Mawusubɔsubɔe Ahe Xexeme Ŋutifafa Vɛa?

TSO August 28 vaseɖe August 31, 2000 la, dukɔ 73 teƒenɔlawo siwo wu ame 500 va kpe ta ɖe New York City. Wokpe ta ɖekae ɖe Dukɔ Ƒoƒuawo ƒe dɔwɔƒegã na “Mawusubɔsubɔ Kple Gbɔgbɔ me Ŋgɔnɔlawo ƒe Ƒe Akpe Ðeka Xexeme Ŋutifafa Takpekpe.” Subɔsubɔhakplɔlaawo—siwo dometɔ geɖe tsɔ tablanuwo bla tae, wodo aŋutiɖiɖiwuwo, woɖɔ xefukukuwo, alo do awu ʋlaya yibɔwo—nɔ subɔsubɔha geɖe teƒe. Subɔsubɔha siawo dometɔ aɖewoe nye Baha’i, Buddha, Hindu, Islam, Jain, Yuda, Shinto, Sikh, Tao, Zoroasta, kple Kristodukɔa ƒe subɔsubɔhawo.

Vavalawo kpe ta le Dukɔ Ƒoƒuawo ƒe dɔwɔƒegã le ŋkeke ene takpekpea ƒe ŋkeke eve gbãtɔawo dzi. Gake menye Dukɔ Ƒoƒuawoe wɔ ɖoɖo ɖe takpekpea ŋu alo kpɔ edzi o, ke boŋ kpekpeɖeŋunahabɔbɔ vovovowoe. Ke hã Dukɔ Ƒoƒuawo kple subɔsubɔhakplɔlawo siaa ƒo nu tso alesi wòle vevie be woawɔ nu ɖekae atsɔ atsi ahedada, ameƒomevinyenye, nutomekuxiwo, aʋawɔwɔ, kple ame gbogbowo wuwu ƒe ametsrɔ̃nuwo nui ŋu.

Vavalawo de asi agbalẽ aɖe si ƒe tanyae nye “Xexeame Katã ƒe Ŋutifafa ƒe Tameɖoɖo Kplikpaa” te. Togbɔ be agbalẽa lɔ̃ ɖe edzi be wowɔa ŋutasẽnu kple aʋa “ɣeaɖewoɣi le mawusubɔsubɔ ƒe ŋkɔ me” hã la, egblɔ be amesiwo de asi ete “awɔ nu aduadu kple Dukɔ Ƒoƒuawo . . . le ŋutifafa hehe vɛ me.” Gake womewɔ tameɖoɖo kplikpaa aɖeke si fia alesi woawɔ esia o.

Le ŋkeke evelia dzi la, Bawa Jain, si nye takpekpea ƒe dɔdzikpɔlagã, wu eƒe kpekpeanuʋunyawo nu heɖe nu me be ƒe aɖewo do ŋgɔ la, yekpɔ nutata aɖe le Dukɔ Ƒoƒuawo ƒe dɔwɔƒegã. Wota ame aɖe si kɔkɔ wu Dukɔ Ƒoƒuawo ƒe Dɔdzikpɔƒea ƒe xɔa. Enɔ xɔa ƒom nɔ agoo dom abe ʋɔtru wònye ene. Woŋlɔ ɖe nutataa gɔme be: “Ŋutifafafia.” Aƒetɔ Jain gblɔ be: “Esi mekpɔ [nutataa] teti ko la, ewɔ dɔ ɖe dzinye ale gbegbe. Mebia nya ame vovovo le nusi wòfia ŋu. Mebui be egbea mekpɔ ŋuɖoɖoa. Mi xexeame ƒe gbɔgbɔmekplɔla kple subɔsubɔhakplɔla siwo ƒo ƒu ɖe afisia, ɖee fiam be [miawoe] nye ŋutifafafia si le Dukɔ Ƒoƒuawo ƒe ʋɔtrua ƒom.”

Biblia ɖe nukpɔsusu bubu fia. Eɖee fia be Ŋutifafafia lae nye Yesu Kristo. Ahe xexeame katã ƒe ŋutifafa vɛ, menye to xexe sia me dunyahelawo ƒe ŋgɔnɔlawo loo alo subɔsubɔhakplɔlawo dzi o, ke boŋ to Mawu ƒe Fiaɖuƒea dzi. Fiaɖuƒe sia—Mawu ƒe dziƒodziɖuɖu—ye ana ameƒomea me tɔ toɖolawo nawɔ ɖeka eye wòana woawɔ Mawu ƒe lɔlɔ̃nu le anyigba dzi.—Yesaya 9:5; Mateo 6:9, 10.