Vɔ̃ Yehowa Eye Nàlé Eƒe Seawo Me Ðe Asi

“Vɔ̃ Mawu, eye nalé eƒe seawo me ɖe asi; elabena esia nye amegbetɔwo katã tɔ!”—NYAGBLƆLA 12:13.

1, 2. (a) Aleke vɔvɔ̃ ate ŋu akpɔ mía ta le ŋutilã mee? (b) Nukatae dzila ɖɔŋuɖowo dzea agbagba ƒãa vɔvɔ̃ nyui ɖe wo viwo me?

LEONARDO DA VINCI gblɔ be: “Dzinɔameƒo dea ame ƒe agbe afɔku me, ke vɔvɔ̃ kpɔa eta.” Kalẽ dzodzro wɔwɔ menaa ame kpɔa afɔku dzea sii o, gake vɔvɔ̃ ya ɖoa ŋku edzi nɛ be wòakpɔ nyuie. Le kpɔɖeŋu me, ne míegogo agado gã aɖe to hekpɔ alesi eme yi to ʋĩi la, ame aɖeke magblɔ na mía dometɔ akpa gãtɔ be míhe yi megbe hafi míahe ayi megbe o. Nenema ke menye ɖeko vɔvɔ̃ nyui naa ƒomedodo nyui nɔa mía kple Mawu dome abe alesi míesrɔ̃e le nyati gbãtɔ me ene ko evɔ o, ke ekpɔa mía ta tso afɔku me hã.

² Gake ɖe wosrɔ̃a vɔvɔ̃ na egbeŋkekea me nu geɖe siwo ŋu afɔku le. Esi ɖeviwo menya afɔku siwo elektrikŋusẽ alo ʋumɔ me tsotso le dugãwo me hena vɛ o ta la, woate ŋu age ɖe afɔku gã aɖe me bɔbɔe. * Dzila siwo ɖɔa ŋu ɖo dzea agbagba ƒãa vɔvɔ̃ nyui ɖe wo viwo me, woxlɔ̃a nu wo edziedzi tso afɔku siwo ƒo xlã wo la ŋu. Dzilawo nya be vɔvɔ̃ sia akpɔ yewo viwo ƒe agbe ta.

3. Nukatae Yehowa xlɔ̃a nu mí le gbɔgbɔmefɔkuwo ŋu, eye aleke wòwɔnɛ?

³ Ðetsɔleme ma tɔgbee le Yehowa me na míaƒe nyonyo. Esi wònye Vifofo lɔ̃ame ta la, etoa eƒe Nya kple eƒe habɔbɔa dzi fiaa nu mí be wòaɖe vi na mí. (Yesaya 48:17) Mawu ƒe nufiafiaɖoɖo sia ƒe akpa aɖee nye nuxɔxlɔ̃ mí tso gbɔgbɔmefɔkuwo ŋu “enuenu” ale be míate ŋu atu afɔku siawo ŋuti vɔvɔ̃ nyui ɖo. (Kronika II, 36:15; Petro II, 3:1) Ne ‘ɖe amewo dzra woƒe dzi ɖo be woavɔ̃ Mawu ahalé eƒe seawo me ɖe asi’ le ŋutinya katã me la, anye ne woƒo asa na gbɔgbɔmefɔku geɖe hesi le fukpekpe geɖewo nu hafi. (Mose V, 5:26) Le ‘ɣeyiɣi vɔ̃’ siawo me la, aleke míate ŋu adzra míaƒe dzi ɖo be míavɔ̃ Mawu ahaƒo asa na gbɔgbɔmefɔkui.—Timoteo II, 3:1.

Te Ða le Vɔ̃ Ŋu

4. (a) Fuléle kae wòle be Kristotɔwo natu ɖo? (b) Aleke Yehowa sena le eɖokui me ɖe nuvɔ̃gbenɔnɔ ŋu? (Kpɔ etenuŋlɔŋlɔ.)

⁴ Biblia ɖe nu me be “Yehowa-vɔvɔ̃ enye fuléle vɔ̃.” (Lododowo 8:13) Biblia ƒe  nyagɔmeɖegbalẽ aɖe ɖe fuléle sia gɔme be “ame alo nu siwo ŋu wotsi tre ɖo, nusiwo wonyɔ ŋui, nusiwo wodo vloe kple esiwo ame medi be yeakpɔ alo ado ƒome kple o ŋuti seselelãme.” Eyata mawuvɔvɔ̃ ƒe akpa aɖe enye ŋunyɔnyɔ alo fuléle nusiwo gblẽ le Yehowa ŋkume ŋuti seselelãme. * (Psalmo 97:10) Eƒonɛ ɖe mía nu be míate ɖa le vɔ̃ ŋu, abe alesi míate ɖa le do globo aɖe toe ne doa kpɔkpɔ na vɔvɔ̃ ɖo mí la ene. Biblia gblɔ be: “Yehowa-vɔvɔ̃ wotsɔna tsria vɔ̃e.”—Lododowo 16:6.

5. (a) Aleke míate ŋu ado ŋusẽ míaƒe mawuvɔvɔ̃ kple fuléle vɔ̃e? (b) Nukae Israel-dukɔa ƒe ŋutinya fia mí le go sia me?

⁵ Míate ŋu ana vɔvɔ̃ nyui sia kple míaƒe fuléle vɔ̃ nu nasẽ ɖe edzi wu ne míedea ŋugble le numanyomanyo siwo dona tsoa nuvɔ̃ me godoo la ŋu. Biblia na míenya be míaŋe nusi míeƒã godoo—eɖanye ŋutilã alo gbɔgbɔ mee míeƒãe ɖo o. (Galatiatɔwo 6:7, 8) Susu sia tae Yehowa ƒo nu tso eƒe sewo dzi dada kple asiɖeɖe le tadedeagu vavãtɔ ŋu me tsonuwo ŋu wo me kɔ ƒã ɖo. Mawu ƒe ametakpɔkpɔ manɔmee la, dukɔ sesẽ sẽŋuta siwo ƒo xlã Israel-dukɔ sue masẽmasẽ la anye agbo ɖe wo dzi. (Mose V, 28:15, 45-48) Woŋlɔ Israel ƒe tomaɖomaɖo me tsonu wɔnublanuia ɖe Biblia me tsitotsito “bene wòanye nuxɔxlɔ̃” si me míate ŋu asrɔ̃ nu tsoe ahatu mawuvɔvɔ̃ ɖo.—Korintotɔwo I, 10:11.

6. Ŋɔŋlɔawo me kpɔɖeŋu siwo ŋu míate ŋu ade ŋugble le ne míele mawuvɔvɔ̃ srɔ̃m dometɔ aɖewo ɖe? (Kpɔ etenuŋɔŋlɔ.)

⁶ Le nusi Biblia gblɔ be edzɔ ɖe Israel-dukɔ bliboa dzi megbe la, eƒo nu le ame aɖewo siwo dzi ŋuʋaʋã, agbegbegblẽnɔnɔ, ŋukeklẽ, alo dada ɖu la ƒe agbemenudzɔdzɔ ŋutɔŋutɔwo ŋu. * Ŋutsu siawo dometɔ aɖewo subɔ Yehowa ƒe geɖe, gake le ɣeyiɣi vevi aɖe me le woƒe agbe me la, woƒe mawuvɔvɔ̃ me gbɔdzɔ, eye nusi do tso eme wɔ nublanui ŋutɔ. Ŋugbledede le Ŋɔŋlɔawo me kpɔɖeŋu siawo tɔgbe ŋu ate ŋu ado ŋusẽ míaƒe tameɖoɖo kplikpaa be míawɔ vodada mawo ke tɔgbe o. Aleke wòawɔ nublanui enye esi ne míelala afɔku dzɔ ɖe mía dzi hafi míeva le Mawu ƒe nuxlɔ̃ame bum nya vevii! Nya si dzi ame geɖe lɔ̃ ɖo be nuteƒekpɔkpɔ nye nufiala nyuitɔ—vevietɔ le ame ɖokui ƒoƒo ɖe nudzodzro vɔ̃ me gome—mele nenema o.—Psalmo 19:8.

7. Amekae Yehowa kpena vaa eƒe kpɔɖeŋugbadɔ me?

 ⁷ Susu sẽŋu bubu si ta wòle be míatu mawuvɔvɔ̃ ɖo enye míaƒe didi be míakpɔ mía kple Mawu dome ƒomedodo ta. Míevɔ̃na na nusi medzea Yehowa ŋu o wɔwɔ, elabena mía kplii ƒe xɔlɔ̃wɔwɔ xɔ asi na mí ale gbegbe. Amekae Mawu buna exɔlɔ̃, si wòakpe va eƒe kpɔɖeŋugbadɔ mee? Amesi ‘ƒe zɔzɔme ŋu fɔɖiɖi mele o, si wɔa nu dzɔdzɔe’ la koe. (Psalmo 15:1, 2) Ne míebua mía kple mía Wɔla la dome ƒomedodo ƒe mɔnukpɔkpɔ sia nu vevii la, ana míakpɔ nyuie be míazɔ le eŋkume fɔmaɖimaɖitɔe.

8. Aleke Israel-vi aɖewo siwo nɔ anyi le Maleaxi ŋɔli meɖe ŋudzedzekpɔkpɔ fia ɖe woa kple Mawu dome xɔlɔ̃wɔwɔ ŋui o?

⁸ Nublanuitɔe la, Israel-vi aɖewo siwo nɔ anyi le Maleaxi ŋɔli meva kpɔ ŋudzedze ɖe woa kple Mawu dome xɔlɔ̃wɔwɔa ŋu o. Le esi teƒe be woavɔ̃ Yehowa ahade bubu eŋu la, wotsɔa lã lédɔ kple lã nuwɔewo saa vɔe le eƒe vɔsamlekpui dzi. Alesi wowɔa nui le srɔ̃ɖeɖe me hã ɖe woƒe mawumavɔmavɔ̃ fia. Wogbea woƒe ɖekakpuimesrɔ̃wo ɖe nya maɖinyawo ta kple susu be yewoaɖe ɖetugbiwo. Maleaxi gblɔ na wo be Yehowa lé fu “srɔ̃gbegbe” eye be woƒe alakpanuwɔwɔ te wo ɖa tso woƒe Mawu ŋu. Aleke Mawu axɔ woƒe vɔsawo esi vɔsamlekpuia dzi yɔ fũ kple kpɔɖeŋu ɖatsiwo—si nye wo srɔ̃nyɔnuwo ƒe aɖatsi siwo wofa le dzigbagbã ta? Bubumademade Yehowa ƒe dzidzenuwo ŋu dzimesesẽtɔe alea ʋãe wòbia be: “Afika vɔvɔ̃, si le ŋunye la le?”—Maleaxi 1:6-8; 2:13-16.

9, 10. Aleke míate ŋu aɖee afia be mía kple Yehowa dome xɔlɔ̃wɔwɔ xɔ asi na mí?

⁹ Egbea la, nenema ke Yehowa kpɔa alesi srɔ̃ŋutsu kple vifofo ɖokuitɔdila agbegbegblẽnɔlawo, alo srɔ̃nyɔnu kple vidadawo gɔ̃ hã, tsɔ woƒe nuwɔnawo gbã dzie na wo srɔ̃ kple wo vi maɖifɔ geɖewoe la. Le nyateƒe me la, edoa nuxaxa nɛ. Amesi nye Mawu xɔlɔ̃ abu nuwo alesi Mawu bua woe eye wòadze agbagba vevie ado ŋusẽ eƒe srɔ̃ɖeɖe, agbe xexeame ƒe nukpɔsusu si me womedea bubu srɔ̃ɖekadodoa ŋu le boo o la, eye ‘wòasi le ahasiwɔwɔ nu.’—Korintotɔwo I, 6:18.

¹⁰ Le srɔ̃ɖeɖe kple míaƒe agbe ƒe akpa bubuwo siaa me la, ne míelé fu nusiwo gblẽ le Yehowa ŋkume, heɖe ŋudzedzekpɔkpɔ deto fia ɖe mía kplii dome xɔlɔ̃wɔwɔ ŋu la, ana Yehowa nakpɔ ŋudzedze ɖe mía ŋu ahave mía nu. Apostolo Petro gblɔ kakaɖedzitɔe be: “Medze sii le nyateƒe me be, Mawu mekpɔa ame ŋku me o, hafi boŋ le dukɔ sia dukɔ me, amesi ke vɔ̃nɛ, eye wòwɔa nu dzɔdzɔe la, eya dzea eŋu.” (Dɔwɔwɔwo 10:34, 35) Kpɔɖeŋu geɖe le Ŋɔŋlɔawo me siwo fia alesi mawuvɔvɔ̃ ʋã ame aɖewo wowɔ nu dzɔdzɔe le tetekpɔ vovovowo mee?

Ame Etɔ̃ Aɖewo Siwo Vɔ̃ Mawu

11. Nuwɔna ka mee wògblɔ le be Abraham ‘vɔ̃a Mawu’?

¹¹ Woƒo nu tso ŋutsu aɖe ŋu le Biblia me, amesi Yehowa ŋutɔ yɔ be ye xɔlɔ̃—eyae nye blemafofo Abraham. (Yesaya 41:8) Wodo Abraham ƒe mawuvɔvɔ̃ kpɔ esime Mawu gblɔ nɛ be wòatsɔ via Isak ɖeka hɔ̃ la, amesi dzi Mawu ato ana eƒe ŋugbedodo be yeana Abraham ƒe dzidzimeviwo nazu dukɔ gã nava eme la, asa vɔe na ye. (Mose I, 12:2, 3; 17:19) Ðe ‘Yehowa xɔlɔ̃a’ akpɔ dzidzedze le dodokpɔ sesẽ sia mea? (Yakobo 2:23) Le ɣeyiɣi si tututu dzi Abraham do hɛa ɖe dzi be yeawu Isak la, Yehowa ƒe dɔla gblɔ be: “Megaka asi ɖevi la ŋu o, eye megawɔ nanekee o! Menyae azɔ bena, èvɔ̃a Mawu, elabena mète wò tenuvi lam o.”—Mose I, 22:10, 12.

12. Nukae ʋã Abraham wòɖe mawuvɔvɔ̃ fia, eye aleke míate ŋu aɖe nɔnɔme sia tɔgbe afia?

¹² Togbɔ be Abraham ɖee fia va yi be yevɔ̃a Yehowa hã, le ŋkeke ma dzi la, eɖe eƒe mawuvɔvɔ̃a fia le mɔ tɔxɛ aɖe nu. Alesi wòlɔ̃ be yeatsɔ Isak asa vɔe nye nusi yi ŋgɔ sasasã wu toɖoɖo bubudeameŋutɔe ko. Kakaɖedzi blibo si nɔ Abraham si be yeƒe Dziƒofofoa awɔ Eƒe ŋugbedodoa dzi, eye ne ehiã la, afɔ Isak ɖe tsitre lae ʋãe. Abe alesi Paulo ŋlɔe ene la, ‘kakaɖedzi  blibo nɔ Abraham si bena, nusi ke ŋugbe Mawu do la, ate ŋu awɔe hã.’ (Romatɔwo 4:16-21) Ðe míalɔ̃ awɔ Mawu ƒe lɔlɔ̃nu ne ebia be míatsɔ nu gãwo asa vɔe gɔ̃ hãa? Ðe míeka ɖe edzi bliboe be toɖoɖo sia tɔgbe aɖe vi na mí tegbetegbe, esi míenyae be Yehowa nye “teƒeɖola na amesiwo dinɛ vevie” laa. (Hebritɔwo 11:6) Emae woyɔna be mawuvɔvɔ̃ vavãtɔ.—Psalmo 115:11.

13. Nukatae wòsɔ be Yosef yɔ eɖokui be ‘Mawu vavã la vɔ̃la’?

¹³ Mina míade ŋugble le mawuvɔvɔ̃ si woɖe fia le nuwɔna me ƒe kpɔɖeŋu bubu ŋu—si nye Yosef tɔ. Yosef nye kluvi nɔ Potifar ƒeme, amesi doa go ahasiwɔwɔ ŋuti nyaƒoɖeamenu gbesiagbe. Edze ƒã be mɔ aɖeke menɔe wòate ŋu aƒo asa na eƒe aƒetɔ srɔ̃, si ƒonɛ ɖe enu gbesiagbe be wòanɔ agbe gbegblẽ kple ye la kpɔkpɔ o ene. Esi nyɔnua ‘lée’ mlɔeba la, ‘esi do go le aƒea me.’ Nukae ʋãe wòsi le nuvɔ̃wɔwɔ nu enumake? Ðikeke mele eme o be nu gbãtɔe nye mawuvɔvɔ̃, si nye didi be yeaƒo asa na ‘vɔ̃ gã sia wɔwɔ ahada vo ɖe Mawu ŋuti.’ (Mose I, 39:7-12) Esɔ be Yosef yɔ eɖokui be ‘Mawu vavã la vɔ̃la.’—Mose I, 42:18.

14. Aleke Yosef ƒe nublanuikpɔkpɔ ɖe mawuvɔvɔ̃ vavãtɔ fiae?

¹⁴ Le ƒe aɖewo megbe la, Yosef kpɔ nɔvia siwo tsɔe dzra ɖe kluvinyenye me nublanuimakpɔmakpɔe la ŋkume kple ŋkume. Ate ŋu anɔ te ɖe alesi wonɔ nuɖuɖu dim kutɔkutɔe la dzi be enye mɔnukpɔkpɔ na ye be yeaɖo vɔ̃ si wowɔ ɖe ye ŋu la teƒe na wo hafi. Gake nɔƒe si le ame si zazã atsɔ ate ame ɖe anyii mefia mawuvɔvɔ̃ o. (Mose III, 25:43) Eyata esi Yosef kpɔ be ye nɔviawo trɔ dzime alesi dze la, etsɔe ke wo nublanuikpɔkpɔtɔe. Abe Yosef ene la, míaƒe mawuvɔvɔ̃ aʋã mí míatsɔ nu nyui aɖu vɔ̃ dzii, eye wòana hã be míadze tetekpɔ me o.—Mose I, 45:1-11; Psalmo 130:3, 4; Romatɔwo 12:17-21.

15. Nukatae Hiob ƒe agbenɔnɔ do dzidzɔ na Yehowa ƒe dzi?

¹⁵ Hiob nye mawuvɔ̃la ƒe kpɔɖeŋu ɖedzesi bubu. Yehowa gblɔ na Abosam be: “Èlé ŋku ɖe nye dɔla Hiob ŋua? Elabena enye ame maɖifɔ, ame dzɔdzɔe kple mawuvɔ̃la, eye wòtsri nu vɔ̃ɖi, eye ame aɖeke mede enu le anyigba dzi o.” (Hiob 1:8) Hiob ƒe fɔmaɖimaɖi gbenɔnɔa do dzidzɔ na Fofoa si le dziƒo la ƒe dzi ƒe geɖe. Hiob vɔ̃ Mawu elabena enya be eyae nye nu dzɔdzɔetɔ si woawɔ eye be eyae nye mɔ nyuitɔ si nu woanɔ agbe ɖo. Hiob gblɔ be: ‘Kpɔ ɖa, Yehowa-vɔvɔ̃ enye nunya, eye vɔ̃tsitsri enye gɔmesese.’ (Hiob 28:28) Hiob nye srɔ̃tɔ si meɖe ŋku ɖe ɖetugbiwo kple susu gbegblẽ o, eye meɖoa tame gbegblẽ ɖe ahasiwɔwɔ hã ŋu o. Togbɔ be enye kesinɔtɔ hã la, meɖoa dzi ɖe kesinɔnuwo ŋu o, eye eƒo asa na trɔ̃subɔsubɔ ƒomevi ɖesiaɖe.—Hiob 31:1, 9-11, 24-28.

16. (a) Mɔ kawo nue Hiob ɖe amenuveve fia le? (b) Aleke Hiob ɖee fia be yemegbe vodada tsɔtsɔ ke o?

¹⁶ Mawuvɔvɔ̃ gafia nu nyui wɔwɔ kpakple teteɖa tso nuvɔ̃ ŋu. Esia na be Hiob kpɔ nublanui na ŋkuagbãtɔwo, xɔdrɔ̃wo, kple hiãtɔwo. (Mose III, 19:14; Hiob 29:15, 16) Hiob nya be ‘amesiame si gbea ehavi nu veve dzudzɔa Ŋusẽkatãtɔ la vɔvɔ̃ hã.’ (Hiob 6:14) Amenumavemave ate ŋu ana woagbe vodada tsɔtsɔ ake alo ana woalé nya ɖe dɔme. Le Mawu ƒe mɔfiafia te la, Hiob do gbe ɖa ɖe exɔlɔ̃ etɔ̃awo, siwo he nuxaxa geɖe va edzi la ta. (Hiob 42:7-10) Ðe míate ŋu aɖe tsɔtsɔkegbɔgbɔ ma tɔgbe afia haxɔsetɔ si dze agɔ le mía dzi le mɔ aɖe nua? Gbedodoɖa  tso dzime ɖe amesi dze agɔ le mía dzi la ta ate ŋu akpe ɖe mía ŋu ŋutɔ be míaɖu dzikua dzi. Nu nyui siwo su Hiob si ɖe eƒe mawuvɔvɔ̃ ta la na míenya be ‘Yehowa dzra nu nyui geɖe ɖo na amesiwo vɔ̃nɛ.’—Psalmo 31:20; Yakobo 5:11.

Mawuvɔvɔ̃ Kpakple Amegbetɔvɔvɔ̃

17. Nukae amegbetɔvɔvɔ̃ ate ŋu awɔ na mí, gake nukatae susu mele vɔvɔ̃ sia me o ɖo?

¹⁷ Togbɔ be mawuvɔvɔ̃ ate ŋu aʋã mí míawɔ nu nyuie hã la, amegbetɔvɔvɔ̃ ya ate ŋu agblẽ míaƒe xɔse dome. Susu sia tae esime Yesu nɔ dzi dem ƒo na apostoloawo be dzo nanɔ wo me ɖe gbeƒãɖeɖedɔa ŋu wògblɔ na wo be: “Migavɔ̃ amesiwo le ŋutilã wum, eye womate ŋu awu luʋɔ o la o, ke boŋ mivɔ̃ amesi ate ŋu atsrɔ̃ luʋɔ kple ŋutilã siaa le [Gehenna, NW].” (Mateo 10:28) Yesu ɖe nu me be susu mele amegbetɔvɔvɔ̃ me o, elabena amegbetɔwo mate ŋu agblẽ míaƒe etsɔmegbenɔnɔ ƒe mɔkpɔkpɔwo dome o. Gakpe ɖe eŋu la, míevɔ̃a Mawu elabena míenya ŋusẽ triakɔ si le esi, eye dukɔwo katã ƒe ŋusẽ meɖi naneke kura o, ne míetsɔe sɔ kple etɔ. (Yesaya 40:15) Abe Abraham ene la, míeka ɖe Yehowa ƒe ŋusẽ dzi bliboe be afɔ Esubɔla wɔnuteƒewo ɖe tsitre. (Nyaɖeɖefia 2:10) Eyatae míetsɔa kakaɖedzi gblɔna be: “Ne Mawu le mía dzi la, ameka atsi tre ɖe mía ŋutii?”—Romatɔwo 8:31.

18. Aleke Yehowa ɖoa eteƒe na amesi vɔ̃nɛ?

¹⁸ Eɖanye míaƒe ƒometɔ aɖe alo sukuhati tagbɔsesẽtɔ aɖee le tsitre tsim ɖe mía ŋu o, míakpɔe be ‘dzideƒo sẽŋu le Yehowa-vɔvɔ̃ me.’ (Lododowo 14:26) Míate ŋu ado gbe ɖa na Mawu be wòado ŋusẽ mí, esi míenyae be aɖo to mí. (Psalmo 145:19) Yehowa meŋlɔa amesiwo vɔ̃nɛ la be gbeɖe o. Eto eƒe nyagblɔɖila Maleaxi dzi na kakaɖedzi mí be: “Ale Yehowa-vɔ̃lawo gblɔ le wo nɔeawo dome enye si: Yehowa ɖo to see, eye wòŋlɔ ŋkuɖodzigbalẽ le eŋku me na Yehowa-vɔ̃lawo kple amesiwo léa ŋku ɖe eƒe ŋkɔ ŋu la.”—Maleaxi 3:16.

19. Vɔvɔ̃ ka ƒomevi nue ayi, gake kae anɔ anyi tegbetegbe?

¹⁹ Ɣeyiɣi si me anyigbadzitɔwo katã asubɔ Yehowa eye amegbetɔvɔvɔ̃ maganɔ anyi o la gogo. (Yesaya 11:9) Vɔvɔ̃ na dɔwuame, dɔléle, nuvlowɔwɔ, kple aʋawɔwɔ hã nu ayi. Gake mawuvɔvɔ̃ ya anɔ anyi ayi ɖe mavɔmavɔ me esime esubɔla nuteƒewɔla siwo le dziƒo kple anyigba dzi la yi edzi le bubu dem eŋu, le to ɖomee, hele ekafum. (Nyaɖeɖefia 15:4) Hafi ɣeyiɣi ma naɖo la, neva eme be mí katã míawɔ ɖe aɖaŋu si gbɔgbɔ ʋã Salomo wòɖo la dzi be: “Wò dzi megaʋã ŋu nuvɔ̃wɔlawo o, ke boŋ neʋã ŋu Yehowa-vɔvɔ̃ ɣeawokatãɣi. Vavãe, ɣeyiɣi li gbɔna, eye wò mɔkpɔkpɔ mazu dzodzro o.”—Lododowo 23:17, 18.

[Etenuŋɔŋlɔwo]

Èɖo Ŋku Wo Dzia?

•Aleke míesrɔ̃a fuléle nuvɔ̃e?

•Aleke Israel-vi aɖewo siwo nɔ anyi le Maleaxi ŋɔli mede asixɔxɔ woa kple Yehowa dome xɔlɔ̃wɔwɔ ŋui o?

•Nukae míate ŋu asrɔ̃ tso Abraham, Yosef, kple Hiob gbɔ ku ɖe mawuvɔvɔ̃ ŋu?

•Vɔvɔ̃ ka nue mayi akpɔ gbeɖe o, eye nukatae?

[Biabiawo]

[Nɔnɔmetata si le axa 19]

Dzila ɖɔŋuɖowo ƒãa vɔvɔ̃ nyui ɖe wo viwo me

[Nɔnɔmetata si le axa 20]

Alesi vɔvɔ̃ tea mí ɖa tsoa afɔku ŋui la, nenemae mawuvɔvɔ̃ hea mí ɖa tsoa nuvɔ̃ ŋui

[Nɔnɔmetata si le axa 23]

Hiob lé eƒe mawuvɔvɔ̃ me ɖe asi esi alakpaxɔlɔ̃ etɔ̃awo ƒo nya ɖe enu gɔ̃ hã

[Afi Si Míexɔ Mɔɖeɖe Tso]

From the Bible translation Vulgata Latina, 1795