Wozã Mawu ƒe Ŋkɔa le Titina Afrika

TITINA Afrika nɔla akpa gãtɔ xɔ Mawu dzi se. Womekea ɖi aɖeke be eyae nye nuwo katã Wɔla o. (Nyaɖeɖefia 4:11) Gake, abe alesi wòle le ame geɖe gome le teƒe bubuwo ene la, womelɔ̃a eƒe ŋkɔ ŋutɔŋutɔ—Yehowa—zazã o.

Titina Afrikatɔwo, kpakple amesiwo le xexea ƒe akpa bubuwo, gblɔa nya kuna ɖe Mawu ƒe ŋkɔa ŋu ne wogblɔ le Aƒetɔ ƒe Gbedodoɖaa me be, “Wò ŋkɔ ŋuti nakɔ!” (Mateo 6:9) Gake ɣeyiɣi didi aɖee nye sia la, ame ʋɛ aɖewo koe nya ŋkɔa. Ke hã le ƒe siwo va yi me la, Yehowa Ðasefowo ƒe gbeƒãɖeɖe dzonɔamemetɔe trɔ amewo ƒe nɔnɔme ɖe Mawu ƒe ŋkɔa zazã ŋu. Egbea, wonya Mawu ƒe ŋkɔa hexɔe de eme le Afrikatɔwo ƒe gbegbɔgblɔ geɖe me, abe Zulu (uJehova), Yoruba (Jehofah), Xhosa (uYehova) kple Swahili (Yehova) ene. Ke hã Biblia gɔmeɖeɖe siwo le gbegbɔgblɔ siawo me ƒe akpa gãtɔ gbe Mawu ƒe ŋkɔa zazã kokoko.

Gɔmeɖeɖe nyui aɖe si zã Mawu ƒe ŋkɔa enye Biblia si le Zandegbe me, si nye gbe si wodona le Central African Republic, Sudan, kple Democratic Republic of Congo ƒe akpa aɖewo. Le xexea ƒe akpa ma la, amewo zãa Mawu ƒe ŋkɔ heŋlɔnɛ be Yekova le wo degbea me. Aleke kee woɖaŋlɔa Mawu ƒe ŋkɔa le gbe aɖe mee o, ele vevie be woazãe. Nukatae? Elabena “amesiame, si ayɔ [Yehowa] ƒe ŋkɔa dzi la, woaɖee.”—Romatɔwo 10:13.

[Anyigbatata/Nɔnɔmetata si le axa 32]

(Edze nyuie le agbalẽa ŋutɔ me)

SUDAN

CENTRAL AFRICAN REPUBLIC

DEMOCRATIC REPUBLIC OF CONGO

[Afi Si Míexɔ Mɔɖeɖe Tso]

The Complete Encyclopedia of Illustration/J. G. Heck