Nyabiabia Siwo Tso Exlẽlawo Gbɔ
Nyabiabia Siwo Tso Exlẽlawo Gbɔ
Ɣekaɣie wokɔ “[Kɔkɔeƒewo ƒe Kɔkɔeƒe, NW]” la ŋu, abe alesi wogblɔe ɖi le Daniel 9:24 ene?
Daniel 9:24-27 nye nyagblɔɖi si ku ɖe “amegã, si wosi ami na”—si nye Kristo—ŋu. Eyata “Kɔkɔeƒewo ƒe Kɔkɔeƒe” la ŋu kɔkɔ si wogblɔ ɖi la meku ɖe Kɔkɔeƒewo ƒe Kɔkɔeƒe si le Yerusalem-gbedoxɔa me ŋu o. Ke boŋ nyagbɔgblɔ “Kɔkɔeƒewo ƒe Kɔkɔeƒe” la fia Mawu ƒe dziƒogbedoxɔ la—si nye dziƒo ƒe Kɔkɔeƒewo ƒe Kɔkɔeƒea—si le Yehowa ƒe dziƒo gbɔgbɔmegbedoxɔ gã la me. *—Hebritɔwo 8:1-5; 9:2-10, 23.
Ɣekaɣie Mawu ƒe gbɔgbɔmegbedoxɔa dze dɔwɔwɔ gɔme? De ŋugble le nusi dzɔ esime Yesu tsɔ eɖokui na be woanyrɔ ye le ƒe 29 M.Ŋ. me la ŋu kpɔ. Tso ɣeyiɣi ma dzi la, Yesu na Psalmo 40:7-9 me nyawo va eme. Apostolo Paulo ɖee fia emegbe be Yesu do gbe ɖa na Mawu be: “Vɔsawo kple nunanawo mèdi o, ke boŋ ŋutilã nèdzra ɖo nam.” (Hebritɔwo 10:5) Yesu nyae be Mawu ‘medi’ be woayi edzi atsɔ lãwo anɔ vɔ sam le Yerusalem-gbedoxɔa me o. Ðe eteƒe la, Yehowa dzra amegbetɔ ŋutilã deblibo ɖo ɖi na Yesu be wòatsɔ asa vɔe. Esime Yesu nɔ eƒe dzimedidiwo gblɔm la, eyi edzi be: “Kpɔ ɖa, megbɔna, agbalẽ me woŋlɔ nya ɖo le ŋutinye be, oo Mawu, wò lɔlɔ̃nu mawɔ!” (Hebritɔwo 10:7) Eye aleke Yehowa ɖo eŋui? Mateo ƒe Nyanyuia gblɔ be: “Ke esi [wonyrɔ, NW] Yesu vɔ la, edo go tso tɔa me enumake; eye kpɔ ɖa, dziƒowo ʋu nɛ, eye wòkpɔ Mawu ƒe [gbɔgbɔ] la le ɖiɖim abe akpakpa ene va edzi; eye kpɔ ɖa, gbe tso dziƒowo le gbɔgblɔm bena: Amesia enye vinye, si gbɔ nyemelɔ̃a nu lena o la, si dzea ŋunye!”—Mateo 3:16, 17.
Yehowa Mawu ƒe ŋudzedzekpɔkpɔ ɖe Yesu ƒe vɔsaŋutilã ŋu fia be woɖo vɔsamlekpui aɖe si lolo wu vɔsamlekpui ŋutɔŋutɔ si nɔ Yerusalem-gbedoxɔa me la anyi. Esia nye Mawu ƒe “lɔlɔ̃nu” ƒe vɔsamlekpui, alo ɖoɖo si dzi woato axɔ Yesu ƒe agbe abe vɔsa ene. (Hebritɔwo 10:10) Gbɔgbɔ kɔkɔe tsɔtsɔ si ami na Yesu la fia be fifia Mawu ɖo eƒe gbɔgbɔmegbedoxɔ ƒe ɖoɖo bliboa anyi. * Eyata wosi ami na Mawu ƒe dziƒonɔƒea le Yesu ƒe nyɔnyrɔxɔɣi, alo ɖoe anyi wònye “Kɔkɔeƒewo ƒe Kɔkɔeƒe” le gbɔgbɔmegbedoxɔ gã la ƒe ɖoɖoa me.
[Etenuŋɔŋlɔwo]
^ mm. 3 Ne èdi Mawu ƒe gbɔgbɔmegbedoxɔa ƒe akpa vovovoawo ŋuti numeɖeɖe la, kpɔ July 1, 1996, Gbetakpɔxɔ ƒe axa 14-19.
^ mm. 5 Wogblɔ nya sia le agbalẽ si nye Ðo To Daniel ƒe Nyagblɔɖi La! ƒe axa 195.
[Nɔnɔmetata si le axa 27]
Wosi ami na ‘Kɔkɔeƒewo ƒe Kɔkɔeƒea’ esime Yesu xɔ nyɔnyrɔ