Keklẽ Abe Akaɖiwo Ene Le Kekelidu Me

Fluctuat nec mergitur, alo “Ƒutsotsoewo le enyamam gake menyrɔna o,” ye nye Paris dugã la me tɔwo ƒe mɔfiamenya.

ABE tɔdziʋu si ho ɖe tɔ dzi le ahomya sesẽwo me ene la, Paris te ŋu nɔ te ɖe dutatɔwo ƒe kɔkɔ ɖe dua me taŋtaŋ kpakple dua me tɔwo ŋutɔ ƒe aglãdzenuwo wɔwɔ nu le ƒe 2,000 kple edzivɔ siwo va yi me. Paris nye xexemedugã siwo dze ani wu la dometɔ ɖeka fifia, eye wònya kpɔna na amewo ale gbegbe le eƒe xɔtuɖaŋu deŋgɔ, mɔdodo siwo to wodo atiwo ɖo, kple blemanudzraɖoƒe siwo xɔ ŋkɔ le xexeame godoo siwo le afima la ta. Ame aɖewo bunɛ be enye hakpanyaŋlɔlawo, nutalawo, kple xexemenunyalawo nɔƒe. Ame bubuwo va ɖua eme nu viviwo hekpɔa ŋudzedze ɖe eƒe atsyãwuwo ŋu.

Tso blema ke la, Katoliko-ha xɔ aƒe ɖe Paris. Le ƒe alafa eve siwo va yi me la, wova yɔa Paris be Kekelidu, le akpa vevi si wòwɔ le Europa gbalẽnyalawo ƒe habɔbɔ aɖe si woyɔna be Kekeli me ta. Egbea la, Paristɔ akpa gãtɔ nya alo womenya o, xexemenunya si li tso ɣemaɣi ke la kpɔtɔ le ŋusẽ kpɔm ɖe wo dzi.

Ke hã amegbetɔ ƒe nunya mena amewo kpɔ kekeli le woƒe agbe me abe alesi woakpɔ mɔ nɛ ene o. Egbea ame geɖe le kekeli dim tso teƒe bubu. Anye ƒe 90 enye sia fifia la, Yehowa Ðasefowo le ‘keklẽm abe akaɖiwo ene’ le Paris. (Filipitɔwo 2:15) Abe ƒudzidela bibiwo ene la, ehiã be  woanɔ tɔtrɔm ɣesiaɣi ɖe ƒutsotsoe siwo le tɔtrɔm alo nudzɔdzɔwo ŋu ale be woate ŋu aku “dukɔwo katã ƒe nu [vevitɔwo]” ato ƒu dzii.—Xagai 2:7.

Dugã si me Dɔ Wɔwɔ Sẽ

Le ƒe 1850 me ke la, ame 600,000 sɔŋ ye nɔ Paris dugã la me. Dua me nɔla siwo li egbea kpakple golɔgoewo me tɔwo ƒe xexlẽme gbɔ miliɔn asieke ŋu. Alesi amewo le agbɔ sɔmee le Paris na wòva zu dugã si me gbevovovodolawo le le France wu dugã ɖesiaɖe. Enye xexeame ƒe suku kɔkɔwo nɔƒe, afimae yunivɛsiti xoxotɔ kekeake le xexeame katã le, eye sukuvi siwo ade 250,000 le afima. Le Paris ƒe golɔgoe aɖewo siwo me xɔwo kɔkɔ yi yame ʋĩ le me la, aglãdzenuwɔnawo kple dɔmakpɔwɔe nye nusiwo mede ame dzi o le Paris dometɔ aɖewo. Ðikekemanɔmee la, ebia aɖaŋu kple tɔtrɔ ɖe nɔnɔmewo ŋu be Yehowa Ðasefowo nagblɔ nyanyuia le mɔ si avivi na amesiame ƒomevi nu.—Timoteo I, 4:10.

Modzakatsaɖila miliɔn 20 kple edzivɔ ye ɖia tsa vaa Paris ƒe sia ƒe. Wotsɔa dzidzɔ liaa Eiffel-xɔ Kɔkɔ la, ɖia tsa le Seine-tɔsisi la to, alo ɖia tsa toa nuɖuƒe kple ahanoƒe siwo le mɔto, henɔa  teƒeawo kpɔm. Gake Parisnɔlawo tsoa hloloe le woƒe gbesiagbegbenɔnɔ me. Christian, si nye ɣeyiɣiawo katã ƒe subɔla aɖe ɖe nyaa me be: “Amewo le kplakplakpla dzi ɣesiaɣi. Ðeɖi tea wo ŋu ne wogbɔ tso dɔme.” Nuƒoƒo na vovomanɔŋutɔ siawo mele bɔbɔe o.

Gake kuxi sesẽtɔ siwo Yehowa Ðasefowo doa goe le Paris la dometɔ ɖekae nye keke ɖe amewo ŋu le woƒe aƒewo me. Wode nuƒomɔ̃ aƒe aɖewo ŋu. Gake le nuvlowɔwɔ ƒe dzidziɖedzi ta la, wode elektrik dedienɔnɔtakpɔmɔ̃ aƒe geɖewo ƒe agbo ŋu, ale be màte ŋu age ɖe wo me o. Ðikeke mele eme o be esia hã gbɔe wòtso be le nuto aɖewo me la ame 1,400 sɔŋ ye wòle be Ðasefo 1 naɖe gbeƒã na. Eyata woyi edzi le vomeɖase kple telefon dzi ɖaseɖiɖi mɔnuwo zãm ŋutɔ le afimawo. Ðe Yehowa Ðasefowo te ŋu na woƒe ‘kekelia klẽ’ le mɔ bubuwo hã nua?—Mateo 5:16.

Mɔnukpɔkpɔ geɖe kple teƒe siwo woaɖi vomeɖase le la bɔ. Martine kpɔ nyɔnu aɖe tɔ ɖe ʋudzeƒe, eye eƒe nɔnɔme ɖi amesi dzi nu te ɖo. Vinyɔnu ɖekɛ si le nyɔnua si la ku ɣeyiɣi kpui aɖe koe nye ema. Martine tsɔ agbalẽ gbadza aɖe si ƒo nu tso Biblia ƒe tsitretsitsi kɔfanamenyawo ƒe mɔkpɔkpɔ ŋu la nɛ. Emegbe megado go nyɔnua kpɔ o ɣleti aɖewo. Esi Martine gava kpɔ nyɔnua ake la, edze agbagba dze Biblia-nusɔsrɔ̃ gɔme kplii. Togbɔ be srɔ̃a ti eyome hã la, eva zu Ðasefo.

Vomeɖaseɖiɖi si Tsea Ku

Ʋuɖoɖomɔnu si le Paris dugãa mee nye nyuitɔwo kekeake siwo le xexeame katã la dometɔ ɖeka. Ame 5,000,000 ye ɖoa bɔs xɔŋkɔ si ŋkɔe nye Metro la gbesiagbe. Wogblɔ be Paris ƒe titina tomemɔ ʋudzeƒe si woyɔna be Châtelet-Les-Halles lae nye tomemɔ ƒe ʋudzeƒe gãtɔ kekeake kple esi woɖoa ʋu le wu ɖesiaɖe le xexeame katã. Mɔnukpɔkpɔ geɖe li hena keke ɖe amewo ŋu le afima. Alexandra ɖoa Metro la yia dɔme gbesiagbe. Gbeɖeka eɖo dze kple ɖekakpui aɖe si ʋumenugbagbeviɣidɔ nɔ fu ɖem na vevie eye wokpɔ be magate ŋu atsi agbe o. Alexandra tsɔ trakt aɖe si ƒo nu tso Paradiso mɔkpɔkpɔa ŋu nɛ. Wowɔ Biblia me numedzodzro le teƒe ma le game ma ke dzi gbesiagbe kwasiɖa ade. Gake gbeɖeka ŋutsua megavana o. Ema megbe kpuie la, ŋutsua srɔ̃ ƒo ka na Alexandra be wòava kɔa dzi enumake elabena srɔ̃aŋutsua ƒe dɔlélea nu va sẽ. Gake kaka Alexandra naɖo kɔa dzi la, nu gblẽ xoxo. Le ŋutsua ƒe ku megbe la, srɔ̃a ʋu yi Bordeaux le France ƒe anyieheɣetoɖoƒe, eye Ðasefo siwo le du ma me va srãnɛ kpɔna. Dzidzɔnya kae nye si Alexandra se le ƒe ɖeka megbe be ahosia va zu Kristotɔ Yehowa Ðasefo xɔnyɔnyrɔ si le mɔ kpɔm be yeakpɔ ye srɔ̃ le tsitretsitsia me!—Yohanes 5:28, 29.

Nyɔnu Kristotɔ tsitsi aɖe ƒo nu na Renata le keteke aɖe si tso Paris yina Limoges, le titina France, me. Renata tsɔ ƒe atɔ̃ sɔŋ srɔ̃ mawuŋununya, Hebrigbe, kple Helagbe le wo de Poland, gake megava xɔ Mawu dzi se o. Ɣleti etɔ̃ do ŋgɔ la, edo gbe ɖa na Mawu. Togbɔ be nya si gblɔm nɔvinyɔnu tsitsia nɔ na Renata medo dzidzɔ nɛ boo o, eye meva susu me nɛ be yeagase eŋkɔ ake o hã la, etsɔ eƒe telefon xexlẽdzesi nɛ. Gake nɔvinyɔnua ɖoe kplikpaa hekpɔ egbɔ be ame aɖe naɖasrã Renata kpɔ le ɣeyiɣi kpui aɖe megbe. Esime srɔ̃tɔ Ðasefo aɖewo yi Renata gbɔ la, eƒe susue nye be ‘Nukae amesiawo nya afiam?’ Togbɔ be Renata srɔ̃ mawuŋununya hã la, etsɔ ɖokuibɔbɔ xɔ Biblia ƒe nyateƒe lae. Nyɔnu sia ɖe nu me be: “Eme kɔ nam enumake be nyateƒeae nye esia.” Fifia dzi le edzɔm be yele Biblia ƒe gbedasia gblɔm na amewo.

Michèle nɔ ʋukuku srɔ̃m. Sukuvi bubu siwo nɔ klass la kplii te nuƒoƒo tso gbɔdɔdɔ do ŋgɔ na srɔ̃ɖeɖe ŋu. Michèle gblɔe fia be yemekpɔ ŋudzedze ɖe woƒe dzeɖoɖoa ŋu o. Ʋukuku fiala, Sylvie, biae le kwasiɖa ɖeka megbe bena: “Yehowa Ðasefoe nènyea?” Michèle ƒe Biblia me nukpɔsusuwo wɔ dɔ ɖe Sylvie dzi. Wodze Biblia-nusɔsrɔ̃ gɔme, eye le ƒe ɖeka megbe la, Sylvie xɔ nyɔnyrɔ.

Abɔ kple modzakaɖebɔ gbogbo siwo le Paris nye teƒe siwo mɔnukpɔkpɔ nyuiwo sua ame si woaɖo dze kple amewo le. Josette wɔ ɖiɖiɖemeɣi aɖe ŋudɔ yi abɔ aɖe me, afisi nyɔnu tsitsi aɖe  si ŋkɔe nye Aline nɔ tsa ɖim le. Josette ƒo nu tso Biblia ƒe ŋugbedodo wɔnukuwo ŋu nɛ. Wowɔ ɖoɖo hena Biblia-nusɔsrɔ̃ wɔwɔ, eye eteƒe medidi o Aline wɔ ŋgɔyiyi ɖo nyɔnyrɔxɔxɔ gbɔ. Fifia Aline si xɔ ƒe 74 la nye gbesiagbe mɔɖela dovevienu aɖe si Kristotɔwo ƒe nyateƒea gbɔgblɔ doa dzidzɔ na.

Kekeli na Dukɔwo Katã

Mehiã be Ðasefo siwo le Paris nazɔ mɔ ayi anyigba didiwo dzi hafi ade ha kple gbevovovodolawo o. Dua me tɔ siwo nye amedzrowo ƒe xexlẽme de alafa memama 20 kloe. Kristo-hame kple ƒuƒoƒowo le gbegbɔgblɔ siwo ade 25 me.

Zi geɖe la, aɖaŋu kple ŋugbledede hã nana be nu nyuiwo dona tsoa nyanyuikakadɔ tɔxɛ sia wɔwɔ me. Ðasefo Philippinestɔ aɖe ɖo anyigbamama tɔxɛ aɖe na eɖokui. Ne ele asi ɖim la, ete ŋu dzea dzeɖoɖo gɔme kple etɔ Philippinestɔ bubuwo le fiasewo me tsɔ dzea Biblia-nusɔsrɔ̃ geɖe gɔmee.

Eɖea vi ne èwɔ mɔnukpɔkpɔwo ŋudɔ le ɖaseɖiɖidɔa me. Le December 1996 me, esi Ðasefo siwo le dutagbe hame aɖe me se be fefewɔla aɖewo siwo xɔ ŋkɔ le xexeame godoo la gbɔna dua me la, wowɔ ɖoɖo be yewoadze agbagba aƒo nu na fefewɔlaawo. Le fefea wɔwɔ megbe le fiẽ aɖe me la, wote ŋu ƒo nu na fefewɔla siwo trɔ yina amedzrodzeƒe si wodze. Mɔnukpɔkpɔ sia ŋudɔwɔwɔ na wona Biblia 28, Kristotɔwo ƒe agbalẽ 59, agbalẽ gbadza 131, kple magazine 290. Le kwasiɖa etɔ̃ si wotsɔ nɔ dua mee ƒe nuwuwu la, fefewɔlaawo dometɔ ɖeka bia be: “Aleke mawɔ ava zu Yehowa Ðasefo?” Bubu gblɔ be: “Meyina gbeƒã ɖe ge le mía dedukɔ me!”

Kesinɔnu Ɣaɣla Siwo Ŋu Woava Ke Ðo

Afisiafi si tsaɖila siwo va Paris akpɔ la, wokpɔa blemaxɔ dzeaniwo. Gake nusiwo gaxɔ asi wu li siwo ŋu woava ke ɖo. Aniza kple tasia srɔ̃ si nye dziɖuɖu ƒe amedɔdɔ ye va France. Aniza xlẽa Biblia le aƒeme edziedzi. Gbeɖeka esi wònɔ kplakplakpla dzi be yeado le aƒeme la, mɔɖela aɖe tsɔ trakt si nye Nusita Nate ŋu Aka ɖe Biblia Dzi nɛ. Wowɔ ɖoɖo be yewoado go le kwasiɖa si kplɔe ɖo me, eye wodze Biblia-nusɔsrɔ̃ wɔwɔ gɔme. Aniza do go tsitretsiɖeŋu geɖe tso eƒe ƒometɔwo gbɔ. Ewɔ ŋgɔyiyi le nua sɔsrɔ̃ me ɖo nyɔnyrɔxɔxɔ gbɔ. Aleke wòbua mɔnukpɔkpɔ si su esi be wòagblɔ nyateƒea na amewoe? “Le gɔmedzedzea me la, gbeƒãɖeɖedɔa wɔwɔ menɔ bɔbɔe nam o elabena ŋu kpeam. Gake ne mexlẽ Biblia la, edea dzo menye. Nye susu medzea akɔ anyi ne nyemeɖe gbeƒã o.” Nɔnɔme mae dzena le Ðasefo siwo le Paris dometɔ geɖe, siwo “[gba] go ɖaasi le Aƒetɔ la ƒe dɔwɔwɔ me” la ŋu.—Korintotɔwo I, 15:58.

Biblia ƒe nyateƒea klẽ ɖe xɔtudɔ siwo wɔm wole le Paris gbɔto dzi, heɖe “nu xɔasi” bubuwo ɖe go. Bruce yi exɔlɔ̃ si va zu Yehowa Ðasefo eteƒe medidi o gbɔ kple susu be yeaɖaɣe kasɛt le egbɔ. Esi Bruce kpɔ exɔlɔ̃a wònɔ Biblia me dzrom kple ame aɖewo siwo wònya la, eɖo to se dzeɖoɖoa. Elɔ̃ ɖe Biblia sɔsrɔ̃ ƒe ɖoɖo si wodo ɖe egbɔ la dzi, gake kuxi aɖewo nɔ eŋu. “Wonyam nyuie le nutoa me. Kɔ koe fonye dana ɣesiaɣi, eye mewɔa ɖoɖo ɖe ɣeɖuɖu kpeɖiwo ŋu. Aleke amewo axɔe ase be meva zu Ðasefo?” Togbɔ be amewo ɖea fu na Bruce edziedzi be wòagawɔ ɖoɖo ɖe ɣeɖuɖuwo ŋu hã la, edzudzɔ dɔ ma wɔwɔ. Ɣleti ɖeka megbe la, ete gbeƒãɖeɖe: “Nutoa me tɔ ɖesiaɖe di be yeanya nusita meva zu Ðasefo ɖo.” Ema megbe kpuie la, exɔ nyɔnyrɔ. Le ɣeyiɣi aɖe megbe la, mɔnukpɔkpɔ su esi wòde Subɔsubɔdɔ ƒe Hehenasuku.

Kesinɔnuwo didi ate ŋu abia agbagbadzedze geɖe. Gake aleke gbegbee wònyea dzidzɔe nye si ne kutsetse nyuiwo do tso eme! Jacky, Bruno, kple Damien nye abolomelawo le Paris. Jacky ɖe nu me be: “Keke ɖe mía ŋu menɔa bɔbɔe o, elabena míewɔa dɔ ɣesiaɣi eye míenɔa aƒeme o.” Gbesiagbe mɔɖela aɖe si ŋkɔe nye Patrick kpɔe be xɔ sue aɖewo le xɔa tame, eye wòva susu me nɛ be ame anɔ ɖeka ya teti me godoo. Alesi wòɖoe kplikpaa be yeayi ɖe afima ɖe vi esime le ŋdɔ aɖe me wòke ɖe Jacky si va afima nɔ ge ɣeyiɣi kpui aɖe la ŋu. Nukae do tso eme? Xɔlɔ̃ etɔ̃awo va zu Ðasefowo eye wodi dɔ bubu si na wokpɔa mɔ wɔa teokrasidɔwo bliboe.

 Ahom la Nutsitsi

Nyitsɔ laa la, France nyadzɔdzɔgbalẽ aɖewo gblɔ le Yehowa Ðasefowo ŋu be wonye subɔsubɔ kɔmama vɔ̃ɖi aɖe. Le ƒe 1996 me la, Ðasefowo tsɔ dzi blibo ma trakt aɖe si me nyatakaka tɔxɛ aɖe le, si ŋkɔe nye Jehovah’s Witnesses—What You Need to Know (Yehowa Ðasefowo—Nusi Wòhiã be Nànya tso Wo Ŋu) la ƒe tata ɖekaɖeka miliɔn asieke kple edzivɔ. Emetsonuwo de dzi ƒo ale gbegbe.

Wodze agbagba etɔxɛe be woaɖo amesiame gbɔ. Dziɖuɖumegã geɖe ɖe ŋudzedzekpɔkpɔ fia Ðasefoawo. Nutomeɖaŋuɖola aɖe ŋlɔ bena: “Yehowa Ðasefowo wɔe nyuie be woma trakt sia. Eɖɔ alakpanya siwo wogblɔ le wo ŋu ɖo.” Ðɔkta aɖe gblɔ bena: “Menɔ nyatakaka sia lalam ɣeyiɣi didi aɖee nye sia!” Ŋutsu aɖe si tso Paris nuto me ŋlɔ bena: “Ðeko meva do go ɖe Jehovah’s Witnesses—What You Need to Know trakt la nu xlẽ. Madi be manya nu geɖe tso mia ŋu eye miava wɔ aƒeme Biblia nusɔsrɔ̃ femaxee kplim.” Ame bubu ŋlɔ bena: “Akpe na mi ɖe miaƒe anukwareɖiɖi ta.” Nyɔnu Katolikotɔ aɖe gblɔ na Ðasefoawo be: “Eglo! Mieɖo alakpanya siawo ŋu azɔ!”

Sɔhɛ Ðasefo geɖe siwo le Paris nuto me la kpɔ dzidzɔ tɔxɛ aɖe le gbeƒãɖeɖedɔ si ŋu wowɔ ɖoɖo ɖo le Xexeame Katã Katoliko Sɔhɛwo ƒe Ŋkekewo ƒe azãɖuɣi le ƒe 1997 me la me. Togbɔ be yame ƒe dzoxɔxɔ gbɔ 35° C ŋu hã la, Ðasefo siwo ade 2,500 sɔŋ ye kpɔ gome le eme. Le ŋkeke ʋɛ aɖewo ko me la, woma agbalẽ gbadza si nye Agbalẽ si Nyo na Amesiame ɖekaɖeka 18,000 na sɔhɛ siwo tso xexeame ƒe akpa sia akpa va. Hekpe ɖe ɖase nyui si gbeƒãɖeɖedɔ ma ɖi le Yehowa ƒe ŋkɔa ŋu kpakple nyateƒea ƒe nukuwo ƒaƒã ŋu la, egade dzo sɔhɛ Ðasefowo me hã. Nɔvinyɔnu ɖetugbi aɖe si tso eƒe mɔkekeɖuɖu dzi ale be wòate ŋu akpɔ gome le dɔ tɔxɛ sia me bliboe ŋlɔ bena: “Dzidzɔmewo le Yehowa si le anyigba dzi, amesiwo zãa woƒe ŋusẽ tsɔ kafunɛ. Ŋkeke eve siawo siwo me tutuɖo geɖe le la ɖe vi nam ŋutɔŋutɔ wu mɔkeke ɖesiaɖe si maɖu le nye agbe me! (Psalmo 84:11)”

February 28, 1998, dzie se si Hitler de si na be woxe mɔ ɖe Yehowa Ðasefowo nu le Germany la xɔ ƒe 65. Ðasefo siwo le France ɖe video si nye Jehovah’s Witnesses Stand Firm Against Nazi Assault (Yehowa Ðasefowo Nɔ Te Sesĩe le Nazitɔwo ƒe Amedzidzedze Me), si me yometiti si me Yehowa ƒe amewo to dze le tsitotsito la fia amewo le akpata siwo wohaya me le ɣletiŋkeke ma dzi. Woma amekpegbalẽvi miliɔn adre kple edzivɔ. Ŋutinyaŋlɔlawo kple amesiwo nɔ fuwɔamesaɖawo me kpli wo ɣemaɣi gblɔ ɖaseɖinya ʋãmewo. Le Paris nuto me la, ame 5,000 kloe ye de, siwo dometɔ gbogbo aɖewo menye Ðasefowo o.

Paristɔ geɖe kpɔ ŋudzedze ɖe gbɔgbɔmekekelia ŋu, eye enye dzidzɔ na wo be Fiaɖuƒegbeƒãɖelawo le keklẽm nyuie abe akaɖiwo ene. Ðeko wòle tututu abe alesi Yesu gblɔe ene be: “Nuŋeŋe la sɔ gbɔ; ke nuŋelawo mede ha o.” (Mateo 9:37) Tame si Yehowa Ðasefowo ɖo kplikpaa be yewoaɖu gbeƒãɖeɖe me mɔxenuwo dzi le dugãa me na Paris va zu Kekelidu aɖe le mɔ tɔxɛ aɖe nu hena Yehowa ƒe kafukafu.

[Nɔnɔmetata si le axa 9]

Dugã la ƒe Takpexɔ

[Nɔnɔmetata si le axa 9]

Louvre Blemanudzraɖoƒe

[Nɔnɔmetata si le axa 9]

Garnier Fefewɔƒe

[Nɔnɔmetata si le axa 10]

Biblia ƒe gbedasia gbɔgblɔ na vovomanɔŋutɔwo le afisi woakpɔ wo le