Nukae Nye Gbɔgbɔmeparadiso La?

WONYI Gustavo le Brazil-du aɖe me. * Wofiae tso ɖevime ke be ame nyuiwo yia dziƒo ne woku. Menya naneke tso Mawu ƒe tameɖoɖo be ameƒomea me tɔ wɔnuteƒewo ava nɔ agbe deblibo le paradisonyigba dzi ŋu o. (Nyaɖeɖefia 21:3, 4) Eye nu bubu aɖe hã nɔ anyi si menya o. Menya be fifia kura gɔ̃ hã la, yeate ŋu anɔ gbɔgbɔmeparadiso me o.

Èse gbɔgbɔmeparadiso ma ŋuti nya kpɔa? Ènya nusi wònye kple nusi wòbia be woawɔ hafi ate ŋu anɔ emea? Ehiã be amesiame si di be yeakpɔ dzidzɔ vavã la nanya nu tso paradiso ma ŋu.

Keke Ðe Gbɔgbɔmeparadisoa Ŋu

Be woagblɔ be woate ŋu anɔ paradiso me egbea kura gɔ̃ hã aɖi fefenya aɖe ko. Xexe sia me menye paradiso o. Ame geɖe li siwo le nusi blema Hebri-fia aɖe gblɔ la me tom, esi nye: “Kpɔ ɖa, amesiwo wote ɖe anyi la ƒe aɖatsiwo le tsyɔtsyɔm, ke akɔfala aɖeke meli na wo o; amesiwo te wo ɖe anyi la, sẽ ŋuta le wo ŋu, ke akɔfala aɖeke meli na wo o.” (Nyagblɔla 4:1) Ame miliɔn alafa geɖe kpea fu le dunyahehe, mawusubɔsubɔ, kple ganya ƒe nuɖoanyi siwo me wowɔa nu fitifitiwo le te, eye womekpɔa gbɔdzɔe kple “akɔfala” aɖeke o. Ame bubu geɖe dagbana be yewoate ŋu axe yewo ŋuti fewo, anyi yewo viwo, ahawɔ nu bubu geɖe siwo hiã hena agbenɔnɔ. Anɔ eme be adzɔ dzi na amesiawo hã be yewoakpɔ akɔfala, amesi aɖe yewoƒe agba la dzi na yewo vie. Le wo katã gome la, agbenɔnɔ meɖi alesi wòanɔ le paradiso me le go aɖeke me o.

Ekema afikae gbɔgbɔmeparadisoa le? Helagbe, Persiagbe, kple Hebrigbe me nya si gɔme woɖe be “paradiso” le Eʋegbe me la siaa fia modzakaɖebɔ alo abɔ si me woɖina ɖe eme le tomefafatɔe. Biblia do ŋugbe be gbaɖegbe, anyigba azu paradiso ŋutɔŋutɔ si anɔ abe abɔ ene si me amegbetɔƒome si ŋu nuvɔ̃ mele o anɔ. (Psalmo 37:10, 11) Esi esia le susu me na mí la, míekpɔ be gbɔgbɔmeparadiso nye nɔnɔme si nya kpɔna na ŋku eye wònaa susu me kɔdzeanyi ame; enaa ŋutifafa nɔa ame kple ehavi kpakple Mawu dome. Abe alesi Gustavo va ke ɖe eŋui ene la, paradiso aɖe li nenema egbea, eye amesiwo ƒe xexlẽme le dzidzim ɖe edzi ye le gegem ɖe eme.

Esi Gustavo xɔ ƒe 12 la, etso nya me be yedi be yeazu Roma Katoliko nunɔla. Edzilawo lɔ̃ ɖe edzi nɛ be wòayi ɖe nunɔlasuku. Le afima la, eƒo eɖokui ɖe hadzidzi, fefewɔwɔ, kple dunyahehe, siwo ƒe ɖoɖo sɔlemeha la wɔ be wòatsɔ ahe sɔhɛwoe me. Enya be ele be nunɔlawo natsɔ wo ɖokui aɖo anyi na amewo eye be womate ŋu aɖe srɔ̃ o. Ke hã nunɔlaawo kple nunɔlasukua delawo dometɔ aɖewo siwo Gustavo nya la nɔa agbe gbegblẽ nɔm. Le nɔnɔme si nɔ afima ta, eteƒe medidi o Gustavo dze ahatsunono gɔme. Edze ƒã be mekpɔ ke ɖe gbɔgbɔmeparadisoa ŋu haɖe o.

Gbeɖeka, Gustavo xlẽ Biblia-srɔ̃ trakt aɖe si ƒo nu tso anyigba dzi paradiso ŋu. Ena wòbu tame le taɖodzinu si le agbe ŋu la ŋu. Egblɔ be: “Mete Biblia xexlẽ edziedzi, gake nyemesea  egɔme o. Nyemenya be ŋkɔ le Mawu si gɔ̃ hã o.” Edzo le nunɔlawo ƒe sukua eye wòte ɖe Yehowa Ðasefowo ŋu, henɔ kpekpeɖeŋu dim be yease Biblia me. Le ema megbe la, ewɔ ŋgɔyiyi kabakaba eye eteƒe medidi o etsɔ eƒe agbe ɖe adzɔgbe na Mawu. Ðe Gustavo nɔ nu srɔ̃m tso gbɔgbɔmeparadisoa ŋu.

Dukɔ Hena Mawu ƒe Ŋkɔ

Gustavo srɔ̃e be Mawu ƒe ŋkɔ, Yehowa, menye nu dzro aɖe ko na Biblia-nusrɔ̃vi o. (Mose II, 6:3) Enye nu vevi aɖe le tadedeagu vavãtɔ me. Yesu fia eyomedzelawo be woado gbe ɖa be: “Mía Fofo, si le dziƒowo! Wò ŋkɔ ŋuti nakɔ!” (Mateo 6:9) Esi nusrɔ̃la Yakobo nɔ nu ƒom tso Trɔ̃subɔdukɔ me tɔ siwo va zu Kristotɔwo ŋu la, egblɔ be: “Mawu kpɔ trɔ̃subɔlawo ɖa . . . bena yeaxɔ dukɔ tso wo dome hena eƒe ŋkɔ la.” (Dɔwɔwɔwo 15:14) Le ƒe alafa gbãtɔ me la, ‘dukɔ si wòxɔ hena eƒe ŋkɔ la’ ye nye Kristo-hamea. Ðe dukɔ aɖe li hena Mawu ƒe ŋkɔ egbea? Ẽ, eye Gustavo va dze sii be Yehowa Ðasefowoe nye dukɔ ma.

Yehowa Ðasefowo le dɔ wɔm moveviɖoɖotɔe le dukɔ kple anyigbamama 235 dzi. Wode subɔla miliɔn ade kple edzivɔ, eye ɖetsɔlemetɔ miliɔn enyi bubu de woƒe kpekpewo. Wonya dutoƒosubɔsubɔdɔ si wowɔna, eye wole wɔwɔm ɖe Yesu ƒe nya siawo dzi be: “Woaɖe gbeƒã fiaɖuƒeŋutinya nyui sia afia amewo le xexe blibo la katã me, bena wòanye ɖaseɖiɖi na dukɔwo katã.” (Mateo 24:14) Gake nukatae Gustavo se le eɖokui me be yeke ɖe gbɔgbɔmeparadiso ŋu le Yehowa Ðasefowo gbɔ? Egblɔ be: “Metsɔ nusiwo mekpɔ le xexeame, vevietɔ le nunɔlasukua sɔ kple nusi mekpɔ le Yehowa Ðasefowo gbɔ. Vovototo gã si le wo domee nye lɔlɔ̃ si le Ðasefoawo me na wo nɔewo.”

Ame bubu hã gblɔ nya siawo tɔgbe ke le Yehowa Ðasefowo ŋu. Miriam, si nye Brazil-ɖetugbi aɖe, gblɔ be: “Nyemenya alesi wokpɔa dzidzɔe o, le nye ƒomea me kura gɔ̃ hã me. Yehowa Ðasefowo gbɔe mekpɔ be wotsɔ lɔlɔ̃ de dɔwɔwɔ me le zi gbãtɔ.” Ŋutsu aɖe si ŋkɔe nye Christian gblɔ be: “Meƒoa ɖokuinye ɖe gbɔgbɔyɔyɔ me ɣeaɖewoɣi, gake mawusubɔsubɔ menɔ vevie nam o. Ðoƒe si nɔ asinye kple mɔ̃ɖaŋudɔ si mewɔna lae le vevie nam wu. Ke hã esi srɔ̃nye te Biblia sɔsrɔ̃ kple Yehowa Ðasefowo la, mekpɔ tɔtrɔ le eƒe agbenɔnɔ me. Dzidzɔ kple dzonɔameme si mekpɔ le Kristotɔ nyɔnu siwo vaa egbɔ me hã wɔ dɔ ɖe dzinye ŋutɔ.” Nukatae amewo gblɔa nya siawo le Yehowa Ðasefowo ŋu?

Nukae Nye Gbɔgbɔmeparadisoa?

Nusiwo na Yehowa Ðasefowo to vovo na subɔsubɔha bubuwo dometɔ ɖekae nye alesi wotsɔa ɖe le Biblia me sidzedze mee. Woxɔe se be nyateƒee Biblia tona eye be enye Mawu ƒe Nya. Eyata menye nusi dzi woƒe subɔsubɔha nɔ te ɖo la nyanya koe le vevie na wo o. Ðokuisinusɔsrɔ̃ kple Biblia xexlẽ ƒe ɖoɖo le wo si. Zi alesi ame aɖe de ha kple Yehowa Ðasefowoe eteƒe didii la, zi nenemae wòsrɔ̃a nu tso Mawu kple Eƒe lɔlɔ̃nu si woŋlɔ ɖe Biblia me la ŋui.

Sidzedze sia naa Yehowa Ðasefowo vona tsoa nusiwo naa amewo mekpɔa dzidzɔ o, abe aʋatsodzixɔsewo kple nukpɔsusu siwo gblẽa nu le ame ŋu ene, me. Yesu gblɔ be: “Nyateƒe la lawɔ mi ablɔɖeviwoe,” eye Yehowa Ðasefowo kpɔ be esia nye nyateƒe. (Yohanes 8:32) Fernando, amesi yɔa gbɔgbɔ ɣeaɖeɣi va yi la, gblɔ be: “Nusɔsrɔ̃ tso agbe mavɔ nɔnɔ ŋu na gbɔdzɔe gã aɖem. Menɔ vɔvɔ̃m be dzinyelawo alo nye ŋutɔ mava ku.” Nyateƒea ɖe ga Fernando tso eƒe vɔvɔ̃ na gbɔgbɔwo kple ŋɔliwo me.

Le Biblia me la, ƒomedodo kplikplikpli le sidzedze Mawu kple paradiso me nɔnɔ dome. Nyagblɔɖila Yesaya gblɔ be: “Womawɔ vɔ̃ aɖeke o, eye womahe gbegblẽ ava nye tonyigba kɔkɔe blibo la dzi o; elabena sidzedze Yehowa xɔ  anyigba la dzi, abe alesi tsi yɔ atsiaƒu me ene.”—Yesaya 11:9.

Ele eme baa be sidzedze ɖeɖe mesɔ gbɔ be wòahe ŋutifafa si ŋu nya Yesaya gblɔ ɖi la vɛ o. Ele be woatsɔ nusi srɔ̃m wole la ade dɔwɔwɔ me. Fernando gblɔ nya sia be: “Ne ame tse gbɔgbɔa ƒe kuawo la, ekpea asi ɖe gbɔgbɔmeparadisoa tutuɖo ŋu.” Apostolo Paulo, amesi yɔ nɔnɔme nyui siwo wòle be Kristotɔ natu ɖo be “gbɔgbɔ ƒe kutsetse” la ƒe nyawo yɔmee Fernando nɔ. Eŋlɔ wo ɖe ɖoɖo nu be woawoe nye “lɔlɔ̃, dzidzɔ, ŋutifafa, dzigbɔgbɔ blewu, dɔmekɔkɔ, dɔmenyonyo, anukwaretɔnyenye, dɔmefafa, ɖokuidziɖuɖu.”—Galatiatɔwo 5:22, 23.

Àte ŋu akpɔ susu si tae hadede kple amesiwo dzea agbagba be yewoatu nɔnɔme siawo ɖo la ana xexeame nanɔ abe paradiso me nɔnɔ ene nyateƒea? Gbɔgbɔmeparadiso si ŋuti nya nyagblɔɖila Zefanya gblɔ ɖi la anɔ amesiawo dome. Egblɔ be: “Womaka aʋatso o, eye alakpaɖe manɔ nu me na wo o; ke boŋ woaɖu nu, eye woatsyɔ akɔ anyi ɖi, ame aɖeke mado voɖi na wo o.”—Zefanya 3:13.

Akpa Vevi si Lɔlɔ̃ Wɔna

Àde dzesii be gbɔgbɔ ƒe kutsetse siwo ŋuti Paulo ƒo nu le la dometɔ gbãtɔe nye lɔlɔ̃. Esiae nye nɔnɔme si ŋuti Biblia ƒo nu geɖe tsoe. Yesu gblɔ be: “Esia me amewo katã woanyae le bena, nye nusrɔ̃lawo mienye, ne lɔlɔ̃ le mia dome.” (Yohanes 13:35) Nyateƒee, Yehowa Ðasefowo mede blibo o. Masɔmasɔwo ɖoa wo dome ɣeaɖewoɣi abe alesi wonɔ Yesu ƒe apostolowo dome ene. Gake wolɔ̃ wo nɔewo nyateƒe, eye wodoa gbe ɖa biaa gbɔgbɔ kɔkɔea ƒe kpekpeɖeŋu bene woatu nɔnɔme sia ɖo.

Esia wɔe be woƒe havilɔlɔ̃a le etɔxɛ. Gbeɖekadodo alo dukɔmevinyenye me masɔmasɔ aɖeke mele wo dome o. Le nyateƒe me la, Ðasefo geɖe siwo nɔ teƒe siwo gbeɖekadolawo kple ameƒomevi aɖewo tsɔtsrɔ̃ ɖa kura yi edzi le le ƒe alafa 20 lia ƒe ƒe mamlɛawo me la kpɔ wo nɔewo ta togbɔ be esia wɔwɔ de woawo ŋutɔ ƒe agbe afɔku me hã. Togbɔ be “dukɔ sia dukɔ kple to sia to kple du sia du kple gbegbɔgblɔ sia gbegbɔgblɔ” mee wotso hã la, ɖekawɔwɔ si gɔme màte ŋu ase o vaseɖe esime wò ŋutɔ nèva ge ɖe wo mee le wo me.—Nyaɖeɖefia 7:9.

Paradiso me Nɔnɔ le Amesiwo Wɔa Mawu ƒe Lɔlɔ̃nu Dome

Ŋukeklẽ, agbegbegblẽnɔnɔ, kple ɖokuitɔdidi mele gbɔgbɔmeparadisoa me o. Wogblɔ na Kristotɔwo be: “Migana miaƒe anyinɔnɔ naɖi xexe sia me o, hafi mitrɔ miaƒe nɔnɔme to miaƒe tamesusu ƒe yeyewɔwɔ me boŋ, bene miadzro nusi nye Mawu ƒe lɔlɔ̃nu, si nyo, eye wòdzea eŋu nyuie, eye wòle blibo la me akpɔ.” (Romatɔwo 12:2) Ne míenɔ agbe dzadzɛ hewɔ Mawu ƒe lɔlɔ̃nu le mɔ bubuwo nu la, míekpea asi ɖe gbɔgbɔmeparadisoa tutuɖo ŋu eye míetua mía ŋutɔwo míaƒe dzidzɔkpɔkpɔ ɖo. Carla kpɔe be esia nye nyateƒe. Egblɔ be: “Fofonye fia alesi wowɔa dɔ sesẽm be nye ŋutɔ mate ŋu akpɔ nye nuhiahiãwo gbɔ. Gake togbɔ be nusiwo mesrɔ̃ le yunivɛsiti na mese le ɖokuinye me be mele dedie hã la, ɖekawɔwɔ si nɔa ƒome me kple dedienɔnɔ si sidzedze Mawu ƒe Nya la ko ate ŋu ana mí ya bɔm.”

 Ele eme be gbɔgbɔmeparadisoa me nɔnɔ meɖea agbemekuxiwo ɖa ya o. Kristotɔwo ate ŋu adze dɔ. Dukɔmeviʋa ate ŋu adzɔ le dukɔ si me wole me. Wo dometɔ geɖe nye hiãtɔwo. Ke hã ƒomedodo kplikplikpli me nɔnɔ kple Yehowa Mawu—si nye gbɔgbɔmeparadisoa ƒe akpa vevi aɖe la—fia be woate ŋu akpɔ esinu be wòakpe ɖe yewo ŋu. Vavãe, ele mía kpem be ‘míatsɔ míaƒe nyawo adro ɖe ye dzi,’ eye ame geɖe ate ŋu agblɔ mɔ wɔnuku si dzi wòkpe ɖe wo ŋu le le woƒe kuxi sesẽtɔwo kekeake me. (Psalmo 55:23; 86:16, 17) Mawu do ŋugbe be yeanɔ kple ye subɔlawo le “bali doblukɔ tsiɖitsiɖi” gɔ̃ hã me. (Psalmo 23:4) Kakaɖedzi si le mía si be Mawu alɔ̃ faa be yeakpe ɖe mía ŋu kpena ɖe mía ŋu be míakpɔ “Mawu ƒe ŋutifafa, si ƒo gɔmesesewo katã ta” si le mía si, si nye gbɔgbɔmeparadisoa ƒe nu vevi aɖe la ta.—Filipitɔwo 4:7.

Gbɔgbɔmeparadisoa Tutuɖo

Tsaɖiɖi yi modzakaɖebɔ me dzɔa dzi na ame akpa gãtɔ. Wodina be yewoaɖi tsa le eme alo ɖewohĩ anɔ zikpui aɖe dzi ase vivi le afima. Le mɔ ma ƒomevi nu la, ame geɖe sea vivi na hadede kple Yehowa Ðasefowo. Wokpɔna be vivisese, ŋutifafa, kple tutuɖo le hadede kple wo me. Gake ne abɔ dzeani aɖe ayi edzi anɔ abe paradiso ene la, ele be woalé be nɛ. Nenema ke esi Yehowa Ðasefowo léa be na gbɔgbɔmeparadisoa le xexe sia si me menye paradiso o me ta koe gbɔgbɔmeparadisoa li ɖo, eye Mawu yrana ɖe woƒe agbagbadzedzewo dzi. Ekema aleke nàwɔ akpe asi ɖe paradiso ma ƒe anyinɔnɔ ŋu?

Gbã la, ele be nàde ha kple Yehowa Ðasefowo ƒe hame aɖe, asrɔ̃ Biblia kpli wo, eye Biblia me sidzedze si dzi wotu gbɔgbɔmeparadisoa ɖo la nasu asiwò. Carla gblɔ be: “Ne gbɔgbɔmenuɖuɖu aɖeke meli o la, gbɔgbɔmeparadiso aɖeke hã manɔ anyi o.” Esia bia Mawu ƒe Nya la xexlẽ edziedzi kple ŋugbledede le nusi xlẽm nèle ŋu. Sidzedze si asu asiwò la ate wò ɖe Yehowa Mawu ŋu kplikplikpli wu, eye wòana be nàlɔ̃e. Àsrɔ̃ alesi nàƒo nu nɛ le gbedodoɖa me hã ahabia eƒe mɔfiame kple eƒe gbɔgbɔ ƒe kpekpeɖeŋu le eƒe lɔlɔ̃nu wɔwɔ me. Yesu gblɔ na mí be míanɔ gbedodoɖa dzi ɣesiaɣi. (Luka 11:9-13) Apostolo Paulo gblɔ be: “Minɔ gbedodoɖa dzi madzudzɔmadzudzɔe!” (Tesalonikatɔwo I, 5:17) Mɔnukpɔkpɔ si li be nàƒo nu na Mawu le gbedodoɖa me kple kakaɖedzi be ele esem na wò nye gbɔgbɔmeparadisoa ƒe akpa vevi aɖe.

Ne ɣeyiɣiawo va le yiyim la, nusi srɔ̃m nèle la ana wò agbenɔnɔ nanyo ɖe edzi wu, eye mlɔeba àdi be yeaƒo nu tso eŋu na ame bubuwo. Ekema àte ŋu awɔ ɖe se si Yesu de dzi, si nye: “Mina miaƒe kekeli naklẽ le amewo ƒe ŋku me, bena woakpɔ miaƒe nu nyui wɔwɔwo, eye woakafu mia Fofo, si le dziƒo.” (Mateo 5:16) Yehowa Mawu kple Yesu Kristo ŋuti sidzedzea gbɔgblɔ na ame bubuwo kple lɔlɔ̃ gã si amesiawo ɖe fia amegbetɔƒomea me ɖeɖe na wo hea dzidzɔ geɖe vɛ.

Ɣeyiɣi si me anyigba bliboa katã azu paradiso ŋutɔŋutɔ—si nye abɔ nyui si me ɖi aɖeke mele o eye aƒe siwo sɔ na ameƒomea me tɔ wɔnuteƒewo le—la tu aƒe. Gbɔgbɔmeparadisoa ƒe anyinɔnɔ le ‘ɣeyiɣi sesẽ siwo me nɔnɔ sesẽ’ siawo me nye Mawu ƒe ŋusẽ ƒe kpeɖodzi kple nusi wòate ŋu awɔ eye wòle wɔwɔ ge hã le etsɔme la ƒe dzesi.—Timoteo II, 3:1.

Fifia kura gɔ̃ hã la, amesiwo le gbɔgbɔmeparadisoa me la kpɔa Yesaya 49:10 ƒe emevava gbɔgbɔmetɔ be: “Dɔ kple tsikɔ mawu wo o, eye ŋdɔ kple ɣe maɖu wo o, elabena wo nuvela le wo kplɔm, eye wòakplɔ wo ato tsidzidziwo ŋu.” José aɖo kpe nya ma ƒe nyateƒenyenye dzi. Edi vevie be yeazu hadzila xɔŋkɔ, gake mawusubɔsubɔ le Kristo-hamea mee wòkpɔ dzidzeme geɖe le. Egblɔ be: “Fifia mele agbe si ɖɔ ʋu nɔm. Mesena le ɖokuinye me be mele dedie le Kristotɔwo ƒe nɔviwo ƒe habɔbɔa me, eye medze sii be Yehowa nye Fofo lɔlɔ̃tɔ si ŋu míate ŋu aɖo ŋu ɖo.” Woɖɔ dzidzɔ si kpɔm José—kple ame miliɔn geɖe siwo le abe eya ene—le la nyuie le Psalmo 64:10 be: “Ame dzɔdzɔe akpɔ dzidzɔ ɖe Mawu Yehowa ŋu, eye [wòasii] atso; amesiwo katã ƒe dzi to mɔ ɖeka la, woaƒo adegbe.” Aleke woɖɔ gbɔgbɔmeparadisoa nyuie enye si!

[Etenuŋɔŋlɔ]

[Nɔnɔmetata si le axa 10]

Esi nèle vivi sem na gbɔgbɔmeparadisoa la, kpe asi ɖe ekeke ɖe nu ŋu!