Agbemeŋutinya

Teƒeɖoɖowo Le Yehowa Ƒe Amekpekpe Dzi Wɔwɔ Me

ABE ALESI MARIA DO CÉU ZANARDI GBLƆE ENE

“ Yehowa nya nusi wɔm wòle. Ne ekpe wò la, ele be nàwɔ ɖe edzi ɖokuibɔbɔtɔe.” Fofonye ƒe nya sia si wògblɔ, ƒe 45 aɖewo enye sia va yi la, kpe ɖe ŋunye mewɔ ɖe amekpekpe gbãtɔ si mexɔ tso Yehowa ƒe habɔbɔa gbɔ, be manye ɣeyiɣiawo katã ƒe subɔla la dzi. Egbea, megadaa akpe ɖe fofonye ƒe aɖaŋuɖoɖoa ta elabena mekpɔ teƒeɖoɖo xɔasi geɖe tso amekpekpe siawo dzi wɔwɔ me.

PAPA dɔ Gbetakpɔxɔ magazinea le ƒe 1928 me eye wòva tsɔ ɖe le Biblia me. Esi wònye be titina Portugal yee wònɔ ta la, agbalẽ siwo wòxɔna toa posu me kple tɔgbuinye ƒe Biblia si nɔ esi koe nye kadodo si nɔ woa kple Mawu ƒe habɔbɔa dome. Le ƒe 1949 me, esime mexɔ ƒe 13 la, míaƒe ƒomea ʋu yi Brazil, si nye Dada wo de, heɖanɔ Rio de Janeiro gbɔto.

Míaƒe aƒelika yeyewo kpe mí be míade yewoƒe sɔleme, eye míede sẽe. Papa lɔ̃a nya biabia wo ku ɖe dzomavɔ, luʋɔ la, kple nusi gbɔna dzɔdzɔ ge ɖe anyigba dzi le etsɔme ŋu—gake ŋuɖoɖo aɖeke menɔa wo si o. Papa gblɔna be: “Ðeko wòle be míalala nyateƒe Biblia nusrɔ̃viawo.”

Gbeɖeka la, ŋkunɔ aɖe va míaƒe aƒeme henɔ Gbetakpɔxɔ kple Nyɔ! nam. Papa bia nya mawo kee, eye wòna Biblia me ŋuɖoɖo siwo me kɔ. Le kwasiɖa si kplɔe ɖo me la, Yehowa Ðasefo bubu aɖe srã mí kpɔ. Le biabia geɖe ŋuɖoɖo megbe la, ebia mɔ hegblɔ be yeyina “gbea dzi.” Esi Papa mese nusi wògblɔ la gɔme o hesusu be Ðasefowo kpɔa gome  le kamedefefewo me la, exlẽ Mateo 13:38 nɛ be: “[Gbea dzi] enye xexe la me.” Papa bia be: “Nye hã mate ŋu ayia?” Eɖo eŋu be: “Ẽ.” Dzi dzɔ mí ŋutɔ be míegake ɖe Biblia ƒe nyateƒea ŋu ake! Papa xɔ nyɔnyrɔ le takpekpe si kplɔe ɖo me, eye mexɔ nyɔnyrɔ le ema megbe kpuie, le November 1955 me.

Nye Amekpekpe Gbãtɔ Dzi Wɔwɔ

Le ƒe ɖeka kple afã megbe la, mexɔ agbalẽkotoku gã aɖe si le hẽ, tso Yehowa Ðasefowo ƒe alɔdzedɔwɔƒe si le Rio de Janeiro gbɔ, si wotsɔ nɔ kpeyem be manye ɣeyiɣiawo katã ƒe gbeƒãɖeɖedɔa wɔla. Ɣemaɣi la, Dada ƒe lãme gblẽ ŋutɔ, eyata mebia fofonye be wòaɖo aɖaŋu nam. Eɖo eŋu kakaɖedzitɔe be: “Yehowa nya nusi wɔm wòle. Ne ekpe wò la, ele be nàwɔ ɖe edzi ɖokuibɔbɔtɔe.” Esi nya siawo de dzi ƒo nam ta la, mekpe amekpegbalẽvia ɖo hedze ɣeyiɣiawo katã ƒe subɔsubɔdɔa gɔme le July 1, 1957 dzi. Du si me woɖom ɖo gbã enye Três Rios, si nye du aɖe le Rio de Janeiro Nutome.

Gbã la, Três Riostɔwo medi be yewoase míaƒe gbedasia o elabena menye Katolikotɔwo ƒe Biblia zãmee míenɔ o. Míekpɔ kpekpeɖeŋu geɖe esi míete Biblia sɔsrɔ̃ kple Geraldo Ramalho, amesi nye Katolikotɔ veviedola aɖe. Ekpe ɖe ŋunye nye asi ka Biblia aɖe si dzi afima ƒe nunɔla ƒe asinuŋɔŋlɔ le. Tso ɣemaɣi la, ne ame aɖe fɔ tsitretsiɖeŋunya aɖe ɖe te la, mefiaa nunɔlaa ƒe asinuŋɔŋlɔa wo eye womegabiaa nya aɖeke o. Geraldo xɔ nyɔnyrɔ emegbe.

Dzi dzɔm kakaka tso eme esime wowɔ nutome sue takpekpe le Três Rios titina le ƒe 1959 me. Kpovitɔwo ƒe amegã, si nɔ Biblia srɔ̃m ɣemaɣi, wɔ ɖoɖo gɔ̃ hã be woaklã takpekpea ƒe boblododo gbalẽwo ɖe du bliboa me. Le dɔwɔwɔ le Três Rios ƒe etɔ̃ megbe la, mexɔ dɔdasi yeye le Itu, si anɔ kilometa 110 lɔƒo le São Paulo ƒe ɣetoɖoƒekpa dzi.

Agbalẽ Dzẽ, Blɔ, Kple Aŋutiɖiɖi, Tɔwo

Le ŋkeke aɖewo ƒe xɔdidi megbe la, mía kple nye zɔhɛ mɔɖelaa míekpɔ xɔ nyui aɖe ɖe ahosi dɔmenyotɔ aɖe, si ŋkɔe nye Maria ƒeme le dua titina. Maria wɔ nu ɖe mía ŋu abe eya ŋutɔ ƒe vinyɔnuwoe míenye ene. Gake eteƒe medidi o Roma Katolikotɔwo ƒe bisiɔp si le Itu ɖagblɔ nɛ be woanya mí, gake egbe gbidii, egblɔ be: “Esi srɔ̃nye ku la, miewɔ naneke tsɔ fa akɔ nam o. Yehowa Ðasefo siawo kpe ɖe ŋunye togbɔ be nyemenye woƒe hamea me tɔ o hã.”

Ɣeyiɣi ma mee nyɔnu aɖe fi tofi na mí be Katoliko nunɔla siwo le Itu gbe na woƒe hameviwo be woagaxɔ “agbalẽ dzẽ si ƒo nu tso Abosam ŋu la” o. “Let God Be True,” si nye agbalẽ si nam míenɔ le kwasiɖaa mee wowɔnɛ. Esi wònye nunɔlaawo xe mɔ ɖe agbalẽ dzẽa nu ta la, míedzraɖo ɖe agbalẽ blɔtɔ la (“New Heavens and a New Earth”) nana ŋu. Emegbe esi sɔlemehakplɔlaawo nya se tɔtrɔ  sia ŋu nya ko la, míetrɔ ɖe agbalẽ aŋutiɖiɖitɔ (What Has Religion Done for Mankind?) kple bubuawo ŋu. Enyo ŋutɔ be agbalẽ vovovo siwo ŋu akpa ƒe amadede vovovowo le la nɔ mía si!

Le Itu nɔnɔ ƒe ɖeka megbe la, mexɔ telegram aɖe si me wokpem be mava wɔ dɔ le Betel, si nye Yehowa Ðasefowo ƒe alɔdzedɔwɔƒe si le Rio de Janeiro hena ɣeyiɣi kpui aɖe be woatsɔ adzra ɖo ɖe takpekpe gãa ŋu. Mexɔe kple dzidzɔ.

Mɔnukpɔkpɔ Kple Gbetɔame Bubuwo

Dɔ mevɔna le Betel gbeaɖekegbe o, eye dzi dzɔm be mana kpekpeɖeŋu le mɔ sia mɔ si mate ŋui nu. Aleke gbesiagbe mawunyakpukpuia me dzodzro ŋdi sia ŋdi kple ƒome Gbetakpɔxɔ Nusɔsrɔ̃ le Dzoɖa fiẽwo tua ame ɖoe nye si! Gbe siwo Otto Estelmann kple Betel-ƒomea me tɔ kpɔnuteƒe bubuwo dona ɖa tso dzi me la wɔa dɔ ɖe dzinye vevie.

Le takpekpe gãa megbe la, medo nye agbawo be matrɔ ayi Itu, gake nukutɔe la, alɔdzea dzikpɔla Grant Miller, tsɔ lɛta aɖe si wotsɔ nɔ kpeyem be mazu ɣeyiɣiawo katã ƒe Betel-ƒomea me tɔ la nam. Mía kple Nɔvinyɔnu Hosa Yazedjian, amesi gakpɔtɔ le Brazil Betel, ye nɔ xɔme. Le ŋkeke mawo me la, Betel-ƒomea nɔ sue—mí ame 28 koe—eye mí katã míenye xɔlɔ̃ veviwo.

Le ƒe 1964 me la, João Zanardi, si nye ɖekakpui ɣeyiɣiawo katã ƒe subɔla aɖe va xɔ hehe le Betel. Emegbe woɖoe nutome sue dzikpɔla, alo dzikpɔla mɔzɔla, le nuto aɖe si gbɔ medidi o me. Míedoa go ɣeaɖewoɣi ne etsɔ eƒe nyatakakawo va Betel. Alɔdzea dzikpɔlaa ɖe mɔ na João be wòade ƒome nusrɔ̃ƒea le Dzoɖa fiẽwo, eyata míete ŋu va wɔa nu ɖekae wu. Mía kple João míeɖe mía nɔewo le August 1965 me. Metsɔ dzidzɔ xɔ amekpekpe be mawɔ ɖeka kple srɔ̃nye le nutome sue dɔa me la dzi.

Le ŋkeke mawo me la, mɔzɔzɔdɔa wɔwɔ le Brazil kɔƒewo me sesẽ ŋutɔ. Nyemaŋlɔ gbeƒãɖelawo ƒe ƒuƒoƒo aɖe si míesrã kpɔ le Aranha, Minas Gerais Nutome be akpɔ o. Ele be míaɖo keteke eye emegbe míazɔ mɔ mamlɛa kple afɔ—atsɔ mɔzɔkplowo, nuŋlɔmɔ̃, sinimaɖemɔ̃, gbedzidekplowo, kple agbalẽwo ɖe ŋuti. Aleke dzi dzɔa mí enye si be míakpɔ nɔviŋutsu tsitsi Lourival Chantal, amesi lalaa mí le ketekedzeƒea ɣesiaɣi be yeakpe míi.

Le Aranha la, míewɔa kpekpeawo le aƒe aɖe si wohaya me. Xɔ sue aɖe si le egodo mee míemlɔna. Mlekpui aɖe le xɔa ƒe akpa ɖeka si me míedoa nakedzo ɖo tsɔ ɖaa nui hetsɔ ɖoa tsi siwo nɔviawo ku ɖe tɔkpowo me vɛ la dzoe. Do aɖe si le pamprogble aɖe titinae nye míaƒe afɔdzideƒe. Ne zã do la, míegblẽa akaɖia ɖi be wòanya adoŋgowo—si nye nudzodzoe si tea ŋu naa Chagas dɔléle. Ne ŋu ke la, dzudzɔ yɔa ŋɔtime na mí wonyɔna yibɔɔ. Nuteƒekpɔkpɔ ka gbegbee nye si!

Esi míenɔ nutome sue dɔa wɔm le Paraná Nutome la, míegaxɔ agbalẽkotoku gã hẽ mawo dometɔ aɖe tso alɔdzedɔwɔƒea. Esia nye amekpekpe bubu tso Yehowa ƒe habɔbɔa gbɔ—be míaɖa subɔ le Portugal! Lɛtaa ɖo aɖaŋu  be míabu gɔmeɖose si le Luka 14:28 ŋu ahabu nusiwo dɔdasi sia xɔxɔ abia ŋu hafi axɔe elabena woxe mɔ ɖe míaƒe Kristotɔwo ƒe dɔa nu le afima, eye Portugal-dziɖuɖua lé nɔvi geɖe xoxo.

Ðe míayi ɖe dukɔ aɖe si me woati mía yome le alea mea? João gblɔ be: “Ne mía nɔvi Portugaltɔwo ate ŋu anɔ afima ahasubɔ Yehowa nuteƒewɔwɔtɔe la, nukatae míate ŋui o?” Esi meɖo ŋku fofonye ƒe nyawo dzi la, melɔ̃ ɖe edzi be: “Ne Yehowa kpe mí la, ele be míawɔ ɖe edzi ahaka ɖe eyama dzi.” Le esia megbe kpuie la, míetrɔ yi Betel le São Paulo ɖaxɔ nufiamewo hewɔ agbalẽwo hena mɔa zɔzɔ.

João Maria Kple Maria João

Eugênio C, si nye tɔdziʋu si míeɖo la ho le Santos, São Paulo Nutoa ƒe melidzeƒea le September 6, 1969 dzi. Le ŋkeke asieke ƒe ƒudzimɔzɔzɔ megbe la, míeɖo Portugal. Gbã la, míewɔ dɔ kple nɔvi bibiwo ɣleti geɖe le Alfama kple Mouraria ƒe ablɔ xaxɛwo dzi, le Lisbon ƒe nuto gã xoxoa me. Wona hehe mí be míanɔ ŋudzɔ be kpovitɔwo nagalé mí bɔbɔe o.

Míewɔa hamea ƒe kpekpewo le Ðasefowo ƒe aƒewo me. Ne míede dzesii be aƒelikawo ƒe susu le mía dzi vam la, míeɖɔlia kpekpeawo wɔƒe enumake ale be woagadze aƒea dzi alo be woalé nɔviawo o. Míewɔa modzakatsaɖiɖi nuɖuɖu, si nye alesi míeyɔa míaƒe takpekpewo le Monsanto Tsaɖibɔ, si le Lisbon xa, kple Costa da Caparica, si nye ƒutanuto aɖe si me atiwo le la me. Míedoa aƒemewuwo ɖe ŋkekea ŋu, eye anyinɔƒedzikpɔla ƒe ƒuƒoƒo siwo le ŋudzɔ nɔa teƒeteƒe siwo sɔ. Ne ame aɖe si ŋuti míake ɖi le gbɔna la, míetea modzakaɖeɖe, ɖua nu, alo tea ha dzidzi.

Be wòaga nɔ bɔbɔe na ŋkutsakpovitɔwo be woadze si mí o la, míezãa míaƒe ŋkɔwo ŋutɔŋutɔ o. Nɔviawo yɔa mí be João Maria kple Maria João. Míezãna míaƒe ŋkɔwo le lɛta alo nuŋlɔɖi aɖeke me o. Ðe eteƒe la, wona xexlẽdzesiwo mí. Meɖoe kplikpaa be nyemalé nɔviawo ƒe adrɛswo ɖe tame o. Mewɔ esia kple susu be ne wolém la, manɔ bɔbɔe nam be made wo asi o.

Togbɔ be mɔxeɖenuawo nɔ anyi hã la, mía kple João míeɖoe kplikpaa be míawɔ mɔnukpɔkpɔ ɖesiaɖe ŋudɔ atsɔ aɖi ɖasee, esi  míenyae be ablɔɖe si le mía si la ate ŋu abu ɣesiaɣi ta. Míesrɔ̃ ŋuɖoɖo ɖe míaƒe Dziƒofofo, Yehowa ŋu. Esi wònye mía Takpɔla ta la, ezã eƒe dɔlawo le mɔ aɖe nu be míese le mía ɖokui me abe ɖee míele “amesi womekpɔna o la kpɔm” ene.—Hebritɔwo 11:27.

Gbeɖeka, esime míenɔ gbeƒã ɖem tso aƒeme yi aƒeme le Porto la, míedo go ŋutsu aɖe si zii ɖe míadzi be míava ye gbɔ. Nɔvinyɔnu si menɔ dɔ wɔm kplii la lɔ̃ ɖe edzi heheɖemegbemanɔmee, eye nyaa aɖeke menɔ asinye magblɔ wu be makplɔe ɖo o. Dzidzi ƒom, esi mekpɔ be woklã ame aɖe si do asrafowu ƒe foto ɖe agbalimemɔa me. Nuka wɔgee míala fifia? Amea na zi mi, emegbe wòbiam be: “Àɖe mɔ na viwòŋutsu be wòaɖu asrafo ne wozii ɖe edzia?” Nɔnɔmea bia nuwɔwɔ ŋuɖɔɖotɔe. Esi medo gbe ɖa le tame megbe la, meɖo eŋu kple gbe bɔbɔe be: “Vi aɖeke mele asinye o, eye meka ɖe edzi be ne nyee bia nya tɔtɔame sia wò la, ŋuɖoɖo sia kee nànam.” Eƒe nu ku. Eyata meyi edzi be: “Azɔ ne ɖee nèbia alesi ame nɔvi alo fofoa ƒe ku nana wòsena le eɖokui me la, mate ŋu aɖo eŋu elabena tsɛnye kple fofonye siaa ku.” Aɖatsi lólo ɖe ŋku dzi nam esi menɔ nu ƒom, eye mede dze sii be avi ʋẽ ɖe eya hã. Eɖe eme be yesrɔ̃ ku nyitsɔ laa. Eɖo to nyuie esime menɔ tsitretsitsimɔkpɔkpɔa me ɖem. Emegbe míegblẽ nyaa ɖe Yehowa si me, hebia mɔ ɖokuibɔbɔtɔe, hedzo dedie.

Togbɔ be mɔxeɖenua nɔ anyi hã la, wokpe ɖe dzianukwaretɔwo ŋu be nyateƒe sidzedzea nasu wo si. Porto ye srɔ̃nye te nusɔsrɔ̃ kple Horácio, amesi nye asitsala, eye wòwɔ ŋgɔyiyi kabakaba le. Emegbe viaŋutsu Emílio, amesi nye ɖɔkta bibi aɖe hã ɖe adzɔgbe na Yehowa hexɔ nyɔnyrɔ. Le nyateƒe me la, naneke mate ŋu axe mɔ na Yehowa ƒe gbɔgbɔ kɔkɔea o.

“Mienya Nusi Ŋu Yehowa Aɖe Mɔ Ðo Gbeɖe O”

Le ƒe 1973 me la, wokpe mía kple João be míade “Mawu ƒe Aʋadziɖuɖu” Dukɔwo Dome Takpekpe le Brussels, Belgium. Spain kple Belgium nɔvi akpe geɖe, kpakple amesiwo tso Mozambique, Angola, Cape Verde, Madeira, kple Azores ye va. Le Nɔviŋutsu Knorr ƒe nuƒo mamlɛa si wòƒo tso dɔwɔƒea ƒe ta le New York me la, ede dzi ƒo be: “Miyi edzi miasubɔ Yehowa nuteƒewɔwɔtɔe. Mienya nusi ŋu Yehowa aɖe mɔ ɖo gbeɖe o. Ame aɖe menya nu o, miade dukɔwo dome takpekpe si kplɔe ɖo la le Portugal!”

Le ƒe si kplɔe ɖo me la, wode gbeƒãɖeɖedɔa agbalẽ me le se nu le Portugal. Abe alesi Nɔviŋutsu Knorr gblɔe ene la, míewɔ dukɔwo dome takpekpe gbãtɔ le Lisbon, le April 25, 1978 dzi. Mɔnukpɔkpɔ kae nye si wònye be míalɔ gbɔ ato Lisbon ƒe ablɔwo dzi akpla agbalẽwo,  eye míetsɔ magazinewo nɔ ɖase ɖim henɔ amewo kpem kple amekpegbalẽviwo be woava se dutoƒo nuƒoa! Nu wɔnuku aɖee wònye.

Míeva lɔ̃ mía nɔvi Portugaltɔwo, amesiwo dometɔ geɖe kpe gaxɔmenɔnɔ kple ƒoƒo ƒe fu le Kristotɔwo ƒe akpaɖekedzimademade ta. Míaƒe didi wònye be míayi edzi asubɔ le Portugal. Gake madze edzi nenema o. Le ƒe 1982 me la, dzidɔ sesẽ aɖe dze João dzi, eye alɔdzedɔwɔƒea doe ɖa be míagbugbɔ ayi Brazil.

Ɣeyiɣi Sesẽ Aɖe

Nɔvi siwo le alɔdzedɔwɔƒe si le Brazil kpe ɖe mía ŋu geɖe eye wode dɔ asi na mí be míaɖa subɔ le Quiririm-hamea me le Taubaté, São Paulo Nutome. João ƒe lãme gblẽ ɖe edzi kabakaba, eye eteƒe medidi o wòtsi teƒe ɖeka. Ðetsɔlemetɔwo va srɔ̃na Biblia le mía ƒeme, eye míewɔa kpekpewo hena gbeadziyiyi gbesiagbe, kple kwasiɖa sia kwasiɖa ƒe agbalẽ me nusɔsrɔ̃. Ðoɖo siawo kpe ɖe mía ŋu míelé míaƒe gbɔgbɔmemenyenye ɖe te.

João yi edzi wɔ nusi wòate ŋui le Yehowa ƒe subɔsubɔdɔa me vaseɖe eƒe kugbe le October 1, 1985 dzi. Evem eye melé blanui vie gake meɖoe kplikpaa be mayi nye dɔdasia dzi. Kplamatsedonu bubu do mo ɖa le April 1986 me esime adzoblasuwo dze nye aƒe dzi hefi nye nuwo katã kloe. Ɣemaɣie nye zi gbãtɔ si metsi akogo eye ŋɔdzi lém. Atsu kple asi aɖe kpem be mava nɔ yewo gbɔ vie, eye esia dzɔ dzi nam ŋutɔ.

João ƒe kua kple nye nuawo fifi hã gblẽ nu le nye Yehowa subɔsubɔ ŋu. Dzideƒo meganɔa asinye le subɔsubɔdɔa me o. Esi meŋlɔ agbalẽ tso nye kuxia ŋu ɖo ɖe alɔdzedɔwɔƒea la, wo kpem be mava nɔ Betel hena ɣeyiɣi aɖe be wòakpe ɖe ŋunye be magaɖo ɖokuinye me. Ɣeyiɣi do ŋusẽ ame kawoe nye ma!

Esi mehaya vie ko la, mexɔ dɔdasi be maɖasubɔ le Ipuã, si nye du aɖe si le São Paulo nutome. Gbeƒãɖeɖedɔa na vovo menɔ ŋunye o, gake dzi ɖena le ƒonye ɣeaɖewoɣi. Le ɣeyiɣi mawo me la, meƒoa ka na Quiririm nɔviwo, eye ƒome aɖe va srãam kpɔna ŋkeke ʋɛ aɖewo. Sasrãkpɔ mawo de dzi ƒo nam ŋutɔŋutɔ! Le nye Ipuã nɔɣi ƒe ƒe gbãtɔ me la, nɔviŋutsu kple nɔvinyɔnu vovovo 38 zɔ mɔ didiwo va srãm kpɔ.

Le ƒe 1992 me, ƒe ade le João ƒe ku megbe la, megaxɔ amekpekpe bubu tso Yehowa ƒe habɔbɔa gbɔ, be maʋu ayi Franca, si le São Paulo Nutome, afisi megakpɔtɔ le ɣeyiɣiawo katã ƒe subɔsubɔdɔa wɔm le. Amewo le nyaa xɔm ŋutɔ le anyigbamama sia me. Le 1994 me la, mete Biblia sɔsrɔ̃ kple dudzikpɔla la. Ɣemaɣi la, enɔ ho ʋlim na Braziltɔwo ƒe sewɔtakpekpea me yiyi, gake togbɔ be vovo menɔ eŋu o hã la, míesrɔ̃a nu Dzoɖa ŋdɔ ɖesiaɖe. Be naneke nagado kplamatse mí o la, etsia eƒe telefon. Aleke dzi dzɔm enye si be makpɔe wòanɔ asi ɖem le dunyahehe ŋu vivivi, eye le nyateƒea ƒe kpekpeɖeŋu me la, wòagbugbɔ eƒe ƒomea atu ɖo! Woa kple srɔ̃a woxɔ nyɔnyrɔ le ƒe 1998 me.

Ne metrɔ kpɔ megbe la, mate ŋu agblɔ be yayra kple mɔnukpɔkpɔ geɖe nɔ ɣeyiɣiawo katã ƒe subɔlanyenye me nam. Wɔwɔ ɖe amekpekpe siwo Yehowa nam to eƒe habɔbɔa dzi na mekpɔ yayra geɖewo vavã. Eye amekpekpe kawoe wòaga nam le etsɔme o, alesi medi vevie be mawɔ ɖe wo dzi la gakpɔtɔ le nenema.

[Nɔnɔmetata siwo le axa 25]

Le 1957 me, esime mete ɣeyiɣiawo katã ƒe subɔsubɔdɔa wɔwɔ, kple egbea

[Nɔnɔmetata si le axa 26]

Nye kple Brazil Betel-ƒomea me tɔwo le ƒe 1963 me

[Nɔnɔmetata si le axa 27]

Míaƒe srɔ̃ɖeɖe le ƒe 1965 me

[Nɔnɔmetata si le axa 27]

Takpekpe aɖe si míewɔ le Portugal esime woxe mɔ ɖe dɔa nu

[Nɔnɔmetata si le axa 28]

Ablɔdziɖaseɖiɖi le Lisbon esime míenɔ 1978 “Aʋadziɖuɖu ƒe Xɔse” Dukɔwo Dome Takpekpea wɔm