Nyabiabia Siwo Tso Exlẽlawo Gbɔ

Ur ye Yehowa bla nu kple Abraham le loo alo Xaran ye?

Yehowa ƒe nubabla kple Abraham ŋu nya dze zi gbãtɔ le Mose I, 12:1-3, si gblɔ be: “Eye Yehowa gblɔ na Abram bena: Ʋu le wò anyigba dzi kple ƒowòmeawo gbɔ kple fofowò ƒe me, eye nayi anyigba, si mafia wò la dzi! Mawɔ wò dukɔ gã . . . Eye le wò me woayra anyigba dzi ƒomeawo katã le.” * Anye be Yehowa bla nu sia kple Abraham esime wònɔ Ur eye wògbugbɔ ɖo kpe edzi esime wòʋu va nɔ Xaran.

Le ƒe alafa gbãtɔ me la, Stefano ƒo nu tso Yehowa ƒe sedede na Abraham be wòaʋu ayi Kanaan ŋu. Esi wònɔ nu ƒom na Sanhedrin me tɔwo la, egblɔ be: ‘Ŋutikɔkɔe ƒe Mawu la ɖe eɖokui fia mía fofo Abraham, esime wòle Mesopotamia, hafi wòva nɔ Xaran, eye wògblɔ nɛ bena: “Ʋu tso wò anyigba dzi kple ƒowòmeawo gbɔ, eye nayi anyigba, si mafia wò la dzi.”’ (Dɔwɔwɔwo 7:2, 3) Ur ye nye Abraham denyigba, eye abe alesi Stefano gblɔe ene la, afimae nye afisi wòse gbeɖeɖea le gbã be wòaʋu ayi Kanaan. (Mose I, 15:7; Nexemya 9:7) Stefano megblɔ Mawu ƒe nubabla kple Abraham ŋu nya o, gake le Mose I, 12:1-3 me la, woƒo nu le nubabla ŋu kpe ɖe sededea be wòaʋu ayi Kanaan ŋu. Eyata esɔ be míaxɔe ase be Ur ye Yehowa bla nu kple Abraham le.

Gake Mose ƒe Agbalẽ Gbãtɔa me nuŋlɔɖia xexlẽ nyuie fia be Yehowa gbugbɔ gblɔ eƒe nubablaa ŋu nya na Abraham le Xaran, abe alesi wògbugbɔ gblɔe hegagblɔ eŋunya aɖewo kpee le ɣeyiɣi vovovo me le Kanaan ene. (Mose I, 15:5; 17:1-5; 18:18; 22:16-18) Nya si le Mose I, 11: 31, 32, fia be Abraham fofo, Tarax, ʋu le Ur yi Kanaan, eye Abraham, Sara, kple Lot yi kplii. Wova ɖo Xaran henɔ afima vaseɖe esime Tarax ku. Abraham nɔ Xaran ɣeyiɣi didi aɖe ale be kesinɔnu gbogbo aɖewo su esi. (Mose I, 12:5) Eye le ɣeyiɣi aɖe megbe la, Naxor, si nye Abraham nɔviŋutsu hã ʋu va afima.

Esi Biblia gblɔ Tarax ƒe ku ŋutinya vɔ la, eƒo nu le nya si Yehowa gblɔ na Abraham ŋu heyi dzi be: “Tete Abram ʋu, abe alesi Yehowa gblɔ nɛ ene.” (Mose I, 12:4) Eyata Mose I, 11:31–12:4 me nyawo na wòdzena gaglãa be Yehowa gblɔ nya si wogblɔ ɖe Mose I, 12:1-3 le Tarax ƒe ku megbe. Ne aleae wòle la, ke Abraham ʋu le Xaran yi anyigba si Yehowa fiae dzi tsɔ wɔ ɖe gbeɖeɖe si wòse teti koe nye ma kple esi wòse ƒe aɖewo do ŋgɔ le Ur la nu.

Le Mose I, 12:1 me nyawo nu la, Yehowa de se na Abraham be: “Ʋu le wò anyigba dzi kple ƒowòmeawo gbɔ kple fofowò ƒe me.” Ɣeaɖeɣi la, Abraham ‘denyigba’ enye Ur, eye afimae fofoa ‘ƒeme’ nɔ. Gake Abraham fofo ʋu kple eƒe aƒemetɔwo yi Xaran, eye Abraham va yɔ afisia be yewo denyigba. Esi wònɔ Kanaan ƒe geɖe megbe, eye wòdɔ eƒe xɔnuvi ɖe ‘wo denyigba dzi kple eƒe ƒometɔwo gbɔ’ be wòaɖaɖe srɔ̃ na Isak la, xɔnuvi la yi “Naxor ƒe du la me” (anye Xaran alo teƒe si gogoe). (Mose I, 24:4, 10) Afimae xɔnuvi la kpɔ Rebeka le le Abraham ƒe ƒometɔwo dome, si nye Naxor ƒe ƒome gã la me.—Mose I, 22:20-24; 24:15, 24, 29; 27:42, 43.

Esi Stefano nɔ nu ƒom na Sanhedrin la me tɔwo la, egblɔ le Abraham ŋu be: “Le fofoa ƒe ku megbe la ena wòʋu va anyigba sia, si dzi míele azɔ la dzi.” (Dɔwɔwɔwo 7:4) Esia fia be Yehowa ƒo nu kple Abraham le Xaran. Esɔ be míaxɔe ase be le ɣeyiɣi ma dzi la, Yehowa gbugbɔ ɖo kpe eƒe nubabla kple Abraham dzi nɛ abe alesi wogblɔe le Mose I, 12:1-3 ene, elabena Abraham ƒe ʋuʋu yi Kanaan megbe hafi nubablaa dze dɔwɔwɔ gɔme. Eyata ŋugbledede le nya siwo katã ku ɖe nyaa ŋu ŋuti na míaƒo nya ta be Yehowa anya bla nu kple Abraham xoxoxo le Ur eye wògbugbɔ ɖo kpe edzi le Xaran.

[Etenuŋɔŋlɔ]