Alesi Míanye Nyuiwɔlawoe

EGBEGBE nyagɔmeɖegbalẽwo ɖe “nyuiwɔwɔ” gɔme be enye “agbenyuinɔnɔ deŋgɔ; nusi nyo wɔwɔ.” Enye “nusi sɔ wɔwɔ kple nusi sɔ ŋu bubu; nɔnɔme nyui.” Nyagɔmeɖegbalẽŋlɔla Marvin R. Vincent gblɔ be gɔmesese gbãtɔ si nɔ nya si gɔme woɖe be “nyuiwɔwɔ” ŋu le blema Helagbe me la fia “nu nyui ɖesiaɖe ƒomevi wɔwɔ.” Eyata mewɔ nuku o be wobu nɔnɔmewo abe ŋuɖɔɖɔɖo, dzideƒo, ɖokuimamla, nudzɔdzɔewɔwɔ, nublanuikpɔkpɔ, kutrikuku, anukwareɖiɖi, ɖokuibɔbɔ, kple nuteƒewɔwɔ le ɣeyiɣi vovovo me be wonye nyuiwɔwɔ. Wogaɖe nyuiwɔwɔ gɔme hã be enye “nuwɔwɔ ɖe dzɔdzɔenyenye ƒe dzidzenu nu.”

Ameka ƒe agbenyuinɔnɔ deŋgɔ, nusi nyo wɔwɔ, kple dzɔdzɔenyenye ƒe dzidzenu nue wòle be míanɔ agbe ɖo? Newsweek magazine gblɔ be: “Le agbenyuinɔnɔ ŋuti nunya si bɔ nu la, ɖikeke si Ŋkuʋuʋu he vɛ la na be nyui kple vɔ̃ ŋuti nukpɔsusu ɖesiaɖe trɔ zu nusi dze ame ŋutɔ ŋu ƒe nya, ame ŋutɔ ƒe seselelãme alo tiatia si wòwɔna le afisi wòtso ta.” Gake ɖe nusi dze ame ŋu alo ame ŋutɔ ƒe didi nye mɔ nyui si dzi woato atso nya me le nyui kple vɔ̃ ŋutia? Ao. Bene míatu nyuiwɔwɔ ɖo la, míehiã nyui kple vɔ̃ ƒe dzidzenu si ŋu kakaɖedzi le—dzidzenu si dzi woanɔ te ɖo agblɔ be nuwɔna, nɔnɔme, alo agbenɔnɔ aɖe nyo alo menyo o.

Nyuiwɔwɔ ƒe Dzidzenuwo Tsoƒe Vavãtɔ Ðeka La

Agbenyuinɔnɔ ƒe dzidzenu vavãtɔwo Tsoƒe ɖeka koe li—eyae nye ameƒomea Wɔla Yehowa Mawu. Esi Yehowa Mawu wɔ ame gbãtɔ Adam vɔ megbe teti la, ede se sia na ame be: “Ðu abɔmetiawo katã ƒe tsetse faa; ke ati, si na wodzea si nyui kple vɔ̃ la, megaɖu eya ƒe tsetse  aɖeke o; gbesigbe naɖu eƒe ɖe, ku ke naku.” (Mose I, 2:16, 17) Yehowa Mawu tsɔ ŋkɔ ɖedzesi ma na atia be yeatsɔ afia be ye ɖeɖekoe kpɔ mɔ atso nya me le nusi nye nyui kple vɔ̃ ŋu na yeƒe nuwɔwɔwo. Esia ta Mawu ƒe nyui kple vɔ̃ ƒe dzidzenuwoe va zu nusi dzi woanɔ te ɖo adrɔ̃ ʋɔnu, alo eyae woatsɔ adzidze ame ƒe nuwɔnawo, nukpɔsusu, kple amenyenyee. Dzidzenu siawo manɔmee la, míate ŋu ade vovototo si sɔ nyui kple vɔ̃ dome o.

Se si wode ɖe sidzedze nyui kple vɔ̃ ƒe atia nu la da tiatia aɖe ɖe Adam kple Xawa ŋkume—be woaɖo to loo alo woagbe toɖoɖo. Nyuiwɔwɔ le woawo gome bia be woaɖo to sedede ma. Esi ɣeyiɣiawo va nɔ yiyim la, Yehowa gaɖe nusiwo dzea eyama ŋu kple nusiwo medzea eŋu o fia, eye wòna woŋlɔ wo ɖe Biblia me na mí. Eyata be míatu nyuiwɔwɔ ɖo la, ebia be míawɔ nu wòasɔ ɖe Yehowa ƒe dzidzenu dzɔdzɔeawo, siwo le Ŋɔŋlɔawo me nu.

Nya Mawu ƒe Dzidzenuwo Nyuie

Esi wònye Yehowa Mawu na nyui kple vɔ̃ ƒe dzidzenuwo eye wòna woŋlɔe ɖe Biblia me ta la, ɖe mele be míanya wo nyuie oa? Apostolo Paulo ŋlɔ be: “Ŋɔŋlɔ sia ŋɔŋlɔ, si tso Mawu ƒe Gbɔgbɔ me la, enyo hã na nufiafia, na mokaka, na ɖɔɖɔɖo, na amehehe, si le dzɔdzɔenyenye me, bene Mawu ƒe ame la nade blibo, eye wòanɔ dzadzraɖoɖi hena dɔ nyui sia dɔ nyui wɔwɔ.”—Timoteo II, 3:16, 17.

Le kpɔɖeŋu me, de ŋugble le nugɔmemasemase si dze ŋgɔ Kunihito, amesi ƒe nya míegblɔ le nyati si do ŋgɔ me, esi wòɖe nusi wo detɔwo buna be enye ameɖokuibɔbɔ fia la ŋu kpɔ. Esi emegbe wògava lé ŋku ɖe Ŋɔŋlɔawo ƒe dzidzenuwo ŋu nyuie wu la, ekpɔ nya la gbɔ le mɔ si da sɔ wu nu. Biblia nya de ɖokuibɔbɔ ƒe dzi ƒo baa, eye wògblɔ be míagaka ɖe mía ɖokui dzi akpa o eye míaganye dadalawo o. (Lododowo 11:2; Mixa 6:8) Gake esi apostolo Paulo nɔ nu ƒom le “dzikpɔladɔ” ƒe dzedze ŋu la, egblɔ be ‘woadi’ mɔnukpɔkpɔ ma ‘vevie.’ (Timoteo I, 3:1) ‘Dzikpɔladɔ didi’ menye ɖokuidodoɖedzi alo dada koe wòfia be woatsri o ke ele be woatsri alesi woada ame ɖokui ɖe anyi dzodzro hã.

Nukae Biblia gblɔ le agbenyuinɔnɔ le dɔwɔnyawo me ŋu? Dɔwɔmɔnu siwo ŋu nya ku ɖo zazã alo gbagbãƒewo didi le dziɖuɖu ƒe sewo kple adzɔsewo ŋu bɔ egbea le dɔwɔnyawo me. Gake eɖanye nukae ame bubuwo wɔna o, Biblia ƒe dzidzenue nye be ele be míawo ya ‘míaɖi anukware le nusianu me.’ (Hebritɔwo 13:18) Eyata míetua nyuiwɔwɔ ɖo ne míeɖia anukware eye míewɔa nusi le dzɔdzɔe ɖe dɔtɔwo, dɔwɔviwo, asisiwo, kple dziɖuɖu ŋu. (Mose V, 25:13-16; Romatɔwo 13:1; Tito 2:9, 10) Le nyateƒe me, anukwareɖiɖi naa wokana ɖe ame dzi eye ame ƒe nu nyoa ame ŋu. Eye zi geɖe la, dɔwɔnyawo dede agbalẽ me xea mɔ na masɔmasɔ kple kuxi sesẽ siwo ate ŋu ado mo ɖa le “nuɖiɖeame” ta.—Nyagblɔla 9:11; Yakobo 4:13, 14.

Awudodo kple dzadzraɖo nye nu bubu si me wòhiã be míatu nyuiwɔwɔ ɖo le. Awudodo siwo me woawɔ tiatia le toa vovo le dukɔ vovovo me, eye woate ŋu aƒo nya ɖe mía nu sesĩe be míado awu ƒe atsyã siwo to yeyee. Gake nukatae nàtɔ atsyã ɖesiaɖe si to? Biblia xlɔ̃ nu mí be ‘míagawɔ nu abe nuɖoanyi sia tɔ ene o.’ (Romatɔwo 12:2) Le esi apostolo Paulo nade sewo kpaŋkpaŋ teƒe la, gbɔgbɔ ʋãe wòŋlɔ be: “Nyɔnuwo nado awu ɖe nɔnɔme nyui me, eye woawɔ leke na wo ɖokui le ŋukpekpe kple ɖokuidziɖuɖu me; menye kple ɖaƒoƒo vivivo kple sika alo adzagbawo alo awu xɔasi dodo o, ke nusi dze nyɔnu, siwo ʋua Mawu ƒe subɔsubɔ me la, enye be, woawɔ leke na wo ɖokui to dɔwɔwɔ nyuiwo me.” (Timoteo I, 2:9, 10) Dzidzenu vevi sia ku ɖe ŋutsuwo kple nyɔnuwo siaa ŋu. Gake woate ŋu awɔ tiatia le awu ƒe atsyã hamehame siwo wodona le dukɔ si me wole nu alo le nusi dze ame ŋutɔ ŋu nu.

Biblia yɔ agbegbegblẽnɔnɔ nuwɔna siwo ŋu Mawu tsi tre ɖo vevie hã. Míexlẽ nuxlɔ̃ame sia le Korintotɔwo I, 6:9, 10 be: “Alo mienyae bena, ame madzɔmadzɔwo manyi  mawufiaɖuƒe la ƒe dome oa? Migana woable mi o: Ahasiwɔlawo kple trɔ̃subɔlawo kple matrewɔlawo kple hadzelawo kple ŋutsu, siwo dɔna kple ŋutsuwo, kple fiafitɔwo kple ŋubiãlawo kple ahamulawo kple busubɔlawo kple adzodalawo la womanyi mawufiaɖuƒe la ƒe dome o.” Ŋɔŋlɔ sia kpe ɖe Maria, amesi ƒe nya míegblɔ do ŋgɔ ŋu be wòkpɔe be le agbenɔnɔ ƒe dzidzenu kɔkɔ si Wɔla la ɖo nu la, yewo kple Juan dome kadodoa mesɔ o eye ele be yeatso eme ne yedi be yeƒe nu nadze Mawu ŋu. Eme kɔ kɔte be bene míatu nyuiwɔwɔ ɖo la, ehiã be míanya Yehowa ƒe dzidzenuwo nyuie.

Srɔ̃ Nu Kple Dzi

Nyuiwɔwɔ menye asidedeatame atsri nu gbegblẽ wɔwɔ ko o. Ŋusẽ si kpena ɖe ame ŋu be woanɔ agbe nyui le eŋu. Nunyuiwɔla wɔ ame. Nufiala aɖe gblɔ be “ele be woatsɔ dzi kple susu siaa asrɔ̃ nyuiwɔwɔe.” Eyata menye Mawu ƒe Nya la nyanya tsitotsito koe nye nusi hiã le nyuiwɔwɔ tutuɖo me o. Ehiã be míade ŋugble le nusi woŋlɔ ɖe eme hã ŋu ale be akpedada na Yehowa nayɔ míaƒe dzi me fũ eye esia naʋã mí be míatsɔ Ŋɔŋlɔawo me gɔmeɖosewo awɔ dɔe le míaƒe agbenɔnɔ me.

Hakpala la tsɔ dzidzɔ gblɔ be: “Aleke gbegbe nyemehelɔ̃a wò se lae o! Nye ŋugbledede wònye ɖaa.” (Psalmo 119:97) Eye Fia Dawid ŋlɔ be: “Meɖo ŋu blemaŋkekewo, [Mawu,] mede ŋugble le wò nuwɔwɔwo katã ŋu, eye mesusu wò asinudɔwɔwɔwo ŋu.” (Psalmo 143:5) Ele be míawo hã míana ŋugbledede gbedodoɖatɔe nanye míaƒe Biblia kple Biblia-srɔ̃gbalẽwo sɔsrɔ̃ ƒe akpa vevi aɖe.

Nyateƒee, ɣeyiɣi kpɔkpɔ na nusɔsrɔ̃ kutrikukutɔe si ŋu ŋugbledede kpe ɖo ate ŋu anye nu sesẽ. Gake nyuiwɔwɔ yometiti bia be míaƒle ɣeyiɣi tso esi míazã ɖe dɔ bubuwo ŋu me. (Efesotɔwo 5:15, 16) Aaron si xɔ ƒe 24 la ƒlea ɣeyiɣi gbesiagbe esi wòfɔna aɖabaƒoƒo 30 doa ŋgɔ na ɣeyiɣi si wòfɔna tsã. Egblɔ be: “Gbã la, ɖeko metsɔa gaƒoƒo afã bliboa katã xlẽa Bibliae. Nyitsɔ laa hafi meva kpɔ alesi gbegbe ŋugbledede le vevie. Eyata fifia metsɔa ɣeyiɣi abe ema ƒe afã ene bua nusi mexlẽ ŋui. Nusia wɔwɔ ɖe vi nam ŋutɔŋutɔ.” Míate ŋu ade ŋugble ɣebubuɣiwo hã. Dawid gblɔ le ha aɖe si wòdzi na Yehowa me be: “Meɖo ŋku dziwò le nye aba dzi, ne menyɔ le zã.” (Psalmo 63:7) Eye Biblia gblɔ be: “Isak yi gbe me le fiẽ, be [yeade ŋugble].”—Mose I, 24:63.

Ŋugbledede hiã vevie ŋutɔ le nyuiwɔwɔ tutuɖo me, elabena ekpena ɖe mía ŋu míesena le mía ɖokui me abe alesi Yehowa sena le eɖokui me ene, eye be míaxɔ eƒe nukpɔsusuwo awɔ mía tɔe. Le kpɔɖeŋu me, Maria nya be Mawu tsri matrewɔwɔ. Gake be ‘wòatsri nuvɔ̃ alé ɖe nu nyui ŋu’ la, ehiã be wòade ŋugble le Biblia me mawunyakpukpui veviwo ŋu. (Romatɔwo 12:9) Wokpe ɖe eŋu wòkpɔ alesi tɔtrɔwɔwɔ hiãe esi wòxlẽ Kolosetɔwo 3:5, afisi woxlɔ̃ nu mí le be ‘míawu mía ŋutinu, siwo le anyigba dzi; ahasiwɔwɔ, makɔmakɔnyenye, fiẽŋufiẽŋui, nudzodzro vɔ̃ kple ŋukeklẽ.’ Maria bia eɖokui se be: ‘Gbɔdɔdɔ ƒe dzodzro ka tɔgbee wòle be mawu? Nusiwo nyɔa dzodzro makɔmakɔ kawoe wòle be matsri?  Ðe wòle be mawɔ tɔtrɔ aɖewo le alesi mewɔna ɖe ŋutsuwo ŋu mea?’

Ŋugbledede ƒe akpa aɖee nye be míabu nusiwo atso míaƒe nuwɔna me ŋu. Paulo xlɔ̃ nu Kristotɔwo be woatsri ahasiwɔwɔ eye woaɖu wo ɖokui dzi ale be ‘ame aɖeke megagblẽ nu le nɔvia ŋu eye wòabae o.’ (Tesalonikatɔwo I, 4:3-7) Biabia siwo nyo wòle be míade ŋugble le wo ŋue nye: ‘Nukae magblẽ le ɖokuinye, nye ƒomea, kple ame bubuwo ŋu ne mewɔ nusia? Aleke wòagblẽ nu le ŋunye le gbɔgbɔ me, seselelãme, kple ŋutilã mee? Aleke nuwo nɔ na amesiwo da Mawu ƒe se dzi va yi?’ Nusiawo ŋu bubu na nyuiwɔwɔŋusẽ gaɖo Maria ŋu, eye ate ŋu ado ŋusẽ míawo hã.

Srɔ̃ Nu tso Amewo ƒe Kpɔɖeŋuwo Me

Ðe woate ŋu afia nyuiwɔwɔ ame le sukua? Nyabiabia sia ɖu ta na nuŋubulawo ƒe akpewo. Helatɔ xexemenunyala Plato susui be woate ŋui. Gake Aristotle ya ɖe nu me be agbenɔnɔ mee wotona srɔ̃nɛ. Nyadzɔdzɔŋlɔla aɖe ŋlɔ kpuie tso nya si wohe le eŋu la ŋu be: “Kpuie ko la, womate ŋu asrɔ̃ nyuiwɔwɔ ƒe gɔmeɖosewo la ɖeɖeko le eɖokui si o. Eye womate ŋu afiae ame tso agbalẽ me hã o. Amehawo me . . . afisiwo wodea nyuiwɔwɔ ƒe dzi ƒo le eye woɖoa eteƒe na ame le ye wosrɔ̃a nɔnɔme nyui le.” Gake afikae míakpɔ amesiwo me nyuiwɔwɔ akuakua le la le? Togbɔ be míakpɔ nyuiwɔwɔ ƒe kpɔɖeŋu aɖewo le dukɔ akpa gãtɔ gbɔ, ne eglo le woƒe glimeme ŋkutawo ya teti gbɔ hã la, àte ŋu akpɔ nyuiwɔwɔ ƒe kpɔɖeŋu gbogbo aɖe le Biblia me.

Nyuiwɔwɔ ƒe kpɔɖeŋu vevitɔ kekeake ye nye Yehowa. Ewɔa nu nyui le eƒe mɔwo katã dzi, enye dzɔdzɔetɔ eye wònyo. Míate ŋu atu nyuiwɔwɔ ɖo ne míezu ‘Mawu srɔ̃lawo.’ (Efesotɔwo 5:1) Eye Mawu Vi Yesu Kristo ‘gblẽ kpɔɖeŋu ɖi na mí, bene míato yeƒe afɔɖoƒewo tututu.’ (Petro I, 2:21) Tsɔ kpe ɖe eŋu la, míakpɔ nuteƒewɔla geɖewo ƒe nuŋlɔɖiwo le Biblia me, abe Abraham, Sara, Yosef, Rut, Hiob, kple Daniel kpakple eƒe zɔhɛ Hebri-vi etɔ̃awo tɔ ene. Mele be míaŋlɔ míaƒe ɣeyiɣia me Yehowa subɔlawo ƒe nyuiwɔwɔ kpɔɖeŋuwo hã be o.

Míate Ŋu Atui Ðo

Ðe míate ŋu awɔ nu nyui le Mawu ŋkume vavãa? Esi wònye be míenyi blibomademade ƒe dome ta la, ɣeaɖewoɣi aʋa sesẽ aɖe ate ŋu adzɔ ɖe míaƒe susu kple míaƒe ŋutilã dome—ɖe alesi míadi be míawɔ nyui kple nuvɔ̃ ƒe nɔnɔme si le mía me dome. (Romatɔwo 5:12; 7:13-23) Gake le Mawu ƒe kpekpeɖeŋu me, míate ŋu aɖu aʋa ma dzi. (Romatɔwo 7:24, 25) Yehowa na eƒe Nya la kple Biblia-srɔ̃gbalẽwo mí. Ne míetsɔa veviedodo srɔ̃a Ŋɔŋlɔawoe eye míetsɔa gbedodoɖa dea ŋugble le wo ŋu la, dzi dzadzɛ ate ŋu ava su mía si. Dzi dzadzɛ ma mee susu, nyagbɔgblɔ, kple nuwɔna nyuiwo ate ŋu atso. (Luka 6:45) Míate ŋu atu mawumemenyenye ɖo ne míesrɔ̃a Yehowa Mawu kple Yesu Kristo ƒe kpɔɖeŋuwo. Eye kakaɖedzitɔe la, míate ŋu asrɔ̃ nu geɖe tso ame vovovo siwo le Mawu subɔm nuteƒewɔwɔtɔe egbea gbɔ.

Apostolo Paulo xlɔ̃ nu eƒe agbalẽxlẽlawo be ‘woayi edzi anɔ’ nu nyui kple nu bubu siwo dze kafukafu ‘ŋu bum.’ Ne míewɔnɛ alea la, Mawu ayra mí godoo. (Filipitɔwo 4:8, 9) Le Yehowa ƒe kpekpeɖeŋu me la, míate ŋu anye nyuiwɔlawo.

[Nɔnɔmetata si le axa 6]

Na ŋugbledede nanye wò Biblia sɔsrɔ̃ ƒe akpa aɖe

[Nɔnɔmetata si le axa 7]

Tu mawumemenyenye ɖo to Kristo Yesu sɔsrɔ̃ me