“Wò Kekeli Me Míele Kekeli Kpɔm Le”

ZI geɖe la, akaɖi nye nane si míebuna nu vevii o, negbe ɖee wotsii eye viviti do le míaƒe nutoa me hafi. Dzidzɔtɔe la, kakaɖedzi blibo le míaƒe kekeli “tsoƒe”—si nye ɣea—ŋu. Eye míeda akpe be míekpɔa kekeli tsoa ɣea gbɔ, míete ŋu kpɔa nu, ɖua nu, gbɔa ya, hele agbe.

Esi wònye kekeli le vevie be agbe nanya nɔ ta la, mele be wòawɔ nuku na mí be míaxlẽ le Mose ƒe Agbalẽ Gbãtɔ me be kekeli do le nuwɔwɔ ƒe ŋkeke gbãtɔ dzi o. “Mawu gblɔ be: Kekeli nedo! Eye kekeli do.” (Mose I, 1:3) Bubumewo abe Fia Dawid ene bu Yehowa ɣeawokatãɣi be eyae nye agbe kple kekeli tsoƒe. Dawid ŋlɔ bena: “Gbɔwò agbedzɔƒe le, eye wò kekeli me míele kekeli kpɔm le.”—Psalmo 36:10.

Woate ŋu awɔ Dawid ƒe nyawo ŋudɔ le gɔmesese ŋutɔŋutɔ kple kpɔɖeŋutɔ siaa nu. Encyclopædia Britannica gblɔ be: “Le nyateƒe me la, kekelie naa wokpɔa nu nyuie.” Egblɔ kpee be: “Nyatakaka gbogbowo toa ŋku dzi ɖoa amegbetɔ ƒe ahɔhɔ̃ gbɔ wu to lãmenusenu bubuawo dometɔ ɖesiaɖe dzi.” Esi wònye ŋku si wona mí—si hiã kekeli atsɔ awɔ dɔ nyuie—dzie míeto srɔ̃a nu gbogbotɔ ta la, wozã kekeli le Ŋɔŋlɔawo me le kpɔɖeŋumɔnu.

Eyata Yesu gblɔ na eƒe nusrɔ̃lawo be: “Nyee nye xexeame ƒe kekeli la; amesi ke dzea yonyeme la, mele viviti la me zɔ ge akpɔ o, ke boŋ agbe la ƒe kekeli anɔ esi.” (Yohanes 8:12) Kpɔɖeŋu ƒe kekeli si ƒe nya gblɔm Yesu nɔ enye nyateƒe ƒe gbedasi si wòɖe gbeƒãe, si ate ŋu aklẽ ɖe eƒe nyaselawo ƒe susuwo kple dziwo me. Le Yesu ƒe nusrɔ̃lawo ƒe gbɔgbɔmeviviti me nɔnɔ ƒe geɖe megbe la, wote ŋu va se Mawu ƒe tameɖoɖo na ameƒomea kple Fiaɖuƒea ƒe mɔkpɔkpɔ gɔme mlɔeba. Esi ema ate ŋu ana agbe mavɔ wo ta la, enye “agbe la ƒe kekeli” nyateƒe. Yesu gblɔ na Fofoa si le dziƒo le gbedodoɖa me be: “Esiae nye agbe mavɔ la bena, woanya wò, Mawu vavã ɖeka la, kple Yesu Kristo, si nèdɔ ɖa la.” (Yohanes 17:3) Migana míabu gbɔgbɔmekekeli sia nu tsɛe gbeɖe o!