Amekae Ama Mí Atso Mawu Ƒe Lɔlɔ̃ Gbɔ?
Amekae Ama Mí Atso Mawu Ƒe Lɔlɔ̃ Gbɔ?
“Minɛ míalɔ̃e, elabena etre mí lɔlɔ̃!”—YOHANES I, 4:19.
1, 2. (a) Nukatae enyanya be wolɔ̃ mí le vevie ɖo? (b) Ameka ƒe lɔlɔ̃e míehiã na wu?
ALEKE wòle vevie be nànya be wolɔ̃ wòe? Lɔlɔ̃ naa amegbetɔwo kpɔa dzidzedze tso woƒe vidzĩme va ɖo woƒe tsitsime. Èkpɔ alesi dzi dzɔa vidzĩi ne dadaa kɔe ɖe akɔ lɔlɔ̃tɔe kpɔa? Zi geɖe la, nuka kee ɖale dzɔdzɔm o, ne vidzĩa nya kpɔ dadaa ƒe nukomo ko la, eɖea dzi ɖi eye eƒe dzi dzea eme le dada si lɔ̃e la ƒe asi me. Alo èɖo ŋku alesi nènɔ le sɔhɛmenɔɣi sesẽ mawo me la dzia? (Tesalonikatɔwo I, 2:7) Ɣeaɖewoɣi la, mànya nusi tututu dim nèle alo alesi tututu sem nèle le ɖokuiwò me o, ke hã aleke enyanya be ye fofo kple ye dada lɔ̃ ye la nɔ vevie enye si! Ðe nyanya be yeate ŋu atsɔ yeƒe kuxi alo nyabiabia ɖesiaɖe ayi wo gbɔe menye kpekpeɖeŋu na wò oa? Le nyateƒe me, nusiwo hiã vevie le míaƒe agbemeŋkekewo katã me dometɔ ɖekae nye be woalɔ̃ mí. Lɔlɔ̃ sia ɖoa kpe edzi be asixɔxɔ le mía ŋu.
2 Enye nyateƒe be ame dzilawo ƒe lɔlɔ̃ mavɔ wɔa akpa aɖe le ame ƒe tsitsi kple dadasɔ me. Ke hã kakaɖedzi si anɔ mía si be míaƒe Dziƒofofo Yehowa lɔ̃ mí la gale vevie kura wu hena míaƒe gbɔgbɔ me kple seselelãme ƒe nyonyo. Anɔ eme be dzila siwo tsɔa ɖe le eme na ame nyateƒe menɔ magazine sia xlẽla aɖewo si o. Ne aleae wòle le gowòme la, ke lé dzi ɖe ƒo. Ne dzilawo ƒe lɔlɔ̃ mede edeƒe o alo meli kura o gɔ̃ hã la, Mawu ƒe nuteƒewɔwɔ ƒe lɔlɔ̃ xɔna na ame.
3. Aleke Yehowa ka ɖe eƒe lɔlɔ̃ na eƒe amewo dzi na woe?
3 Yehowa ɖee fia to eƒe nyagblɔɖila Yesaya dzi be vidada ate ŋu “aŋlɔ” via maɖino “be,” gake ye ya yemaŋlɔ yeƒe amewo be o. (Yesaya 49:15) Nenema ke Dawid gblɔ kakaɖedzitɔe be: ‘Ne fofonye kple danye gblẽm ɖi la, Yehowa axɔm.’ (Psalmo 27:10) Aleke gbegbe nya siawo naa kakaɖedzi amee nye si! Nɔnɔme ka mee nèɖale o, ne èɖe adzɔgbe na Yehowa Mawu la, ele be naɖo ŋku edzi ɣesiaɣi be eƒe lɔlɔ̃ na wò ƒo amegbetɔ ɖesiaɖe ƒe lɔlɔ̃ na wò ta!
Minɔ Mawu ƒe Lɔlɔ̃ la Me
4. Aleke woka ɖe Mawu ƒe lɔlɔ̃ dzi na ƒe alafa gbãtɔ me Kristotɔwoe?
4 Ɣekaɣie nye zi gbãtɔ si nèva nya nu tso Yehowa ƒe lɔlɔ̃ ŋu? Ðewohĩ wò nya de sɔsɔ ge kple ƒe alafa gbãtɔ me Kristotɔwo tɔ. Paulo ƒe lɛta si wòŋlɔ ɖo ɖe Romatɔwo ƒe ta 5 lia ƒo nu tso alesi nuvɔ̃wɔla siwo te wo ɖokui ɖa tso Mawu gbɔ tsã la wɔ va nya nu tso Yehowa ƒe lɔlɔ̃ ŋu wònya se ŋutɔ. Míexlẽ le kpukpui 5 lia me be: “Wotrɔ Mawu ƒe lɔlɔ̃ la kɔ ɖe míaƒe dziwo me to Gbɔgbɔ kɔkɔe, si wona mí la dzi.” Paulo gblɔ kpee le kpukpui 8 lia me be: “Mawu ɖe ye ŋutɔ ƒe lɔlɔ̃, si wòtsɔ lɔ̃ mí la fia bena, esime míeganye nuvɔ̃wɔlawo la, Kristo ku ɖe mía ta.”
5. Aleke nèwɔ va kpɔ ŋudzedze ɖe alesi gbegbe Mawu ƒe lɔlɔ̃ loloe ŋu?
5 Le mɔ ma ke nu la, esime wotsɔ Mawu ƒe Nya ƒe nyateƒea vɛ na wò eye nèxɔ edzi se la, Yehowa ƒe gbɔgbɔ kɔkɔea te dɔwɔwɔ le wò dzi me. Esia wɔe be nèva nɔ ŋudzedze kpɔm ɖe nu gã si Yehowa wɔ esime wòdɔ Via si gbɔ melɔ̃a nu le o ɖa be wòva ku ɖe tawò la ŋu. Eyata Yehowa kpe ɖe ŋuwò nènya alesi gbegbe wòlɔ̃a ameƒomeae. Esi nèva kpɔe be togbɔ be wodzi wò nenye nuvɔ̃me si te ɖa tso Yehowa gbɔ hã la, eʋu mɔ ɖi be amegbetɔwo nate ŋu azu ame dzɔdzɔewo eye mɔkpɔkpɔ nasu wo si be woanɔ agbe mavɔ la, ɖe mewɔ dɔ ɖe dziwò oa? Ðe lɔlɔ̃ na Yehowa meɖo mewò oa?—Romatɔwo 5:10.
6. Nukatae míate ŋu ase le mía ɖokui me ɣeaɖewoɣi be mía kple Yehowa dome didi?
6 Esi Fofowò si le dziƒo ƒe lɔlɔ̃ he wò eye nèwɔ asitɔtrɔ le wò agbe ŋu be wò nu nadze eŋu la, ètsɔ wò agbe ɖe adzɔgbe na Mawu. Fifia nèle ŋutifafa me kple Mawu. Gake ɖe nèsenɛ le ɖokuiwò me ɣeaɖewoɣi be ye kple Yehowa dome didia? Esia ate ŋu adzɔ ɖe mía dometɔ ɖesiaɖe dzi. Gake ɖo ŋku edzi ɣesiaɣi be Mawu metrɔna o. Alesi ɣe si ƒe keklẽ ɖoa anyigba dzi ɣesiaɣi nu metsina o la, nenemae eƒe lɔlɔ̃ hã nu metsina gbeɖe o. (Maleaxi 3:6; Yakobo 1:17) Ke míawo ya míate ŋu atrɔ—ne eganye hena ɣeyiɣi kpui aɖe hã. Ne anyigbaa le totrom la, viviti dona ɖe ɣletinyigbaa ƒe afã. Nenema ke ne míetrɔ ɖa tso Mawu gbɔ vie gɔ̃ hã la, míate ŋu ase le mía ɖokui me be mía kplii dome ƒomedodoa me megasẽ o. Nukae míate ŋu awɔ atsɔ aɖɔ nɔnɔme ma ɖo?
7. Aleke ɖokuimedzodzro ate ŋu akpe ɖe mía ŋu be míanɔ Mawu ƒe lɔlɔ̃ la mee?
7 Ne míese le mía ɖokui me be dometsotso aɖe va mía kple Mawu ƒe lɔlɔ̃a dome la, ele be míabia mía ɖokui se be: ‘Ðe mele Mawu ƒe lɔlɔ̃ la bum nu tsɛa? Vivivi la, ɖe metrɔ ɖa le mɔ aɖe nu tso Mawu gbagbe si si lɔlɔ̃ le la gbɔ, hele eɖem fia le mɔ vovovowo nu be megbɔdzɔ le xɔse mea? Ðe meda susu ɖe “ŋutilã ƒe nuwo” dzi le esi teƒe be madae ɖe “gbɔgbɔ me nuwo” dzia?’ (Romatɔwo 8:5-8; Hebritɔwo 3:12) Ne míete ɖe aga le Yehowa ŋu la, míate ŋu awɔ afɔɖeɖe aɖɔ nuwo ɖo, be míagava nɔ ƒomedodo kplikplikpli si me dzidzɔ le me kplii. Yakobo xlɔ̃ nu mí be: “Mite ɖe Mawu ŋu, eye wòate ɖe mia ŋu.” (Yakobo 4:8) Wɔ ɖe Yuda ƒe nya siawo dzi be: “Lɔlɔ̃tɔwo . . ., mitu mia ɖokui ɖe miaƒe xɔse kɔkɔe, si ƒo wo katã ta la dzi, eye mido gbe ɖa le Gbɔgbɔ kɔkɔe la me, eye midzra mia ɖokui ɖo le Mawu ƒe lɔlɔ̃ la me.”—Yuda 20, 21.
Nɔnɔmewo ƒe Tɔtrɔ Megblẽa Naneke le Mawu ƒe Lɔlɔ̃ Ŋu O
8. Tɔtrɔ kawoe ate ŋu ava míaƒe agbe me kpata?
8 Tɔtrɔ geɖe vaa míaƒe agbe me le nuɖoanyi sia me. Fia Salomo gblɔ be “azãgbe kple nuɖiɖeame li na [mí] katã.” (Nyagblɔla 9:11) Míaƒe agbe ate ŋu trɔ keŋkeŋ le zã ɖeka me. Lãmesẽ anɔ mía si egbea, eye etsɔ míate ŋu adze dɔ vevie. Egbea adze abe ɖe míaƒe dɔwɔɖui li ke ene, eye etsɔ ko dɔa nagblẽ. Ku ate ŋu akplɔ míaƒe lɔlɔ̃tɔ aɖe adzoe le vome. Kristotɔwo ate ŋu anɔ ŋutifafa me le dukɔ aɖe me hena ɣeyiɣi aɖe, eye le vome ko yometiti sesẽ aɖe nava wo dzi. Ðewohĩ woatso mía nu aʋatsotɔe si awɔe be woawɔ nu madzɔmadzɔwo ɖe mía ŋu. Ẽ, agbe mele dedie o alo kakaɖedzi blibo mele eŋu o.—Yakobo 4:13-15.
9. Nukatae wòanyo be míade ŋugble le Romatɔwo ta 8 lia ƒe akpa aɖewo ŋu?
9 Ne nu wɔnublanuiwo dzɔ ɖe mía dzi la, míate ŋu ase le mía ɖokui me be wogblẽ mí ɖi, ahanɔ ebum gɔ̃ hã be lɔlɔ̃ si le Mawu si na mí dzi ɖe kpɔtɔ. Esi nusiawo te ŋu dzɔna ɖe mí katã dzi ta la, anyo be míade ŋugble le apostolo Paulo ƒe akɔfanamenya siwo woŋlɔ ɖe Romatɔwo ta 8 lia me ŋu nyuie. Kristotɔ siwo wotsɔ gbɔgbɔ si ami nae woŋlɔ nya mawo na. Ke hã gɔmeɖose siwo le eme la sɔ na alẽ bubuawo me tɔwo, amesiwo zu Mawu xɔlɔ̃wo le esi wobu wo ame dzɔdzɔewo ta abe alesi Abraham hã nyee do ŋgɔ na Kristotɔwo ŋɔli ene.—Romatɔwo 4:20-22; Yakobo 2:21-23.
10, 11. (a) Nya kawoe futɔwo tsɔna ɖe Mawu ƒe amewo ŋu ɣeaɖewoɣi? (b) Nukatae nutsotso siawo mewɔa nu boo aɖeke le Kristotɔwo ŋu o?
10 Xlẽ Romatɔwo 8:31-34. Paulo bia be: “Ne Mawu le mía dzi la, ameka atsi tre ɖe mía ŋutii?” Enye nyateƒe be Satana kple eƒe xexe vɔ̃ɖia tsi tre ɖe mía ŋu. Futɔwo atso mía nu aʋatsotɔe, le dukɔ siwo me míele ƒe ʋɔnudrɔ̃ƒewo kura gɔ̃ hã. Wotsɔ nya ɖe dzila Kristotɔ aɖewo ŋu be wolé fu wo viwo le esi womeɖe mɔ be woazã atikewɔmɔnu aɖe si tsi tre ɖe Mawu ƒe se ŋu na wo o alo esi womeɖea mɔ na wo be woakpɔ gome le trɔ̃subɔlawo ƒe azãɖuɖuwo me o ta. (Dɔwɔwɔwo 15:28, 29; Korintotɔwo II, 6:14-16) Wobu fɔ Kristotɔ wɔnuteƒe bubuwo madzemadzee be wonye aglãdzelawo le esi wogbe be yewomawu yewo havi amegbetɔwo le aʋagbedzi alo akpɔ gome le dunyahehe me o ta. (Yohanes 17:16) Tsitretsiɖeŋula aɖewo to nyakakamɔnuwo dzi kaka aʋatsonyawo tso Yehowa Ðasefowo ŋu, hetso wo nu aʋatsotɔe be wonye vivimeha vɔ̃ɖi.
11 Gake mègaŋlɔ be o be le apostoloawo ƒe ŋkekea me la, wogblɔ be: “Wogblɔ nya ɖe kɔmamã sia ŋuti le afisiafi.” (Dɔwɔwɔwo 28:22) Ðe aʋatsonutsotsowo te ŋu wɔa nane ŋutɔŋutɔa? Mawue nɔa te ɖe Kristotɔ vavãwo ƒe Kristo ƒe tafevɔsa dzixɔxɔse dzi bua wo be wonye ame dzɔdzɔewo. Nukatae Yehowa magalɔ̃ amesiwo dea ta agu nɛ la o esi wòtsɔ nu xɔasitɔ kekeake si wòate ŋu ana—Via si gbɔ melɔ̃a nu le o—na ɖe wo ta megbe? (Yohanes I, 4:10) Fifia si wofɔ Kristo ɖe tsitre tso ame kukuwo dome eye wotsɔe ɖo Mawu ƒe nuɖusi me la, exɔna na Kristotɔwo vevie. Amekae ate ŋu atsi tre ɖe alesi Kristo xɔna na eyomedzelawoe ŋu wòasɔ alo atɔ gbe ʋɔnu dzɔdzɔe si Mawu drɔ̃na na eƒe ame wɔnuteƒewo wòadze edzi? Ame aɖeke meli o!—Yesaya 50:8, 9; Hebritɔwo 4:15, 16.
12, 13. (a) Nɔnɔme alo nuwɔna kawoe mate ŋu ama mí ɖa tso Mawu ƒe lɔlɔ̃ la gbɔ o? (b) Taɖodzinu ka tae Satana hea nɔnɔme sesẽwo vaa mía dzi ɖo? (d) Nukatae Kristotɔwo ɖua dzi godoo?
12 Xlẽ Romatɔwo 8:35-37. Le mía ŋutɔwo megbe la, ɖe ame alo nu bubu aɖe gali si ate ŋu ama mí ɖa tso Yehowa kple Via, Kristo Yesu, ƒe lɔlɔ̃ la gbɔa? Satana adi be yeazã yeƒe dɔwɔla siwo le anyigba dzi atsɔ anɔ fu ɖem na Kristotɔwoe. Le ƒe alafa siwo va yi me la, woti mía nɔviŋutsu kple nɔvinyɔnu Kristotɔwo yome vevie le dukɔ geɖe me. Le teƒe aɖewo egbea la, gakuxi sesẽwo dzea ŋgɔ mía nɔviwo gbesiagbe. Dɔ wua wo dometɔ aɖewo vevie alo nudodo boo aɖeke menɔa wo si o. Taɖodzinu ka tae Abosam le nɔnɔme sesẽ siawo hem vɛ? Eƒe tameɖoɖoa ƒe akpa aɖee nye be yeaɖe dzi le amewo ƒo woagatsɔ subɔsubɔ vavã ana Yehowa o. Satana di be yeana míaxɔe ase be Mawu ƒe lɔlɔ̃ la nu fa. Gake nenemae nyaa lea?
13 Abe Paulo, amesi yɔ nya tso Psalmo 44:23, ene la, míesrɔ̃ Mawu ƒe Nya si woŋlɔ la. Míese egɔme be Mawu ƒe ŋkɔa tae nusiawo dzɔna ɖe mí eƒe “alẽwo” dzi ɖo. Elɔ Mawu ƒe ŋkɔa ŋutikɔkɔ kple eƒe dziɖulanyenye taʋiʋli ɖe eme. Nya vevi siawo tae Mawu ɖe mɔ ɖe tetekpɔwo ŋu ɖo, menye be megalɔ̃a mí tae o. Aleke ke nɔnɔmeawo sesẽe o wona kakaɖedzi mí be lɔlɔ̃ si le Mawu si na eƒe amewo, kple mía dometɔ ɖesiaɖe la, metrɔ o. Ne míelé míaƒe nuteƒewɔwɔ me ɖe asi la, aleke ke wòadze abe ɖe woɖu mía dzi ene o, azu dziɖuɖu na mí boŋ. Kakaɖedzi be Mawu ƒe lɔlɔ̃ nu metsina gbeɖe o doa ŋusẽ mí heléa mí ɖe te.
14. Nukatae Paulo ka ɖe Mawu ƒe lɔlɔ̃ dzi togbɔ be Kristotɔwo akpe nɔnɔme sesẽwo ƒe fu hã?
14 Xlẽ Romatɔwo 8:38, 39. Nukae na Paulo ka ɖe edzi be naneke mate ŋu ama Kristotɔwo ɖa tso Mawu ƒe lɔlɔ̃ la gbɔ o? Ðikeke mele eme o be Paulo ŋutɔ ƒe nuteƒekpɔkpɔwo esime wònɔ subɔsubɔdɔa wɔm lae do ŋusẽ eƒe kakaɖedzi be nɔnɔme sesẽwo mate ŋu agblẽ lɔlɔ̃ si le Mawu si na mí dome o. (Korintotɔwo II, 11:23-27; Filipitɔwo 4:13) Gakpe ɖe eŋu la, Paulo nya nu tso Yehowa ƒe tameɖoɖo mavɔwo kple alesi wòwɔ nu kple Eƒe amewo va yi ŋu. Ðe ku gɔ̃ hã ate ŋu aɖu lɔlɔ̃ si le Mawu si na amesiwo subɔe nuteƒewɔwɔtɔe la dzia? Kura o! Nuteƒewɔla siwo ku la ayi edzi anɔ Mawu ƒe susu debliboa me, eye afɔ wo ɖe tsitre le eƒe ɣeyiɣi ɖoɖi dzi.—Luka 20:37, 38; Korintotɔwo I, 15:22-26.
15, 16. Yɔ nusiwo mate ŋu ana Mawu nadzudzɔ esubɔla wɔnuteƒewo lɔlɔ̃ gbeɖe o la dometɔ aɖewo.
15 Nyadzɔɖeamedzi ka kee míado goe le agbe si li egbea me—eɖanye afɔku si gblẽ nu le mía ŋu, dɔlémafɔ, alo ganyawo ƒe nugbegblẽ le ame ŋu—o, naneke mate ŋu agblẽ lɔlɔ̃ si le Mawu si na eƒe amewo me o. Mawudɔla sẽŋuwo, abe mawudɔla sẽto si va zu Satana ene, mate ŋu akpɔ ŋusẽ ɖe Yehowa dzi be wòagalɔ̃ esubɔla siwo tsɔ wo ɖokui kee la o. (Hiob 2:3) Dziɖuɖuwo ate ŋu axe mɔ ɖe Mawu subɔlawo nu, ade wo gaxɔ me, awɔ funyafunya wo ahayɔ wo be “xexe sia me aɖukpodzinuwo” faa. (Korintotɔwo I, 4:13) Fuléle si dukɔwo hena vɛ alea ate ŋu aƒoe ɖe amegbetɔwo nu be woatsi tre ɖe mía ŋu, gake ema meƒonɛ ɖe xexeame katã ƒe Dziɖulagã la nu be wòagblẽ mí ɖi o.
16 Esi míenye Kristotɔwo ta la, mele be míavɔ̃ nusi Paulo yɔ be ‘nusi li fifi’—si nye nudzɔdzɔwo, nɔnɔmewo, kple nuwɔna siwo le fifi nuɖoanyi sia me—alo ‘nusiwo ava dzɔ’ le etsɔme la dometɔ aɖeke be ate ŋu agblẽ Mawu kple eƒe amewo dome ƒomedodo me o. Togbɔ be ŋutilã me kple gbɔgbɔ me ŋusẽwo aho aʋa ɖe mía ŋu hã la, Mawu ƒe nuteƒewɔwɔ ƒe lɔlɔ̃ alé mí ɖe te. Abe alesi Paulo te gbe ɖe edzi ene la, ‘kɔkɔƒe alo gogloeƒe’ gɔ̃ hã metsia Mawu ƒe lɔlɔ̃ nu o. Ẽ, nusianu si adi be yeaɖe dzi le mía ƒo, alo nusianu si le didim be yeakpɔ ŋusẽ ɖe mía dzi, dometɔ aɖeke mate ŋu ama mí ɖa tso Mawu ƒe lɔlɔ̃ la gbɔ o; eye nuwɔwɔ bubu aɖeke mate ŋu ado kplamatse Wɔla la kple esubɔla wɔnuteƒewo dome ƒomedodo o. Mawu ƒe lɔlɔ̃ nu metsina gbeɖe o; eli tegbee.—Korintotɔwo I, 13:8.
Na Mawu ƒe Amenuveve nanɔ Vevie na Wò Tegbee
17. (a) Nukatae Mawu ƒe lɔlɔ̃ ƒe amesinɔnɔ “nyo wu agbe”? (b) Aleke míeɖenɛ fiana be míekpɔa ŋudzedze ɖe Mawu ƒe amenuveve ŋui?
17 Aleke Mawu ƒe lɔlɔ̃ le vevie na wòe? Ðe nèsena le ɖokuiwò me abe Dawid, amesi ŋlɔ be: “Elabena wò amenuveve nyo wu agbe; nye nuyiwo akafu wò. Ekema makafu wò le nye agbe me katã, eye mawu nye asiwo dzi le wò ŋkɔ me” la enea? (Psalmo 63:4, 5) Le nyateƒe me la, ɖe nane li si xexe sia me ƒe agbenɔnɔ ate ŋu ana si nyo wu Mawu ƒe lɔlɔ̃ kple xɔlɔ̃wɔwɔ si me nuteƒewɔwɔ lea? Le kpɔɖeŋu me, ɖe dɔwɔɖui si hea ga geɖe vɛ nyo wu tomefafa kple dzidzɔ si ƒomedodo kplikplikpli me nɔnɔ kple Mawu hena vɛa? (Luka 12:15) Kristotɔ aɖewo dze ŋgɔ nugbegbe le Yehowa gbɔ loo alo ku ƒe tiatiawɔwɔ. Ema dzɔ ɖe Yehowa Ðasefo geɖe dzi le Nazi ƒe fuwɔamegakpɔwo me le Xexemeʋa II me. Mía nɔvi Kristotɔwo dometɔ akpa gãtɔ tiae be yewoanɔ Yehowa ƒe lɔlɔ̃a me eye wolɔ̃ faa be yewoaku ne ehiã. Kakaɖedzi ate ŋu anɔ amesiwo nɔa Mawu ƒe lɔlɔ̃a me nuteƒewɔwɔtɔe si be ana etsɔme mavɔ si xexeame mate ŋu ana o la yewo. (Marko 8:34-36) Gake nusiwo wòlɔ ɖe eme la de ŋgɔ wu agbe mavɔ nɔnɔ ko.
18. Nukatae agbe mavɔ nɔnɔ dzroa ame ale gbegbe?
18 Togbɔ be míate ŋu anɔ agbe tegbee Yehowa manɔmee o hã la, te kpɔ nàkpɔ alesi agbenɔnɔ wòadidi Wɔla la manɔmee anɔ ɖa le susu me. Viɖe aɖeke manɔ eme o eye tameɖoɖo vavã aɖeke manɔ eŋu o. Yehowa na dɔ si naa dzidzeme eƒe amewo be woawɔ le ŋkeke mamlɛ siawo me. Eyata míate ŋu aka ɖe edzi be ne Yehowa, Tameɖola Gã la, na agbe mavɔ la, eme ayɔ fũ kple nu dodzidzɔname siwo ŋu viɖe le be míasrɔ̃ ahawɔ. (Nyagblɔla 3:11) Afika kee míasrɔ̃ nu ase ɖo le ƒe akpe siwo le ŋgɔ me o, míase “Mawu ƒe kesinɔnuwo kple nunya kple sidzedze [si] me goglo” la me awu enu gbeɖe o.—Romatɔwo 11:33.
Fofo la Lɔ̃a Mi
19. Kakaɖedzi kae Yesu Kristo na eƒe nusrɔ̃lawo hafi dzo?
19 Le Yesu ƒe fiẽ mamlɛa kple eƒe apostolo 11 wɔnuteƒeawo le Nisan 14, 33 M.Ŋ. dzi me la, egblɔ nya geɖe tsɔ do ŋusẽ wo ɖe nusi nɔ ŋgɔ la ŋu. Wo katã wonɔ anyi kple Yesu le eƒe tetekpɔwo me, eye woawo ŋutɔ wose alesi wòlɔ̃ wòe la le wo ɖokui me. (Luka 22:28, 30; Yohanes 1:16; 13:1) Emegbe Yesu gaka ɖe edzi na wo be: “Fofoa ŋutɔ lɔ̃a mi.” (Yohanes 16:27) Aleke nya mawo anya kpe ɖe nusrɔ̃lawo ŋu be woakpɔ lɔlɔ̃ si le woƒe Dziƒofofoa si na woe enye si!
20. Nukae nèɖo kplikpaa be yeawɔ, eye nuka dzie nàte ŋu aka ɖo?
20 Amesiwo le agbe egbea la dometɔ geɖe tsɔ ƒe geɖe subɔ Yehowa nuteƒewɔwɔtɔe. Ðikeke mele eme o be hafi nuɖoanyi vɔ̃ɖi sia nawu enu la, míagadze ŋgɔ tetekpɔ geɖewo. Mègana tetekpɔ alo fukpekpe siawo nana nàke ɖi nuteƒewɔwɔ ƒe lɔlɔ̃ si le Mawu si na wò la gbeɖe o. Míate ŋu adzudzɔ gbetete ɖe nyateƒenya sia dzi o: lɔlɔ̃ le Yehowa si na wò. (Yakobo 5:11) Mina mía dometɔ ɖesiaɖe míayi edzi awɔ míatɔ sinua ahanɔ Mawu ƒe sewo dzi wɔm nuteƒewɔwɔtɔe. (Yohanes 15:8-10) Mina miazã mɔnukpɔkpɔ ɖesiaɖe atsɔ akafu eƒe ŋkɔ. Mina míana tame si míeɖo be míayi edzi anɔ tetem ɖe Yehowa ŋu le gbedodoɖa kple eƒe Nya sɔsrɔ̃ me la me nagasẽ ɖe edzi. Nuka kee etsɔme ahe vɛ o, ne míedze agbagba ɖesiaɖe wɔ nusi dzea Yehowa ŋu la, míanɔ ŋutifafa me eye kakaɖedzi anɔ mía si ɖe eƒe lɔlɔ̃ si nu metsina o la ŋu bliboe.—Petro II, 3:14.
Aleke Nàɖo Wo Ŋui?
• Be míate ŋu ada asɔ le gbɔgbɔ me kple seselelãme gome la, ameka ƒe lɔlɔ̃e míehiã vevie wu?
• Nukawoe mate ŋu ana Yehowa nadzudzɔ esubɔlawo lɔlɔ̃ gbeɖe o?
• Nukatae Yehowa ƒe lɔlɔ̃ na mí “nyo wu agbe”?
[Biabiawo]
[Nɔnɔmetata siwo le axa 13]
Ne míese le mía ɖokui me be míete ɖa tso Mawu ƒe lɔlɔ̃ ŋu la, míate ŋu adze agbagba aɖɔ nuwo ɖo
[Nɔnɔmetata si le axa 15]
Paulo nya nusitae wonɔ eyome tim ɖo