Èhiã Dzitsinya si Wona Hehee

Yameʋuɖolawo kple ekula siwo nɔ New Zealand Yameʋudɔwɔƒea ƒe Yameʋu-901 me yina Antarctica nɔ mɔ kpɔm be gbemagbe anye ŋkeke si dzi yewoaɖo ŋkui ɖaa. Ʋumenɔlaawo le klalo kple woƒe fotoɖemɔ̃wo, eye dzidzɔ yɔ wo me fũ esime DC-10 yameʋu si me wonɔ la bɔbɔ ɖe anyi me esi wo gogo Antarctica be woate ŋu akpɔ anyigbaa ƒe dzedzeme dzeani la.

YAMEƲUKULA la ku ʋu ƒe 15 sɔŋ, eye eƒe ʋukuɣiwo katã sɔ gbɔ wu gaƒoƒo 11,000. Hafi woaho la, eŋlɔ mɔzɔzɔa ŋuti mɔfiame de yameʋua ƒe kɔmpiuta me nyuie eye menɔ nyanya nɛ be mɔfiame gbegblẽe wona ye o. Esi DC-10 yameʋua nɔ alilikpo siwo le yame meta 600 me tom yina la, elɔ Erebus-to la hege dze eƒe bali me eye ame 257 siwo katã nɔ eme la ku.

Alesi yameʋukulawo ɖoa ŋu ɖe kɔmpiutawo ŋu na mɔfiafia to yamee la, nenema ke wona dzitsinya amegbetɔwo be wòafia mɔ wo le agbe me. Eye afɔku dziŋɔ si dzɔ ɖe Yameʋu-901 dzi la ate ŋu ana míasrɔ̃ nu vevi aɖewo ku ɖe míaƒe dzitsinya ŋu. Le kpɔɖeŋu me, alesi yameʋu ƒe dedienɔnɔ le yame nɔa te ɖe yamezɔzɔmɔfianu ƒe dɔwɔwɔ nyuie kple nyatakaka siwo de pɛpɛpɛ dzi la, nenema ke míaƒe gbɔgbɔmemenyenye, míaƒe agbenɔnɔ, kple míaƒe ŋutilãmededienɔnɔ gɔ̃ hã nɔa te ɖe dzitsinya si wɔa dɔ nyuie dzi to agbenɔnɔ ƒe mɔfiame siwo le eteƒe pɛpɛpɛ nanae dzi.

Nublanuitɔe la, mɔfiame siawo le bubum kabakaba alo wole aɖaba ŋem ƒu wo dzi le xexeame egbea. Amerikatɔ nufiala aɖe gblɔ be: “Míesea nya geɖe ku ɖe alesi United States sukuvi mete xlẽa nu o, kple alesi mete ŋu ŋlɔa nu o, kpakple fu si wòkpena le anyigbaŋutinya nyanya me ŋu. Nenema ke vovototo dede nyui kple vɔ̃ dome hã sesẽ nɛ. Hekpe ɖe agbalẽxexlẽ kple akɔnta si menya o ŋuti la, míagblɔ be agbenyuinɔnɔ ƒe tɔtɔ gã aɖe hã va kpe ɖe nusɔsrɔ̃ kuxiawo ŋuti.” Egblɔ kpee be “sɔhɛ siwo li egbea menya ta le agbenyuinɔnɔ ŋu le agbeme o. Bia wo dometɔ aɖe se ne nane li nye ‘nyui kple vɔ̃’ hã, eye enumake àkpɔe be etɔtɔ, atsi numakemakee, atsi dzodzoe ade vovo ge do kpoe. . . . Ne woɖo kɔledzi la, tɔtɔ sia nu va sẽna ɖe edzi le esi teƒe be wòaka ɖe me.”

Nusiwo gbɔ tɔtɔ sia tso dometɔ ɖeka enye agbenɔnɔdzidzenu ɖoɖo na ame ɖokui, si nye nukpɔsusu si keke ta si le amewo si be dzidzenuwo toa vovo le ame ƒe didi alo kɔnu si dzi woda asi ɖo nu. Bu nusi adzɔ ne ɖe yameʋukulawo aku yameʋu mɔfiafia si wode eme si ŋu kakaɖedzi le manɔmee ke boŋ wòazã akaɖi si trona le xɔ kɔkɔwo tame si ŋu womate ŋu aɖo ŋu ɖo o si te ŋu tsina kplo ɣeaɖewoɣi la ɖe eteƒe ŋu kpɔ! Ðikeke mele eme o be afɔku si dzɔ le Erebus-to dzi tɔgbe abɔ ŋutɔ. Nenema ke esi xexeame ɖe asi le agbenyuinɔnɔ ƒe dzidzenu si woɖo anyi ŋu la, woŋe emetsonu wɔnublanuiwo eye wogale nuxaxa kple ku si le dzidzim ɖe dzi xam tso eme esi nuteƒemawɔmawɔ le ƒomewo me mam eye ame miliɔn geɖe le fu kpem le AIDS kple nulɔdɔ bubuwo ta.

Agbenɔnɔdzidzenu ɖoɖo na ame ɖokui adze abe tagbɔkɔkɔe nuwɔna ene ya, gake le nyateƒe me la, amesiwo nɔa agbe nenema le abe blema Niniwetɔ siwo menya ‘woƒe ɖusi tso mia gbɔ o’ ene. Amesiwo ɖoa agbenɔnɔdzidzenu na wo ɖokui le abe Israel-vi megbedela siwo yɔa “vɔ̃  be nyui kple nyui be vɔ̃” ene.—Yona 4:11; Yesaya 5:20.

Ekema afikae míatrɔ ɖo akpɔ se kple gɔmeɖose siwo me kɔ siwo metɔtɔa ame o atsɔ ahe míaƒe dzitsinya ahakpɔ eta? Ame miliɔn geɖe kpɔe be Biblia kpɔa nuhiahiã siawo gbɔ nyuie. Tso agbenyuinɔnɔ dzi yi dɔwɔwɔ ŋuti sewo dzi kple tso ɖeviwo hehe dzi va ɖo Mawu subɔsubɔ dzi la, Biblia na mɔfiame le nu veviwo katã ŋu. (Timoteo II, 3:16) Enye nusi dzi wote ŋu ka ɖo le ƒe alafa geɖe siwo va yi la me. Esi wònye ŋusẽtɔ gãtɔ, mía Wɔla, lae ɖo Biblia ƒe agbenyuinɔnɔ ƒe dzidzenuwo anyi ta la, wole vevie na amegbetɔwo katã. Eyata susu aɖeke meli si ta míanɔ agbe nyui kple vɔ̃ manyamanyae o.

Gake egbea la, wotso ɖe wò dzitsinya ŋu wu ɣeyiɣi bubu ɖesiaɖe. Aleke wòate ŋu adzɔ nenemae? Eye aleke nàwɔ akpɔ wò dzitsinya tae? Mɔ nyui si dzi nàto enye be nànya afisi amedzidzedzea kple eƒe ayemɔwo tso. Míadzro nusiawo me le nyati si akplɔe ɖo me.