“Ðe Mawu Tsɔa Dzo Hea Toe Na Amewo Le Hell Nyateƒea?”

“Mawuŋununyahehe xɔmee mielea?”

Biabia sia ɖi ɖe Joel kple Carl ŋutɔ. Ðekakpui eveawo—siwo nye lɔlɔ̃nu faa dɔwɔlawo le Yehowa Ðasefo ƒe dɔwɔƒegã le Brooklyn, New York—nɔ agbalẽwo me tsam le agbalẽdzraƒe aɖe si tsɔ ɖe wo gbɔ. Esi Joel nɔ ŋku lém ɖe Biblia ƒe nyadigbalẽwo ŋu la, Carl hã nɔ numedzodzro aɖe si wòwɔ kple ame aɖe le gbeadzi ŋu nya gblɔm nɛ. Esi ŋutsu aɖe si tɔ ɖe wo gbɔ lɔƒo se dzeɖoɖo sia ƒe akpa aɖe la, eʋãe wòte ɖe wo ŋu.

Ke hã ŋutsua tsi dzi ɖe nya aɖe si nɔ fu ɖem nɛ me kɔkɔ ŋu tsɔ wu be wòanya nenye mawuŋununyahehe aɖe xɔmee ɖekakpui eveawo le. Eɖe nu me be: “Yudatɔ menye eye xɔ̃nye Kristotɔ aɖewo gblɔ nam be woatsɔ dzo ahe toe nam le hell elabena Yudatɔwo gbe Yesu. Nya sia ɖea fu nam ŋutɔ. Tohehe sia si tso lɔlɔ̃ Mawu gbɔ la metrɔ nam tututu o. Ðe Mawu tsɔa dzo hea to na amewo le hell nyateƒea?”

Joel kple Carl gblɔ na ŋutsu sia si di vevie be yease nya sia gɔme la be nusrɔ̃vi siwo léa fɔ ɖe Biblia sɔsrɔ̃ ŋue yewonye. Wofiae tso Ŋɔŋlɔawo me be ame kukuwo meganyaa naneke o eye alɔ̃ ko dɔm wole le ku me hele tsitretsitsi lalam. Eyata womekpea fu alo sea veve aɖeke le dzomavɔ me o. (Psalmo 146:3, 4; Nyagblɔla 9:5, 10; Daniel 12:13; Yohanes 11:11-14, 23-26) Ŋutsua tsɔ eƒe adrɛs na Joel kple Carl le dzeɖoɖo aɖabaƒoƒo 45 megbe hebia be woaɖo nyatia ŋuti nyatakaka bubuwo ɖe ye.

Ne dzo funyafunyawɔƒee hell nye la, ɖe ame aɖe abia kpɔ be woaɖo ye ɖe afima? Ke hã blemafofo Hiob, esime wònɔ didim be yeaƒo asa na yeƒe fukpekpe la bia be: “Oo, ne naxaɣlam ɖe tsiẽƒe [hell Douay Version], eye nadzram ɖo, vaseɖe esime wò dɔmedzoe nu nafa; naɖo ɣeyiɣi nam, eye naɖo ŋku dzinye emegbe ɖe!” (Hiob 14:13) Eme kɔ ƒã be, Hiob mexɔe se be funyafunyawɔƒee hell nye o. Ke ɖe wòdi be woakpɔ ye ta le afima. Ku nye agbemanɔmanɔ eye hell si wozã le Biblia me nye ameƒomea katã ƒe yɔdo.

Ne èdi be yeanya nusi dzɔna ɖe mía dzi ne míeku kple mɔkpɔkpɔ si li le ku megbe ŋuti nyatakaka bubuwo kpee la, míele kpewòm dzidzɔtɔe be nàwɔ mɔnuɖoɖo si gbɔna la ŋudɔ.