Ðe Nèle ‘Ɣeyiɣi Nyuitɔ Ƒlema’?

APOSTOLO Paulo xlɔ̃ nu ƒe alafa gbãtɔ me Kristotɔ siwo nɔ Efeso be: “Mikpɔ nyuie be, miazɔ pɛpɛpɛ; menye abe numanyamanyatɔwo ene o, ke boŋ abe nunyalawo ene, amesiwo [ƒlea ɣeyiɣi nyuitɔ, NW]; elabena ŋkekeawo nye vɔ̃.” (Efesotɔwo 5:15, 16) Nukatae nuxlɔ̃ame sia le vevie ɖo? Nya sia ŋuɖoɖo bia be míanya nɔnɔme si dze ŋgɔ Kristotɔwo le blemadu ma me.

Efeso xɔ ŋkɔ le hokpɔkpɔ si de du, agbegbegblẽnɔnɔ tɔŋku, nuvlowɔwɔ vivivo, kple gbɔgbɔyɔyɔ ƒomevi vovovowo me. Hekpe ɖe eŋu la, ele be Kristotɔ siwo le afima nawɔ aʋa kple xexeme dzixɔse siwo ku ɖe ɣeyiɣi ŋu. Helatɔ siwo menye Kristotɔwo o le Efeso la mexɔe se be ɖe ɣeyiɣi zɔna tẽ o. Hela xexemenunya fia wo be ne woku la, woyia edzi ganɔa dzɔdzɔm madzudzɔmadzudzɔe. Ne ame aɖe gblẽ eƒe ɣeyiɣi le agbenɔɣi ɖeka me la, agakpɔe le bubu me. Nukpɔsusu sia ate ŋu akpɔ ŋusẽ ɖe Efeso Kristotɔwo dzi ale be womagatsi dzi ɖe Yehowa ƒe nudzɔdzɔwo ƒe ɣeyiɣi ɖoɖi, si me eƒe ʋɔnudɔdrɔ̃ ƒe ɣeyiɣi ɖoɖi hã le, ŋu o. Eyata Paulo ƒe nuxlɔ̃ame be ‘woaƒle ɣeyiɣi nyuitɔ’ la sɔ.

Menye ɣeyiɣi ko gbadzaa ŋue Paulo nɔ nu ƒom le o. Helagbe me nya si wòzã la fia ɣeyiɣi ɖoɖi aɖe, ɣeyiɣi nyuitɔ si woatsɔ awɔ nanee. Paulo nɔ nu xlɔ̃m ƒe alafa gbãtɔ me Kristotɔwo be woawɔ ɣeyiɣi nyuitɔ, alo amenuveɣi si me wole fifia, la ŋudɔ le nunya me hafi enu nava yi eye Mawu ƒe amenuveve kple agbe mavɔ nunana nu nava yi na wo.—Romatɔwo 13:11-13; Tesalonikatɔwo I, 5:6-11.

Míawo hã míele ɣeyiɣi nyuitɔ ma tɔgbe aɖe me. Le esi Kristotɔwo nagblẽ amenuveɣi sia si magava akpɔ o ɖe xexeame ƒe dzidzɔkpɔkpɔ si nɔa anyi ɣeyiɣi kpui aɖe ŋu teƒe la, nunya anɔ eme na wo ne wozã ɣeyiɣi si le wo si le ‘anyinɔnɔ kɔkɔe kple mawusosroɖa dɔwo’ wɔwɔ me eye to esia wɔwɔ me woado ŋusẽ wo kple wo Wɔla, Yehowa Mawu, dome ƒomedodo.—Petro II, 3:11; Psalmo 73:28; Filipitɔwo 1:10.