Womegblẽ Mí Ði Esi Wodo Míaƒe Xɔse Kpɔ O

Vicky nye nyɔnuvi sue dzetugbe aɖe—eƒe lãme sẽ, eƒe nu léa dzi na ame, eye wòzã. Ẽ, míaƒe dzidzɔ gba go esime míedzii le ƒe 1993 ƒe adame. Míenɔ du sue aɖe me le Sweden ƒe anyiehe, eye míekpɔa dzidzɔ.

GAKE esi Vicky xɔ ƒe ɖeka kple afã la, edze abe míaƒe agbe dome va nɔ gbegblẽm ene. Eƒe lãme menɔ kɔkɔm o hena ɣeyiɣi aɖe, eyata míekɔe yi kɔdzi. Míaŋlɔ ɣeyiɣi ma be gbeɖe o esime ɖɔkta la gblɔ na mí be mía vinyɔnuvia dze ʋumenugbagbeviɣidɔ si nu sẽ, si nye ɖevime kansa tɔgbe aɖe si gblẽa ʋumenugbagbeviɣiwo.

Esesẽ na mí be míase egɔme be dɔ sesẽ siae dze mía vinyɔnu suea dzi. Ðeko wòte dzesidede xexe si me wòge ɖo koe nye ma, gake eva dze ŋgɔ ku. Esi ɖɔkta la nɔ agbagba dzem be yeafa akɔ na mí la, egblɔ be yewoate ŋu ada dɔa to mɔ aɖe si wɔa dɔ nyuie dzi, si nye atikewo zazã kple ʋu geɖe dodo nɛ. Nya sia sese gatɔtɔ mí ɖe edzi.

Wodo Míaƒe Xɔse Kpɔ

Míelɔ̃ mía vinyɔnua vevie eye míedi be woawɔ atike nyuitɔ kekeake nɛ. Gake míeda asi ɖe ʋudodo ya dzi kura o. Míexɔ Mawu ƒe Nya, Biblia, si gblɔ eme kɔ ƒã be ele be Kristotɔwo ‘natsri ʋu’ la dzi se vevie. (Dɔwɔwɔwo 15:28, 29) Míenya hã be afɔku le ʋudodo ŋutɔ hã me. Ʋudodo wɔe be ame akpe geɖe xɔ dɔlélewo heku. Dɔdamɔnu si ko gali woawɔ nɛ enye esi xɔ asi ŋutɔ si me womazã ʋu le o. Esia mee míaƒe xɔse ta ʋiʋli dze egɔme le.

 Nukae míate ŋu awɔ? Míeƒo nu tso eŋu na Kɔdzi ƒe Nyatakakadɔwɔƒe si le Yehowa Ðasefowo ƒe alɔdzedɔwɔƒe si le Sweden. * Enumake woɖo faks ɖe kɔdzi vovovowo le Europa katã tsɔ nɔ kɔdzi kple ɖɔkta si alɔ̃ azã atike ada dɔa ʋumazãmazãe dim. Veviedodo kple lɔlɔ̃ si mía nɔvi Kristotɔwo ɖe fia le woƒe agbagbadzedze be woakpe ɖe mía ŋu me do ŋusẽ mí ŋutɔ. Womegblẽ mí ɖi le míaƒe xɔse ta ʋiʋli me o.

Le gaƒoƒo aɖewo ko megbe la, woke ɖe kɔdzi kple ɖɔkta aɖe ŋu le Homburg/Saar, Germany. Wowɔ ɖoɖo be míaɖo yameʋu ayi afima ŋkeke si kplɔe ɖo be woado Vicky kpɔ. Esime míeva ɖo la, mía nɔvi Kristotɔ siwo nye Yehowa Ðasefowo ƒe hame si le Homburg me tɔwo kple míaƒe ƒometɔ aɖewo nɔ afima hexɔ mí. Eye Kɔdzi Kadododzikpɔkɔmiti si le afima la teƒenɔla aɖe do dzaa na mí dzidzɔtɔe. Eyi kɔadzi kpli mí eye wòna kpekpeɖeŋu ɖesiaɖe si wòate ŋui la mí. Efa akɔ na mí esi míekpɔe be le dutadukɔ me hã la, gbɔgbɔmenɔviwo nɔ mía si siwo na kpekpeɖeŋu mí.

Esi míedo go Ðk. Graf le kɔadzi la, míegakpɔ akɔfafa. Esea nu gɔme ŋutɔ eye eka ɖe edzi na mí be yeawɔ nusianu si yeate ŋui ada dɔ na Vicky ʋumazãmazãe. Ne eƒe ʋumenugbagbevidzĩ me nuwo ɖiɖi ɖo gram 5 le desilita ɖeka me hã la, yelɔ̃ be yeayi edzi anɔ dɔa dam nɛ ʋumazãmazãe. Egblɔ hã be alesi wokpɔ dɔlélea kaba kple afɔ si woɖe hekplɔ Vicky va yewo gbɔ kabae la na mɔkpɔkpɔ li be woate ŋu ada dɔa nɛ dzidzedzetɔe. Egblɔ be esia enye zi gbãtɔ si yeazã atikewo ada dɔ si tɔgbe Vicky dze ʋumazãmazãe. Míeda akpe geɖe na Ðk. Graf hekpɔ dzidzɔ ɖe eŋu ɖe eƒe dzinɔameƒo kple tameɖoɖo kplikpaa be yeakpe ɖe mía ŋu ta.

Gakuxi

Biabia si do mo ɖa azɔe nye be, Aleke míawɔ axe Vicky ƒe kɔdzifewo? Míelulu esi wona míenya be dɔdada nɛ ƒe eve axɔ Germany mark 150,000 lɔƒo. Ga si nɔ mía si megogo ga ma kura o, ke hã ehiã be woadze dɔdada na Vicky gɔme enumake. Esi wònye míedzo le Sweden va le dɔ dam le Germany ta la, míate ŋu axɔ dumeviwo ƒe lãmesẽtakpɔkpɔ ƒe nugblẽfexega o. Eyata mía kple mía vinyɔnu sue si le dɔ lém enye si nɔ afima eye atike hã li woawɔ nɛ gake ga si le mía si made o.

Woxɔ na mí le kɔadzi esi wogblɔ na mí be woate ŋu adze dɔdada nɛ gɔme enumake ne míexe mark 20,000 hena ame nɔ megbe na mí de asi agbalẽ te be míaxe ga mamlɛa. Ga aɖe nɔ mía si le gadzraɖoƒe, eye le xɔlɔ̃wo kple ƒometɔwo ƒe kpekpeɖeŋu lɔlɔ̃tɔe me la, míete ŋu xe mark 20,000 la—gake aleke míawɔ axe ga mamlɛa?

Le esia me hã woɖo ŋku edzi na mí be womegblẽ mí ɖi le míaƒe xɔse ta ʋiʋli me o. Gbɔgbɔmenɔviŋutsu aɖe si míedze si ɣemaɣi o gblɔ be yeaxe ga susɔea. Gake megava hiã be míaxɔ ga si wòbe yeana mí dɔmenyotɔe la o elabena míete ŋu wɔ ɖoɖo bubuwo tsɔ xe fea.

Atikewɔla Bibi Dze Dɔ Gɔme

Wodze egɔme tsɔ atikewo nɔ dɔa dam. Ŋkekewo kple kwasiɖawo va yi. Nɔnɔmea sesẽna hetea ɖeɖi mía kple mía vinyɔnuvia ŋu ɣeaɖewoɣi. Ke hã, dzi dzɔa mí ŋutɔ eye míedaa akpe ɣesiaɣi si míekpɔ dzesi siwo fia be dɔa le kakam ɖe eme. Wotsɔ atikewo da dɔ nɛ ɣleti enyi sɔŋ. Dzidzenu suetɔ kekeake si Vicky ƒe ʋumenugbagbevidzĩ me nuwo ɖiɖi va ɖoe nye gram 6 le desilita ɖeka me, eye Ðk. Graf wɔ ɖe eƒe ŋugbedodoa dzi.

Ƒe ade kple edzivɔ va yi, eye dodokpɔ mamlɛ si wowɔ nɛ ɖee fia be ʋumenugbagbeviɣidɔ aɖeke megale eŋu o. Fifia enye nyɔnuvi kpɔdzidzɔ si ŋu dɔlélea ƒe dzesi aɖeke medzena le  o. Ẽ, ewɔ nuku be Vicky haya keŋkeŋ alea. Míenya be ɖevi geɖe siwo ŋu dɔléle sia ke le kuna togbɔ be wozãa atike tsɔ daa dɔ na wo hedoa ʋu na wo hã.

Míete ŋu ʋli míaƒe xɔse ta dzidzedzetɔe, gake míaƒe ƒometɔwo, nɔviŋutsu kple nɔvinyɔnu Kristotɔwo, kple atikewɔla bibiwoe kpe ɖe mía ŋu. Kɔdzi ƒe Nyatakakadɔwɔlawo kpe ɖe mía ŋu gaƒoƒo 24 gbesiagbe. Ðk. Graf kple eƒe hadɔwɔlawo zã woƒe aɖaŋu tsɔ kpe ɖe Vicky ŋu wòhaya. Le nyateƒe me la, míeda akpe geɖe ɖe nusiawo katã ta.

Wodo Ŋusẽ Míaƒe Xɔse

Gake míaƒe akpedada gãtɔ yi na mía Mawu, Yehowa, ɖe eƒe belélename lɔlɔ̃tɔe kple ŋusẽ si míekpɔna tsoa eƒe Nya, Biblia, me la ta. Ne míetrɔ kpɔ megbe la, míekpɔa nusi gbegbe míesrɔ̃ kple alesi gbegbe agbemenya sesẽ sia do ŋusẽ míaƒe xɔsee la dzea sii.

Fifia míaƒe dzimedidie nye be ƒomedodo kplikplikpli nakpɔtɔ anɔ mía kple Yehowa Mawu dome eye míafia asixɔxɔ si le agbenɔnɔ ɖe eƒe nudidiwo nu la mía vinyɔnua. Ẽ, míedi be míana gbɔgbɔmedomenyinu nyui aɖe nasu esi ale be wòanɔ agbe mavɔ le Paradiso si gbɔna me le anyigba sia dzi.—Ame aɖee ŋlɔe míeta.

[Etenuŋɔŋlɔ]