Agbemeŋutinya

Gbɔgbɔmekekeli Klẽ Le Titina Ɣedzeƒe

ABE ALESI NAJIB SALEM GBLƆE ENE

Le ƒe alafa gbãtɔ M.Ŋ. me la, Mawu ƒe Nya ƒe kekeli klẽ tso Titina Ɣedzeƒe heɖo anyigba ƒe dzogoewo katã dzi. Le ƒe alafa 20 lia me la, kekeli ma gatrɔ yi ɖaklẽ ɖe xexea ƒe akpa ma ake. Na magblɔ alesi wòdzɔe na wò.

WODZIM le ƒe 1913 le du si nye Amioun, le Lebanon ƒe dziehe. Kelili kple tomefafa si nɔ xexeame ɣemaɣi ƒe ƒe mamlɛa enye ma, elabena Xexemeʋa I dzɔ le ƒe si kplɔe ɖo me. Esime aʋaa ke le ƒe 1918 me la, nu glo Lebanon, si wobuna ɣemaɣi be enye Titina Ɣedzeƒe ƒe adzagba la, le ganya kple dunyahehe gome.

Esime posudɔwɔƒea gadze dɔ gɔme le Lebanon le ƒe 1920 me la, woxɔa lɛtawo tso Lebanontɔ siwo le duta gbɔ. Amesiawo dometɔ aɖewoe nye nyruinyewo Abdullah kple George Ghantous. Woŋlɔ agbalẽ na wo fofo, si nye tɔgbuinye, Habib Ghantous, hegblɔ Mawu Fiaɖuƒea ŋuti nya nɛ. (Mateo 24:14) Viaŋutsuawo ƒe lɛtaa me nyawo ɖeɖe gbɔgblɔ na duametɔwo na woɖu fewu le eŋu. Duametɔwo kaka aʋatsonya be Habib viwo le eƒom ɖe wo fofo nu be wòadzra eƒe anyigba, atsɔ aƒle tedzi, atsɔ ayi gbeƒãɖeƒee.

Kekelia ƒe Ta Keke Gbãtɔ

Le ƒe si kplɔe ɖo, si nye ƒe 1921 me la, Michel Aboud, amesi nɔ Brooklyn, New York, U.S.A., trɔ va Tripoli, Lebanon. Ezu Biblia Nusrɔ̃vi, si nye ŋkɔ si woyɔna na Yehowa Ðasefowo ɣemaɣi. Togbɔ be Nɔviŋutsu Aboud xɔlɔ̃ kple ƒometɔ geɖe mexɔ Biblia me gbedasia  o hã la, ameŋkuta eve siwo nye nufialagã Ibrahim Atiyeh, kple aɖutikewɔla Hanna Shammas ya xɔe. Le nyateƒe me la, Ðk. Shammas tsɔ eƒe aƒe kple kɔdzi na hena Kristotɔwo ƒe kpekpewo wɔwɔ.

Ŋutsuvi dzaa ko menye esime Nɔviŋutsu Aboud kple Nɔviŋutsu Shammas wova Amioun, afisi menɔ. Woƒe sasrãkpɔa wɔ dɔ ɖe dzinye vevie, eye medze gbeƒãɖeɖedɔa wɔwɔ gɔme kple Nɔviŋutsu Aboud. Ƒe 40 sɔŋ mía kplii míenye zɔhɛwo le subɔsubɔdɔa me, vaseɖe esime Nɔviŋutsu Aboud ku le ƒe 1963 me.

Le ƒe 1922 kple ƒe 1925 dome la, Biblia me nyateƒe ƒe keklẽa keke ta ŋutɔ de kɔƒe siwo le Lebanon ƒe dziehe gome. Ame 20 va ɖo 30 kpea ta le amewo ƒe aƒeme abe mía tɔ me ene le Amioun be woadzro Biblia me. Hakplɔlawo dɔ ɖeviwo be woaƒo ganugoewo eye woado ɣli ahaƒu asi nu kple susu be woagblẽ kpekpeawo me, eyata míekpena le aveme ɣeaɖewoɣi.

Esi menye ɖevi la, nye veviedodo nu le gbeadzi—kple Kristotɔwo ƒe kpekpeawo katã dede me—na wotsɔ megbeŋkɔ nam be Timoteo. Sukudzikpɔla de se nam be madzudzɔ nusi wòyɔna be “kpekpe mawo” dede. Esi megbe la, wonyãm le sukua.

Ðaseɖiɖi le Biblia Nyigbawo Dzi

Le nye nyɔnyrɔxɔxɔ le ƒe 1933 me megbe kpuie la, medze mɔɖeɖedɔa wɔwɔ gɔme, alea Yehowa Ðasefowo yɔa ɣeyiɣiawo katã ƒe subɔsubɔdɔ lae. Togbɔ be míede ha ɣemaɣi o hã la, menye ame akpa gãtɔ siwo le kɔƒe siwo le Lebanon dziehe gome koe míeɖe gbeƒã na o, ke hã míeɖo Beirut kple eƒe golɔgoewo ke heyi ɖe Lebanon ƒe anyiehe ʋĩ. Le gɔmedzeɣi mawo me la, afɔe míezɔna alo doa tedzi edziedzi, abe alesi Yesu kple eyomedzela ƒe alafa gbãtɔ me tɔwo wɔe ene.

Le ƒe 1936 me la, Yousef Rahhal, amesi nye Lebanontɔ Ðasefo si nɔ United States ƒe geɖe la gbɔ va Lebanon srãge akpɔ. Etsɔ nuƒomɔ̃wo kple agbaƒomɔ̃wo ɖe asi gbɔe. Míeda mɔ̃a ɖe Ford-ʋu aɖe si wowɔ le ƒe 1931 me tame eye míetsa le Lebanon kple Syria godoo, hetsɔ Fiaɖuƒegbedasia yi saɖeaga nutowo me. Nuƒomɔ̃a te ŋu ɖina dea amesiwo le adzɔge wu kilometa ewo gbɔ. Amewo dea woƒe xɔwo tame be yewoase nusi woawo ɖɔna be gbe siwo le ɖiɖim tso dziƒo la. Amesiwo le agblewo me gblẽa woƒe dɔwo ɖi heyina be yewoaɖa see.

Mɔ mamlɛ siwo mezɔ kple Yousef Rahhal dometɔ ɖekae nye esi míeyi Aleppo, Syria, le ƒe 1937 ƒe vuvɔŋɔli me. Hafi wòatrɔ ayi United States la, míezɔ mɔ yi Palestine hã. Le afima la, míeɖi tsa yi du siwo le Haifa kple Jerusalem me, kpakple kɔƒe siwo le dukɔa me me. Amesiwo míedo goe dometɔ ɖekae nye Ibrahim Shehadi, amesi menya do ŋgɔ to agbalẽŋɔŋlɔ nɛ dzi. Ibrahim wɔ ŋgɔyiyi le Biblia me sidzedzea me ale gbegbe be le míaƒe sasrãkpɔa me la, ete gomekpɔkpɔ kpli mí le tso aƒeme yi aƒeme subɔsubɔdɔa me.—Dɔwɔwɔwo 20:20.

Medi vevie hã be makpɔ Nufialagã Khalil Kobrossi, amesi nye Katolikotɔ dovevienu aɖe si srɔ̃a Biblia kple Yehowa Ðasefowo to agbalẽŋɔŋlɔ dzi. Aleke wòwɔ ke ɖe Ðasefo siwo le Lebanon ƒe adrɛs ŋu? Fiasetɔ aɖee dze Yehowa Ðasefowo ƒe agbalẽa aɖe tsɔ bla nu kpotoe siwo Khalil ƒle le egbɔ le fiase aɖe me le Haifa la nɛ. Míaƒe adrɛs nɔ agbalẽ kakɛ ma dzi. Sasrãkpɔa dzɔ dzi na mía kplii siaa, eye  wòtrɔ va xɔ nyɔnyrɔ emegbe le Tripoli, le ƒe 1939 me.

Le ƒe 1937 me la, Petros Lagakos kple srɔ̃a va ɖo Tripoli. Le ƒe ʋɛ siwo kplɔe ɖo me la, mí ame etɔ̃ míekpe Lebanon kple Syria ƒe akpa gãtɔ ɖo kple Fiaɖuƒegbedasia si míetsɔ yi na amewo le woƒe aƒewo me. Hafi Nɔviŋutsu Lagakos naku le ƒe 1943 me la, Ðasefoawo tsɔ gbɔgbɔmekekelia ɖo Lebanon, Syria, kple Palestine ƒe du kple kɔƒe akpa gãtɔ me. Ɣeaɖewoɣi la, mí ame 30 kloe tsɔa ʋuvi alo ɖoa bɔs hedzea mɔ fɔŋli ga 3:00 me be míate ŋu aɖo saɖeaga nutowo me.

Le ƒe 1940-awo me la, Ibrahim Atiyeh ɖe Gbetakpɔxɔ gɔme ɖe Arabgbe me. Emegbe mekpɔa edzi tsɔa asi ŋlɔa magazinea ene ɖona ɖe Ðasefo siwo le Palestine, Syria, kple Egypt. Le Xexemeʋa II ƒe ŋkeke mawo me la, wotsi tre ɖe míaƒe gbeƒãɖeɖedɔa ŋu vevie, gake kadodo nɔ mía kple Biblia me nyateƒea lɔ̃la siwo katã le Titina Ɣedzeƒe dome. Nye ŋutɔ meta du kple kɔƒe siwo ƒo xlã wo, eye míeɖoe be míaɖo wo gbɔ kple nyanyuia.

Esime Xexemeʋa II gakpɔtɔ nɔ edzi yim le ƒe 1944 me la, meɖe Evelyn, si nye nye zɔhɛ mɔɖela Michel Aboud vinyɔnu. Miedzi vi etɔ̃ mlɔeba, nyɔnuvi ɖeka kple ŋutsuvi eve.

Dɔwɔwɔ Kple Dutanyanyuigblɔlaawo

Esi aʋa ke megbe kpuie la, Gilead Suku nuwula gbãtɔawo siwo wohe hena dutanyanyuigbɔgblɔ va ɖo Lebanon. Esia wɔe be woɖo hame gbãtɔ le Lebanon, eye wotiam menye hamesubɔla. Emegbe le ƒe 1947 me la, Nathan H. Knorr kple eƒe agbalẽŋlɔla, Milton G. Henschel, va srã Lebanon kpɔ hedo ŋusẽ geɖe nɔvia wo. Eteƒe medidi o dutanyanyuigblɔla geɖe va ɖo, eye wona kpekpeɖeŋu geɖe mí le ɖoɖowɔwɔ na míaƒe subɔsubɔdɔa kple kpekpewo dzi kpɔkpɔ me.

Le míaƒe mɔzɔzɔ ɖeka me yi saɖeaga nuto aɖe me le Syria la, bisiɔp si le afima tsi tre ɖe mía ŋu. Ebu fɔ mí be míele agbalẽ si wòyɔ be Ziontɔwo ƒe agbalẽwo mam. Nusi ɖi kokoe le nyaa mee nye be do ŋgɔ na ƒe 1948 la, hakplɔlawo bu mí “Kɔmiunisttɔwo.” Le ɣeyiɣi sia me la, wolé mí hete míaƒe nu me se gaƒoƒo eve sɔŋ si me míeɖi ɖase na wo le nyuie.

 Mlɔeba la, ʋɔnudrɔ̃la si se nyawo la gblɔ be: “Togbɔ be mebu fɔ genua [bisiɔp lae wowɔnɛ] si tsɔ nya ɖe mia ŋu hã la, ele be mada akpe nɛ be wòna mɔnukpɔkpɔ siam be medo go mi hesrɔ̃ nu geɖe tso miaƒe nufiafiawo ŋu.” Esia megbe la edo taflatse na mí ɖe fuɖenamea ta.

Esime míeɖo bɔs yina Beirut ƒe ewo megbe la, mete dzeɖoɖo kple ŋutsu aɖe si nɔ axanye, amesi nye agbledededzikpɔla aɖe. Esi wòɖo to se míaƒe dzixɔse ŋu nyawo aɖabaƒoƒo ʋɛ aɖewo megbe la, egblɔ be ye xɔlɔ̃ aɖe gblɔ nya mawo tɔgbe yese kpɔ le Syria. Amekae nye exɔlɔ̃ ma? Ʋɔnudrɔ̃la si ɖo to míaƒe nya ƒe ewo si va yi lae!

Le ƒe 1950-awo me la, meyi ɖasrã Ðasefowo kpɔ le Iraq hekpɔ gome kpli wo le tso ʋɔtru nu yi ʋɔtru nu dɔa me. Mezɔ mɔ hã de Jordan kple West Bank zi geɖe. Le ƒe 1951 me la, menɔ Ðasefo ene aɖewo dome yi Bethlehem. Míeɖu Aƒetɔ la ƒe Fiẽ Nuɖuɖu le afima. Gbemagbe ŋdi la, amesiwo katã va azãa ɖuƒe ɖo bɔs yi Jordan Tɔsisia to, afisi wonyrɔ wo dometɔ 22 tsɔ ɖo kpe woƒe adzɔgbeɖeɖe dzi na Yehowa le. Ɣesiaɣi si woatsi tre ɖe mía ŋu le nuto ma me la, míegblɔna na wo be: “Ðe míeva be míagblɔ na mi be mía ŋutɔwo míade viwo dometɔ ɖeka ava zu Fia ɖe anyigba bliboa dzi! Nukatae míedo adã? Ele be dzi nadzɔ mi!”

Gbeƒãɖeɖe le Nɔnɔme Sesẽwo Me

Ne míagblɔe gbadzaa la, Titina Ɣedzeƒetɔwo nye dɔmenyotɔwo, ɖokuibɔbɔlawo, kple amedzrowɔlawo. Wo dometɔ geɖe ɖoa to Mawu ƒe Fiaɖuƒegbedasia kple dzidzɔ. Le nyateƒe me la, nu bubu aɖeke mate ŋu ana dzidzeme wu be woanya be eteƒe madidi o Biblia ƒe ŋugbedodo sia ava eme be: “Mawu ŋutɔ anɔ anyi kpli [eƒe amewo] eye wòanye woƒe Mawu. Eye Mawu latutu aɖatsi sia aɖatsi ɖa le woƒe ŋku me, eye ku maganɔ anyi  akpɔ o, eye konyifafa kple ɣlidodo kple veve aɖeke maganɔ anyi o.”—Nyaɖeɖefia 21:3, 4.

Meva kpɔe dze sii be amesiwo tsia tre ɖe míaƒe dɔwɔwɔ ŋu la dometɔ geɖe mese míaƒe dɔa kple gbedasi si míelé ɖe asi la gɔme tututu o. Kristodukɔa ƒe subɔsubɔhakplɔlawoe gblɔa nya gbegblẽ geɖe le mía ŋu! Eyata le dukɔmeviʋa si dzɔ le Lebanon le ƒe 1975 me hexɔ ƒe 15 me la, Ðasefoawo kpe fu geɖe.

Ɣeaɖeɣi la, menɔ Biblia srɔ̃m kple ƒome aɖe si nye sɔlemedela dovevienuwo. Ŋgɔyiyi nyui si wowɔ le Biblia ƒe nyateƒeawo sɔsrɔ̃ me do dziku na hakplɔlawo. Esia na be subɔsubɔƒuƒoƒo aɖe si le afima de adã tame na emetɔwo le zã aɖe me be woava dze ƒomea ƒe fiase dzi, eye wotɔ dzo adzɔnuawo si ƒe home ade United States dɔlar 10,000 ya teti. Le zã ma ke me la, wova hem dzoe. Ke hã mete ŋu ɖe nya me na woƒe ŋgɔnɔla, hegblɔ nɛ be nenye Kristotɔ vavãwoe wonye la, womawɔ nu ŋkumaʋumaʋutɔe o. Esi megblɔ alea la, ena wotɔ ʋua hegblɔ nam be maɖi.

Ɣebubuɣi la, ame ene siwo xɔ asrafowo ƒe hehe la lém sesẽe. Le ŋɔdzidoname geɖe megbe la, woƒe ŋgɔnɔla, si gblɔ be yeada tum la, trɔ susu enumake eye woɖe asi le ŋunye. Wode ŋutsu siawo dometɔ eve gaxɔ me fifia ɖe amewuwu kple adzodada ta, eye wowu ame eve susɔeawo.

Gbeƒãɖeɖe ƒe Mɔnukpɔkpɔ Bubuwo

Mɔnukpɔkpɔ su asinye edziedzi be maɖo yameʋu tso dukɔ ɖeka me ayi bubu me. Esime menɔ yameʋu me ɣeaɖeɣi tso Beirut yina United States la, menɔ Charles Malek, amesi nye Lebanontɔwo ƒe dutanyawo nunɔla tsã xa. Eɖo to mawunyakpukpui ɖesiaɖe si mexlẽ tso Biblia me nɛ la nyuie hekpɔ ŋudzedze ɖe eŋu. Mlɔeba la, egblɔ nam be yede suku aɖe le Tripoli afisi Ibrahim Ayiteh, ŋutsu si tonye gblɔ Biblia me nyateƒea na, fia nu ye le! Aƒetɔ Malek gblɔ be Ibrahim fia ye be ye nede bubu Biblia ŋu.

Le yame mɔzɔzɔ bubu me la, menɔ Palestinatɔwo teƒenɔla le Dukɔ Ƒoƒuawo me xa. Mɔnukpɔkpɔ su asinye be meƒo nu tso Mawu ƒe Fiaɖuƒea ŋu nɛ. Mlɔeba la, efia nɔvia ŋutsu ƒe ƒome si le New York lam, eye mesrãa wo kpɔna zi geɖe le afima. Míaƒe ƒometɔ aɖe hã wɔa dɔ le Dukɔ Ƒoƒuawo ƒe dɔwɔƒea le New York. Esime meyi ɖasrãe kpɔ le eƒe dɔwɔƒe gbeɖeka la, meɖu gaƒoƒo etɔ̃ le afima si mete ŋu tsɔ ɖe gbeƒã tso Mawu Fiaɖuƒea ŋuti nɛ.

Mexɔ ƒe 88 fifia, eye megatea ŋu kpɔa gome bliboe le hamea me gbanɔamedziwo tsɔtsɔ me. Srɔ̃nye, Evelyn hã kpɔtɔ le Yehowa subɔm kplim aduadu. Mía vinyɔnua ɖe dzikpɔla mɔzɔla Yehowa Ðasefo aɖe si va nye hamemegã le Beirut hamea me fifia. Wo vinyɔnu hã nye Ðasefo. Mía vi suetɔ kekeake kple srɔ̃a hã nye Ðasefowo eye wo vinyɔnu hã le nyateƒea me. Mía viŋutsu tsitsitɔ ya la, míeƒã Kristotɔwo ƒe xɔsea ɖe eƒe dzi me, eye mele mɔ kpɔm be ava xɔe mlɔeba.

Le ƒe 1933 me la wotiam mezu mɔɖela—si nye gbãtɔ le Titina Ɣedzeƒe. Anye ne nyemakpɔ nu nyui aɖeke atsɔ nye agbe awɔe wu be masubɔ Yehowa le mɔɖeɖedɔa me le ƒe 68 siwo va yi la katã me o. Eye meɖoe be mayi dzi azɔ le gbɔgbɔmekekeli si wònana la me.

[Nɔnɔmetata si le axa 23]

Najib le ƒe 1935 me

[Nɔnɔmetata si le axa 24]

Míele ʋu si dzi nuƒomɔ̃ nɔ xa le Lebanon towo dzi le ƒe 1940 me

[Nɔnɔmetata siwo le axa 25]

Etametɔ tso miame yi ɖusime: Najib, Evelyn, wo vinyɔnu, Nɔviŋutsu Aboud kple Najib ƒe viŋutsu tsitsitɔ la, le ƒe 1952 me

Etetɔ (ŋgɔgbetɔwo): Nɔviŋutsu Shammas, Knorr, Aboud, kple Henschel le Najib ƒe aƒeme, Tripoli, le ƒe 1952 me

[Nɔnɔmetata si le axa 26]

Najib kple srɔ̃a, Evelyn