Exɔ Asi Wu Sika Nyuitɔ

WODINA sika vevie le eƒe nyonyo kple alesi wòte ŋu nɔa anyi didinae ta. Nusita wodinɛ vevie nye alesi wòklẽna eye meƒoa ɖi o ɣeyiɣi didi aɖe ŋutɔ ta. Susu si ta wònɔa nenemae enye alesi tsi, ɔksidzin kple sulfur kpakple nu bubu geɖe mete ŋu gblẽa nu le eŋu bɔbɔe o. Sikanu siwo ŋu woke ɖo le ze siwo tsi tome kple le teƒe bubuwo la kpɔtɔ klẽna le ƒe alafa geɖewo megbe.

Gake enyo be míade dzesii be Biblia gblɔ be nane si ŋu viɖe le, si xɔ “asi geɖe wu sika, si gblẽna, wònye wodoe kpɔ kple dzo hafi” hã li. (Petro I, 1:7) Sika si ‘wodo kpɔ,’ alo esi ŋu wodza to mɔ bubuwo nu ƒe keklẽ ate ŋu aɖo alafa memama 99.9. Ke hã esi ŋu wodza alea gblẽna, alo lólona ne wodee hydrochloric acid ƒe dzidzenu etɔ̃ si wotsaka kple nitric acid ƒe dzidzenu ɖeka me. Esia ta Biblia gblɔe be ‘sika gblẽna’ wòsɔ kple dzɔdzɔmeŋutinunya.

Gake nyateƒe Kristotɔwo ƒe xɔse ‘xɔa luʋɔ ɖe agbe.’ (Hebritɔwo 10:39) Amewo ate ŋu awu amesi si xɔse sẽŋu le abe alesi wowu Yesu Kristoe ene. Gake wodo ŋugbe sia na amesiwo si xɔse vavãtɔ le be: “Nanye nuteƒewɔla yiɖase ɖe ku me, eye mana agbefiakuku wò.” (Nyaɖeɖefia 2:10) Amesiwo ku le xɔse me gakpɔtɔ le susu me na Mawu eye wòafɔ wo ɖe tsitre. (Yohanes 5:28, 29) Sika agbɔsɔsɔme aɖeke mate ŋu awu nusia o. Le susu sia ta, asixɔxɔ adodoe le xɔse ŋu wu sika. Ke hã la, hafi asixɔxɔ sia nanɔ xɔse ŋu la ele be woadoe kpɔ. Le nyateƒe me, xɔse sia ‘si wodo kpɔ’ ŋue Petro gblɔ le be exɔ asi geɖe wu sika. Adzɔ dzi na Yehowa Ðasefowo be woakpe ɖe ŋuwò nàsrɔ̃ Biblia be nàtu Mawu vavã, Yehowa, kple Via Yesu Kristo ŋuti dzixɔse sẽŋu ɖo ahalé eme ɖe asi. Esia ŋue Yesu gblɔ le be enaa “agbe mavɔ.”—Yohanes 17:3.