mewɔ dɔ ma ƒe ene kple afã. Nye nuteƒekpɔkpɔwo le mɔɖeɖedɔa me, le game, Gilead, kple Brooklyn kpe ɖe ŋunye ŋutɔ. Esi meva ɖo Mexico la, mede dzesii enumake be ehiã be woatu mía nɔviŋutsu kple nɔvinyɔnu Mexicotɔwo ƒe gbɔgbɔmemenyenye ɖo. Ehiã etɔxɛe be woakpe ɖe wo ŋu ne woalé Mawu ƒe Nya la ƒe dzidzenu kɔkɔwo me ɖe asi.

Ebɔ le Latin-Amerika dukɔ geɖe si me Mexico hã le be nyɔnu kple ŋutsu nanɔ wo nɔewo gbɔ wo nɔewo maɖemaɖee le se nu. Kristodukɔa ƒe subɔsubɔhawo, vevietɔ Roma Katoliko-ha la koŋ, ye ɖe mɔ be wɔna sia si mesɔ ɖe Ŋɔŋlɔawo nu o la nɔ edzi yim. (Hebritɔwo 13:4) Ena be ame aɖewo va le Yehowa Ðasefowo ƒe hameawo me togbɔ be womeɖe srɔ̃ le se nu o hã. Eyata wowɔ ɖoɖo na amesiawo be woana dzinu ade wo ne woatsɔ aɖɔ nuwo ɖoe. Ne menye nenema o la, womagabu wo Yehowa Ðasefowoe o.

Enɔ bɔbɔe na wo dometɔ geɖe be woaɖɔ nuwo ɖo le woƒe agbenɔnɔ me. Nusi wòhiã be woawɔ koe nye be woaɖe wo srɔ̃awo le se nu. Ame bubuwo ƒe nya sẽ wu ema. Le kpɔɖeŋu me, ame aɖewo gbugbɔ srɔ̃ ɖe zi eve, ɖewo gbugbɔ ɖee zi gbɔ zi etɔ̃ sɔŋ gake womegbe wo dometɔ aɖeke le setɔwo gbɔ o. Esi wova kpɔ Yehowa ƒe amewo ƒe srɔ̃ɖenyawo gbɔ wòsɔ ɖe Mawu ƒe Nya la ƒe nufiafia nu mlɔeba la, woyra hameawo le gbɔgbɔ me ale gbegbe.—Korintotɔwo I, 6:9-11.

Ɣemaɣi ame akpa gãtɔ mede suku yi ŋgɔ le Mexico o. Hafi mava Mexico le ƒe 1950 me gɔ̃ hã la, alɔdzedɔwɔƒea dze nuxexlẽ kple nuŋɔŋlɔ srɔ̃sukuwo ɖoɖo gɔme. Fifia míegbugbɔ ɖoɖo gawɔ ɖe suku siawo ŋu eye míewɔ ɖoɖo be míade wo agbalẽ me le dziɖuɖu gbɔ. Tso ƒe 1946 me, esime wodze nuŋlɔɖi wɔwɔ le sukua ŋu la, amesiwo wu 143,000 ye Ðasefowo fia nuxexlẽ kple nuŋɔŋlɔe le Mexico!

Mexico sewo sẽ ŋutɔ le subɔsubɔnyawo me. Gake le ƒe siwo va yi eteƒe medidi boo o me la, wowɔ tɔtrɔ veviwo le go sia me. Le ƒe 1992 me la, wowɔ se yeye aɖe le subɔsubɔnyawo ŋu, eyata le ƒe 1993 me la, wode Yehowa Ðasefowo agbalẽ me le Mexico be wonye mawusubɔsubɔhabɔbɔ.

Mebua tɔtrɔ siawo dzidzɔnya gã aɖee, tɔtrɔ siwo ne wogblɔ be woadzɔ la, magbe le ƒe siwo  va yi me. Medea dziɖuɖudɔwɔƒewo edziedzi ƒe geɖe eye womekana ɖe dzinye o. Gake aleke gbegbe wònya kpɔe nye si be nàkpɔ alesi wokpɔ nya siawo gbɔe to Senyawo Gbɔkpɔƒe si le míaƒe alɔdzedɔwɔƒea dzi enye si, ale be ƒã hafi wodoa kplamatse aɖe mí le gbeƒãɖeɖedɔa me.

Subɔsubɔ Kple Srɔ̃nye si Nye Dutanyanyuigblɔla

Esi meva ɖo Mexico la, Gilead Sukua ƒe klass siwo do ŋgɔ nuwula geɖe nɔ dukɔa me xoxo. Wo dometɔ ɖekae nye Esther Vartanian, si nye Ðasefo si tso Armenia, eye wòdze mɔɖeɖedɔa gɔme le Vallejo, California, le ƒe 1942 me. Míeɖe mía nɔewo July 30, 1955, eye le ema megbe la, míeyi míaƒe dɔdasia dzi le Mexico. Esther yi eƒe dutanyanyuigbɔgblɔdɔa dzi le Mexico City, eye míenɔ alɔdzedɔwɔƒea, afisi meyi subɔsubɔdɔa dzi le.

Le ƒe 1947 me la, Esther va ɖo eƒe dutanyanyuigbɔgblɔdɔa ƒe dɔdasi wɔƒe gbãtɔ le Monterrey, Nuevo León, Mexico. Hame ɖeka si me Ðasefo 40 le koe nɔ Monterrey ɣemaɣi, gake ɣeyiɣi si me wonɔ eɖem yi Mexico City le ƒe 1950 me la, hame enee nɔ anyi. Ƒome siwo Esther srɔ̃ Biblia kplii esime wònɔ subɔsubɔm le Monterrey la ƒe ƒometɔ siwo nye sɔhɛwo le míaƒe alɔdzedɔwɔƒe si tsɔ ɖe Mexico City gbɔ, fifia.

Le ƒe 1950 me la, anyigbamama si me dutanyanyuigblɔlawo wɔ dɔ le le Mexico City la nye dua ƒe akpa gãtɔ. Wozɔa afɔ le woƒe dɔdasia wɔwɔ me alo ɖoa ʋu siwo tsi ŋutɔ eye woyɔna tititi. Esi meva ɖo le ƒe 1950 ƒe nuwuwu lɔƒo la, hame adre ye nɔ anyi. Fifia wodzi ɖe edzi ɖo 1,600, eye Fiaɖuƒegbeƒãɖela siwo wu 90,000 sɔŋ le Mexico City, eye amesiwo wu 250,000 va Kristo ƒe kua ƒe Ŋkuɖodzia le ƒe si va yi me le afima! Le ƒe siwo va yi me la, mɔnukpɔkpɔ su mía kple Esther si míesubɔ le hame siawo dometɔ geɖe me.

Ne mía kple Esther míedze Biblia-nusɔsrɔ̃  gɔme la, míedzea agbagba ɣesiaɣi be míana ƒomea ƒe ta nanɔ eme ale be ƒome bliboa va nɔa nusɔsrɔ̃a me. Esia na míekpɔ ƒome gã geɖe va le Yehowa subɔm. Mexɔ se be nusiwo ta nyateƒe tadedeagua le dzidzim ɖe edzi le Mexico ye nye be zi geɖe la, ƒome blibowo wɔa ɖeka gena ɖe nyateƒe tadedeagua me.

Yehowa Yra Ðe Míaƒe Dɔa Dzi

Tso ƒe 1950 me ke la, dɔa va le afɔ tsɔm ale gbegbe le Mexico, le amewo ƒe dzidziɖedzi ƒe agbɔsɔsɔ gome kple tɔtrɔ siwo wowɔ le habɔbɔa me gome. Dzidzɔ bliboe wònye be míawo hã míawɔ sue aɖe le dzidziɖedzi sia me, le dɔwɔwɔ kple dzidzɔme siawo siwo me amedzrowɔwɔ le me.

Karl Klein si nye Yehowa Ðasefowo ƒe Dziɖuha me tɔ fifia kple srɔ̃a Margaret va srã mí kpɔ le woƒe mɔkekexɔxɔ aɖe me ƒe aɖewoe nye sia. Nɔviŋutsu Klein di be yeanya alesi dɔa le edzi yimee le míaƒe anyigbamamaa me le Mexico, eyata wo kple Margaret wova San Juan Tezontla Hamea, si tsɔ ɖe Mexico City gbɔ la me, afisi míedea kpekpewo le ɣemaɣi. Xɔ vi aɖe koe míaƒe akpataa nye, eƒe kekeme anye meta 4.5 eye eƒe didime anye meta 5.5. Amesiwo ade 70 nɔ anyi hafi míede, eye màgakpɔ teƒe aɖeke atɔ ɖo le xɔa me o. Ame tsitsiwo nɔ zikpuiwo dzi, ɖekakpui kple ɖetugbiwo nɔ zikpui lɔbɔwo dzi, eye ɖeviwo nɔ anyikpememewo dzi le anyigba.

Nusia wɔ dɔ ɖe Nɔviŋutsu Klein dzi ale gbegbe elabena Biblia nɔ ɖevi ɖesiaɖe si, eye woxlẽa mawunyakpukpuiawo le Biblia me kplɔa nuƒola la ɖo. Le dutoƒonuƒoa ƒe nuwuwu la, Nɔviŋutsu Klein ƒo nu tso Mateo 13:19-23 me nyawo ŋu, eye wògblɔ be “anyigba nyui” si Yesu yɔ la ƒe geɖe le Mexico. Ðevi siwo nɔ anyi gbemagbe dometɔ adre le dɔ wɔm fifia le alɔdzedɔwɔƒea kekeɖenudɔ gã si wɔm wole le teƒe si te ɖe Mexico City ŋu me. Bubu le subɔsubɔm le Betel, eye wo dometɔ bubu geɖe nye mɔɖelawo!

Esi meva Mexico City la, ame 11 koe nɔ míaƒe alɔdzedɔwɔƒea. Fifia amesiwo ade 1,350 ye le dɔ wɔm le afisia, wo dometɔ siwo anye 250 le alɔdze yeyea tudɔ wɔm. Ne wowu dɔ bliboa nu, ɖewohĩ le ƒe 2002 me la, míate ŋu akpɔ nɔƒe na ame 1,200 akpee le xɔ siwo wotu kpee me. Ne èbu eŋu kpɔ la, Fiaɖuƒegbeƒãɖelawo mede 7,000 le dukɔ bliboa me le ƒe 1950 me o, gake fifia míewu ame 500,000! Dzidzɔ yɔa nye dzi me fũ ne mekpɔ alesi Yehowa yra ɖe dɔ sesẽ si mía nɔvi Mexicotɔ siwo bɔbɔa wo ɖokui wɔ tsɔ kafui la dzi.

Tenɔnɔ Ðe Kuxi Sesẽ aɖe Nu

Nane si va le fu ɖem nam vevie le ŋkeke siawo mee nye dɔléle. Magblɔ be menɔ lãmesẽ me le nye agbemeŋkeke akpa gãtɔ me. Gake le November 1988 me la, gbagbadɔ va dze dzinye si na be nyemegate ŋu wɔa nu geɖe o. Le Yehowa ƒe kpekpeɖeŋu me la, kamedede kple dɔyɔɖaŋu bubuwo na wòka ɖe eme nam vie, gake nye ŋutinu aɖewo megate ŋu ʋãna abe alesi medii ene o. Megale atikewɔwɔ dzi eye medea kɔdzi enuenu bene taɖuame sesẽwo kple lãmeve bubu siwo gakpɔtɔ li la nagaɖe fu nam o.

Togbɔ be nyemagate ŋu awɔ dɔ geɖe abe alesi medii ene o hã la, nye dzi dzea eme elabena menya be mete ŋu kpe ɖe ame geɖe ŋu wonya Yehowa ƒe tameɖoɖowo eye wova zu esubɔla ɖeadzɔgbewo. Dzi dzɔam hã be maƒo nu kple Kristotɔ nɔviŋutsu kpakple nɔvinyɔnu siwo vaa míaƒe alɔdzedɔwɔƒea dometɔ geɖe alesinu mate ŋui; mesena le ɖokuinye me be enye dzidede ƒo na mía nɔewo.

Enyanya be Yehowa kpɔa ŋudzedze ɖe alesi míesubɔnɛ ŋu eye be menye dzodzroe dɔ si míewɔ nye o la do ŋusẽm ŋutɔ. (Korintotɔwo I, 15:58) Togbɔ be ŋutete boo megale ŋunye o eye dɔléle hã le nuƒo dom nam hã la, Kolosetɔwo 3:23, 24 me nyawo wɔa dɔ ɖe dzinye vevie, esiwo nye: “Nusianu, si ke miewɔna la, miwɔe tso dzi me, abe Aƒetɔ lae miewɔe na ene, eye menye na amewo o, esi mienya bena, miaxɔ domenyinyi ƒe teƒeɖoɖo tso Aƒetɔ gbɔ la.” Le wɔwɔ ɖe nuxlɔ̃ame sia dzi me la, mesrɔ̃ alesi masubɔ Yehowa tso luʋɔ blibo me togbɔ be mele dodokpɔwo me tom hã.

[Nɔnɔmetata si le axa 24]

Ƒe 1942 me esime menye mɔɖela

[Nɔnɔmetata si le axa 24]

Srɔ̃nye dze dutanyanyuigbɔgblɔ ƒe dɔa gɔme le Mexico le ƒe 1947 me

[Nɔnɔmetata si le axa 24]

Mía kple Esther egbea

[Nɔnɔmetata siwo le axa 26]

Etame le miame: Míaƒe Mexico Betel-ƒomea le ƒe 1952 me, nyee le ŋgɔgbea

Etame: Amesiwo wu 109,000 kpe ta le Mexico City ƒe fefewɔƒe sia le ƒe 1999 me na nutome gã takpekpe wɔwɔ

Ete le miame: Míaƒe alɔdzedɔwɔƒe yeyea si nu woawu kpuie