Yehowae Nye Míaƒe Sitsoƒe

“Elabena Yehowa enye wò sitsoƒe, . . . Dzɔgbevɔ̃e maƒo go wò o.”—PSALMO 91:9, 10.

1. Nukatae míate ŋu agblɔ be Yehowae nye míaƒe sitsoƒe?

YEHOWA nye sitsoƒe vavã na eƒe amewo. Ne míetsɔ mía ɖokui nɛ bliboe la, ‘woate ŋu amimi mí le go sia go me, gake gbɔgbɔtsixe matsi mía ƒo o; míatsi dzodzodzoe, gake míabu ŋuɖoɖo keŋ o; woati mía yome, gake womagblẽ mí ɖi o; woaxlã mí ɖe anyi, gake womatsrɔ̃ mí o.’ Nukata? Elabena Yehowa naa ‘ŋusẽ si gbɔ dzɔdzɔmetɔ ŋu’ la mí. (Korintotɔwo II, 4:7-9) Ẽ, míaƒe Dziƒofofoa kpena ɖe mía ŋu míenɔa mawusosroɖagbe, eye hakpala la ƒe nyawo ate ŋu anye nya veviwo na mí, be: “Elabena Yehowa enye wò sitsoƒe, eye dziƒoʋĩtɔ la nètsɔ wɔ nɔwòƒee. Dzɔgbevɔ̃e maƒo go wò o.”—Psalmo 91:9, 10.

2. Nya kae míate ŋu agblɔ le Psalmo 91 kple nusi ŋugbe wòdo ŋu?

² Anye Mose ye ŋlɔ Psalmo 91 me nyawo. Woyɔ eŋkɔ le Psalmo 90 lia ƒe ŋgɔdonya me be eyae nye ekpala, eye Psalmo 91 lia kplɔe ɖo evɔ nya aɖeke metso wo dome si yɔ eŋlɔla bubu ƒe ŋkɔ  o. Anye be haxe ye Psalmo 91 lia nye wodzi; si fia be ame ɖeka doe ɖa (91:1, 2), eye hadziha xee nɛ (91:3-8). Ðewohĩ hadzila ɖeka ƒe gbe gaɖi ɖe eyome (91:9a) eye hadziha la xee nɛ (91:9b-13). Ate ŋu anye be emegbe hadzila ɖekae dzi akpa mamlɛawo (91:14-16). Aleke ke woɖadzii o, Psalmo 91 lia do gbɔgbɔmededienɔnɔ ƒe ŋugbe na Kristotɔ amesiaminawo ƒe ha la eye wòna kakaɖedzi ma tɔgbe wo hati ɖeadzɔgbewo ƒe ha bliboa. * Mina míadzro psalmo sia me le alesi Yehowa subɔla siawo katã abui nu.

Dedienɔnɔ le ‘Mawu ƒe Bebeƒe’

3. (a) Nukae nye “dziƒoʋĩtɔ la ƒe bebeƒe”? (b) Nukae míekpɔna esi “míele ŋusẽkatãtɔ la ƒe vɔvɔli te”?

³ Hakpala la dzi ha be: “Amesi bɔbɔ nɔ dziƒovĩtɔ la ƒe bebeƒe, eye wòle ŋusẽkatãtɔ la ƒe vɔvɔli te la, eya gblɔna na Yehowa be: Nye sitsoƒe kple nye mɔ̃ sesẽ nènye, nye Mawu, si ŋu meɖoa ŋu ɖo.” (Psalmo 91:1, 2) “Dziƒoʋĩtɔ la ƒe bebeƒe” nye kpɔɖeŋu ƒe ametakpɔƒe na mí, kple vevietɔ na amesiaminawo, amesiwo Abosam tɔ ŋkui koŋ. (Nyaɖeɖefia 12:15-17) Ne menye ɖe míeva dze Mawu gbɔ abe gbɔgbɔ me amedzrowo ene wòle mía ta kpɔm o la, anye ne etsrɔ̃ mí katã. Esi míeva dze “ŋusẽkatãtɔ la ƒe vɔvɔli te” ta la, Mawu ƒe vɔvɔli si kpɔa ame ta la tsyɔa mía dzi. (Psalmo 15:1, 2; 121:5) Sitsoƒe aɖeke mele dedie wu míaƒe Aƒetɔ Dziɖulagã, Yehowa o, eye mɔ̃ sesẽ aɖeke metri akɔ wui o.—Lododowo 18:10.

4. Mɔ̃ kawoe “xevimɔ̃trela,” Satana, zãna, eye aleke míedona le wo mee?

⁴ Hakpala la gblɔ kpee be: “[Yehowa] aɖe wò tso xevimɔ̃trela ƒe adoboli me, tso dɔvɔ̃, si gblẽa nu me.” (Psalmo 91:3) Le blema Israel la, kamɔ̃ alo ayemɔ̃ ye xevimɔ̃trela ɖona tsɔ léa xewoe. Kamɔ̃ siwo “xevimɔ̃trela,” Satana, tsɔ ɖea amewo dometɔ aɖewoe nye eƒe habɔbɔ vɔ̃ɖi kple ‘ayemenuwɔnawo.’ (Efesotɔwo 6:11) Eɣlaa mɔ̃wo ɖe mɔ me na mí be woahe mí ade nuvɔ̃ɖiwɔwɔ me be nu nagblẽ le mía ŋu le gbɔgbɔ me. (Psalmo 142:4) Gake esi míegbe nu le numadzɔmadzɔwɔwɔ gbɔ ta la, ‘míaƒe luʋɔ le abe xe si do le kamɔ̃ me ene.’ (Psalmo 124:7, 8) Aleke gbegbe míedaa akpee nye si be Yehowa ɖea mí tsoa “xevimɔ̃trela” vɔ̃ɖia si me!—Mateo 6:13.

5, 6. “Dɔvɔ̃” kae ‘gblẽ nu’ le amewo ŋu, gake nukatae megblẽa nu le Yehowa ƒe amewo ŋu o?

⁵ Hakpala la yɔ “dɔvɔ̃, si gblẽa nu.” Nane le abe dɔxɔleameŋu vɔ̃ɖi aɖe ene si “gblẽa nu” le amegbetɔƒomea kple Yehowa ƒe dziɖulanyenye taʋlilawo ŋu. Ŋutinyaŋlɔla Arnold Toynbee ŋlɔ nu tso eŋu be: “Tso esime Xexemeʋa II ke la, dulɔlɔ̃ wɔe be dukɔ nɔɖokuisiwo dzi ɖe edzi zi gbɔ zi eve . . . Mamae nye nɔnɔme si va le ameƒomea si nɔm enuenu.”

⁶ Le ƒe gbogbo siwo katã va yi me la, dziɖula aɖewo ƒlɔ dzo ɖe dzrehehe siwo maa dukɔwo me la te. Wote tɔ ɖe edzi hã be woatsɔ bubu deto ana yewo alo atsɔe ana nɔnɔmewɔwɔ alo dzesi vovovo aɖewo. Gake Yehowa meɖe mɔ gbeɖe be “dɔvɔ̃” sia nagblẽ nu le eƒe amewo ŋu o. (Daniel 3:1, 2, 20-27; 6:8-11, 17-23) Esi míenye dukɔwo dome nɔvihabɔbɔ si me lɔlɔ̃ le ta la, Yehowa koe míesubɔna, míedea akpa aɖeke dzi o le Ŋɔŋlɔawo nu, eye míeda asi ɖe edzi nazãmabumabutɔe be “le dukɔ sia dukɔ me, amesi ke [vɔ̃a Mawu], eye wòwɔa nu dzɔdzɔe la, eya dzea eŋu.” (Dɔwɔwɔwo 10:34, 35; Mose II, 20:4-6; Yohanes 13:34, 35; 17:16; Petro I, 5:8, 9) Togbɔ be ‘míekpea fu aɖewo’ abe yometiti ene le esi míenye Kristotɔwo ta hã la, dzi dzɔa mí eye míele dedie le gbɔgbɔ me le “dziƒoʋĩtɔ la ƒe bebeƒe.”

7. Aleke Yehowa tsɔ eƒe ‘fu tsyɔa’ mía dzii?

⁷ Esi Yehowa nye míaƒe sitsoƒe ta la, nya siwo faa akɔ na mí enye be: “Atsɔ eƒe fu atsyɔ dziwò, eye eƒe aʋala te nabe ɖo; akpoxɔnu  gã kple ɖagbitɔ enye eƒe nyateƒe la.” (Psalmo 91:4) Mawu kpɔa mía ta abe alesi xe kekena ɖe viawo dzi kpɔa wo ta ene. (Yesaya 31:5) ‘Etsyɔa eƒe fuwo mía dzi be asi nagaka mí o.’ Míagblɔe gbadzaa ko be xe ƒe fuwo nye eƒe aʋalawo. Woawoe xe la tsɔ tsyɔa viawo dzi tsɔ kpɔa wo ta tso lãlénuwo si me. Esi míele abe xevi suewo ene ta la, míenɔa dedie le Yehowa ƒe kpɔɖeŋu ʋalawo te elabena míebe ɖe eƒe Kristo-ha vavãtɔa me ta.—Rut 2:12; Psalmo 5:2, 12.

8. Aleke Yehowa ƒe “nyateƒe” nye akpoxɔnu gã kple glie?

⁸ Míeɖoa ŋu ɖe “nyateƒe,” alo nuteƒewɔwɔ ŋu. Ele abe blematɔwo ƒe akpoxɔnu gã si ƒe nɔnɔme ɖia ʋɔtru eye wòlolona ale be wote ŋu xea ameti bliboa ŋgɔ ene. (Psalmo 5:13) Ŋuɖoɖo ɖe takpɔkpɔ sia tɔgbe ŋu wɔe be míevɔ̃na o. (Mose I, 15:1; Psalmo 84:12) Abe míaƒe xɔse ene la, Mawu ƒe nyateƒetɔnyenye nye akpoxɔnu gã si tsia Satana ƒe aŋutrɔ bibiawo nu hexea futɔwo ƒe kɔwo. (Efesotɔwo 6:16) Eganye gli hã, si nye kpo sesẽ aɖe si megbe míetsi tre ɖo sesĩe.

‘Míavɔ̃ O’

9. Nukatae zãme ate ŋu anye vɔvɔ̃ɣi, gake nukatae ŋɔdzi meléa mí o?

⁹ Le Mawu ƒe ametakpɔkpɔ ta la, hakpala la gblɔ be: “Màvɔ̃ zã me ŋɔdzi kple aŋutrɔ, si le ʋɔ lũm le ŋkeke me, dɔvɔ̃, si le zɔzɔm le blukɔ me, kple dɔ xɔleameŋua, si le nu gblẽm le ŋdɔ la o.” (Psalmo 91:5, 6) Esi wònye viviti mee wowɔa nu vɔ̃ɖi geɖe le ta la, vɔvɔ̃ ate ŋu aɖo ame le zãme. Le gbɔgbɔmeviviti si tsyɔ anyigba dzi me la, ayemenuwoe míaƒe futɔwo wɔna zi geɖe be yewoatsɔ agblẽ míaƒe gbɔgbɔmemenyenye me ahatɔ te míaƒe gbeƒãɖeɖedɔa. Gake ‘míevɔ̃a zãme ŋɔdzi aɖeke o’ elabena Yehowa dzɔa mía ŋu.—Psalmo 64:2, 3; 121:4; Yesaya 60:2.

10. (a) Anye nukae “aŋutrɔ, si le ʋɔ lũm le ŋkeke me” fia, eye aleke míewɔa nu ɖe eŋui? (b) Aleke “dɔvɔ̃, si le zɔzɔm le blukɔ me” la le, eye nukatae míevɔ̃na nɛ o?

¹⁰ “Aŋutrɔ, si le ʋɔ lũm le ŋkeke me” ate ŋu anye nya tɔamewo gbɔgblɔ. (Psalmo 64:4-6; 94:20) Esi míele edzi le nyateƒenyawo gblɔm la, tsitretsitsi ɖe míaƒe subɔsubɔdɔ kɔkɔea ŋu gaglãa nenema nyea dzodzro. Gakpe ɖe eŋu la, míevɔ̃a “dɔvɔ̃, si le zɔzɔm le blukɔ me” o. Esia nye kpɔɖeŋudɔvɔ̃ si woto vɛ le xexe sia si dze dɔ le agbenɔnɔ kple subɔsubɔ gome eye wòle Satana ƒe ŋusẽ te la ƒe blukɔ me. (Yohanes I, 5:19) Ewɔnɛ be susu kple dzi ƒe nɔnɔme si wua ame va nɔa ame si, ale be amewo meganyaa nu tso Yehowa, eƒe tameɖoɖowo, kple eƒe ɖoɖo siwo me lɔlɔ̃ le la ŋu o. (Timoteo I, 6:4) Míevɔ̃na le viviti sia me  o, elabena míele gbɔgbɔmekekeli gã aɖe me.—Psalmo 43:3.

11. Nukae dzɔna ɖe amesiwo ‘ŋu wogblẽa nu le le ŋdɔ’ dzi?

¹¹ ‘Dɔxɔleameŋu, si le nu gblẽm le ŋdɔ’ hã medoa ŋɔdzi na mí o. “Ŋdɔ” ate ŋu afia yeaɖi ŋkuʋuʋu si le xexeame. Amesiwo xɔa eƒe ŋutilã me nukpɔsusuwo dzi se kuna le gbɔgbɔ me. (Timoteo I, 6:20, 21) Esi míele Fiaɖuƒegbedasia gblɔm dzinɔameƒotɔe la, míevɔ̃a míaƒe futɔwo dometɔ aɖeke o, elabena Yehowae nye mía Takpɔla.— Psalmo 64:2; Lododowo 3:25, 26.

12. Amekawo xae ame akpewo le “anyi dzem” ɖo, eye le mɔ ka nu?

¹² Hakpala la yi edzi be: “Akpe nenɔ anyi dzem ɖe axawò, eye akpe ewo ɖe wò nuɖusi me, ke wò la, mate ɖe ŋuwò o! Vavã, àkpɔe kple wò ŋkuwo, eye àkpɔ, alesi woaɖo eteƒe na ame vɔ̃ɖiwoe.” (Psalmo 91:7, 8) Le esi ame geɖe mena Yehowa nye woƒe sitsoƒe o ta la, ‘wodze anyi’ ɖe ku me le gbɔgbɔ me ‘ɖe mía xa.’ Efia be “akpe ewo” dze anyi ɖe egbeŋkekea me gbɔgbɔ me Israel ƒe “nuɖusi me.” (Galatiatɔwo 6:16) Gake eɖanye Kristotɔ amesiaminawo alo woƒe zɔhɛ ɖeadzɔgbewo míenye o, míele  dedie le Mawu ƒe “bebeƒe.” Ðeko míele alesi ‘wole eteƒe ɖom na ame vɔ̃ɖi’ siwo le xaxa kpɔm tso asitsatsa, subɔsubɔ, kple nu bubuwo mee la ‘kpɔm kple ŋku.’—Galatiatɔwo 6:7.

‘Dzɔgbevɔ̃e Aɖeke Maɖi Kpe Mí O’

13. Dzɔgbevɔ̃e kawoe meƒoa go mí o, eye nukatae?

¹³ Togbɔ be xexe sia ƒe dedienɔnɔ me le gbegblẽm hã la, míetsɔa Mawu ɖoa nɔƒe gbãtɔ eye míekpɔa dzideƒo tso hakpala la ƒe nya siawo me be: “Elabena Yehowa enye wò sitsoƒe, eye dziƒoʋĩtɔ la nètsɔ wɔ nɔwòƒee. Dzɔgbevɔ̃e maƒo go wò o, eye hiãkame mate ɖe wò agbadɔ ŋu o.” (Psalmo 91:9, 10) Ẽ, Yehowae nye míaƒe sitsoƒe. Gake míetsɔ Mawu Dziƒoʋĩtɔ la wɔ ‘míaƒe nɔƒee’ hã, afisi míenɔa dedie le. Míekafua Yehowa be eyae nye Xexeame Katã Dziɖulagã, míetsɔe wɔ míaƒe Dedienɔƒe ‘hele’ egbɔ, eye míegblɔa eƒe Fiaɖuƒea ŋu nyanyuia. (Mateo 24:14) Eyata ‘dzɔgbevɔ̃e aɖeke maƒo go mí o’—dzɔgbevɔ̃e siwo woyɔ va yi le psalmo sia me dometɔ aɖeke o. Ne dzɔgbevɔ̃ewo abe anyigbaʋuʋuwo, ahom sesẽwo, tsiɖɔɖɔwo, dɔwuamewo, kple aʋawɔwɔ ƒe nugbegblẽwo ɖi kpe mía kple ame bubuwo hã la, nusiawo megblẽa míaƒe xɔse alo gbɔgbɔ me dedienɔnɔ me o.

14. Nukatae dɔvɔ̃ wuamewo mekpɔa ŋusẽ ɖe mí Yehowa subɔlawo dzi o?

¹⁴ Kristotɔ amesiaminawo le abe amedzro siwo le avɔgbadɔwo me tso nuɖoanyi sia gbɔ. (Petro I, 2:11) ‘Dɔvɔ̃ gɔ̃ hã megogoa woƒe agbadɔ o.’ Eɖanye dziƒo alo anyigba dzi nɔnɔe míele mɔ kpɔm na o, míenye xexeame ƒe akpa aɖeke o, eye eƒe gbɔgbɔ me dɔvɔ̃ wuame siwo nye agbegbegblẽnɔnɔ, ŋutilãmenudidi, alakpasubɔsubɔ, kple ‘lã wɔadã la’ kpakple eƒe “legba,” si nye Dukɔ Ƒoƒuawo, subɔsubɔ mekpɔa ŋusẽ ɖe mía dzi o.—Nyaɖeɖefia 9:20, 21; 13:1-18; Yohanes 17:16.

15. Mɔ kawo nue mawudɔlawo kpena ɖe mía ŋu le?

¹⁵ Hakpala la gblɔ tso alesi wokpɔa mía ta ŋu be: “[Yehowa] adɔ eƒe dɔlawo ɖe ŋuwò, ne woakpɔ tawò le wò mɔwo katã dzi. Asi me woakɔ wò ɖo, ne màgatsɔ wò afɔ axlã ɖe kpe aɖeke o.” (Psalmo 91:11, 12) Wona ŋusẽ mawudɔlawo be woakpɔ mía ta. (Fiawo II, 6:17; Psalmo 34:8-10; 104:4; Mateo 26:53; Luka 1:19) Wodzɔa mía ŋu ‘le míaƒe mɔwo katã dzi.’ (Mateo 18:10) Mawudɔlawo fiaa mɔ mí Fiaɖuƒegbeƒãɖelawo eye wodzɔa mía ŋu be míagakli nu le gbɔgbɔ me o. (Nyaɖeɖefia 14:6, 7) ‘Kpewo’ abe mɔ xexe ɖe míaƒe dɔa nu ene gɔ̃ hã mena míekli nu ale be míebu Mawu ƒe ŋudzedzekpɔkpɔ o.

16. Vovototo kae le “dzata” kple “ƒli” ƒe nu dzi dzedze dome, eye aleke míewɔa nu ɖe wo ŋui?

¹⁶ Hakpala la yi edzi be: “Àzɔ dzata kple ƒli dzi, eye ànyã avuzi le dzatavi kple ʋɔ driba dzi.” (Psalmo 91:13) Abe alesi dzata dzea nu dzi ŋkume kple ŋkumee la, míaƒe futɔwo dometɔ aɖewo tsia tre ɖe mía ŋu gaglãa to sewo dede me be woatsɔ atɔ te míaƒe gbeƒãɖeɖedɔa. Azɔ hã wodzea mía dzi le vome abe alesi ƒli dona tsoa ɣaɣlaƒe ene. Ɣeaɖewoɣi subɔsubɔhakplɔlawo nɔa adzame toa sewɔlawo, ʋɔnudrɔ̃lawo, kple ame bubuwo dzi dzea mía dzi. Gake to Yehowa ƒe kpekpeɖeŋu dzi la, míekpɔa nyaa gbɔ ŋutifafatɔe le ʋɔnu, si wɔnɛ be ‘míeʋlia nyanyuia ta heɖonɛ anyi le se nu.’—Filipitɔwo 1:7; Psalmo 94:14, 20-22.

17. Aleke míenyaa avuzi le ‘dzatatsui’ dzi?

¹⁷ Hakpala la ƒo nu tso ‘avuzinyanyã le dzatatsui kple ʋɔ driba dzi’ ŋu. Dzatatsui ƒe mo sẽna ŋutɔ, eye da gã ate ŋu anye esi lolo ŋutɔ. (Yesaya 31:4) Gake aleke ke dzatatsuia ƒe mo asẽe ne ele nu dzi dzem ŋkume kple ŋkumee o, toɖoɖo Mawu wu amegbetɔ alo habɔbɔ siwo wɔa nu abe dzata ene wɔnɛ be míenyaa avuzi le edzi le kpɔɖeŋumɔ nu. (Dɔwɔwɔwo 5:29) Eyata “dzata” wɔadã mewɔa nuvevi mí le gbɔgbɔ me o.

18. Ameka dzie “ʋɔ driba” la na míeɖo ŋkui, eye nukae wòle be míawɔ ne wòdze mía dzi?

¹⁸ “Ʋɔ driba” ye wozã le Helagbe me Septuagint Biblia hã me. Ate ŋu ana míaɖo ŋku “ʋɔ driba gã, si nye da xoxo la, esi woyɔna be: Abosam kple Satana” dzi. (Nyaɖeɖefia 12:7-9;  Mose I, 3:15) Ele abe lã dziŋɔ aɖe si ate ŋu agbã lãme na eƒe nuléle hafi amii ene. (Yeremya 51:34) Ne Satana le agbagba dzem be yeaxatsa ɖe mía ŋu, atsɔ xexe sia ƒe nyaƒoɖeamenuwo agbã lãme na mí ami mí la, mina míaʋli ado le esi me anya avuzi le “ʋɔ driba” sia dzi. (Petro I, 5:8) Ele be amesiamina susɔeawo nawɔe alea ne wodi be yewoakpɔ gome le Romatɔwo 16:20 ƒe emevava me.

Yehowa—Mía Xɔla

19. Nukatae míesi Yehowa tso?

¹⁹ Hakpala la nɔ Mawu teƒe gblɔ tso tadeagula vavãtɔ ŋu be: “Maɖee, elabena eku ɖe ŋunye; makɔe aɖo kɔkɔƒe, elabena enya nye ŋkɔ.” (Psalmo 91:14) Nyagbe “makɔe aɖo kɔkɔƒe” fia le nyaa ŋutɔŋutɔ nu be anɔ afisi asi matui o. Mí Yehowa subɔlawo míesii tso vevietɔ le esi ‘míaƒe dzi ku ɖe eŋu’ ta. (Marko 12:29, 30; Yohanes I, 4:19) Ewɔe be Mawu hã ‘ɖea mí’ tsoa míaƒe futɔwo si me. Míatsrɔ̃ ɖa le anyigba dzi gbeɖe o. Ke boŋ woaxɔ na mí le esi míenya Mawu ƒe ŋkɔ heyɔnɛ le xɔse me ta. (Romatɔwo 10:11-13) Eye míeɖoe kplikpaa be ‘míazɔ le Yehowa ƒe ŋkɔ me tegbee.’—Mixa 4:5; Yesaya 43:10-12.

20. Esi Psalmo 91 ɖo eƒe nuwuwu la, nuka ƒe ŋugbee Yehowa do na esubɔla nuteƒewɔla?

²⁰ Esi Psalmo 91 ɖo eƒe nuwuwu la, Yehowa gblɔ le esubɔla wɔnuteƒe ŋu be: “Ayɔm, eye matɔ nɛ, meli kplii le hiã me; maɖee le eme, eye mahade bubu eŋu. Matsɔ agbe didi aɖi ƒo nɛ, eye mana wòakpɔ nye xɔname.” (Psalmo 91:15, 16) Ne míedo gbe ɖa yɔ Mawu le ɖekawɔwɔ me kple eƒe lɔlɔ̃nu la, aɖo eŋu na mí. (Yohanes I, 5:13-15) Míeto fukpekpe geɖe me xoxo le alesi Satana tso ɖe mía ŋu ta. Gake nya siwo nye “meli kplii le hiã me” dzra mí ɖo ɖe dodokpɔ siwo gale ŋgɔ gbɔna ŋu eye wona kakaɖedzi mí be Mawu alé mí ɖe te ne wotsrɔ̃ nuɖoanyi vɔ̃ɖi sia.

21. Aleke wona amesiaminawo le ŋutikɔkɔe me xoxo?

²¹ Togbɔ be Satana ƒe tsitretsiɖeŋua nu sẽ ŋutɔ hã la, woado ŋutikɔkɔe na amesiamina susɔe siwo gale mía dome la le dziƒo le Yehowa ƒe ɣeyiɣi ɖoɖi dzi—esi wonɔ anyigba dzi ‘ɣeyiɣi didi’ vɔ megbe. Ke hã mɔ ɖedzesi siwo nu Mawu xɔ na amesiaminawo le la wɔe be wole gbɔgbɔ me ŋutikɔkɔe me xoxo. Eye bubu ka gbegbee nye si wode wo ŋu be woxɔ ŋgɔ nye Yehowa ƒe Ðasefowo le anyigba dzi le ŋkeke mamlɛ siawo me! (Yesaya 43:10-12) Xɔxɔ gãtɔ kekeake si Yehowa axɔ na eƒe amewo la anye le eƒe Harmagedon-ʋã gã la me esime wòaʋli eƒe dziɖulanyenye ta ahakɔ eƒe ŋkɔ kɔkɔe la ŋu.—Psalmo 83:19; Xezekiel 38:23; Nyaɖeɖefia 16:14, 16.

22. Amekawoe ‘akpɔ Yehowa ƒe xɔname’?

²² Míeɖanye Kristotɔ amesiaminawo alo woƒe zɔhɛ ɖeadzɔgbewo o, Mawue míekpɔa mɔ na be wòaxɔ na mí. Woaxɔ na amesiwo le Mawu subɔm nuteƒewɔwɔtɔe le “Yehowa ƒe ŋkeke gã dziŋɔ la” dzi. (Yoel 3:3-5) Mawu atsɔ ‘agbe didi’—si nye agbe mavɔ—‘aɖi ƒo na’ mí amesiwo nye “ameha gã” me tɔ siwo atsi agbe age ɖe eƒe xexe yeyea me agawɔ nuteƒe le dodokpɔ mamlɛtɔ me. Afɔ ame gbogbo aɖewo hã ɖe tsitre. (Nyaɖeɖefia 7:9; 20:7-15) Anye dzidzɔ gã ŋutɔ na Yehowa be wòato Yesu Kristo dzi ‘ana míakpɔ xɔxɔ.’ (Psalmo 3:9) Esi mɔkpɔkpɔ nyui siawo gbegbe le mía ŋgɔ ta la, mina míayi edzi anɔ Mawu sinu kpɔm be wòakpe ɖe mía ŋu míaxlẽ míaƒe ŋkekewo hena eƒe ŋutikɔkɔe. Neva eme be míato míaƒe nuƒoƒo kple nuwɔna dzi aɖee afia be Yehowae nye míaƒe sitsoƒe.

[Etenuŋɔŋlɔ]

Aleke Nàɖo Wo Ŋui?

• Nukae nye “dziƒoʋĩtɔ la ƒe bebeƒe”?

• Nukatae míevɔ̃na o?

• Aleke wòadzɔ be ‘dzɔgbevɔ̃e aɖeke maƒo go mí o’?

• Nukata míate ŋu agblɔ be Yehowae nye mía xɔla?

[Biabiawo]

[Nɔnɔmetata si le axa 17]

Ènya alesi Yehowa ƒe nyateƒetɔnyenye nye akpoxɔnu gã na mía?

[Nɔnɔmetata siwo le axa 18]

Yehowa kpena ɖe esubɔlawo ŋu wowɔa woƒe subɔsubɔdɔa togbɔ be wodzea wo dzi ŋkume kple ŋkume kpakple le vome hã

[Afi Si Míexɔ Mɔɖeɖe Tso]

Cobra: A. N. Jagannatha Rao, Trustee, Madras Snake Park Trust