Na Wò Ŋgɔgbedede Nadze Ƒã
Na Wò Ŋgɔgbedede Nadze Ƒã
“De ŋugble le nusiawo ŋu; ƒo ɖokuiwò ɖe wo me, bene wò ŋgɔgbedede nadze ƒã le amewo katã ŋku me.”—TIMOTEO I, 4:15, NW.
1. Aleke nàte ŋu awɔ anya ɣeyiɣi si me atikutsetse aɖe ɖi woaɖu?
KPƆ atikutsetse si vivia nuwò ŋutɔ—eɖanye atɔ́, peya, mango, alo bubu aɖe—le susu me ɖaa. Àte ŋu anya ɣeyiɣi si me wòɖi hebɔbɔna be woaɖua? Àte ŋu anyae bɔbɔe. Eƒe ʋeʋẽ, amedede, kple alesi wòbɔbɔe gblɔna na wò be nu vivi aɖe le wò lalam. Ne eƒe sue aɖe nya ɖo nume na wò ko la, woakpɔe be nu vivi aɖe ka asiwò. Nukae nyo ale! Nukae vivi ale! Enaa nèkpɔa dzidzɔ hesea vivi geɖe ŋutɔ.
2. Aleke tsitsi dzena wokpɔnae, eye ŋusẽ kae wòkpɔna ɖe ame ŋutɔ ƒe ƒomedodowo dzi?
2 Nudzɔdzɔ bɔbɔe dodzidzɔname sia tɔgbe dzɔna le agbenɔnɔ ƒe akpa bubuwo me. Le kpɔɖeŋu me, abe alesi wòle le atikutsetse ƒe ɖiɖi gome ene la, ame ƒe tsitsi le gbɔgbɔ me hã dzena le mɔ vovovowo nu. Míekpɔa alesi ame tsii la dzea sii ne amesia ɖe nugɔmesese, sidzedze, nunya kple bubuawo fia. (Hiob 32:7-9) Le nyateƒe me la, enyea dzidzɔ be míade ha ahawɔ dɔ kple amesiwo ɖea nɔnɔme siawo fiana le woƒe nɔnɔmewo kple nuwɔnawo me.—Lododowo 13:20.
3. Nukae alesi Yesu ɖɔ eŋɔlimetɔwo ɖe fia le tsitsi ŋu?
3 Le go bubu me la, ame ate ŋu atsi le ƒe me, gake alesi wòƒoa nu hewɔa nui aɖee fia be metsi le seselelãme kple gbɔgbɔ me gome o. Le kpɔɖeŋu me, esime Yesu Kristo nɔ nu ƒom tso dzidzime dzego si nɔ anyi le eŋɔlime ŋu la, egblɔ be: “Yohanes va, meɖua nu o, menoa nu hã o, eye wogblɔ bena: Gbɔgbɔ vɔ̃ le eme. Amegbetɔvi la va, ɖua nu, noa nu hã, eye wogblɔ bena: Kpɔ ɖa, amesia enye nutsuɖula kple ahatsunola.” Togbɔ be amesiawo tsi le ŋutilã gome hã la, Yesu gblɔ be wowɔ nu abe “ɖevi” ene—wometsi o. Eyatae wògblɔ kpee be: “Nunya la eƒe dɔwɔwɔ tso afia nɛ.”—Mateo 11:16-19.
4. Mɔ kawo nue ŋgɔgbedede kple tsitsinyenye dzena le?
4 Míate ŋu akpɔe le Yesu ƒe nyawo me be ne nunya vavã—si nye tsitsi ƒe dzesi vevi aɖe—le ame si la, edzena le dɔ siwo wòwɔna kple nusiwo dona tsoa eme la me. Kpɔ aɖaŋu si apostolo Paulo ɖo na Timoteo ku ɖe esia ŋu la ɖa. Esi Paulo yɔ nusiwo wòle be Timoteo nadi vevie vɔ la, egblɔ be: “De ŋugble le nusiawo ŋu; ƒo ɖokuiwò ɖe wo me, bene wò ŋgɔgbedede nadze ƒã le amewo katã ŋku me.” (Timoteo I, 4:15, NW) Ẽ, Kristotɔ ƒe ŋgɔgbedede aɖo tsitsinyenye gbɔ ‘dzena ƒã,’ alo dzena nyuie wokpɔna. Abe akaɖi si le keklẽm ene la, Kristotɔ ƒe tsitsi menye nɔnɔme si nɔa ememe alo ɣlana o. (Mateo 5:14-16) Eyata míade ŋugble le mɔ vevi eve siwo nu ŋgɔgbedede kple tsitsinyenye ate ŋu adze le: (1) tsitsi le sidzedze, nugɔmesese, kple nunya me; (2) gbɔgbɔa ƒe kutsetsewo ɖeɖefia.
Ðekanyenye le Xɔse Kple Sidzedze Me
5. Aleke woate ŋu aɖɔ tsitsinyenyee?
5 Nyagɔmeɖegbalẽ akpa gãtɔwo ɖɔa tsitsinyenye be tsitsi bliboe, be woatsi keŋkeŋ, eye be woaɖo nɔnɔme mamlɛa alo dzidzenu si wodi la gbɔ. Míegblɔ do ŋgɔ be ne atikutsetse aɖe tsi nyuie eye eƒe dzedzeme, amadede, ʋeʋẽ, kple vivi ɖo afisi wòadzro ame ko hafi woate ŋu agblɔ be etsi alo ɖi. Eyata tsitsinyenye de sɔsɔ ge kple nyonyo, be woade keŋkeŋ, alo ade blibo gɔ̃ hã.—Yesaya 18:5; Mateo 5:45-48; Yakobo 1:4.
6, 7. (a) Nukae fia be Yehowa tsɔ ɖe le egbɔkpɔkpɔ be ye subɔlawo katã nawɔ ŋgɔyiyi aɖo gbɔgbɔmetsitsinyenye gbɔ me vevie? (b) Nukae tsitsi le gbɔgbɔme do ƒome kplikplikpli kpli?
6 Yehowa Mawu tsɔ ɖe le egbɔkpɔkpɔ be ye subɔlawo katã nayi ŋgɔ aɖo gbɔgbɔmetsitsinyenye gbɔ me vevie. Be esia nate ŋu ava eme nɛ la, ena nu wɔnukuwo Kristo-hamea. Apostolo Paulo ŋlɔ ɖo ɖe Kristotɔ siwo le Efeso be: “Eya ke ɖo ame aɖewo wonye apostolowo, eye ame aɖewo hã nye nyagblɔɖilawo, eye ame aɖewo hã nye nyanyuiegblɔlawo, eye ame aɖewo hã nye kplɔlawo kple nufialawo, bene woadzra ame kɔkɔewo ɖo hena subɔsubɔ ƒe dɔwɔwɔ hena Kristo ƒe ŋutilã tutu, halase esime mí katã míade Mawuvi la dzixɔse kple sidzedze ƒe ɖekanyenye la gbɔ, azu ŋutsu blibo, eye míade Kristo ƒe tsitsime blibo la ƒe dzidzenu la gbɔ, bene míaganye ɖevi, siwo nufiafia ƒe ya sia ya ƒona yina gaƒona gbɔna, eye wònyama wo to amewo ƒe beble la me to aɖaŋu vɔ̃, si nu sẽ la me, le nudadafiafia ƒe amebeblemɔ la nu o.”—Efesotɔwo 4:11-14.
7 Le kpukpui siawo me la, Paulo ɖe eme be susu siwo tae Mawu na gbɔgbɔmenu gbogbo siawo hamea dometɔ aɖewo enye be ameawo katã ‘nade dzixɔse kple sidzedze ƒe ɖekanyenye la gbɔ,’ azu “ŋutsu blibo,” eye ‘Kristo ƒe tsitsime blibo ƒe dzidzenu’ nasu wo si. Ɣemaɣi ko hafi aʋatso nukpɔsusu kple nufiafiawo ƒe ya magate ŋu aƒo mí ayi agbɔe abe ɖeviwo ene o. Eyata míekpɔ ƒomedodo kplikplikpli si le ŋgɔyiyi aɖo Kristotɔ ƒe tsitsinyenye gbɔ kple ‘Mawuvi la dzixɔse kple sidzedze ƒe ɖekanyenye la gbɔ dede’ dome. Nya vevi ʋɛ aɖewo le Paulo ƒe aɖaŋuɖoɖoa me si wòanyo be míaxɔ ade dzime.
8. Nukae dzixɔse kple sidzedze ƒe “ɖekanyenye” gbɔ ɖoɖo bia?
8 Gbã la, esi wònye be ele be woalé “ɖekanyenye” me ɖe asi ta la, ele be Kristotɔ tsitsi nawɔ ɖeka kple haxɔsetɔwo bliboe vevietɔ le dzixɔse kple sidzedze gome. Mele be wòado eya ŋutɔ ƒe nukpɔsusuwo ɖe ŋgɔ alo ate tɔ ɖe wo dzi loo alo alé eya ŋutɔ ƒe nukpɔsusuwo le Biblia gɔmesese ŋu me ɖe asi goŋgoŋ o. Ðe eteƒe la, ekana ɖe nyateƒe si Yehowa Mawu toa Via, Yesu Kristo, kple “dɔla nuteƒewɔla kple aɖaŋudzela” dzi ɖena fiana la dzi bliboe. Ne míeyi edzi ɖu gbɔgbɔmenu si wonaa mí “le ɣeyiɣi nyui dzi”—to Kristotɔwo ƒe agbalẽwo, kpekpewo, takpekpe suewo kple gãwo dzi—la, míate ŋu aka ɖe edzi be míatu “ɖekanyenye” ɖo kple Kristotɔ haxɔsetɔwo le xɔse kple sidzedze me.—Mateo 24:45.
9. Ðe nyagbɔgblɔ ‘dzixɔsea’ si Paulo zã le eƒe lɛta si wòŋlɔ ɖo ɖe Efesotɔwo la me.
9 Evelia, nyagbɔgblɔ ‘dzixɔsea’ mefia kakaɖedzi si Kristotɔ ɖesiaɖe gblɔna be ele ye si o, ke boŋ míaƒe xɔse blibo la katã, eƒe “kekeme kple didime kple goglome kple kɔkɔme.” (Efesotɔwo 3:18; 4:5; Kolosetɔwo 1:23; 2:7) Le nyateƒe me la, aleke Kristotɔ ate ŋu awɔ ɖeka kple haxɔsetɔwo ne ‘xɔsea’ ƒe akpa aɖewo ko dzie wòka ɖo alo lɔ̃ ɖo? Esia fia be mele be Biblia ƒe gɔmedzenufiafiawo ɖeɖeko nyanya alo sidzedze nyateƒea afã kple afã alo ɖewoɖewoe nasɔ gbɔ na mí o. Ðe eteƒe la, ele be míadi vevie be míawɔ nusiwo katã Yehowa na mí to eƒe habɔbɔa dzi la ŋudɔ atsɔ aku eƒe Nyaa me tsitotsito. Ele be míadze agbagba ake ɖe Mawu ƒe lɔlɔ̃nu kple tameɖoɖo ŋu gɔmesese vavãtɔ ŋu alesi míate ŋui. Esia bia dzigbɔɖi tsɔtsɔ axlẽ Biblia kple Biblia-srɔ̃gbalẽwo ahasrɔ̃ wo, gbedodoɖa na Mawu hena kpekpeɖeŋu kple mɔfiafia, Kristotɔwo ƒe kpekpewo dede edziedzi, kple gomekpɔkpɔ le Fiaɖuƒegbeƒãɖeɖe kple nusrɔ̃lawo wɔwɔ ƒe dɔa me bliboe.—Lododowo 2:1-5.
10. Gɔmesese kae le nya siwo nye “halase esime mí katã míade,” si wozã le Efesotɔwo 4:13 la ŋu?
10 Etɔ̃lia, Paulo tsɔ nya siwo nye “halase esime mí katã míade,” ɖo ŋgɔe na taɖodzinu etɔ̃a ɖɔɖɔ. Biblia ƒe mɔfiagbalẽ aɖe ɖe nyagbɔgblɔ si nye “mí katã” la gɔme be “menye wo katã ɖekaɖekae, vovovoe o, ke boŋ amesiawo katã ƒe ƒuƒoƒo.” Ne míagblɔe bubui la, ele be mía dometɔ ɖesiaɖe nadze agbagba alesi dze be wòaɖo Kristotɔ ƒe tsitsinyenye ƒe taɖodzinua gbɔ kple nɔviwo ƒe habɔbɔ bliboa. The Interpreter’s Bible gblɔ be: “Menye ame ɖokui ɖeɖe ɖe aga dzie ame ato aɖo gbɔgbɔmetaɖodzinu gbɔ bliboe o, abe alesi ŋutilã ƒe ŋutinu ɖeka mate ŋu atsi bliboe le eɖokui si o negbe ɖee ŋutilã bliboa yi edzi tsi le lãmesẽ me la ko ene.” Paulo ɖo ŋku edzi na Kristotɔ siwo nɔ Efeso be woa kple ‘ame kɔkɔewo katãe’ wòle be woadze agbagba be woate ŋu ase nusiwo katã xɔsea lɔ ɖe eme la gɔme.—Efesotɔwo 3:18a.
11. (a) Nukae gbɔgbɔmeŋgɔyiyi wɔwɔ mefia o? (b) Nukae wòle be míawɔ be míawɔ ŋgɔyiyi?
11 Edze kɔte le Paulo ƒe nyawo me be gbɔgbɔmeŋgɔyiyi wɔwɔ mefia sidzedze tsɔtsɔ ayɔ míaƒe susuwo me kple agbalẽ geɖe sɔsrɔ̃ o. Kristotɔ tsitsi metsɔa agbalẽnyanya nɔa fu ɖemee na ame bubuwo o. Ðe eteƒe la, Biblia gblɔ be: “Ame dzɔdzɔe ƒe toƒe le abe agudzedze ƒe kekeli, si nɔa kɔkɔm ɖe edzi, vaseɖe esime ŋu kena keŋ ene.” (Lododowo 4:18) Ẽ, amea ‘ƒe toƒee nɔa kɔkɔm ɖe edzi,’ ke menye eya ŋutɔe o. Ne míeyi edzi le agbagba dzem be míalé Mawu ƒe Nyaa ƒe gɔmesese si me Yehowa yi edzi le kɔkɔm na eƒe amewo me ɖe asi la, míanɔ ŋgɔ yim le gbɔgbɔ me. Be woalé nu me ɖe asi le go sia me fia be woayi ŋgɔ, eye ema nye nane si mí katã míate ŋu awɔ.—Psalmo 97:11; 119:105.
Ðe ‘Gbɔgbɔa ƒe Kutsetsewo’ Fia
12. Nukatae gbɔgbɔa ƒe kutsetsewo ɖeɖefia le vevie le míaƒe didi be míawɔ gbɔgbɔmeŋgɔyiyi me?
12 Alesi “dzixɔse kple sidzedze ƒe ɖekanyenye la gbɔ” ɖoɖo le vevie la, nenema ke wòle vevie be míaɖe Mawu ƒe gbɔgbɔa ƒe kutsetsewo afia le míaƒe agbenɔnɔ ƒe akpa sia akpa mee. Nukatae? Elabena, abe alesi míekpɔe ene la, tsitsinyenye menyea ememe alo ɣaɣlaƒe nu o, ke boŋ edzena nyuie wokpɔna le nɔnɔme siwo ate ŋu aɖe vi ahatu ame bubuwo ɖo me. Le nyateƒe me la, menye agbagbadzedze be míatu nɔnɔme aɖewo ƒomevi ɖo dzro ko alo awɔ ameŋkumenu ye míaƒe gbɔgbɔmeŋgɔyiyi didi la nye o. Ðe eteƒe la, ne míele tsitsim le gbɔgbɔ me, hele Mawu ƒe gbɔgbɔa ƒe mɔfiafia yome la, tɔtrɔ wɔnukuwo ava míaƒe nɔnɔmewo kple nuwɔnawo me. Apostolo Paulo gblɔ be: “Mizɔ le Gbɔgbɔ me, eye miele ŋutilã ƒe nudzodzro dzi wɔ ge o.”—Galatiatɔwo 5:16.
13. Tɔtrɔ kae ɖenɛ fiana nyuie be ame le ŋgɔyiyi wɔm?
13 Paulo yi edzi yɔ “ŋutilã ƒe dɔwɔwɔwo,” siwo sɔ gbɔ eye ‘wodze ƒã.’ Hafi ame aɖe nava kpɔ ŋudzedze ɖe Mawu ƒe nudidiwo ŋu la, enɔa agbe abe xexeame ene eye wònyea nusiwo Paulo yɔ be: “matrewɔwɔ, ahasiwɔwɔ, makɔmakɔnyenye, hadzedze, trɔ̃subɔsubɔ, afakaka, kewɔwɔ, dzrewɔwɔ, ŋuʋaʋã, dɔmedzoedodowo, dzrehehewo, mamãwo, kɔmamãwo, dɔmevevi, hlɔ̃dodowo, ahamumuwo, aglotutuwo kple esia tɔgbewo” dometɔ aɖewo wɔla. (Galatiatɔwo 5:19-21) Gake ne amea le gbɔgbɔmeŋgɔyiyi wɔm la, eva nɔa asi ɖem le ‘ŋutilã ƒe dɔwɔwɔ’ manyomanyo siawo ŋu vivivi hedzea ‘gbɔgbɔa ƒe kuwo tsetse’ gɔme. Tɔtrɔ sia si dzena nyuie amesiame kpɔna la ɖenɛ fiana be amea le ŋgɔyiyi wɔm ɖota Kristotɔwo ƒe tsitsinyenye gbɔ.—Galatiatɔwo 5:22.
14. Ðe nyagbɔgblɔ eve siwo nye “ŋutilã ƒe dɔwɔwɔwo” kple “gbɔgbɔa ƒe kutsetsewo” me.
14 Ele be mialé ŋku ɖe nyagbɔgblɔ eve siwo nye “ŋutilã ƒe dɔwɔwɔwo” kple “gbɔgbɔa ƒe kutsetsewo” la ŋu. “Dɔwɔwɔwo” nye nusi ame wɔna la me tsonu. Ne míagblɔe bubui la, nusiwo Paulo yɔ be ŋutilã ƒe dɔwɔwɔwo nye nusiwo ame ŋutɔ ɖona wɔna loo alo amegbetɔ ƒe ŋutilã madeblibo la ƒe ŋusẽkpɔɖeamedzi ƒonɛ ɖe enu wòwɔna. (Romatɔwo 1:24, 28; 7:21-25) Le go bubu me la, nyagbɔgblɔ “gbɔgbɔa ƒe kutsetsewo” fia be nɔnɔme siwo wòyɔ la metsoa nusi woyɔna be nɔnɔme alo amenyenye tutuɖo ŋuti gbagbadzedzewo me o, ke boŋ Mawu ƒe gbɔgbɔa ƒe dɔwɔwɔ ɖe ame dzi mee wòtsona. Abe alesi ati atse ku ne wolé be nɛ nyuie ene la, nenema ke ame atse gbɔgbɔa ƒe kuwoe ne gbɔgbɔ kɔkɔea wɔa dɔ le eƒe agbenɔnɔ me bɔbɔe.—Psalmo 1:1-3.
15. Nukatae wòle vevie be míalé ŋku ɖe “gbɔgbɔa ƒe kutsetsewo” ƒe akpawo katã ŋu?
15 Nu bubu si ŋu wòle be míade ŋugble le enye nya “kutsetsewo” si Paulo zã wòlɔ nɔnɔme nyoameŋu siwo katã wòyɔ la ɖe eme. * Gbɔgbɔ la metsea ku hamehamewo na mí be míatia esi dzɔ dzi na mí o. Nɔnɔme siwo katã Paulo yɔ—lɔlɔ̃, dzidzɔ, ŋutifafa, dzigbɔgbɔ blewu, dɔmekɔkɔ, dɔmenyonyo, xɔse, dɔmefafa, kple ɖokuidziɖuɖu—la le vevie, eye wo katãe ƒoa ƒu hafi Kristotɔ ƒe amenyenye yeye te ŋu sua ame si. (Efesotɔwo 4:24; Kolosetɔwo 3:10) Eyata, togbɔ be mía ŋutɔwo ƒe nɔnɔme kple didi ana be nɔnɔme siawo dometɔ aɖewo nadze le míaƒe agbenɔnɔ me wu hã la, ele vevie be míalé ŋku ɖe akpa siwo katã Paulo yɔ la ŋu. To esia wɔwɔ me la, míate ŋu aɖe Kristotɔ ƒe nɔnɔme afia le míaƒe agbenɔnɔ me nyuie wu.—Petro I, 2:12, 21.
16. Nukae nye míaƒe taɖodzinu le míaƒe Kristotɔwo ƒe tsitsinyenye didi me, eye aleke míate ŋu aɖo egbɔe?
16 Nu vevi si míate ŋu asrɔ̃ tso Paulo ƒe numedzodzroa me enye be le míaƒe Kristotɔ ƒe tsitsinyenye didi me la, menye sidzedze kple agbalẽnyanya vivivo alo amenyenye yeye si asu mía si lae nye míaƒe taɖodzinu o. Ke taɖodzinuae nye be Mawu ƒe gbɔgbɔa nate ŋu awɔ dɔ le míaƒe agbe me bɔbɔe. Alesi míaƒe tamebubu kple nuwɔnawo le sɔsɔmee ɖe Mawu ƒe gbɔgbɔa ƒe mɔfiafiawo nui la, nenemae míanɔ tsitsim le gbɔgbɔmee. Aleke míate ŋu aɖo taɖodzinu sia gbɔe? Ele be míaɖe asi le míaƒe dzi kple susu ŋu be Mawu ƒe gbɔgbɔa nawɔ dɔ ɖe wo dzi. Esia bia míaƒe Kristotɔwo ƒe kpekpewo dede kple gomekpɔkpɔ le wo me edziedzi. Ele hã be míasrɔ̃ Mawu ƒe Nyaa ahade ŋugble le eŋu edziedzi, aɖe mɔ eƒe gɔmeɖosewo nafia mɔ mí le míaƒe nuwɔwɔ kple ame bubuwo me kpakple le tiatia kple nyametsotso siwo míewɔna me. Ekema míaƒe ŋgɔgbedede adze ƒã nyateƒe.
Wɔ Ŋgɔyiyi Hena Mawu ƒe Ŋutikɔkɔe
17. Aleke ŋgɔgbedede do ƒome kple míaƒe Dziƒofofoa ŋutikɔkɔe?
17 Ƒo wo katã ta la, míaƒe ŋgɔgbedede si míana wòadze ƒã hea ŋutikɔkɔe kple kafukafu vɛ, menye na mí o, ke boŋ na míaƒe Dziƒofofo, Yehowa, amesi na be míete ŋu ɖo gbɔgbɔmetsitsinyenye gbɔ. Yesu gblɔ na eƒe nusrɔ̃lawo le zã si do ŋgɔ na eƒe kua me be: “Esia me wokɔ Fofonye ŋuti le, bena mietsea ku geɖe, eye miazu nye nusrɔ̃lawo.” (Yohanes 15:8) Nusrɔ̃laawo he ŋutikɔkɔe vɛ na Yehowa to gbɔgbɔa ƒe kuwo kple Fiaɖuƒea ƒe kuwo siaa si woƒe subɔsubɔdɔa tse dzi.—Dɔwɔwɔwo 11:4, 18; 13:48.
18. (a) Nuŋeŋe dodzidzɔname kae le edzi yim egbea? (b) Agba kae nuŋeŋe sia da ɖi?
18 Egbea, Yehowa ƒe yayra le eƒe amewo dzi eye wole xexeame katã ƒe gbɔgbɔmenuŋeŋedɔ aɖe wɔm. Ƒe aɖewo enye sia la, ame yeye 300,000 lɔƒo tsɔa wo ɖokui ɖea adzɔgbe na Yehowa hetsɔ nyɔnyrɔxɔxɔɖetsime ɖoa kpe woƒe adzɔgbeɖeɖea dzi ƒe sia ƒe. Esia nana míekpɔa dzidzɔ eye ɖikeke mele eme o hã be edoa dzidzɔ na Yehowa ƒe dzi. (Lododowo 27:11) Gake be esia nakpɔtɔ anye dzidzɔ kple kafukafu tsoƒe na Yehowa la, ahiã be ame yeye siawo katã ‘nazɔ le Kristo me, eye woanye amesiwo do ke, siwo wotu ɖe eyama me, eye woli ke wo ɖe xɔse me.’ (Kolosetɔwo 2:6, 7) Esia da agba eve ɖe Mawu ƒe amewo dzi. Le go aɖe me la, ne ènye amesi xɔ nyɔnyrɔ eteƒe medidi o la, ɖe nàxɔ agbanɔamedzi si nye veviedodonu be ‘wò ŋgɔgbedede nadze ƒã le amewo katã ŋku mea’? (NW) Le go bubu me la, ne èle nyateƒea me hena ɣeyiɣi aɖe la, ɖe nàxɔ agbanɔamedzi si nye ɖetsɔtsɔ le ame yeyewo ƒe gbɔgbɔmededienɔnɔ mea? Le go evea siaa me la, alesi wòhiãe be míaʋli aɖo tsitsinyenye gbɔ la dze ƒã.—Filipitɔwo 3:16; Hebritɔwo 6:1.
19. Mɔnukpɔkpɔ kple yayra kawoe nàkpɔ ne èna wò ŋgɔgbedede dze ƒã?
19 Yayra wɔnukuwo le amesiwo katã dze agbagba vevie na woƒe ŋgɔgbedede dze ƒã la lalam. Ðo ŋku Paulo ƒe dzideƒonamenya siwo wògblɔ na Timoteo esime wòxlɔ̃ nui be wòawɔ ŋgɔyiyi vɔ megbe la dzi be: “Kpɔ ɖokuiwò kple wò nufiafia la dzi nyuie, nɔ nusiawo dzi; elabena ne èwɔ esia la, àxɔ ɖokuiwò kple amesiwo ɖoa to wò la, ɖe agbe.” (Timoteo I, 4:16) Ne èdo vevie hena wò ŋgɔgbedede dze ƒã la, wò hã àte ŋu akpɔ gome le mɔnukpɔkpɔ vevi si nye Mawu ƒe ŋkɔa ŋutikɔkɔ kple eƒe yayrawo xɔxɔ me.
[Etenuŋɔŋlɔ]
^ mm. 15 Nya ‘kutsetse’ fia “atikutsetse” ko le gbe gbãtɔa me.—Galatiatɔwo 5:22, Kingdom Interlinear Translation.
Èɖo Ŋku Wo Dzia?
• Mɔ kawo nue woate ŋu aɖe gbɔgbɔmetsitsinyenye afia le?
• Sidzedze kple nugɔmesese kae ɖea tsitsinyenye fiana?
• Aleke “gbɔgbɔa ƒe kutsetsewo” ɖeɖefia ɖea gbɔgbɔmeŋgɔyiyi fianae?
• Agbanɔamedzi kawoe wòle be míaxɔ esi míele tsitsinyenye minyam?
[Biabiawo]
[Nɔnɔmetata si le axa 13]
Ðiɖi, alo tsitsi, dzena nyuie wokpɔna
[Nɔnɔmetata si le axa 15]
Míewɔa gbɔgbɔmeŋgɔyiyi ne míelé nyateƒe si woɖe fia la me ɖe asi
[Nɔnɔmetata si le axa 17]
Gbedodoɖa kpena ɖe mía ŋu be míeɖea “gbɔgbɔa ƒe kutsetsewo” fiana