‘Abi si Xɔlɔ̃ De Ame Ŋu’

APOSTOLO Paulo kpɔe be ehiã be yeaɖɔ ƒe alafa gbãtɔ me Kristotɔ siwo nɔ Galatia la ɖo le nanewo me. Ðewohĩ esi medi be dzi naku wo o ta ebia be: “Esi megblɔ nyateƒe na mi la, eyata mezu miaƒe futɔ mahã?”—Galatiatɔwo 4:16.

Esi Paulo ‘gblɔ nyateƒe’ na wo la, meva zu woƒe futɔ o. Le nyateƒe me la, enɔ nu wɔm le ɖekawɔwɔ me kple Biblia ƒe gɔmeɖose si nye: “Xɔlɔ̃ ƒe abidede ame ŋu medze vɔ̃ o.” (Lododowo 27:6) Enyae be nuxlɔ̃ame ate ŋu ana ŋu nakpe agɔdzelaa ya. Ke hã enya be nuxlɔ̃ame si dze si yemana nuvɔ̃wɔla o ate ŋu anye Yehowa Mawu ƒe lɔlɔ̃ maɖemaɖe fia eyama. (Hebritɔwo 12:5-7) Eyata esi Paulo nye xɔlɔ̃ wɔnuteƒe eye wòdia hamea ƒe nyonyo ɣesiaɣi ta la, medi be yeagbe nuxlɔ̃ame si ana woawɔ ɖɔɖɔɖo la nana wo o.

Egbea la, Yehowa Ðasefowo le dɔ si wode wo si be ‘woawɔ dukɔwo katã me nɔlawo ne woanye nusrɔ̃lawo, ahafia wo be woawɔ nusiwo katã Yesu Kristo ɖo’ la wɔm. Ne nyateƒe Kristotɔ siawo le dɔ sia wɔm la, wometɔa tsi Biblia ƒe nyateƒe siwo klo nu le alakpanufiafia kple nuwɔna siwo mesɔ be Kristotɔ nawɔ o dzi la o. (Mateo 15:9; 23:9; 28:19, 20; Korintotɔwo I, 6:9, 10) Le esi teƒe be woazu futɔ siwo wogbe la, wole eɖem fia boŋ be yewonye xɔlɔ̃ vavã siwo tsɔ ɖe le amewo me.

Mawu ƒe gbɔgbɔ ʋã hakpala la wòŋlɔ gɔmesesetɔe be: “Ne ame dzɔdzɔe ƒom la, lɔlɔ̃e; ne ehe to nam la, tamemi wònye, nye ta magbee o, nenye be, ele ewɔm atraɖi hã.”—Ps. 141:5.