Ðe Wòwɔna na Wò be Womesea Nu Gɔme na Ye Oa?

ANTONIO kpɔ be yetɔtɔ ŋutɔ. Le vome, exɔlɔ̃ vevi Leonardo megadoa vivi ɖe eŋu tututu o eye menya nusitae o. * Le ɣeyiɣi vovovowo me la, melɔ̃ gbe na Antonio o, eye ne wo kplii wole teƒe ɖeka la, fifia ɖeko wòwɔna abe nya aɖee le wo dome ene. Antonio te vɔvɔ̃ be ke ɖewohĩ ɖe yegblɔ nya aɖe alo wɔ nane si gɔme ye xɔlɔ̃a mese o. Gake anye nukae dzɔ?

Nugɔmemasename bɔ ɖe afisiafi. Geɖe nyea nya suewo eye wo gbɔ kpɔkpɔ nɔa bɔbɔe. Bubuwo te ŋu ɖea dzi le ame ƒo ŋutɔ, vevietɔ ne wogakpɔtɔ li togbɔ be wodze agbagba ɖesiaɖe be woaɖe wo ɖa hafi. Nukae hea nugɔmemasename vɛ? Aleke gbegbe wògblẽa nu le ame nɔewo ŋui? Nukae nàwɔ ne wose wò nuwɔnawo gɔme bubui? Ðe nusi amewo buna le ŋuwò le vevie ŋutɔŋutɔ ya?

Nusi nu Womate Ŋu Asi le O

Esi ame bubuwo mate ŋu anya míaƒe tame kple dzime o ta la, madidi hafi ame aɖe nase míaƒe nyagbɔgblɔ alo nuwɔna gɔme bubui o. Nusiwo ate ŋu ahe nugɔmemasename vɛ sɔ gbɔ fũ. Ɣeaɖewoɣi la, míegblɔa nusi míesusu eme kɔna nyuie o. Toɣliɖeɖe kple susuhenu bubuwo ate ŋu ana amea ƒe susu manɔ mía ŋu bliboe o.

Amewo ƒe nuwɔna kple nɔnɔme aɖewo hã ate ŋu ana woase nu gɔme na wo bubui. Le kpɔɖeŋu me, woate ŋu abu vɔvɔ̃nɔtɔ alo amesi kpea ŋu vodadatɔe be medoa vivi ɖe ame ŋu o loo alo ekpɔa eɖokui. Nusiwo me ame aɖe to hã ate ŋu ana wòawɔ nu ɖe eƒe seselelãme nu le esi teƒe be wòatsɔ susu abu nua ŋui. Le teƒe vovovo tsotso kple gbegbɔgblɔ ƒe vovototo ta la, míate ŋu akpɔ mɔ be amewo nase wo nɔewo ƒe nuwɔna gɔme ɣesiaɣi o. Ne míetsɔ nya siwo womese nyuie o gbɔgblɔ kple ameŋulilĩ kpe ɖe nusiawo ŋu la, mawɔ nuku na mí be woase nane si míegblɔ alo wɔ gɔme bubui ɣeaɖewoɣi o. Gake esiawo katã menye akɔfafa aɖeke na amesiwo kpɔ be wose yewoƒe nuwɔna gɔme bubui o.

Le kpɔɖeŋu me, Anna gblɔ nya aɖe si menye vɔ̃ o tso alesi amewo lɔ̃a exɔlɔ̃ aɖe si  menɔ afima o la ƒe nyae ŋu. Nɔnɔme si me wogbugbɔ gblɔ eƒe nyaawo le la na gɔmesese bubu kura va le eŋu, eye ewɔ nuku na Anna eye wòtɔtɔ esime exɔlɔ̃ ma tsɔ dziku bu fɔe le ame geɖewo ŋkume be ebiã ŋu ɖe alesi yeƒe nu nyo zɔhɛ aɖe si nye ŋutsu aɖe ŋui ŋu. Wose Anna ƒe nya me bubui kura, eye agbagba siwo katã wòdze be yeaka ɖe edzi na ye xɔlɔ̃a be yemeɖo susu vɔ̃ aɖeke o la meɖe vi aɖeke o. Nya ma he vevesese geɖe vɛ, eye eteƒe didi hafi Anna te ŋu ɖɔ masɔmasɔa ɖo.

Zi geɖe la, alesi amewo bua wòe edziedzi la nɔ te ɖe alesi wose wò susuwo gɔmee dzi. Eyata esɔ be wòave wò ne wose wò nuwɔnawo gɔme bubui. Ate ŋu aku dzi na wò eye wòawɔ na wò be mele be ame aɖeke nase yeƒe nuwɔna gɔme bubui o. Àbui be ye bubu nenema mesɔ o, be wole vodada dim le ye ŋu, alo be mesɔ le mɔ aɖeke nu o eye wòate ŋu ave wò vevie—vevietɔ ne èdea bubu amesiwo gblɔ nya masɔmasɔ mawo ɖe ŋuwò ƒe nukpɔsusu ŋu.

Togbɔ be àdo dziku ɖe alesi amewo bua wòe ŋu hã la, esɔ be nàde bubu ame bubuwo ƒe nukpɔsusuwo ŋu. Masɔ be Kristotɔ nagbe bubudede amewo ƒe nukpɔsusuwo ŋu o, eye míadi gbeɖe be míaƒe nyagbɔgblɔ alo nuwɔna nagblẽ nu le ame bubuwo ŋu o. (Mateo 7:12; Korintotɔwo I, 8:12) Eyata ahiã ɣeaɖewoɣi be nàɖɔ ame aɖe ƒe nukpɔsusu masɔmasɔ si le esi ɖe ŋuwò la ɖo. Gake dzitsitsi fũ be yeƒe nu nadze amewo ŋu nana boŋ be nyaa gblẽna kura si wɔnɛ be ame ŋutɔ kloa bubu le eɖokui ŋu alo naa wòsena le eɖokui me be yeƒe nu menyo amewo ŋu o. Ne èbu eŋu kpɔ la, asixɔxɔ si le ŋuwò menɔ te ɖe alesi amewo bua wòe dzi o.

Gake ate ŋu adzɔ be nàkpɔe be nya si hem wole ɖe ye ŋu la sɔ. Esia hã ate ŋu ave wò, gake ne èlɔ̃ faa xɔ wò gbɔdzɔgbɔdzɔwo anukwaretɔe la, aɖe vi na wò, elabena ana nàwɔ tɔtrɔ siwo hiã.

Nu Gbegblẽ Siwo Te Ŋu Dona Tsoa Eme

Nugɔmemasenamewo ate ŋu azu nya gã loo alo mazui o. Le kpɔɖeŋu me, ne èse ame aɖe le nu ƒom sesĩe le nuɖuɖudzraƒe la, àbu be amea nye nuhala alo be edina be woakpɔ ye. Ðewohĩ menye nenemae o. Ate ŋu anye be amesi wòle nu ƒom na mesea nu nyuie o. Alo àbu fiase me nudzrala aɖe be dzi medzɔ nɛ o, gake ɖewohĩ lãmee menɔ kɔkɔm nɛ o. Togbɔ be nugɔmemasemase ma naa woabu nu masɔmasɔ ɖe ame ŋu hã la, anɔ eme be womagblẽ nu boo alo anɔ anyi ɣeyiɣi didi o. Gake ɣeaɖewoɣi la, nugɔmemasenamewo ate ŋu ana afɔku nadzɔ. Bu blema Israel-viwo ƒe ŋutinya me nudzɔdzɔ eve ŋu kpɔ.

Esime Naxas, Amon fia ku la, Dawid dɔ eƒe dɔlawo be woaɖafa na viaŋutsu Xanun si dze dziɖuɖu gɔme ɖe fofoa teƒe. Gake wo bu dɔla siawo be wonye futɔ siwo va ŋku tsa ge le Amon-nyigba dzi, si na Xanum na woɖi gbɔ wo gbã eye emegbe wòɖoe be yeawɔ aʋa kple Israel. Amesiwo ade 47,000 ya teti tsi me—esiawo katã dzɔ le susu nyuiwo gɔmemasemase ta.—Kronika I, 19:1-19.

Do ŋgɔ wokpɔ masɔmasɔ aɖe gbɔ le mɔ bubu kura nu le Israel ƒe ŋutinya me. Ruben kple Gad ƒe toawo kpakple Manase ƒe to  afã la ɖi vɔsamlekpui gã aɖe ɖe Yordan-tɔsisia nu. Israel-to mamlɛawo bu nusia be enye nuteƒemawɔmawɔ na Yehowa kple aglãdzedze ɖe eŋu. Eyata woƒo ƒu be yewoaho aʋa ɖe wo ŋu. Hafi woaɖe afɔ vevi sia la, Israel-to mamlɛawo dɔ amewo ɖa be woaɖagblɔ alesi wodo dziku ɖe nusi wobu be enye nuteƒemawɔmawɔ la ŋu na wo. Enyo be wowɔe nenema, elabena vɔsamlekpuia ɖilawo ɖo eŋu be menye yewoƒe susue nye be yewoagbugbɔ le tadedeagu dzadzɛtɔ yome o. Ðe woɖi vɔsamlekpuia boŋ be wòanye yewoƒe nuteƒewɔwɔ na Yehowa ƒe ŋkuɖodzikpe. Masɔmasɔ sia ate ŋu ahe ʋukɔkɔɖi gã aɖe vɛ hafi, gake nunya ŋudɔwɔwɔ xe mɔ ɖe dzɔgbevɔ̃e gã sia nu.—Yosua 22:10-34.

Ðe Nya la me le Lɔlɔ̃ ƒe Gbɔgbɔ Me

Nusɔsrɔ̃ le ŋutinya sia ŋu bubu me. Eme kɔ ƒã be nunyanu si wòle be nàwɔe nye be nàkɔ nya la me. Amekae nya ame neni si ƒe agbe ta wokpɔ le nudzɔdzɔ mamlɛa si ŋu míeƒo nu tsoe la me, le esi akpa eveawo ƒo nu na wo nɔewo ta? Le nya akpa gãtɔ me la, amewo ƒe agbe maɖo afɔku me ne mèse nusi nye ame aɖe ƒe susu me o, gake ate ŋu agblẽ mia kplii ƒe xɔlɔ̃dzedze dome. Eyata ne ewɔ na wò be ame aɖe wɔ nusi mesɔ o ɖe ye ŋu la, ɖe nèka ɖe dzi be yele nyaa gɔme sem abe alesi wòle tututu enea, alo èle egɔme sem bubui? Nukae na amea wɔ nu ma? Biae se. Ðe wòwɔ na wò be mese yeƒe nuwɔna gɔme oa? Miƒo nu tso eŋu. Migaɖe mɔ dada naxe mɔ na miaƒe dzeɖoɖo o.

Yesu gblɔ nu vevi aɖe si ta wòle be míakpɔ masɔmasɔwo gbɔ na mí: “Ne ètsɔ wò nunana va da ɖe vɔsamlekpuia dzi, eye nèɖo ŋui le afima bena, nya aɖe le nɔviwò ƒe dzi me ɖe ŋutiwò la, gblẽ wò nunana la ɖe afima le vɔsamlekpuia ŋgɔ, eye nayi aɖadzra mia kple nɔviwò dome ɖo gbãgbiagbã, hafi nava tsɔ wò nunana la vae.” (Mateo 5:23, 24) Eyata nu nyuitɔ si wòle be nàwɔe nye be nàte ɖe amea ŋu, ame bubuwo megage ɖe eme o. Ðeko wòagblẽ nya la ɖe edzi ne agɔdzela va se wò nutsotsowo gbã tso ame bubu gbɔ. (Lododowo 17:9) Ele be wò taɖodzinu nanye ŋutifafawɔwɔ le lɔlɔ̃ ƒe gbɔgbɔ me. Tsɔ tufafa ƒo nu eme nakɔ vodadamadimadileameŋutɔe tso kuxia ŋu egɔme nanya se. Gblɔ alesi nyaa na nèse le ɖokuiwò mee. Eye ɖo to nàse alesi nyawo le tututu le ame evelia gome. Mègatsi dzi nàɖe vodada na amea o. Lɔ̃ faa be yeaxɔ nya si wòagblɔ ne kpeɖodzi mele eŋu o hã. Ðo ŋku edzi be lɔlɔ̃ xɔa “nuwo katã sena.”—Korintotɔwo I, 13:7.

Gake ne wokɔ nyawo me vɔ megbe gɔ̃ hã la, vevesese aɖewo alo nusiwo nusia gblẽ la agate ŋu anɔ anyi kokoko. Nukae nàte ŋu awɔ tso eŋu? Le afisi wòhiã le la, kukuɖeɖe anukwaretɔe asɔ tsɔ kpe ɖe afɔɖeɖe bubu si akpɔ nya la gbɔ ŋu. Le nɔnɔme siawo katã me la, ele be amesi dzi wodze agɔa le la nawɔ ɖe aɖaŋuɖoɖo sia si tso gbɔgbɔ me dzi: “Mihe adodo kple mia nɔewo, eye mitsɔ ke mia nɔewo, ne nya aɖe le ame aɖe si ɖe ame aɖe ŋuti la, alesi [Yehowa tsɔ ke mi faa, NW] la, miawo hã miwɔ nenema ke! Ke hekpe ɖe nusiawo katã ŋuti la mido lɔlɔ̃, si nye blibonyenye la ƒe nublanu.”—Kolosetɔwo 3:13, 14; Petro I, 4:8.

Zi alesi míegakpɔtɔ nye ame madeblibowo la, masɔmasɔwo kple vevesesedonamenuwo akpɔtɔ anɔ anyi. Amesiame ate ŋu awɔ vodada alo agblɔ dzivenyawo alo nya masɔmasɔwo. Biblia gblɔ be: “Mí katã míeda vo le nu geɖewo me. Ne ame aɖe meda vo le nuƒoƒo me o la, eyae nye ame blibo, eye wòkpɔ ŋusẽ bena, wòaɖu ŋutilã blibo la katã hã dzi.” (Yakobo 3:2) Esi Yehowa Mawu nya esia ta la, etsɔ nufiame siawo na mí: “Wò gbɔgbɔ megayɔ ɖe dzikudodo ŋu o, elabena bometsilawo ƒe akɔtae dziku nɔna. Megalé to hã ɖe amewo ƒe nusiwo katã woƒona la ŋu o, ne màgasee, ne wò dɔla le ɖiŋu dom na wò o. Elabena ele ŋku dzi na wò be, wò hã èdo ɖiŋu  na ame bubuwo zi geɖewo.”—Nyagblɔla 7:9, 21, 22.

“Yehowae Daa Dziwo Kpɔna”

Ke ne edze abe ɖe màte ŋu atrɔ ame aɖe ƒe nukpɔsusu gbegblẽ si le esi ɖe ŋuwò o ɖe? Dzi megaɖe le ƒowò o. Yi edzi nàtu Kristotɔwo ƒe nɔnɔmewo ɖo eye nàɖe wo afia alesi nàte ŋui. Bia Yehowa be wòakpe ɖe ŋuwò le afisi wòhiã le. Menye alesi amewo bua wòe dzie asixɔxɔ si le ŋuwò nɔ te ɖo o. Yehowa ɖeka koe te ŋu “daa dziwo kpɔna” wòsɔna nyuie. (Lododowo 21:2) Womebu Yesu gɔ̃ hã ɖe naneke me o eye amewo ɖi gbɔe, gake esia megblẽ nu le alesi Yehowa bunɛ ŋu o. (Yesaya 53:3) Togbɔ be ame aɖewo asusu nu masɔmasɔwo ɖe ŋuwò hã la, ‘trɔ wò dzi ƒo ɖe Yehowa ŋkume’ eye nàka ɖe edzi be esea nu gɔme na wò, elabena ‘menye alesi amegbetɔ kpɔa nui ye Mawu kpɔa nui o, elabena amegbetɔ kpɔa ŋku nu, ke Yehowa kpɔna keke dzime ke.’ (Psalmo 62:8; Samuel I, 16:7, 8) Ne èyi edzi wɔ nu nyui la, amesiwo bua susu vɔ̃ ɖe ŋuwò ava de dzesi woƒe vodadawo eye woawɔ tɔtrɔwo.—Galatiatɔwo 6:9; Timoteo II, 2:15.

Èɖo ŋku Antonio si míeyɔ va yi le nyatia ƒe gɔmedzedzea dzia? Elé dzi ɖe ƒo hewɔ ɖe Ŋɔŋlɔawo ƒe aɖaŋuɖoɖo dzi, eye wòte ɖe exɔlɔ̃ Leonardo ŋu hebia nusi wòwɔ si vee lae. Nukae do dzo eme? Leonardo ƒe nu ku. Eɖo eŋu nɛ be Antonio mewɔ naneke kura si le ye vem o, eye wòka ɖe edzi nɛ be menye ɖe yeɖoe be yeawɔ nu ɖe eŋu nenema o. Ne ewɔ abe ɖe yemele vivi dom ɖe eŋu o la, ke ɖewohĩ anye tamebubue. Leonardo ɖe kuku be yewɔ nusi ve ye xɔlɔ̃a le manyamanya me eye wòda akpe nɛ be egblɔe na ye. Egblɔ kpee be yeanɔ ŋute ale be yemagava da vo ma ke o. Masɔmasɔa tɔ ɖe afima, eye xɔlɔ̃ eveawo va le kplikplikpli abe tsã ene.

Medzɔa dzi na ame aɖeke be womase nu gɔme na ye o. Gake ne èɖe afɔ ɖesiaɖe si nàte ŋui be yeaɖe nya la me eye nètsɔ Ŋɔŋlɔawo me gɔmeɖose siwo nye lɔlɔ̃ kple tsɔtsɔke kpɔ nya la gbɔe la, anɔ bɔbɔe be nu nyuiwo nado tso eme na wò hã nenema ke.

[Etenuŋɔŋlɔ]

[Nɔnɔmetata siwo le axa 23]

Nu nyuiwo te ŋu dona tsoa eme ne míetsɔ lɔlɔ̃ kple tsɔtsɔke ƒe gbɔgbɔ ɖe nyawo mee