Ƒukukua ƒe Agbalẽxatsaxatsawo—Nukata Wòle Be Nàtsɔ Ðe Le Wo Me?

Hafi woake ɖe Ƒukukua ƒe Agbalẽxatsaxatsawo ŋu la, Hebri Ŋɔŋlɔawo ƒe asinuŋɔŋlɔgbalẽ xoxotɔ kekeake siwo nɔ anyi ye nye ƒe alafa asiekelia kple ewolia M.Ŋ. me tɔwo. Ðe woate ŋu aka ɖe asinuŋɔŋlɔgbalẽ siawo dzi le nyateƒe me be wonye Mawu ƒe Nya la ƒe nuŋlɔɖi siwo de pɛpɛpɛ si va ka mía si, le esi wowu Hebri Ŋɔŋlɔawo ŋɔŋlɔ nu ƒe akpe ɖeka kple edzivɔ do ŋgɔa? Nufialagã Julio Trebolle Barrera, si nye dukɔwo dome dɔwɔha si toa Ƒukukua ƒe Agbalẽxatsaxatsawo me me tɔ, gblɔ be: “Yesaya ƒe Agbalẽxatsaxatsa [si wokpɔ le Qumran] la nye kpeɖodzi si ŋu womate ŋu ake ɖi le o be Yudatɔ nugbugbɔgaŋlɔlawo tsɔ ŋuɖɔɖɔɖo kple beléle gã aɖe ŋlɔ Biblia me nuŋlɔɖi si va ka mía si le ɣeyiɣi didi si wu ƒe akpe ɖeka megbe lae.”

YESAYA ƒe agbalẽ bliboa le agbalẽxatsaxatsa si ƒe nya gblɔm Barrera le la me. Va ɖo egbea la, le Biblia ƒe asinuŋɔŋlɔgbalẽ siwo wu 200 siwo ŋu woke ɖo le Qumram dome la, wokpɔ Hebri Ŋɔŋlɔawo ƒe agbalẽawo dometɔ ɖesiaɖe ƒe akpa aɖewo negbe Ester ƒe agbalẽa koe mele eme o. Wo dometɔ akpa gãtɔ menye agbalẽ blibowo abe Yesaya ƒe Agbalẽxatsaxatsaa ene o, ke woƒe kakɛ siwo mede agbalẽawo ƒe akpa ewolia o ŋu koe woke ɖo. Biblia-gbalẽ siwo ŋu woke ɖo le agbɔsɔsɔme wu le Qumran ye nye Psalmowo (ɖekaɖeka 36), Mose V lia (ɖekaɖeka 29), kple Yesaya (ɖekaɖeka 21). Agbalẽ siawo hã mee woyɔa nya tsonɛ edziedzi wu le Kristotɔwo ƒe Hela Ŋɔŋlɔawo me.

Togbɔ be agbalẽxatsaxatsaawo ɖee fia be tɔtrɔ boo aɖeke meva le Biblia me o hã la, wogaɖee fia hã be vaseɖe afi aɖe la, Hebrigbe me Biblia gɔmeɖeɖe vovovowo nɔ anyi siwo Yudatɔwo zã le Gbedoxɔ Evelia ƒe ɣeyiɣia me, eye be tɔtrɔ suesue vovovo nɔ ɖesiaɖe me. Menye agbalẽxatsaxatsaawo me nyawo ŋɔŋlɔ kple nyagbewo katãe sɔ kple Masoretwo ƒe nuŋlɔɖia o. Wo dometɔ aɖewo de sɔsɔ ge kple Helagbe me Septuagint Biblia tɔwo wu. Do ŋgɔ la, agbalẽnyalawo bui be ɖewohĩ vovototo siwo dze le Septuagint Biblia me atso vodada wɔwɔ gbɔ alo be ɖe gbegɔmeɖelawo ɖoe koŋ kpa nyawo de eme. Fifia agbalẽxatsaxatsaawo ɖee fia be nyaawo ƒe ɖekamawɔmawɔ siawo dometɔ geɖe tso vovototo siwo le Hebrigbe me nuŋlɔɖia me koŋ gbɔ. Ðewohĩ esia tae Hebri Ŋɔŋlɔawo me mawunyakpukpui siwo Kristotɔ gbãtɔwo yɔ me nyagbɔgblɔwo to vovo na Masoretwo ƒe nuŋlɔɖia.—Mose II, 1:5; Dɔwɔwɔwo 7:14.

Eyata Biblia ƒe agbalẽxatsaxatsawo kple agbalẽ kakɛwo ƒe kesinɔnu gbogbo sia si ŋu woke ɖo la na mí gɔmeɖoanyi nyui ŋutɔ aɖe le Hebrigbe me Biblia si va ka mía si la sɔsrɔ̃ me. Ƒukukua ƒe Agbalẽxatsaxatsawo na alesi gbegbe Septuagint Biblia kple Samariatɔwo ƒe Mose ƒe Agbalẽ Atɔ̃awo le vevie le nuŋlɔɖiwo tsɔtsɔ sɔ kple wo nɔewo me gadze kɔte. Woganye dɔwɔnu vevi bubu hã na Biblia gɔmeɖelawo si woate ŋu azã agbugbɔ ŋku alé ɖe nya siwo wotrɔ le Masoretwo ƒe nuŋlɔɖia me ŋu. Le teƒe geɖe la, Xexeme Yeye Biblia Gɔmeɖekɔmiti la nɔ te ɖe wo dzi tso nya me le Yehowa ƒe ŋkɔ gbugbɔgaɖo teƒe siwo woɖee ɖa le le Masoretwo ƒe nuŋlɔɖia me gome.

Agbalẽxatsaxatsa siwo ƒo nu tso Qumran-kɔmamaa ƒe sewo kple dzixɔsewo ŋu ɖee fia kɔte be  menye Yudasubɔsubɔ ƒomevi ɖeka koe nɔ anyi le Yesu ƒe ɣeyiɣia me o. Qumran-kɔmamaa ƒe kɔnyinyiwo to vovo na Farisitɔwo kple Zadukitɔwo tɔ. Ðewohĩ vovototo siawoe na kɔmama ma ɖe wo ɖokui ɖe aga va nɔ gbedadaƒo. Wobui vodadatɔe be Yesaya 40:3 me nya siwo ku ɖe gbe aɖe si ɖi le gbedadaƒo be woata mɔ dzɔdzɔe na Yehowa ŋu la va eme ɖe yewo dzi. Agbalẽxatsaxatsa kakɛ geɖe ƒo nu tso Mesia la ŋu, amesi ƒe vava wo ŋlɔlawo bu be egogo. Esia ɖe dzesi elabena Luka ƒe nuŋlɔɖia gblɔ be “dukɔ la le mɔkpɔkpɔ me” na Mesia ƒe vava.—Luka 3:15.

Ƒukukua ƒe Agbalẽxatsaxatsaawo kpe ɖe mía ŋu míese alesi Yudatɔwo nɔa agbee le Yesu ƒe gbeƒãɖeɖedɔa wɔɣi la gɔme vaseɖe afi aɖe. Nyatakaka siwo woate ŋu atsɔ asɔ kple wo nɔewo le blema Hebrigbe me nuŋlɔɖiwo kple Biblia ƒe kpukpuiwo sɔsrɔ̃ me le wo me. Gake ehiã be woagalé ŋku ɖe Ƒukukua ƒe Agbalẽxatsaxatsawo me nuŋlɔɖiwo ŋu tsitotsito wu. Eyata ɖewohĩ woagava ke ɖe gɔmesese yeyewo ŋu. Ẽ, tomenukuku sia si ɖe dzesi wu si ŋu woke ɖo le ƒe alafa 20 lia me kpɔtɔ le agbalẽnyalawo kple Biblia-srɔ̃lawo siaa ƒe ɖetsɔleme nyɔm esi míele zɔ ɖem yi ŋgɔ le ƒe alafa 21 lia me.

[Nɔnɔmetata Tsoƒe si le axa 7]

Qumran tomenukukuwo: Pictorial Archive (Near Eastern History) Est.; asinuŋɔŋlɔgbalẽ: Courtesy of Shrine of the Book, Israel Museum, Jerusalem