Mawu Ƒe Nya Dzi Wɔlawo Kpɔa Dzidzɔ

Yehowa Ðasefowo ƒe “Mawu ƒe Nya Dzi Wɔlawo” Nutome Gã Takpekpea me nuƒolawo dometɔ ɖeka gblɔ le takpekpe sia ƒe gɔmedzedze be: “Míebu takpekpe sia be enye Yehowa ƒe mɔnuɖoɖo bubu si adzra mí ɖo ɖe Fiaɖuƒedɔ geɖe wu wɔwɔ ŋu.” Eyi edzi be: “Míedzra ɖo be woafia nu mí le ƒomegbenɔnɔ si me dzidzɔ le ŋu, woade dzi ƒo na mí be míazɔ kple Yehowa ƒe habɔbɔa kplikplikpli, woado ŋusẽ mí míayi edzi ado vevie nu le Fiaɖuƒedɔa me, eye be woaɖo ŋku alesi wòhiã be míanɔ ŋudzɔ dzi na mí.”

TSO May 2000 ƒe nuwuwu lɔƒo la, Mawu ƒe nya dzi wɔla miliɔn geɖe kple wo xɔlɔ̃wo ƒo zi ɖe teƒe akpe geɖe le xexeame godoo be woaxɔ Biblia me nufiame veviwo. Nukae wosrɔ̃ le ŋkeke etɔ̃ takpekpe sia me?

Ŋkeke Gbãtɔ—Mègaŋlɔ Yehowa ƒe Nyuiwɔwɔwo Be O

Le nuƒo gbãtɔ me la, zimenɔla la kpe nyaselawo be woase yayra siwo tadedeagu na Yehowa ɖekae hena vɛ ƒe vivi le takpekpewo me. Wona kakaɖedzi vavalawo katã be woƒe xɔse adzi ɖe edzi eye be ŋusẽ agaɖo wo kple Yehowa dome ƒomedodo ŋu.

‘Dzidzɔ Mawu la’ nya nusiwo hiã mí be mía dometɔ ɖesiaɖe nakpɔ dzidzɔ. (Timoteo I, 1:11) Eyata nuƒo si ƒe tanyae nye “Mawu ƒe Lɔlɔ̃nu Wɔwɔ Na Wokpɔa Dzidzɔ” te gbe ɖe edzi be alesi míanɔ agbee ɖe mɔ nyuitɔ kekeake nu la le Yehowa ƒe Nya, Biblia, me. (Yohanes 13:17) Gbe si wobia Ðasefo aɖewo siwo le Yehowa subɔm ɣeyiɣi didi aɖee nye sia ɖe alesi Mawu ƒe lɔlɔ̃nu wɔwɔ le nɔnɔme vovovowo me naa gɔmesese ganɔa míaƒe agbe ŋui fia. Nuƒo si kplɔe ɖo, si nye “Kpɔ Dzidzɔ ɖe Yehowa ƒe Nyuiwɔwɔ Ŋu” te gbe ɖe edzi be, abe “Mawu srɔ̃lawo” ene la, Kristotɔwo di be yewoatse ‘ku nyuiwo katã’ le woƒe agbenɔnɔ me. (Efesotɔwo 5:1, 9) Mɔ ɖedzesi siwo dzi míato awɔ esia dometɔ ɖekae nye gbeƒãɖeɖe nyanyuia kple nusrɔ̃lawo wɔwɔ.—Psalmo 145:7.

Numedzodzro si nye “Yi Edzi Nànɔ Te Sesĩe abe Ðe Nèle Amesi Womekpɔna O la Kpɔm Ene” ɖe alesi xɔse sẽŋu kpena ɖe mía ŋu be ‘míakpɔ’ Mawu si womekpɔna o la fia. Nuƒola la gblɔ alesi gbɔgbɔmemewo nya Mawu ƒe nɔnɔmewo, si ƒe ɖewoe nye ŋutete si le esi be wòanya nusiwo míesusuna gɔ̃ hã. (Lododowo 5:21) Amesiwo wobia gbee la gblɔ afɔɖeɖe siwo wowɔ be woatu xɔse sẽŋu ɖo ahaɖo gbɔgbɔmenuwo nɔƒe gbãtɔ le woƒe agbe me.

Nuƒo tɔxɛ si nye “Kafu Yehowa—Nukunuwo Wɔla La” ye wotsɔ wu ŋdi wɔnawo nui. Ekpe ɖe nyaselawo ŋu wokpɔe be alesi míele nu srɔ̃m tso Yehowa ŋui la, nenemae míekpɔa susu siwo ta wòle be míakafui be eyae nye nukunuwo Wɔla. Nuƒola la gblɔ be: “Ne míede ŋugble le nu wɔnuku siwo Mawu wɔ le  xexemewɔwɔ me kple nu nyui siwo katã wòle wɔwɔm na mí fifi laa ŋu la, ŋudzedzekpɔkpɔ si tso dzime ʋãa mí be míakafui. Ne míebu nu wɔnuku siwo wòwɔ na eƒe amewo le ɣeyiɣi siwo va yi me ŋu la, míedina be míakafui. Eye ne míebu nu nyui siwo Yehowa agawɔ ƒe ŋugbedodowo ŋu la, míedia mɔ siwo dzi míato aɖe míaƒe ŋudzedzekpɔkpɔ afia hã.”

Ŋdɔ ƒe wɔnaa dze egɔme kple nuƒo si nye “Mègana Ðeɖi Nate Ŋuwò le Nunyuiwɔwɔ Me O,” si ɖo ŋku edzi na vavalawo katã be xexe sia ƒe nɔnɔme sesẽwo ɖo kpe edzi be nuwuwua tu aƒe. (Timoteo II, 3:1) Gake ne míena ɖeɖi te mía ŋu o la, míate ŋu aɖee afia be “amesiwo xɔnɛ sena hena luʋɔ xɔxɔ la dometɔwo míenye.”—Hebritɔwo 10:39.

Biblia me ɖaŋu kae woɖo ku ɖe ƒomegbenɔnɔ ŋu? Takpekpea me nuƒo kpuiwo ƒe gbãtɔ, si nye—“Ðo To Mawu ƒe Nya La”—dze egɔme kple akpa si nye “Le Amesi Nàɖe Tiatia Me.” Amesi woaɖe tiatia enye nyametsotso vevitɔwo kekeake siwo amewo wɔna la dometɔ ɖeka. Le esia ta Kristotɔwo dina be yewoagbɔ dzi ɖi atsi hafi aɖe srɔ̃, eye ele be woaɖe srɔ̃ ‘le Aƒetɔ la me ko.’ (Korintotɔwo I, 7:39) Nuƒo kpuiawo ƒe akpa si kplɔe ɖo la dzro alesi Yehowa dinɛ be Kristotɔwo ƒe ƒomewo katã nakpɔ dzidzedze abe gbɔgbɔ me nuɖoanyi sẽŋu ene la me, eye wòfia mɔ nyui siwo dzi woate ŋu ato awɔ esia. Akpa mamlɛa ɖo ŋku edzi na dzilawo be nufiafia wo viwo be woalɔ̃ Mawu dzea egɔme kple dzilawo ƒe lɔlɔ̃ na eyama.

Nuƒo si nye “Kpɔ Nyuie le Nyasegblɔ Kple Amenyagbɔgblɔ Ŋu” me nya veviwo kpe ɖe amesiame ŋu wòkpɔe be togbɔ be nu wɔnukuwo dzɔna hã la, ne míese nyatakaka dedzigbɔnamewo la, ele be míawɔ nu ɖe eŋu nunyatɔe, menye abe amesiwo woate ŋu aflu bɔbɔe ene o. Ade Kristotɔwo dzi wu ne woƒo nu tso nusi wonya be enye nyateƒe ŋu—si nye Fiaɖuƒenyanyuia. Ame geɖe kpɔ akɔfafa kple ŋusẽdodo geɖe le nuƒo si kplɔe ɖo si nye “Tenɔnɔ Ðe ‘Ŋu si Le Ŋutilã Me’ Nu” me. Ekpe ɖe wo ŋu wokpɔe be togbɔ be míanɔ fu siwo nu matso kaba o kpem hã la, Yehowa ate ŋu ado ŋusẽ mí to eƒe gbɔgbɔ kɔkɔea, eƒe Nya, kple míaƒe Kristotɔwo ƒe nɔviwo ƒe habɔbɔa dzi. Nusiwo me Paulo ŋutɔ to la de dzi ƒo na wo geɖe.—Korintotɔwo II, 12:7-10; Filipitɔwo 4:11, 13.

Ŋkeke gbãtɔ wu enu kple nuƒo si nye “Zɔzɔ Aduadu Kple Yehowa ƒe Habɔbɔa.” Woƒo nu tso akpa vevi etɔ̃ siwo Mawu ƒe habɔbɔa  wɔ ŋgɔyiyi le ŋu: (1) gbɔgbɔmekekeli si tso Yehowa gbɔ la gɔmesese si le dzidzim ɖe edzi, (2) subɔsubɔdɔ si Mawu tsɔ de mía si, kple (3) asitɔtrɔ siwo wowɔ le habɔbɔa ƒe ɖoɖo ŋu si sɔ ɖe ɣeyiɣia dzi. Emegbe nuƒola la gblɔ kakaɖedzitɔe be: “Mɔkpɔkpɔ na nusiwo le mía ŋgɔ wɔa dɔ ɖe mía dzi.” Ebia be: “Ðe ɖikeke aɖe le alesi mía tɔ dzɔ le go sia go me be míalé kakaɖedzi si nɔ mía si tsã me ɖe asi vaseɖe nuwuwu la ŋua?” (Hebritɔwo 3:14) Ŋuɖoɖoa dze ƒã. Le ema yome woɖe agbalẽ gbadza yeye si ƒe tanyae nye Àte Ŋu Anye Mawu Xɔlɔ̃! ɖe go. Anye kpekpeɖeŋunu sẽŋu aɖe si woatsɔ akpe ɖe amesiwo mede suku yi ŋgɔ o alo menya nuxexlẽ tututu o ŋu be woasrɔ̃ nu tso Yehowa ŋu.

Ŋkeke Evelia—Yi Edzi Nàɖe Gbeƒã Mawu ƒe Nukunuwo

Le gbesiagbe mawunyakpukpuia me dzodzro vɔ megbe la, takpekpea ƒe ŋkeke evelia yi edzi kple nuƒo kpuiwo si ƒe tanyae nye “Mawu ƒe Nya ƒe Subɔlawo.” Akpa gbãtɔ he susu yi dzidzedze si kpɔm míaƒe gbeƒãɖeɖedɔa le fifia le xexeame katã dzi. Ke hã ame akpa gãtɔ siwo gbe Fiaɖuƒegbedasia doa míaƒe dzidodo le dɔ sia wɔwɔ me kpɔna. Gbeƒãɖela aɖewo siwo le dɔa wɔm ɣeyiɣi didi aɖee nye sia ɖe alesi woyi edzi le dzidzɔ kpɔm le subɔsubɔdɔa me to ŋusẽdodo woƒe susu kple dzi be woate ŋu anɔ te ɖe kuxi si nye ɖekematsɔleme alo tsitretsiɖeŋu nu me. Akpa evelia ɖo ŋku edzi na takpekpea valawo be Yehowa Ðasefowo dzea agbagba be yewoate ɖe amewo ŋu tẽ kple le vome siaa, le afisiafi. Eye akpa mamlɛa ƒo nu tso mɔ vovovo siwo dzi Kristotɔwo ate ŋu akeke woƒe subɔsubɔ ɖe enu le ŋu. Nuƒola la te gbe ɖe edzi be, be míate ŋu awɔ esia la, ele be míatsɔ Mawu ƒe Fiaɖuƒea aɖo nɔƒe gbãtɔ, ne esia wɔwɔ masɔ na mí o alo wòabia be míagbe nu le mía ɖokui gbɔ hã.—Mateo 6:19-21.

Esi wònye be ame mavɔ̃mawuwo ƒe xexe si me ŋutilãmenudidi kɔmaɖinametɔe bɔ ɖo mee míele ta la, nuƒo si nye “Tu Mawusosroɖa Kple Ŋudzedzekpɔkpɔ Ðo” sɔ ɖe ɣeyiɣia dzi ŋutɔ. Nuƒola la tu eƒe nya aɖewo ɖe Timoteo I, 6:6-10, 18, 19 dzi, heɖe alesi mawusosroɖa kpena ɖe Kristotɔwo ŋui be woaƒo  asa na galɔlɔ̃, si ate ŋu akplɔ wo atrae ahahe vevesese geɖe vɛ me. Ete gbe ɖe edzi be aleke ke míaƒe ganyawo ɖale o, mía kple Yehowa dome ƒomedodo kpakple míaƒe gbɔgbɔ me nyonyo dzie dzidzɔkpɔkpɔ nɔ te ɖo. Nusiwo dzi wotɔ asii le nuƒo si nye “Nana be Ŋu Nagakpe Mawu O” me la ʋã ame geɖe. Wote gbe ɖe nyateƒe si wònye be Yehowa meŋlɔa eƒe Ðasefo wɔnuteƒewo be o la dzi. Yesu Kristo—amesi “nye [ame ma] ke etsɔ kple egbe, yi ɖe mavɔmavɔ me”—ƒe kpɔɖeŋu si ɖeke mesɔ kplii o la akpe ɖe ame geɖe ŋu be woayi edzi aƒu agbedu la dzidodotɔe.—Hebritɔwo 13:8.

Nyɔnyrɔxɔxɔnuƒo—si nyea Yehowa Ðasefowo ƒe ƒuƒoƒo gãwo ƒe wɔna vevi aɖe ɣesiaɣi—ye wotsɔ wu ŋdi ƒe wɔnawo nui. Dzidzɔ kae nye si wònye be woakpɔ adzɔgbeɖelawo yeyewo be wodze Yesu ƒe afɔɖoƒewo yome xɔ nyɔnyrɔ ɖe tsi me! (Mateo 3:13-17) Amesiwo katã ɖe afɔ sia la wɔ geɖe le Mawu ƒe nya dzi wɔwɔ me xoxo. Gawu la, ne woxɔ nyɔnyrɔ vɔ la, wozua nyanyuia ƒe subɔla siwo woɖo, eye wokpɔa dzidzɔ le enyanya me be wole gome kpɔm le Yehowa ƒe ŋkɔa ŋuti kɔkɔ me.—Lododowo 27:11.

Woɖo aɖaŋu veviwo le nuƒo si nye “Tsitsi Hiã le ‘Vovototo Dede Nyui Kple Vɔ̃ Dome’” me. Nublanuitɔe la, nyui kple vɔ̃ ŋuti dzidzenu siwo le xexeame si la meɖo afi aɖeke kura o. Eyata ehiã be míaɖo ŋu ɖe Yehowa ƒe dzidzenuwo ŋu. (Romatɔwo 12:2) Wode dzi ƒo na amesiame be wòawɔ dɔ sesĩe be Mawu ƒe mɔwo ƒe gɔmesese  vavãtɔ nasu esi eye wòaɖo tsitsi gbɔ. Emegbe etsɔtsɔ de dɔwɔna me awɔe be míana hehe míaƒe sidzedze ŋutetewo be woate ŋu ‘ade vovototo nyui kple vɔ̃ dome.’—Hebritɔwo 5:11-14.

Nuƒo kpui siwo wotu ɖe “Ku Kutri le Gbɔgbɔmemenyenye Tutuɖo Me” dzie kplɔe ɖo. Kristotɔ vavãwo nya vevienyenye si le gbɔgbɔmemenyenye tutuɖo kple eléle ɖe te ŋu. Esia bia kutrikuku vevie—le nuxexlẽ, nusɔsrɔ̃, kple ŋugbledede gome. (Mateo 7:13, 14; Luka 13:24) Gbɔgbɔmemewo léa “gbedodoɖa kple kukuɖeɖewo katã” hã me ɖe asi. (Efesotɔwo 6:18) Míekpɔnɛ dzea sii be míaƒe gbedodoɖawo ɖea míaƒe xɔse ƒe todede kple ɖokuitsɔtsɔna, míaƒe gbɔgbɔmemenyenye, kpakple nusiwo míebuna ‘nu veviwo wu’ la fiana. (Filipitɔwo 1:10) Wote gbe ɖe vevienyenye si le ƒomedodo si me vivisese kple lɔlɔ̃ le, abe esi nɔa vi ɖoto kple fofo nyodɔme dome ene, tutuɖo kple Yehowa dzi. Menye subɔsubɔha aɖe ko mee míele o—togbɔ be esia nye nyateƒe tɔ hã—ke míedi hã be míatu xɔse sẽŋu ɖo ‘abe ɖe míele Mawu kpɔm ene.’—Hebritɔwo 11:6, 27.

Wogayi gbɔgbɔmeŋgɔyiyiwɔwɔ ƒe nya la me dzodzro dzi le nuƒo si nye “Na Wò Ŋgɔgbedede Nadze Ƒã” me. Wotɔ asi nu etɔ̃ siwo me míewɔa ŋgɔyiyi sia le dzi, siwo nye: (1) sidzedze, nugɔmesese, kple nunya dzidziɖedzi, (2) Mawu ƒe gbɔgbɔa ƒe kuwo tsetse, kple (3) míaƒe agbanɔamedziwo tsɔtsɔ le ƒomea me.

Le gbemagbe ƒe nuƒo mamlɛa si nye “Zɔzɔ le Mawu ƒe Nya ƒe Kekeli si Le Kɔkɔm Ðe Edzi Me” ƒe nuwuwu la, edzɔ dzi na takpekpea valawo be woaxɔ agbalẽ yeye si nye Yesaya ƒe Nyagblɔɖi—Enye Kekeli na Ameƒomea Katã I. Esia nye agbalẽ babla eve siwo ɖe Biblia ƒe agbalẽ si nye Yesaya ƒe ta ɖesiaɖe me la ƒe gbãtɔ. Nuƒola la gblɔ be: “Gbedasi aɖe le Yesaya ƒe agbalẽa me na mí egbea.” Eyi edzi be: “Ẽ, eƒe nyagblɔɖi geɖe va eme le Yesaya ƒe ŋkekeawo me. . . . Gake Yesaya ƒe nyagblɔɖi geɖe le eme vam egbea, eye ɖewo ava eme le xexe yeye si ŋugbe Mawu do me.”

Ŋkeke Etɔ̃lia—Mizu Yehowa ƒe Nya Dzi Wɔlawo

Takpekpea ƒe ŋkeke mamlɛa dze egɔme kple ŋkekea ƒe mawunyakpukpuia me dzodzro. Emegbe nuƒo kpui siwo wotu ɖe “Zefanya ƒe Nyagblɔɖi si Ŋu Gɔmesese Le na Amesiwo Wɔa Mawu ƒe Lɔlɔ̃nu” dzi la kplɔe ɖo. Nuƒo kpui etɔ̃ siawo ɖee fia be abe alesi Yehowa wɔ nui le Yuda si dze aglã ƒe ŋkekeawo me ene la, ahe fukpekpe ava amesiwo gbe be yewomaɖo to eƒe nuxlɔ̃ame o la dzi. Le esi wowɔ nuvɔ̃ ɖe Mawu ŋu ta la, woanɔ tsatsam nublanuitɔe abe ŋkunɔwo ene eye womate ŋu akpɔ ɖeɖe o. Gake Kristotɔ vavãwo yia edzi dia Yehowa nuteƒewɔwɔtɔe, eye woakpɔ  wo ta le Mawu ƒe dzikudogbea. Gawu la, woxɔ yayra geɖewo fifia gɔ̃ hã. Mɔnukpɔkpɔ si me dzidzɔ le le wo si be wodoa Biblia ƒe nyateƒea ƒe “gbegbɔgblɔ dzadzɛ” la. (Zefanya 3:9, NW) Nuƒola la gblɔ be: “Gbegbɔgblɔ dzadzɛa gbɔgblɔ mefia be míaxɔ nyateƒea dzi ase ahafiae ame bubuwo ko evɔ o ke ebia hã be míaƒe agbenɔnɔ nasɔ ɖe Mawu ƒe sewo kple gɔmeɖosewo nu.”

Takpekpea valawo nɔ mɔ kpɔm vevie na drama si nye “Nuxlɔ̃ame Kpɔɖeŋuwo na Míaƒe Ŋkekea.” Drama sia si me wodo blemanuwo le ɖe alesi Israel-vi akpe geɖe tsrɔ̃ le Ŋugbedodonyigba la ƒe liƒo dzi le esi woŋlɔ Yehowa be eye nyɔnu trɔ̃subɔlawo ble wo de matrewɔwɔ kple aʋatso tadedeagu me ta la me. Gbã la, amesiwo ŋu wòku ɖo koŋ la dometɔ ɖeka—si nye Yamin—ƒe susu ma ɖe Moab nyɔnuwo ƒe amenubeble kple eƒe Yehowa subɔsubɔ dome. Ame mavɔ̃mawu Zimri ƒe alakpasusu kple ameblesusu va dze nyuie, abe alesi Pinehas ƒe xɔse kple mawusubɔsubɔ hã dzee ene. Woɖe afɔku si li be míate ŋu ava tsaka kple amesiwo melɔ̃a Yehowa o la fia nyuie.

Dramaa dzra nyaselawo ɖo ɖe nuƒo si kplɔe ɖo ŋu, si nye “Migazu Nyasela Siwo Ŋlɔa Nu Be O.” Korintotɔwo I, 10:1-10 me dzodzro tsitotsito ɖee fia be Yehowa doa alesi míeɖoa toe kpɔna tsɔ nyaa alesi míedzee hena xexeme yeyea domenyinyi. Le ame aɖewo gome la, ŋutilãmenudzodzrowo vu tsyɔ gbɔgbɔmetaɖodzinuwo dzi fifia si míele nuɖoanyi yeyea ƒe agbo nu gɔ̃ hã. Wode dzi ƒo na amesiame be wòagana ‘Yehowa ƒe dzudzɔa me yiyi’ ƒe mɔnukpɔkpɔa nage le esi o.—Hebritɔwo 4:1.

Dutoƒonuƒoa ƒe tanyae nye: “Nusita Wòle Be Nàlé Ŋku Ðe Mawu ƒe Dɔ Wɔnukuwo Ŋu.” Yehowa ƒe “dɔ wɔnukuwo” ɖe nunya kple ŋusẽ si le esi ɖe nuwɔwɔ siwo wokpɔna siwo ƒo xlã mí dzi fia. (Hiob 37:14) Biabia aɖewo si Yehowa bia Hiob la su nɛ be wòakpɔ Wɔla ŋusẽkatãtɔ la ƒe ŋusẽ adze sii. Yehowa agawɔ “dɔ wɔnukuwo” na esubɔla wɔnuteƒewo le etsɔme. Nuƒola la wu enu be: “Susu geɖe li si ta wòle be míalé ŋku ɖe Yehowa ƒe nukunuwo ŋu—nusiwo wòwɔ va yi, nusi wɔm wòle le nuwɔwɔ siwo ƒo xlã mí egbea me, kple nusi ŋugbe wòdo be yeawɔ le etsɔme si gbɔna kpuie.”

Le kwasiɖaa ƒe Gbetakpɔxɔ nusɔsrɔ̃nyatia me dzodzro vɔ megbe la, woƒo takpekpea ƒe nuƒo mamlɛa. Nuƒo dedzolãmename si ƒe tanyae nye “De Asixɔxɔ Mawu ƒe Nya Dzi Wɔla Nyenye ƒe Mɔnukpɔkpɔa Ŋu,” te gbe ɖe edzi be bubue wònye na mí be míanye Mawu ƒe nya dzi wɔlawo. (Yakobo 1:22) Woɖo ŋku edzi na nyaselawo be mɔnukpɔkpɔ tɔxɛe wònye le mía si be míanye Mawu ƒe nya dzi wɔlawo, eye zi alesi míele eŋudɔ wɔm didii la, zi nenemae míayi edzi anɔ asixɔxɔ dem eŋui. Wode dzi ƒo na vavalawo katã be woade ŋugble le nutome gã takpekpe sia ƒe ŋusẽdoame si ŋu viɖe le la ŋu le woƒe didi be yewoanye Mawu ƒe nya dzi wɔlawo bliboe me. Mɔ ma ko dzie míate ŋu ato akpɔ dzidzɔ gãtɔ kekeake si ame ate ŋu akpɔ.

[Aɖaka/Nɔnɔmetata si le axa 25]

Àte Ŋu Anye Mawu Xɔlɔ̃!

Le Fiɖagbe ƒe ŋdɔ me la, woɖe agbalẽ gbadza yeye aɖe si ƒe ŋkɔe nye Àte Ŋu Anye Mawu Xɔlɔ̃! ɖe go. Eva hiã vevie be woana Biblia sɔsrɔ̃ nabɔbɔ le xexeame ƒe akpa geɖe, eye woazã agbalẽ gbadza sia atsɔ akpɔ hiahiã ma gbɔe. Anye yayra gã aɖe na amesiwo mede suku yi ŋgɔ o alo menya nuxexlẽ nyuie o.

[Aɖaka/Nɔnɔmetata siwo le axa 26]

Yesaya ƒe Nyagblɔɖi—Enye Kekeli na Ameƒomea Katã

Edzɔ dzi na takpekpea valawo be woaxɔ Yesaya ƒe Nyagblɔɖi—Enye Kekeli na Ameƒomea Katã, si nye agbalẽ babla eve ƒe Babla I. Wote gbe ɖe asixɔxɔ ŋutɔŋutɔ si le Yesaya ƒe nyagblɔɖia ŋu na míaƒe ŋkekea dzi le agbalẽ sia me.