Nyabiabia Siwo Tso Exlẽlawo Gbɔ

Ɣeyiɣi didi kae Hiob ƒe fukpekpewo xɔ?

Ame aɖewo susui be Hiob ƒe dodokpɔa nɔ anyi ƒe geɖe, gake Hiob ƒe agbalẽa meƒo nu tso fukpekpe ɣeyiɣi didi ma tɔgbe ŋu o.

Edze abe ɣeyiɣi kpui aɖe ko mee Hiob ƒe dodokpɔa ƒe akpa gbãtɔ, si nye eƒe ƒomea me tɔwo ƒe kuku kple eƒe kesinɔnuwo ƒe bubu la dzɔ le ene. Míexlẽ be: ‘Eye wòva me gbe ɖeka be, esi [Hiob] viŋutsuwo kple vinyɔnuwo le nu ɖum, eye wole wein nom le wo nɔvi xoxoetɔ ƒe me la.’ Hiob xɔ nyatakaka siwo kplɔ wo nɔewo ɖo le nusiwo wòbu ŋu—siwo nye eƒe nyiwo, tedziwo, alẽwo, kposɔwo, kple eƒe subɔla siwo nɔ lãawo dzi kpɔm. Edze ƒã be, Hiob anya se viaŋutsu kple vianyɔnu siwo nɔ ‘nu ɖum, eye wonɔ wein nom le wo nɔvi xoxoetɔ ƒe me’ ƒe kua ŋu nya le ema megbe teti. Anye be nusiawo katã dzɔ le ŋkeke ɖeka dzi.—Hiob 1:13-19.

Hiob ƒe dodokpɔa ƒe akpa evelia anya xɔ ɣeyiɣi geɖe. Satana te ɖe Yehowa ŋu hegblɔ nɛ be Hiob ado kpo nu ne fukpekpea ka eŋu ŋutɔŋutɔ—eƒe ŋutilã ŋu. Emegbe wòkplɔ ‘ƒoƒoe vɔ̃ɖi ƒu Hiob tso eƒe afɔƒome vaseɖe eƒe dzodome.’ Dɔléle sia ƒe kaka ɖe eƒe ŋutilã katã ŋu anya xɔ ɣeyiɣi aɖe. Azɔ hã ɣeyiɣi geɖe anya yi hafi eƒe ‘dzɔgbevɔ̃e siawo katã’ ŋu nyawo naɖo eƒe alakpakɔfala siwo va kpɔe ɖa gbɔ.—Hiob 2:3-11.

Elifaz tso Teman le Edom-nyigba dzi, eye Zofar hã tso Arabia dzieheɣetoɖoƒe nutoa aɖe me, eyata teƒe siwo wotso medidi boo tso Hiob dedu Uz si ɖewohĩ anya nɔ dziehe Arabia gbɔ lɔƒo o. Gake Bildad ya nye Suaxtɔ eye eme kɔ ƒã be eƒe amewo nɔ Frat-tɔsisi to. Ne Bildad nɔ wo de ɣemaɣi la, ke kwasiɖawo alo ɣletiwo anya va yi hafi wòate ŋu ase Hiob ƒe nɔnɔmea ŋu nyawo eye be wòazɔ mɔ ava Uz. Gake ate ŋu anɔ eme hã be xɔlɔ̃ etɔ̃awo anɔ nuto si me Hiob nɔ esime eƒe fukpekpea dze egɔme. Aleke ke wòɖa le o, esime Hiob xɔlɔ̃ etɔ̃awo va ɖo egbɔ la, “wobɔbɔ nɔ anyi ɖe anyigba ɖe egbɔ ŋkeke adre kple zã adre” numaƒomaƒoe.—Hiob 2:12, 13.

Emegbe Hiob ƒe tetekpɔa ƒe akpa mamlɛa kplɔe ɖo, si ŋu nyawo dze le agbalẽa ƒe ta geɖe me. Nyaʋiʋli alo nuƒo siwo tre ɖe enu siwo eƒe alakpakɔfala mawo he ɖe eŋu kplɔe ɖo, eye Hiob hã ɖo wo ŋu enuenu. Le ema megbe la, ɖekakpui Elihu ka mo na wo, eye Yehowa tso dziƒo ɖɔ Hiob ɖo.—Hiob 32:1-6; 38:1; 40:1-6; 42:1.

Le esia ta Hiob ƒe fukpekpea kple eƒe nuteƒewɔwɔ katã ate ŋu adzɔ le ɣleti ʋɛ aɖewo alo ɖewohĩ le ɣeyiɣi si made ƒe ɖeka o me. Àde dzesii to nuteƒekpɔkpɔ me be tetekpɔ sesẽwo dzena abe nusi anɔ anyi ɖaa ene. Ke hã ele be míanyae be wo nu yina, abe alesi Hiob tɔ nu yii ene. Ɣeyiɣi didi ka kee dodokpɔ siwo me tom míele axɔ o, mina akpa si Mawu wɔna nanɔ susu me na mí abe alesi wòdze le nya siwo tso gbɔgbɔ me ene be: “Míaƒe aɖabaƒoƒo ɖeka me xaxa, si nu mesẽna o la, wɔa ŋutikɔkɔe mavɔ si nu sẽna ŋutɔ, eye wòƒoa nusianu ta sasasã la, na mí.” (Korintotɔwo II, 4:17) Apostolo Petro ŋlɔ be: “Ke amenuveve katã ƒe Mawu, amesi yɔ mi va eƒe ŋutikɔkɔe mavɔ la gbɔ le Kristo Yesu me la ŋutɔ awu mi amesiwo kpe fu vi aɖe la ƒe hehexɔxɔ nu, ali ke mi, ado ŋusẽ mi.”—Petro I, 5:10, NW.