Mɔxenu Siwo Ado Kplamatse Wò Gbɔgbɔmeŋgɔyiyi Dzi Ðuɖu!

TSƆE be ède dzo wò ʋu me eye wòxɔ gake ʋua gbe zɔzɔ. Nanee gblẽ le eŋua? Ao, ke boŋ kpe gã aɖee xe mɔ na ʋufɔtiawo dometɔ ɖeka. Kpea ɖeɖeɖa koe nye nusi hiã hafi ʋua nate ŋu aho.

Nɔnɔme sia sɔ kple amesiwo le Biblia srɔ̃m kple Yehowa Ðasefowo siwo mɔxenuwo ate ŋu ahe woƒe gbɔgbɔmeŋgɔyiyi ɖe megbe la tɔ. Le kpɔɖeŋu me, Yesu xlɔ̃ nu be nuwo abe “xexeame ƒe agbagbadzedze kple kesinɔnuwo ƒe beble” ene ate ŋu ‘avu tsyɔ nyateƒenya la dzi’ eye wòaxe mɔ na eƒe tsitsi.—Mateo 13:22.

Le ame bubuwo gome la, numame si xɔ aƒe ɖe wo me alo gbɔdzɔgbɔdzɔwo xea mɔ na woƒe ŋgɔyiyi. Biblia ƒe gbedasia dzɔa dzi na Japantɔ aɖe si ŋkɔe nye Yutaka vevie, ke hã la, tsatsadada nye kuxi gã aɖe nɛ. Edze agbagba zi geɖe be yeaɖu numame gbegblẽ sia dzi gake gbeɖegbeɖea koe. Eƒe numamea gblẽ kesinɔnu geɖe dome nɛ, ena wòbu eƒe aƒe etɔ̃, bubu si wotsɔna nɛ le ƒomea me, kple bubu si le eya ŋutɔ ŋu. Ðe wòate ŋu aɖe mɔxenu sia ɖa eye wòava zu Kristotɔa?

Alo bu nyɔnu aɖe si ŋkɔe nye Keiko ŋu kpɔ. To Biblia ƒe kpekpeɖeŋu  me la, ete ŋu ɖe asi le nɔnɔme gbegblẽ siwo nɔ esi siwo nye trɔ̃subɔsubɔ, agbegbegblẽnɔnɔ, kple afakaka ŋu. Gake Keiko gblɔ be: “Atamanono nye nye mɔxenu gãtɔ. Medze agbagba be madzudzɔ gake nyemete ŋui o.”

Nenema ke mɔxenu aɖe si adze abe womate ŋu aɖe ɖa o ene ate ŋu axe mɔ na wò ŋgɔyiyiwɔwɔ. Nuka kee wòɖanye o, kakaɖedzi nenɔ asiwò be àte ŋu aɖu edzi to Mawu ƒe kpekpeɖeŋu me.

Ðo ŋku nuxlɔ̃amenya siwo Yesu gblɔ na eƒe nusrɔ̃lawo esi womete ŋu nya gbɔgbɔ vɔ̃ do goe le ame aɖe si nɔ kpeŋuidɔ lém la me o dzi. Esi Yesu te ŋu wɔ nusi womete ŋu wɔ o megbe la, egblɔ na wo be: “Ne xɔse le mia si abe logoku ene la, miagblɔ na to sia bena: Te ɖa tso afisia nayi afimɛ, eye ate ayi, eye naneke mele miaƒe ŋutete wu ge o.” (Mateo 17:14-20; Marko 9:17-29) Ẽ, kuxi si adze na mí abe to gã aɖe ene maɖi naneke na Wɔla ŋusẽkatãtɔ ya o.—Mose I, 18:14; Marko 10:27.

Dzesidede Ŋgɔyiyi ƒe Mɔxenuwo

Hafi nàte ŋu aɖu wò mɔxenuwo dzi la, ele be nàde dzesi nusiwo wonye gbã. Aleke nàte ŋu awɔ ade dzesi wo? Ɣeaɖewoɣi miaƒe hamea me tɔ aɖe, eɖanye hamemegã alo ame si le Biblia srɔ̃m kpli wò o, ate ŋu ahe wò susu ayi nane dzi. Le esi nàdo dziku ɖe nuxlɔ̃ame ma si me lɔlɔ̃ le ŋu teƒe la, bɔbɔ ɖokuiwò eye ‘nàɖo to amehehe ne nàdze nunya.’ (Lododowo 8:33) Le ɣebubuɣiwo la, àte ŋu ade dzesi wò gbɔdzɔgbɔdzɔwo to Biblia sɔsrɔ̃ me. Nyateƒee, Mawu ƒe nya la “le agbe, eye wòsẽa ŋu.” (Hebritɔwo 4:12) Biblia kple Biblia-srɔ̃gbalẽwo xexlẽ ate ŋu aɖe wò tamesusu, seselelãme, kple didi goglotɔwo kekeake ɖe go. Ekpena ɖe ŋuwò be nàtsɔ Yehowa ƒe dzidzenu kɔkɔwo ado ɖokuiwò kpɔ. Eɖea nusiwo ate ŋu axe mɔ na wò gbɔgbɔmeŋgɔyiyi fiana eye wònaa nèdea dzesi wo.—Yakobo 1:23-25.

Le kpɔɖeŋu me, tsɔe be gbɔdɔdɔ ƒe nuwɔnawo ŋu bubu nye numame si me Biblia-nusrɔ̃vi aɖe ƒo eɖokui ɖo tsã. Asesẽ nɛ be wòabui be nane gblẽ le nusia wɔwɔ ŋu, eye be yemele naneke wɔm ŋutɔŋutɔ o. Le eƒe nusɔsrɔ̃a me la, eva do go nya siwo le Yakobo 1:14, 15 si gblɔ be: “Ke wotea amesiame kpɔna, ne eya ŋutɔ ƒe nudzodzro henɛ, eye wòblenɛ emegbe ne nudzodzro la fɔ fu la, edzia nuvɔ̃; ke ne nuvɔ̃ la tsi vɔ la, edzia ku.” Fifia ekpɔ alesi gbegbe agbe ma tɔgbe nɔnɔ ate ŋu agblẽ nu le eƒe ŋgɔyiyiwɔwɔ ŋu! Aleke wòawɔ aɖe mɔxenu sia ɖa?—Marko 7:21-23.

Mɔxenuwo Dzi Ðuɖu

Ðewohĩ to Kristotɔ tsitsi aɖe ƒe kpekpeɖeŋu dzi la, nusrɔ̃via ate ŋu atsɔ Watch Tower Publications Index * awɔ numekuku geɖe le Mawu ƒe Nya la ŋu. Le kpɔɖeŋu me, ta si nye “Tamesusuwo” akplɔ nusrɔ̃via ayi nyati vovovo siwo ƒo nu tso alesi wòawɔ aɖu tame gbegblẽwo bubu dzi. Nyati siawo ƒo nu tso Biblia ƒe kpukpui siwo kpena ɖe ame ŋu abe Filipitɔwo 4:8 ene si gblɔ be: “Nusiwo nye nyateƒe, nusiwo dzea bubu, nusiwo le dzɔdzɔe, nusiwo le dzadzɛ, nusiwo dze na lɔlɔ̃, nusiwo dze na gbɔgblɔ, ne nudzeamewɔwɔ aɖe li, eye ne kafukafu aɖe li la, misusu nusiawo ŋuti!” Nyateƒee, ele be woatsɔ nusiwo le dzadzɛ hetua ame ɖo aɖo agbegbegblẽnɔnɔ ŋu bubu teƒe!

Ðikeke mele eme o be le eƒe numekukua wɔwɔ me la, nusrɔ̃via ava ke ɖe Biblia me gɔmeɖose bubu siwo akpe ɖe eŋu be kuxia nagado gã ɖe edzi o ŋu. Le kpɔɖeŋu me, Lododowo 6:27 kple Mateo 5:28 xlɔ̃ nu le alesi woagatsɔ nya siwo nyɔa gbɔdɔdɔ ɖe ame me aƒo ɖi ame ƒe susui o ŋu. Hakpala la do gbe ɖa be: “Ðe nye ŋku ɖa le nu dzodzrowo kpɔkpɔ ŋu!” (Psalmo 119:37) Ke hã Biblia ƒe kpukpui siawo ɖeɖe xexlẽ mesɔ gbɔ o. Nunyala la gblɔ be: “Ame dzɔdzɔe ƒe dzi bua tame, ne wòaɖo nya ŋu.” (Lododowo 15:28) Ŋugbledede menye le nusiwo ŋu Mawu de se ɖo ko o ke le nusita wòdee ɖo hã ana gɔmesese deto nasu nusrɔ̃via si le nunya kple viɖe siwo le Yehowa ƒe mɔwo ŋu.

 Mlɔeba la, ele na amesi le kutri kum be yeaɖu nusiwo le mɔ xem na yeƒe ŋgɔyiyiwɔwɔ be wòabia Yehowa ƒe kpekpeɖeŋu faa. Esɔ alea, elabena Mawu nya míaƒe wɔwɔme be míede blibo o eye be kewɔe míenye. (Psalmo 103:14) Gbedodoɖa na Mawu madzudzɔmadzudzɔe hena eƒe kpekpeɖeŋu biabia, tsɔ kpe ɖe agbagbadzedze vevie be woagabu agbegbegblẽnɔnɔ ƒe susuwo ŋu o ava tse ku nyuiwo mlɔeba—si nye dzitsinya dzadzɛ si womedo agba na o.—Hebritɔwo 9:14.

Mègana Ta O

Nɔnɔme ka kee nèle avu wɔm kpli o, nyae be àte ŋu agbɔdzɔ ɣeaɖewoɣi. Ne edzɔ alea la, esɔ be ase dziɖeleameƒo kple kpododonu ƒe seselelãme le ɖokuiwò me godoo. Gake ɖo ŋku Galatiatɔwo 6:9 ƒe nya dzi be: “Migana ɖeɖi nate mía ŋu le nu nyui wɔwɔ me o; elabena ne míegbɔdzɔ le nu nyui wɔwɔ me o la, míaŋe nu le ye ŋutɔ ƒe azãgbe la dzi.” Mawu subɔla wɔnuteƒewo abe Dawid kple Petro ene to nɔnɔme ma tɔgbe me. Gake womena ta o. Woxɔa aɖaŋuɖoɖo ɖokuibɔbɔtɔe eye wowɔ tɔtrɔwo heɖee fia be yewonye Mawu subɔla wɔnuteƒewo. (Lododowo 24:16) Togbɔ be Dawid wɔ vodadawo hã la, Yehowa yɔe be “ŋutsu si dze nye dzi ŋu, amesi lawɔ nye lɔlɔ̃nu katã.” (Dɔwɔwɔwo 13:22) Petro hã ɖe asi le eƒe vodadawo ŋu eye wòva zu sɔti aɖe le Kristo-hamea me.

Egbea ame geɖewo hã kpɔ dzidzedze le mɔxenu siawo tɔgbe dzi ɖuɖu me. Yutaka si míeyɔ le nyati sia ƒe gɔmedzedzea me lɔ̃ wowɔ Biblia-nusɔsrɔ̃ kplii. Egblɔ be: “Yehowa ƒe kpekpeɖeŋu kple yayra le nye afɔɖeɖe ɖesiaɖe me kpe ɖe ŋunye be mete ŋu ɖu tsatsadada ƒe kuxia dzi. Mekpɔ dzidzɔ geɖe esi mekpɔ Yesu ƒe nyawo ƒe nyateƒenyenye—be xɔse ate ŋu ana woaɖe ‘towo’ ɖa.” Le ɣeyiɣi aɖe megbe la, Yutaka va zu subɔsubɔdɔwɔla le hamea me.

Ke le Keiko si atamanono zu numame na gome ya ɖe? Nɔvinyɔnu si srɔ̃ nu kplii do susua ɖa be wòaxlẽ Nyɔ! ƒe nyati vovovo siwo ku ɖe atamanono ŋu. Keiko klã nya siwo le Korintotɔwo II, 7:1 ɖe eƒe ʋu me be wòanye ŋkuɖodzinu nɛ gbesiagbe be wòanɔ dzadzɛ le Yehowa ŋkume. Ke hã la, mete ŋu dzudzɔ o. Keiko gblɔ be: “Dzi ɖe le ƒonye ale gbegbe. Eyata mebia nusi tututu dim menɔ be mawɔ la ɖokuinye—Yehowae medi be masubɔ loo alo Satana yea?” Esi wònya tso nya me be Yehowae yedi be yeasubɔ ko la, edo gbe ɖa veviedodotɔe hebia eƒe kpekpeɖeŋu. Egblɔ be: “Ewɔ nuku nam be medzudzɔ atamanono eye nyemese veve boo aɖeke o. Ðeko wòvem be nyemetso nya me kaba o.”

Wò hã ate ŋu akpɔ dzidzedze le mɔxenu siwo anye kplamatsedonu na wò ŋgɔyiyiwɔwɔ dzi ɖuɖu me. Zi alesi nèna wò tamesusu, dzimedidiwo, nyawo kple nuwɔnawo vawɔ ɖeka kple Biblia ƒe dzidzenuwo la, zi nenemae bubudedeameɖokuiŋu kple kakaɖedzi ava su asiwòe. Dzidzɔ kple dzideƒo asu nɔviwòŋutsu kple nɔviwònyɔnu kpakple wò ƒometɔwo siwo le hadede kpli wò me si. Vevietɔ wu la, àva do ŋusẽ ƒomedodo si le wò kple Yehowa Mawu dome. Edo ŋugbe be ‘yeaɖe nukikli siwo anɔ mɔ me na eƒe ame’ si le dodom le Satana ƒe ŋusẽkpɔaɖemedzi te. (Yesaya 57:14) Eye dzi nenɔ ƒowò be agbagba siwo nàdze le mɔxenu siwo nye kplamatsedonu ɖeɖeɖa na wò gbɔgbɔmeŋgɔyiyi la ana Yehowa nayra wò geɖe.

[Etenuŋɔŋlɔ]

[Nɔnɔmetata si le axa 28]

Yesu do ŋugbe be woate ŋu aɖu mɔxenu siwo le abe to ene dzi ne xɔse le mía si

[Nɔnɔmetata si le axa 30]

Biblia xexlẽ doa ŋusẽ mí le agbagbadzedze be míaɖu gbɔgbɔ me gbɔdzɔgbɔdzɔwo dzi me