Amesiwo Dze la Didi le Kenya

KENYA nye dukɔ aɖe si dzi dzɔdzɔme de eye wòdze ani ale gbegbe. Ave damawo, gbadzaƒe kekewo, dzogbenyigba siwo dzi xɔ dzo vevie, kple to siwo dzi sno tsyɔ ye ɖo atsyɔ̃ na anyigba nyui sia. Avugbɔe miliɔn ɖeka kple edzivɔ kple gbenyi siwo le vɔvɔm la le afima. Àte ŋu akpɔ sɔvedawo hã woanɔ zɔzɔm to gbewo me le ha gã aɖe me.

Xewo hã bɔ, tso hɔ̃ sẽŋu siwo le agba sam dzi, va ɖo xe dzeani akpe geɖe siwo tsɔ woƒe xɔxlɔ̃ viviwo yɔ yamee la dzi. Eye amekae makpɔ atiglinyiwo kple dzatawo o? Màŋlɔ nusiwo nàkpɔ kple gbeɖiɖi siwo nàse le Kenya la be akpɔ o.

Gake gbe bubu aɖe gali wosena le dukɔ dzeani sia katã me. Enye ame akpe geɖe siwo le mɔkpɔkpɔgbedasi aɖe gblɔm la ƒe gbe. (Yesaya 52:7) Amesiwo tso to kple gbegbɔgblɔ siwo wu 40 me lae le gbe sia dom. Le gɔmesese sia nu la, Kenya nye dukɔ si dzeani le gbɔgbɔme gome hã.

Kenyatɔ akpa gãtɔ tsɔ ɖe le mawusubɔsubɔ me eye wolɔ̃na faa be yewoadzro gbɔgbɔmenuwo me. Togbɔ be ele alea hã la, amewo kpɔkpɔ aƒo nu na wo mele bɔbɔe o, elabena Kenya le tɔtrɔ aɖe me tom, abe alesi wòle dzɔdzɔm le dukɔ bubu geɖe hã mee ene.

Ganyawo ƒe sesẽ zi ame geɖe dzi be woatrɔ asi le alesi wonɔa agbee tsã ŋu. Nyɔnuwo, amesiwo aƒeme koe wowɔa dɔ le tsã la va le ɔfis dɔwɔlawo zum fifia alo le atikutsetse, detsiƒonuwo, tɔmelã, kple kusiwo dzram le mɔdodowo dzi. Ŋutsuwo wɔa dɔ ɖeɖiteameŋutɔe gaƒoƒo geɖe be yewoate ŋu akpɔ yewoƒe ƒomewo ƒe nuhiahiãwo gbɔ. Ðeviwo gɔ̃ hã lɔa azi tɔtɔe siwo wobla ɖe nu me kple koklozi ɖaɖawo ɖe woƒe asi suewo me nɔa dzadzram le mɔdodowo dzi. Ewɔe be ame ʋɛ aɖewo koe nɔa aƒeme le ŋkeke me. Nɔnɔme sia wɔe be wòva hiã be Fiaɖuƒenyanyui gbeƒãɖelawo nawɔ asitɔtrɔwo.

Woɖo aɖaŋu na Yehowa Ðasefowo ƒe hamewo be woatrɔ susu ɖe amesiwo mele woƒe aƒewo me o, hele woƒe gbesiagbedɔwɔnawo wɔm la ŋu wu, hekpe ɖe xɔlɔ̃wo, ƒometɔwo, asitsalawo, kple dɔwɔhatiwo ŋu. Eye nɔviawo wɔ ɖe aɖaŋuɖoɖoa dzi, eye wole nu ƒom na amewo le afisiafi si woakpɔ wo le ko. (Mateo10:11) Ðe agbagba si wodze be woadi amewo le teƒe bubuwo la ɖe via? Ẽ, eɖe vi! Bu kpɔɖeŋu aɖewo ŋu kpɔ.

 Ƒometɔwo—Mía Havi Siwo Te Ðe Mía Ŋu Wu

Amesiwo ade miliɔn etɔ̃ ye le Kenya ƒe fiadu, Nairobi, me. Asrafomegã aɖe si xɔ dzudzɔ le dɔme la le dua ƒe ɣedzeƒe gome, amesi melɔ̃ Yehowa Ðasefowo ƒe nya kura o hena ɣeyiɣi didi aɖe, togbɔ be ewɔ nuku nɛ be ye ŋutɔ ye vi ŋutsu nye Ðasefo hã. Le February aɖe me la, asrafomegã si xɔ dzudzɔ le dɔme la zɔ mɔ kilometa 160 yi viaŋutsua ƒeme le Rift Valley du si nye Nakuru me. Le sasrãkpɔa me la, viaŋutsua na nunana aɖee—eyae nye agbalẽ si nye Sidzedze si Kplɔa Ame Yia Agbe Mavɔ Me. * Fofoa xɔe eye wòdzo.

Esi asrafomegã xoxoa gbɔ va ɖo aƒe la, etsɔ agbalẽa na srɔ̃a, amesi dze exexlẽ gɔme, evɔ menya be Yehowa Ðasefowoe tae o. Ʋɛʋɛʋɛ la, Biblia ƒe nyateƒea te dɔwɔwɔ ɖe eƒe dzi dzi, eye wòka nyaa ta na srɔ̃aŋutsu. Esi eya hã di be yeanya nusi le eme ta la, ete agbalẽa xexlẽ. Esi wova nya agbalẽa tala la, woƒo nya ta be womegblɔ nyateƒea na yewo tso Yehowa Ðasefowo ŋu o. Wodi Ðasefo siwo le wo gbɔ yome mɔ, eye wodze Biblia sɔsrɔ̃ gɔme kpli wo. Esi woawo ŋutɔ nɔ agbalẽa xlẽm la, wokpɔe dze sii be menyo be Kristotɔ nazã atama alo adzrae o. (Mateo 22:39; Korintotɔwo II, 7:1) Womehe ɖe megbe kura o, wogblẽ sigaret siwo katã nɔ woƒe fiase me la dome. Le ɣleti geɖe megbe la, wodze va zu gbeƒãɖela maxɔnyɔnyrɔwo, eye eteƒe medidi o woxɔ nyɔnyrɔ le nutome gã takpekpe aɖe me.

Kesinɔnu aɖe Do tso Gbeɖuɖɔ Me

Kɔƒedu xoxo aɖewo siwo le lolom ɖe edzi le fiadua ƒe akpa aɖewo siwo me ame akpe alafa geɖe le. Le afisiawo la, àkpɔ aƒe gbogbo aɖewo siwo wotu kple anyi, ati, ganu gbagbawo, alo zingliwo. Ne dɔ megabɔ ɖe dɔwɔƒewo kple adzɔnuwɔƒewo o la, amewo ŋutɔ toa dɔ aɖewo vɛ nɔa wɔwɔm. Jua kali (si fia “ŋdɔkutsu helĩhelĩ” le Swahiligbe me) dɔwɔlawo nɔa ŋdɔ nu nɔa dɔ wɔm, wotsɔa lɔritaya xoxowo wɔa atokotawo alo tsɔa ganugoe xoxowo wɔa tɔkpoɖogoewoe. Ame aɖewo hã nɔa tsatsam le aɖukpowo dzi kple gbeɖuɖɔgowo me nɔa pepa, ganugoe, kple atukpawo fɔm be woatrɔ asi le wo ŋu hena zazã ake.

Ðe kesinɔnu aɖe ate ŋu anɔ gbeɖuɖɔ mea? Ẽ! Nɔviŋutsu aɖe gblɔ be: “Ŋutsu sesẽ, ƒoɖi, si ŋu awuwo vuvu le eye wòlé aŋekotoku gã aɖe si me yɔ fũ kple nyadzɔdzɔgbalẽ kple magazine xoxowo zɔ va afisi míaƒe Takpexɔ le. Esi wògblɔ nam be yeƒe ŋkɔe nye William vɔ la, ebia be: ‘Gbetakpɔxɔ ƒe tata yeyewo le asiwòa?’ Dzidzi ƒom mebu tame be anye nuka dim wòle hã. Esi metsɔ magazine vovovo atɔ̃ fiae la, elé ŋku ɖe wo ŋu ɖekaɖeka hegblɔ be: ‘Maxɔ wo katã.’ Ewɔ nuku nam eye megbugbɔ yi xɔme ɖatsɔ agbalẽ si nye Ate Ŋu Anɔ Agbe Tegbee le Paradiso me le Anyigba Dzi * vɛ. Metsɔ Paradiso ƒe nɔnɔmetata fiae heɖe nu me nɛ be míesrɔ̃a Biblia kple amewo femaxee. Emegbe medoe ɖe egbɔ be: ‘William, nukata màva etsɔ míadze nusɔsrɔ̃ gɔme o?’ Ewɔ ɖe edzi pɛpɛpɛ!

“Eva eƒe kpekpe gbãtɔ le Kwasiɖagbe aɖe. Nyee nɔ dutoƒonuƒoa ƒom gbemagbe. Esi William zɔ ge ɖe xɔa me la, elé ŋku ɖe nyaselawo ŋu enumake, kpɔm le nuƒolanɔƒea, eye wòɖe abla do le akpataa me. Emegbe mebiae nusita wòwɔ nu nenema. Etsɔ ŋukpe ɖo eŋui be: ‘Ameawo  le dzadzɛ akpa. Ewɔe be nyemevo le ɖokuinye me o.’

“Esi William nɔ ŋgɔ yim le nua sɔsrɔ̃ me la, Biblia ƒe nyateƒea te eƒe agbenɔnɔ tɔtrɔ. Ele tsi, ko ta, do awu siwo ŋu kɔ hele dzadzɛ, eye eteƒe medidi o wòte kpekpeawo dede edziedzi. Esi woɖe agbalẽ si nye Sidzedze si Kplɔa Ame Yia Agbe Mavɔ Me ɖe go la, míedze esɔsrɔ̃ gɔme. Ewɔ dɔdasi eve va yi xoxo le Teokrasi Subɔsubɔ Sukua me eye wòzu gbeƒãɖela maxɔnyɔnyrɔ. Edzɔ dzi nam be maxɔe wòazu nye gbɔgbɔme nɔviŋutsu esi wòxɔ nyɔnyrɔ le ŋkeke ɖeka takpekpe tɔxɛa me.”

Afikae William kpɔ Gbetakpɔxɔ magazinea ƒe vevienyenye le zi gbãtɔ? “Mekpɔ tata aɖewo le pepa xoxowo dome le gbeɖuɖɔ me.” Ẽ, efɔ kesinɔnu le mɔ wɔmoya ma nu!

Ðaseɖiɖi le Dɔwɔƒe

Ðe míenɔa klalo ɣesiaɣi ɖe vomeɖaseɖiɖi ŋu le míaƒe dɔwɔƒe ne mɔnukpɔkpɔa ʋu ɖia? James, si nye hamemegã le Nairobi hame aɖe me xɔ Biblia me nyateƒea to mɔ ma nu. Esia na be mefena kple mɔnu sia zazã le ɖaseɖiɖi na amewo me kura o. Le kpɔɖeŋu me, ɣeaɖeɣi la, James kpɔ eƒe dɔwɔhati aɖe wòde akɔtagbalẽvi aɖe si dzi woŋlɔ ɖo be “Yesu Ðea Ame” tsɔ va dɔwɔƒee. Le nyanyuigblɔla Filipo sɔsrɔ̃ me la, James bia dɔwɔhatia be: “Èse nusi nya mawo fia tututu gɔmea?” (Dɔwɔwɔwo 8:30) Biabia ma ʋu mɔ na numedzodzro nyui aɖe. Wodze Biblia-nusɔsrɔ̃ gɔme, eye emegbe ŋutsua va xɔ nyɔnyrɔ. Ðe ame bubuwo hã ɖo to James to mɔ sia nua? Mina wòaɖe eme:

“Adzɔha ɖeka mee mía kple Tom míenɔ dɔ wɔm le. Zi geɖe la, míeɖoa míaƒe dɔmeʋu ɖekae. Gbeɖeka ŋdi la, edzɔ be mía kplii míenɔ teƒe ɖeka. Menɔ míaƒe agbalẽwo dometɔ ɖeka xlẽm, eye melée ɖe asi le mɔ si nu Tom ate ŋu akpɔ edzi le. Abe alesi menɔ mɔ kpɔmee ene la, agbalẽa do dzidzɔ nɛ, eye meɣe tɔnyea nɛ kple dzidzɔ. Nusi wòxlẽ la wɔ dɔ ɖe edzi ale gbegbe eye wòlɔ̃ be woawɔ Biblia-nusɔsrɔ̃ kpli ye. Woa kple srɔ̃a wonye Yehowa subɔla xɔnyɔnyrɔwo fifia.”

James yi edzi be: “Dzeɖoɖo dodzidzɔnamewo yia edzi edziedzi le ŋdɔnuɖuɣi le míaƒe dɔwɔƒe. Ɣemaɣie medo go Ephraim kple Walter le ŋkeke vovovowo dzi. Wo ame evea siaa nya be Ðasefoe menye. Ephraim di be yease nusita wotiaa Yehowa Ðasefowo yome vevie ɣesiaɣi la gɔme. Biabiawo nɔ Walter si ku ɖe vovototo si le Ðasefowo kple subɔsubɔha bubuwo dome ŋu. Ŋuɖoɖo si mena wo tso Ŋɔŋlɔawo me dze wo kple evea siaa ŋu eye wolɔ̃ be yewoasrɔ̃ nu. Ephraim wɔ ŋgɔyiyi kabakaba. Le ɣeyiɣi aɖe megbe la, woa kple srɔ̃a siaa tsɔ woƒe agbe ɖe adzɔgbee na Yehowa. Enye hamemegã fifia, eye srɔ̃a nye gbesiagbe mɔɖela. Gake Walter ya do go tsitretsiɖeŋu si nu sẽ ale gbegbe be ɖeko wòɖe asi le eƒe nusrɔ̃gbalẽa ŋu. Gake esi nyemedzudzɔ egbɔ yiyi o ta la, egadze nua sɔsrɔ̃ gɔme. Mɔnukpɔkpɔ su eya hã si wònye hamemegã fifia.” Le wo katã me la, ame 11 va zu nyateƒe Kristotɔwo le mɔnukpɔkpɔ siwo ŋudɔ James wɔ tsɔ ɖi vomeɖase le eƒe dɔwɔƒe ta.

Emetsonu si Wɔ Nuku Wu

Xɔlɔ̃wo kple ƒometɔwo ƒo ƒu ɖe kuteƒe aɖe le kɔƒedu sue aɖe me le Victoria-ta to. Ðasefo tsitsi aɖe nɔ fafanamelawo dome. Ete ɖe nufiala aɖe si ŋkɔe nye Dolly ŋu eye wòɖe nɔnɔme si me ame kukuwo le kple Yehowa ƒe tameɖoɖo be yeaɖe ku ɖa  tegbee la me nɛ. Esi wòkpɔ be nyaa vivi enu la, egblɔ nɛ kakaɖedzitɔe be: “Ne ètrɔ yi mia de la, míaƒe dutanyanyuigblɔlawo dometɔ ɖeka ava gbɔwò ava fia Biblia wò.”

Dolly dedue nye dugã lolotɔ etɔ̃lia le Kenya. Ðasefo dutanyanyuigblɔla ene koe nɔ subɔsubɔm le afima ɣemaɣi. Nɔviŋutsu tsitsia meɖoe koŋ gblɔe na dutanyanyuigblɔlawo dometɔ aɖeke be wòayi Dolly gbɔ o. Ðeko kakaɖedzi blibo nɔ esi be wo dometɔ aɖe ayi egbɔ godoo. Eye nenemae wòdzɔe! Le ɣeyiɣi kpui aɖe megbe la, nɔvinyɔnu dutanyanyuigblɔla aɖe do go Dolly eye wòdze nusɔsrɔ̃ gɔme kplii. Dolly xɔ nyɔnyrɔ fifia, vianyɔnuvi sue wɔa dɔ le Teokrasi Subɔsubɔ Sukua me, eye viaŋutsu eve hã xɔ nyɔnyrɔ. Enye dzidzɔ nɛ ŋutɔ esi wòde Mɔɖelawo ƒe Subɔsubɔ Suku.

Dzidziɖedzia Ŋu Dɔwo Gbɔ Kpɔkpɔ

Vomeɖaseɖiɖi moveviɖoɖotɔe na be ame akpe geɖe va se nyanyuia le Kenya. Gbeƒãɖela 15,000 kple edzivɔwoe le dɔ vevitɔ kekeake sia wɔm kple ŋkubiã fifia, eye amesiwo wu 41,000 ye de Kristo ƒe ku ƒe Ŋkuɖodzia le ƒe si va yi me. Amesiwo dea kpekpeawo le Kenya katã la ƒe agbɔsɔsɔme dea Fiaɖuƒegbeƒãɖelawo ƒe xexlẽme ƒe teƒe eve zi geɖe. Esia na Fiaɖuƒe Akpata geɖe va hiã.

Wole Fiaɖuƒe Akpatawo tum ɖe dugãwo kple saɖaga-nutowo siaa me. Du siawo dometɔ ɖekae nye du aɖe si le Samburu nuto, si le adzɔge kilometa 320 lɔƒo le Nairobi ƒe dzieheɣedzeƒe gome. Le ƒe 1934 me la, wotsɔ ŋkɔ na dua be Maralal, si gɔmee nye “nu dadzo” le Samburugbe me, elabena xɔ gbãtɔ si wotu hetsɔ zingli gbae si wozã le afima la daa dzo ne ɣea klẽ ɖe edzi. Le ƒe 62 megbe la, wogatu xɔ bubu ɖe Maralal eye wotsɔ zingli gbae. Eya hã “klẽna” eye “wòdaa dzo” elabena afimae nyateƒe tadeaguƒe le le dua me.

Gbeƒãɖela 15 dze agbagba ale gbegbe tu Fiaɖuƒe Akpata gbãtɔ ɖe Kenya ƒe teƒe sia si sa ɖe aga. Ga menɔ anyi o, eyata ehiã be nɔviwo nazã xɔtunu siwo le wo gbɔ la dzaa ko. Woblu anyi dzĩ kple tsi hetsɔ ɖo glie ɖe ati dzɔdzɔe siwo wotu la ŋu. Wotsaka nyimi kple afi tsɔ zrɔ̃ glia ŋui si naa glia ŋuti sẽna henɔa anyi ƒe geɖe.

Be nɔviawo nakpɔ atiwo hena xɔa tutu la, woxɔ mɔɖegbalẽ si ɖe mɔ be woatso atiwo. Gake ave si tsɔ ɖe wo gbɔ wu la gbɔ didi ade kilometa 10. Ele be nɔviŋutsuwo kple nɔvinyɔnuwo nazɔ afɔ ayi avea me, atso atiawo, eye woatsɔ atiawo ɖe ta yi xɔa tuƒee. Gbeɖeka esi woyi ɖatso atiawo lɔ ɖe ta tso avea me gbɔna la, kpovitɔwo tɔ wo hegblɔ na wo be mɔɖegbalẽ si le wo si la mesɔ o. Kpovitɔawo gblɔ na mɔɖela vevi si nɔ wo dome la be yewolée ɖe ati siwo wotso la ta. Nɔvinyɔnu aɖe si le dua me, si wonya nyuie le nutoa me eye kpovitɔawo hã nyae nyuie ɖo eŋu be: “Ne mielé mía nɔviŋutsua la, ke ele be mialé mí katã elabena mí katãe tso atiawo!” Ale kpovitɔawo ƒe amegã ɖe asi le wo katã ŋu wodzo.

Lã wɔadãwo nɔ avea me, eyata afima zɔzɔ menɔ dedie o. Gbeɖeka nɔvinyɔnu aɖe lã ati aɖe. Esi wòmu dze anyi la, ekpɔ be lã aɖe lɔe ɖe eme kple du. Esi wòkpɔ lãa ƒe amadede si le abe gbe ƒuƒu ene flu la, esusu be avugbɔe, gake emegbe afɔteƒe siwo wòkpɔ la fia be dzatae! Togbɔ be afɔku siawo nɔ anyi hã la, nɔviawo tu akpataa wu enu, eye wònye kafukafu tsoƒe na Yehowa si “daa dzo.”

February 1, 1963, nye ŋkeke ɖedzesi aɖe le teokrasi ŋutinya me le Kenya. Le ŋkeke ma dzi la, woʋu alɔdzedɔwɔƒe gbãtɔ, si nye xɔ ɖeka ko, si ƒe lolome nye meta 7.4 togodo, la nu. October 25, 1997, hã ganye ŋkeke ɖedzesi bubu le Kenya ƒe teokrasi ŋutinya me—enye Betel-ƒe si ƒe lolome nye meta 7,800 togodo la ŋukɔgbe! Ƒe etɔ̃ ƒe kutrikuku tamanamanae wotsɔ tu xɔa wu enui. Lɔlɔ̃nu faa dɔwɔla siwo tso dukɔ vovovo 25 me trɔ anyigba si nye bateƒe agblekagã 3.2 si gbe to ɖo la wòzu alɔdzedɔwɔƒe yeye si dze ani abe abɔ ene, afisi Betel-ƒomea me tɔ 80 anɔ.

Susu geɖe li siwo ta wòle be dzi nadzɔ mí ɖe nusi Yehowa wɔ na eƒe amewo la ta. Míeda akpe nɛ be wòʋã esubɔlawo ƒe dzi be wokeke amesiwo dze le Kenya la diƒe ɖe enu eye wobiã ŋku ɖe wo didi ŋu, si wɔe be wòzu anyigba dzeani le gbɔgbɔ me.

[Etenuŋɔŋlɔwo]