Dedienɔnɔ le Xexe si me Afɔku Bɔ Ðo Me

AFISI woɖi tomebɔmbwo ɖo zɔzɔ ate ŋu awu ame. Gake ne mɔfiagbalẽ si fiaa afisiwo woɖi bɔmb siawo ɖo le asiwò la, ɖe makpe ɖe ŋuwò oa? Gakpe ɖe eŋu la, tsɔe be wona hehe wò be nàte ŋu ade dzesi teƒe vovovo siwo woɖi bɔmb siawo ɖo. Edze ƒã be nusia nyanya akpe ɖe ŋuwò be afɔku si li be nàte ŋu aku alo azu nuwɔametɔ dzi naɖe akpɔtɔ.

Míate ŋu atsɔ Biblia asɔ kple mɔfiagbalẽ ma kpakple dzesidede bɔmb siwo woɖi ɖe tome ŋuti hehexɔxɔ. Nunya si ƒo ɖesiaɖe ta ye le Biblia me míazã le asaƒoƒo na afɔkuwo kple kuxi siwo doa mo ɖa le agbe me gbɔ kpɔkpɔ me.

De dzesi ŋugbedodo dedziƒoname sia si dze le Lododowo 2:10, 11, be: “Ekema nunya age ɖe wò dzi me, eye sidzedze avivi wò luʋɔ nu. Tamebubu akpɔ dziwò, eye gɔmesese adzɔ ŋuwò.” Nunya kple gɔmesese si woyɔ le afisia metso amegbetɔ gbɔ o, ke Mawu gbɔe wòtso. “Ke amesi ɖoa [to mawumenunya] la, anɔ anyi bɔkɔɔ, eye dzɔgbevɔ̃e ƒe ŋɔdzidoname maɖe dzi le eƒo o.” (Lododowo 1:33) Mina míakpɔ alesi Biblia ate ŋu adzi míaƒe dedienɔnɔ ɖe edzi eye wòakpe ɖe mía ŋu míaƒo asa na kuxi geɖewoe ɖa.

Asaƒoƒo na Afɔku Siwo Hea Ku Vɛ

Akɔntabubu siwo Xexeame ƒe Lãmesẽhabɔbɔ ta nyitsɔ laa ɖee fia be amesiwo ku le ƒe ɖeka me le lɔrifɔkuwo me le xexeame katã ƒe xexlẽme ade 1,171,000. Ame bubu siwo gogo miliɔn 40 sɔŋ ye xɔ abi, eye amesiwo wu miliɔn 8 zu nuwɔametɔwo.

Togbɔ be manya wɔ be míaƒo asa na afɔku keŋkeŋ ne míele ʋu kum o hã la, míaƒe dedienɔnɔ dzina ɖe edzi ŋutɔ ne míewɔ ɖe ʋukusewo dzi. Esi Biblia nɔ nu ƒom tso dziɖuɖu siwo dea ʋukusewo hekpɔa egbɔ be woawɔ wo dzi ŋu la, egblɔ be: “Amesiame nabɔbɔ eɖokui na dziɖuɖu, siwo ŋusẽ li na.” (Romatɔwo 13:1) Ʋukula siwo wɔa aɖaŋuɖoɖo sia dzi ɖea afɔkudzedze kple vɔ̃ siwo wòhena vanɛ zi geɖe la dzi kpɔtɔna.

Bubudede agbe ŋu nye ameʋãnu bubu si aʋã ame be wòaku ʋu nyuie. Biblia gblɔ le Yehowa Mawu ŋu be: “Gbɔwò agbedzɔƒe le.” (Psalmo 36:10) Eyata agbe nye Mawu ƒe nunana. Le esia ta míekpɔ mɔ axɔ nunana ma le ame aɖe si alo aɖe bubumademade agbe ŋu afia, le mía ŋutɔwo tɔ hã gome o.—Mose I, 9:5, 6.

Le nyateƒe me la, bubudede amegbetɔ ƒe agbe ŋu ƒe akpa aɖee nye egbɔkpɔkpɔ be míaƒe ʋu kple aƒe le dedie alesi wòanya wɔe. Le blema Israel la, dedienɔnɔ nɔ vevie le agbemenuwɔna ɖesiaɖe me. Le kpɔɖeŋu me, ne  wotu xɔ la, Mawu ƒe Se bia be woatɔ kpɔ ɖe xɔa tame—afisi ƒomea wɔa nu geɖe le. ‘Tɔ kpɔ ɖe wò xɔ tame, bena ame aɖeke magage le edzi, eye nana wò aƒe naɖe hlɔ̃fe o.’ (Mose V, 22:8) Ne le dedienɔnɔse sia dzi mawɔmawɔ ta ame aɖe ge la, Mawu biaa hlɔ̃ aƒeatɔ. Ðikeke mele eme o be lɔlɔ̃ gɔmeɖose si dze le se sia me dzi wɔwɔ aɖe afɔkuwo dzi akpɔtɔ le dɔwɔƒe alo le modzakaɖeɖe gɔ̃ hã me.

Numãme Wuamewo Dzi Ðuɖu

Xexeame ƒe Lãmesẽhabɔbɔ gblɔ be amesiwo wu biliɔn ɖeka ye noa atama le xexeame fifia, eye atamanono ye wua amesiwo ade miliɔn ene ƒe sia ƒe. Wole mɔ kpɔm be xexlẽme sia adzi ɖe edzi aɖo miliɔn 10 le ƒe 20 va ɖo 30 siwo gbɔna me. Atamanola miliɔn bubuwo hekpe ɖe ‘modzakaɖetikewo’ zãlawo ŋu agblẽ nu le woƒe lãmesẽ kple agbenɔnɔ ƒe nyonyome ŋu le woƒe numãme zuzu na wo ta.

Togbɔ be Mawu ƒe Nya meyɔ atamanono kple atikevɔ̃ɖizazã tẽ o hã la, eƒe gɔmeɖosewo ate ŋu akpɔ mía ta tso nusiawo zazã me. Le kpɔɖeŋu me, Korintotɔwo II, 7:1 xlɔ̃ nu mí be: “Mina míakɔ mía ɖokui ŋuti tso ŋutilã kple gbɔgbɔ ƒe ɖiƒoƒo sia ɖiƒoƒo me.” Ðikeke aɖeke mele eme o be aɖinu gblẽnuleameŋu geɖe le atama kple atikevɔ̃ɖi bubuwo me siwo ƒoa ɖi ŋutilã la alo gblẽa edome. Gakpe ɖe eŋu la, Mawu di be míaƒe ŋutilã nanɔ ‘kɔkɔe,’ si fia be wòanɔ dzadzɛ ɖimaƒomaƒoe. (Romatɔwo 12:1) Ðe mèlɔ̃ ɖe edzi be gɔmeɖose siawo dzi wɔwɔ aɖe afɔku aɖe si ate ŋu adzɔ ɖe ame dzi la dzi akpɔtɔ oa?

Asiɖeɖe le Nuwɔna Siwo me Afɔku le Ŋu

Ame geɖe meda sɔ le nuɖuɖu kple ahanono me o. Nutsuɖuɖu me tsonuwo dometɔ aɖewo ate ŋu anye suklidɔ, kansa, kple dzidɔ. Ahamumu ate ŋu ahe kuxi bubuwo, abe ahatsunono, aklãlialiadɔ, ƒome ƒe gbagbã, kple lɔrifɔkuwo ene vɛ. Nugbɔmewɔwɔ bubu si nye nutsuɖuɖu ate ŋu agblẽ nu le ame ŋu eye wòaʋu mɔ na numaɖumaɖudɔ siwo dea ame ƒe agbe afɔku me.

Togbɔ be Biblia menye atikewɔgbalẽ o hã la, ena nuxlɔ̃ame si le tẽ ku ɖe nu ɖuɖu kple nu nono le nunya me ŋu. “Vinye, see, eye nadze nunya, eye naɖo wò dzi mɔ dzɔdzɔe dzi. Meganɔ weintsunolawo kple lãtsuɖulawo dome o. Elabena ahatsunola kple nutsuɖula ɖe wodaa ahe.” (Lododowo 23:19-21) Ke hã Biblia gblɔ be ɖe wòle be nuɖuɖu kple nunono nado dzidzɔ na ame. ‘Amesiame naɖu nu ano nu, eye wòanyo nɛ le eƒe agbagbadzedzewo katã me. Mawu ƒe nunanae.’—Nyagblɔla 3:13.

Biblia de dzi ƒo be míada asɔ le kamedede hã me, esi wòɖo kpe edzi be “[kamedede] nyo na nu vi aɖe ko.” Gake egblɔ kpee be: “Mawusosroɖa nyo na nusianu, eye agbe, si li fifi kple esi le vava ge la, ƒe ŋugbedodo la li nɛ.” (Timoteo I, 4:8) Àbia be, ‘aleke mawusosroɖa aɖe vii fifia gɔ̃ hã?’ Le mɔ geɖe nu. Hekpe ɖe gbɔgbɔmeme si mawusosroɖa naa ame zuna ŋu la, enaa nɔnɔme nyuiwo, siwo ƒe ɖee nye lɔlɔ̃, dzidzɔ, ŋutifafa, kple ɖokuidziɖuɖu—siwo katã nana be ame kpɔa mɔ na nu nyuiwo eye wodea lãmesẽ dzi—sua ame si.—Galatiatɔwo 5:22, 23.

Agbegbegblẽnɔnɔ Me Tsonu Vɔ̃wo

Ame miliɔn geɖe ɖe asi le agbenyuinɔnɔsewo katã ŋu egbea. AIDS dɔvɔ̃ae nye emetsonuawo dometɔ ɖeka. Xexeame ƒe Lãmesẽhabɔbɔ gblɔ be tso ɣeyiɣi si me AIDS dɔvɔ̃a to la, amesiwo wu miliɔn 16 ku, eye fifia la, amesiwo ade miliɔn 34 ye xɔ HIV, si nye dɔlékui si hea AIDS vɛ. AIDS dɔa léla geɖe xɔe tso gbɔdɔdɔ ƒe agbegbegblẽnɔnɔ, abui si atikevɔ̃ɖizãlawo zã la zazã, alo ʋudodo me.

Agbemadzegadzinɔnɔ me tsonu bubuwoe nye dɔléle si nye ʋãƒoame, babadɔ, aklãdɔwo, kple agbadzà xɔxɔ. Togbɔ be womezã atikewɔwɔ me ŋkɔ siawo le Biblia ƒe ɣeyiyiwo me o  hã la, wonya nu tso ŋutilã ƒe akpa siwo nulɔdɔ aɖewo léna ŋu ɣemaɣi. Le kpɔɖeŋu me, Lododowo 7:23 ɖɔ matrewɔwɔ me tsonu dziŋɔ la be enye ‘aŋutrɔ si ƒona ɖe ame ƒe aklã.’ Zi geɖe la, agbadzà dzea aklã la dzi abe aklãdɔléle ke ene. Ẽ, aleke gbegbe Biblia ƒe nuxlɔ̃ame be Kristotɔwo ‘natsri ʋu kple matrewɔwɔ’ sɔ ɖe ɣeyiɣia nu eye lɔlɔ̃ le emee nye si!—Dɔwɔwɔwo 15:28, 29.

Galɔlɔ̃ ƒe Mɔ̃ La

Esi ame geɖe le didim be yewoazu kesinɔtɔwo kaba ta la, wodea ga dɔ siwo wɔwɔ me afɔku gãwo le me. Nublanuitɔe la, gadede dɔwɔna mawo siwo ŋu nya ku ɖo me naa amewo ɖua agba alo gblẽa woƒe ga dome zi geɖe. Gake Biblia gblɔ na mawusubɔla be: “Nedze agbagba, ne wòatsɔ eƒe asiwo awɔ dɔ [sesẽ], bene wòakpɔ nane aɖana hiãtɔwo.” (Efesotɔwo 4:28) Enye nyateƒe be menye ɣesiaɣie dɔsesẽwɔla ate ŋu ava zu kesinɔtɔ o. Gake eƒe susu dzea akɔ anyi, bubu nɔa eŋu, eye ɖewohĩ ga gɔ̃ hã ate ŋu anɔ esi wòadzɔ woatsɔ awɔ dɔ nyui aɖee.

Biblia xlɔ̃ nu be: “Amesiwo dina be, yewoazu kesinɔtɔwo la, gena ɖe tetekpɔwo kple mɔ̃tetrewo kpakple movidzɔdzɔ kple nuveviwɔame ƒe nudzodzro geɖe, siwo tsɔa amewo xlãna ɖe gbegblẽ kple tsɔtsrɔ̃ me la me. Elabena nuvɔ̃wo katã ƒe ke enye galɔlɔ̃, si yome mɔ ame aɖewo di, eye . . . wotsɔ nuxaxa geɖe ŋɔ wo ɖokui flofloflo.” (Timoteo I, 6:9, 10) Míegbe be “amesiwo dina be, yewoazu kesinɔtɔwo” dometɔ geɖe zua kesinɔtɔwo o. Gake nukawo  mee wotona? Ðe medzɔna be wotsɔa woƒe lãmesẽ, ƒome, gbɔgbɔmemenyenye, kple alɔ̃dɔdɔ gɔ̃ hã saa vɔe oa?—Nyagblɔla 5:12.

Nunyala dea dzesii be “ame ƒe agbe menɔa eƒe nukpɔkpɔ vivivo la me o.” (Luka 12:15) Ga kple nunɔamesi aɖewo hiã vevie le nuto akpa gãtɔ me. Le nyateƒe me la, Biblia gblɔ be ‘ga doa vɔvɔli,’ gake egblɔ kpee be ‘viɖe si le nunya ŋue nye be eléa amesiwo si wòle la ƒe agbe ɖe te.’ (Nyagblɔla 7:12) Sidzedze kple nunya vavãtɔ ate ŋu akpe ɖe mía ŋu le nɔnɔmewo katã me, gake vevietɔ le nya siwo lɔ míaƒe agbe ɖe eme me, si ga mate ŋu awɔ o.—Lododowo 4:5-9.

Ɣeyiɣi si me Nunya Ðeɖeko Akpɔ Mía Ta

Eteƒe madidi o, nunya vavãtɔ ‘alé amesiwo si wòle ƒe agbe ɖe te’ le mɔ gã aɖe—si nye ametakpɔkpɔ ato “xaxa gã” si le aƒe tum kabakaba me, esime Mawu atsrɔ̃ ame vɔ̃ɖiwo—nu. (Mateo 24:21) Biblia gblɔ be ɣemaɣi la, amewo atsɔ woƒe gawo anɔ gbe ƒum ɖe mɔdodowo dzi abe ‘ŋunyɔnu’ ene. Nukatae? Elabena woava nya to nudzɔdzɔ dziŋɔwo me azɔ be yewomate ŋu atsɔ sika kple klosalo aƒle agbee le “Yehowa ƒe dzikudogbe” la dzi o. (Xezekiel 7:19) Gake “ameha gã” aɖe, siwo ‘dzra nu nyuiwo ɖo na wo ɖokui le dziƒo’ nunyatɔe to gbɔgbɔmenuwo tsɔtsɔ ɖo nɔƒe gbãtɔ le woƒe agbe me me la akpɔ viɖe tso woƒe kesinɔnu siwo wodzra ɖo dedie la me eye woakpɔ agbe mavɔ le paradisonyigba dzi.—Nyaɖeɖefia 7:9, 14; 21:3, 4; Mateo 6:19, 20.

Aleke míawɔ etsɔme sia si ŋu kakaɖedzi le nasu mía si? Yesu ɖo eŋu be: “Esiae nye agbe mavɔ la bena, woanya wò, Mawu vavã ɖeka la, kple Yesu Kristo, si nèdɔ ɖa la.” (Yohanes 17:3) Ame miliɔn geɖe ke ɖe nunya sia ŋu le Mawu ƒe Nya, Biblia, me. Menye etsɔmemɔkpɔkpɔ dodzidzɔname koe le amesiawo si o, ke ŋutifafa kple dedienɔnɔ aɖe ƒomevi hã le wo si fifia. Ele ko abe alesi hakpala la gblɔe ene be: “Mamlɔ anyi le ŋutifafa me adɔ alɔ̃ enumake; elabena wò Yehowa ɖeɖeko ana manɔ dedie.”—Psalmo 4:9.

Èsusu be nyatakakatsoƒe bubu aɖe gali si ate ŋu akpe ɖe ŋuwò nàɖe nusiwo ate ŋu ade wò lãmesẽ kple agbe afɔku me dzi akpɔtɔ tsɔ wu Biblia? Ŋusẽ si le Biblia si mele agbalẽ bubu aɖeke si o, eye agbalẽ bubu aɖeke mate ŋu akpe ɖe ŋuwò nànɔ dedie ŋutɔŋutɔ le egbexexe si me afɔku bɔ ɖo me o. Nukatae màku eme ayi ŋgɔe o?

[Aɖaka/Nɔnɔmetata si le axa 6]

Lãmesẽ Kple Dedienɔnɔ si Nyo Wu—To Biblia ƒe Kpekpeɖeŋu Me

Esi ɖetugbi aɖe si ŋkɔe nye Jane * di be yeasi le agbemekuxiwo nu la, ezãa atikevɔ̃ɖi siwo nye marijuana, atama, cocaine, amphetamines, LSD kple atike bubuwo. Enoa aha hã ŋutɔ. Jane gblɔ be ye srɔ̃ŋutsu hã nɔ nɔnɔme ma ke me. Etsɔme nyui aɖeke menɔ wo si o. Jane va do go Yehowa Ðasefowo. Ete Kristotɔwo ƒe kpekpewo dede hedze Gbetakpɔxɔ kple eƒe kpeɖeŋutɔ Nyɔ! magazineawo xexlẽ gɔme, eye wòtsɔa wo na srɔ̃a hã wòxlẽna. Ðasefoawo te Biblia sɔsrɔ̃ kpli wo ame evea siaa. Esi wotu ŋudzedzekpɔkpɔ ɖe Yehowa ƒe dzidzenu kɔkɔawo ŋu ɖo ta la, wodzudzɔ atikevɔ̃ɖi ɖesiaɖe zazã. Nukae do tso eme? Jane ŋlɔ le ƒe aɖewo megbe be: “Dzidzɔ geɖe ŋutɔ do tso agbe yeye si nɔm míele fifia me na mí. Meda akpe na Yehowa ale gbegbe ɖe eƒe Nya ƒe ŋusẽ si naa ame ŋuti kɔna kple ɖe agbe nyui si nɔm míele fifia eye míevo tso atikevɔ̃ɖiwo si me la ta.”

Asixɔxɔ si le dɔwɔvi ɖianukware nyenye ŋu dze le Kurt, amesi ƒe dɔ enye kɔmpiutadɔwɔnuwo dzi kpɔkpɔ, ƒe nya me. Wohiã dɔwɔnu yeyewo, eye Kurt ƒe dɔtɔ dee esime be wòadi wo aƒle le asi bɔbɔe dzi. Kurt ke ɖe adzɔha aɖe si sɔ nɛ la ŋu, eye wolɔ̃ ɖe asi aɖe dzi. Gake adzɔhaa ƒe gadzikpɔla wɔ vodada le nuawo ƒe asi dede agbalẽ me me, ale be ga home si wòŋlɔ ɖe agbalẽ me la ɖiɖi anɔ (U.S.) dɔlar 40,000. Esi Kurt kpɔ vodadaa la, egblɔe na adzɔha la, eye adzɔhaa dzi kpɔla gblɔ be yele dɔ sia wɔm ƒe 25 sɔŋ enye sia gake yemekpɔ anukwareɖiɖi sia tɔgbe kpɔ o. Kurt ɖe nu me be Bibliae trɔ asi le yeƒe dzitsinya ŋu. Emetsonue nye be dɔdzikpɔlaa bia be wòatsɔ Nyɔ! ƒe tata si ƒo nu tso anukwareɖiɖi le dɔme ŋu ɖekaɖeka 300 vɛ na ye ne yeama na yeƒe dɔwɔhati bubuwo. Ke Kurt ƒe anukwareɖiɖi na wodoe ɖe ŋgɔ le dɔme.

[Etenuŋɔŋlɔ]

[Nɔnɔmetata si le axa 7]

“Nye Yehowa, wò Mawu, enye amesi fia nusi nyo na wò la wò.”—YESAYA 48:17