Nye Akpedala eye Nàkpɔ Dzidzɔ

“CANADATƆWO ƒe nyadzɔdzɔgbalẽ si nye Calgary Herald gblɔ be: “Akpedada nye didi vevi aɖe si dzɔ kple amegbetɔ.” Herald la ƒo nu tso ƒe asieke vi aɖewo siwo nɔ gɔmedzesuku dem siwo si woƒe nufiala bia tsoe be woaŋlɔ nu tso nusiwo ta woadi be yewoada akpe ɖo ŋu. Sɔhɛ aɖe gblɔ be yedaa akpe na yeƒe ƒomea ‘elabena wolé be na ye.’ Nenema ke nyɔnuvi aɖe hã daa akpe na eƒe ƒomea, egblɔ be: “Wokpɔ tanye mele dedie, mele lãmesẽ me, woléa be nam, wolɔ̃m, wonaa nuɖuɖum, eye dzinyelawo manɔmee la, anye ne nyemele agbe o.”

Akpemadamada kplɔa ame dea dzidzɔmakpɔmakpɔ si nɔa anyi ɖaa me. Xexemenunyala kple mawunyaŋununyala J. I. Packer, gblɔ be: “Wowɔ mí míaƒe agbe nɔte ɖe Mawu ƒe kpekpeɖeŋu kple kadodo kplikplikpli si anɔ mía kple ame bubuwo dome dzi.” Esia na míeɖo ŋku Biblia ƒe nuxlɔ̃ame si me nunya le si wogblɔ ƒe alafa nanewo enye esia dzi, si gblɔ be: “Mizu ame dakpewo!” (Kolosetɔwo 3:15) Akpedada kple ŋudzedzekpɔkpɔ si tso dzi me ɖeɖefia amewo nana míetua ɖetsɔleme ƒe kadodo si me lɔlɔ̃ le ɖo.

Tsɔ kpe ɖe eŋu la, ne míedaa akpe eye míedea asixɔxɔ mía haviwo ŋu la, míeɖenɛ fiaa Yehowa be míenye akpedalawo eye meŋlɔa nusiawo be o. Biblia gblɔ be: “Yehowa ƒe ŋku kpɔa anyigba blibo la dzi, eye wòdoa ŋusẽ amesiwo ku ɖe eŋu kple woƒe dzi blibo.” (Kronika II, 16:9) Mawu na kakaɖedzi mí be yeɖoa ŋku lɔlɔ̃ si amegbetɔwo ɖena fiana le yeƒe ŋkɔ ta la dzi eye yedea asixɔxɔ eŋu. (Hebritɔwo 6:10) Ẽ, susu nyui geɖe li si ta míanye akpedalawo ɖo elabena mawumenɔnɔme nyui sia ɖeɖefia gbesiagbe dzea Yehowa ŋu eye wònaa míekpɔa dzidzɔ. Ðeko wòle abe alesi Lododowo 15:13 gblɔ ene be: “Dzi konu nana mo kɔna.”