Etsi Susu Me Nɛ

YEHOWA ÐASEFOWO kpea ta le dukɔ siwo me wole me le Kristotɔwo ƒe takpekpe gã kple viawo me ƒe sia ƒe. Wowɔa nusia be yewoaxɔ gbɔgbɔmenufiame ɖeviwo eye yewoade ha nyuiwo. Gake woƒe kpekpewo ƒe akpa bubuwo hã te ŋu tsia susu me na vavalawo.

Le kpɔɖeŋu me, le July 1999 me la, Ðasefo akpe geɖe kpe ta le Mozambique wɔ ŋkeke etɔ̃ “Mawu ƒe Nyagblɔɖinya” Nutome Gã Takpekpe tuameɖowo. Emae nye zi gbãtɔ na vavala geɖe siwo de takpekpe sia tɔgbe kpɔ. Menye nusiwo wose tso nuƒolanɔƒea koe wɔ dɔ ɖe wo dzi o ke nusiwo wokpɔ le teƒe bliboa hã.

Nya si nyɔnu aɖe si va takpekpea gblɔ le Maputo Takpexɔ mee nye si: “Nyemekpɔ teƒe dzeani sia tɔgbe kpɔ le nye agbe me katã o! Adzalẽ kple ahuhɔ̃ewo le tsileƒewo, eye afimawo ʋẽna lilili gɔ̃ hã. Ŋutifafa le afisiafi eye ɖeviwo ƒe dzrewɔwɔ ƒe ɣli aɖeke meɖina o. Eye màkpɔ ame aɖeke wòanɔ nɔvia tutum o! Mekpɔ sɔhɛ kpɔdzidzɔ siwo nɔ dze dedziƒonamewo ɖom. Alesi amesiame do awu le ɖoɖo nyui me ale gbegbe hã wɔ dɔ ɖe dzinye. Ɣebubuɣi si miagawɔ takpekpe la, makplɔ vinyewo ɖe asi eye maɖe nu me na srɔ̃nye wòakpɔ be ele be míade takpekpe sia.”

Nyateƒee, amewo dea dzesi Yehowa Ðasefowo ƒe anukwareɖiɖi, woƒe nuteƒewɔwɔ, kple woƒe dzadzɛnyenye. Nukatae Ðasefowo to vovo ɖo? Esi wodzea agbagba be yewoatsɔ nusi yewosrɔ̃na le Biblia me awɔ dɔe le nyateƒe me tae. Màde woƒe takpekpe si woawɔ le miaƒe dukɔa me alo woƒe kwasiɖa sia kwasiɖa kpekpe siwo wowɔna le woƒe Fiaɖuƒe Akpata me ne wò ŋutɔ nàkpɔe ɖa oa?

[Nɔnɔmetata si le axa 32]

ZAMBIA

[Nɔnɔmetata si le axa 32]

KENYA

[Nɔnɔmetata si le axa 32]

MOZAMBIQUE