Agbemeŋutinya

Yehowa Na ‘Ŋusẽ si Gbɔ Dzɔdzɔmetɔ Ŋu’

ABE ALESI HELEN MARKS GBLƆE ENE

Dzomeŋɔli ŋkeke si dzi fifia nɔ wɔwɔm vevie le ƒe 1986 mee. Nye ɖeka koe nɔ lalam le adzɔxɔdɔwɔlawo ƒe agbadɔ te le Europa yameʋudzeƒewo dometɔ ɖeka, afisi amewo mesɔa gbɔ le kura o. Albania, si nye dukɔ si yɔ eɖokui be “mawudzimaxɔse-dukɔ gbãtɔ le xexeame” la ƒe fiadu, Tiranë mee.

METƆ ɖi nɔ asrafo aɖe kpɔm wòte nye mɔzɔkplo la me kaka, eye metsi dzodzodzoe esi nyemenya nusi ava dzɔ o ta. Ne mewɔ nane alo gblɔ nya aɖe si na wòabu nazã ɖe ŋunye la, woate ŋu anyam le dukɔa me eye woade amesiwo va be yewoakpem la gaxɔ alo dɔsesẽwɔsaɖa me. Dzidzɔtɔe la, mete ŋu wɔ nusi na asrafomegãa va wɔ nu kplim xɔlɔ̃wɔwɔtɔe ale gbegbe esi metsɔ aŋekpetike kple akpɔnɔ aɖewo nɛ. Gake aleke wòdzɔe hafi nye, si nye nyɔnu si xɔ wu ƒe 60 la, va ge ɖe nɔnɔme sia me? Nukatae wòle be maɖe asi le dziɖeɖigbenɔnɔ ŋu ahatsɔ ɖokuinye ade afɔku me anɔ agbagba dzem be mado Fiaɖuƒea ƒe nuwo ɖe ŋgɔ le teƒe mamlɛtɔ siwo Marx kple Lenin ƒe dziɖuɖu kpɔ ŋusẽ ɖo vevie la dometɔ ɖeka?

Nyɔnuvi Dɔnɔ aɖe si Si Nyabiase Geɖe Nɔ

Esi wodzim le ƒe 1920 me le Ierápetra, Crete, ƒe eve megbe ko la, axamedɔ wu fofonye. Dada nye amesi da ahe eye menya agbalẽ hã o. Nyee nye wo vi eneawo ƒe mlɔetɔ, eye esi asrãdzẽ nɔ fu ɖem nam ta la, menɔ wudɔwudɔe henye dɔnɔ. Aƒelikawo ɖo aɖaŋu na nɔnye be eƒe ŋku nanɔ ɖevi etɔ̃ siwo si lãmesẽ nɔ la ŋu eye wòazã ga sue si nɔ esi atsɔ akpɔ wo dzi ahaɖe asi le ŋunye maku. Edzɔ dzi nam be dada mewɔ ɖe aɖaŋuɖoɖo ma dzi o.

 Be Dada nakpɔ egbɔ be Papa ƒe luʋɔ gbɔ ɖe eme le dziƒo la, eyia ameɖibɔ me edziedzi, eye zi geɖe la, Orthodɔks-nunɔla aɖee xɔa ŋgɔ kpɔa wɔnawo gbɔ nɛ. Gake ga si wòxɔna ɖe wɔna mawo ta menɔ bɔbɔe o. Megaɖoa ŋku Kristmas-ŋkeke aɖe si dzi vuvɔ nɔ wɔwɔm vevie esime mía kplii míetso ameɖibɔa me gbɔna aƒeme eye menɔ exa nɔ afɔ tem anyi la dzi kokoko. Ga si katã susɔ ɖe mía sie nye ma míetsɔ na nunɔla la. Dada ɖa amagbe aɖewo na mí ɖeviawo eye wòɖe eɖokui ɖe aga yi xɔ bubu me, naneke menɔ dɔme nɛ o eye dzi ɖe le eƒo eƒe mo yɔ kple aɖatsi. Le ɣeyiɣi aɖe megbe la, melé dzi ɖe ƒo yi nunɔla la gbɔ hebiae nusita Fofonye ku kple nusita wòle be danye dahe la nanɔ fe xem na nunɔla la. Ŋu kpee wògblɔ kple gbe bɔbɔe be: “Mawue xɔe. Nenemae wòle. Wò nuxaxaa nu ava ayi.”

Nyemete ŋu kpɔ ɖekawɔwɔ si le eƒe ŋuɖoɖoa kple Aƒetɔ ƒe gbedodoɖa si mesrɔ̃ le suku dome o. Nya nyui siwo ŋu gɔmesese le si wotsɔ dze egɔmee la gale ŋku dzi nam kokoko: “Mía Fofo, si le dziƒowo! Wò ŋkɔ ŋuti nakɔ! Wò fiaɖuƒe nava! Woawɔ wò lɔlɔ̃nu le anyigba dzi, sigbe alesi wowɔna le dziƒo ene!” (Mateo 6:9, 10) Ne Mawu ɖoe be woawɔ yeƒe lɔlɔ̃nu le anyigba dzi la, ke nukatae wòle be míanɔ fu kpem alea gbegbe?

Mekpɔ ŋuɖoɖo na nyabiase ma kloe le ƒe 1929 me, esime Emmanuel Lionoudakis, si nye Yehowa Ðasefowo ƒe ɣeyiɣiawo katã ƒe gbeƒãɖela ɖi tsa va míaƒe aƒeme. * Esi danye bia Emmanuel nusi dim wònɔ la, meke nu o, agbalẽvi aɖe koe wòtsɔ de esi. Danye tsɔ agbalẽvia nam be maxlẽ na ye. Esi ƒe asieke koe mexɔ ɣemaɣi ta la, nyemese nu geɖe gɔme le eme o. Esi danye susu be tokunɔe gbeƒãɖela si va srã mí kpɔ nye ta la, egblɔ be: “Nublanuinya! Màte ŋu aƒo nu o, eye nye hã nyemate ŋu axlẽ nu o.” Emegbe ewɔ asi nɛ kpoo be wòadzo.

Le ƒe ʋɛ aɖewo megbe la, meke ɖe ŋuɖoɖoa ŋu. Fonye Emmanuel Paterakis, xɔ agbalẽvi si nye Where Are the Dead?, si Yehowa Ðasefowo * ta la tso ɣeyiɣiawo katã ƒe subɔla ma ke gbɔ. Esi mexlẽe la, nye dzi dze eme esi mekpɔe be menye Mawue xɔ fofonye o. Mekpɔe be amegbetɔ ƒe blibomademade gbɔe ku tso eye be fofonye le lalam na tsitretsitsi ava paradisonyigba dzi.

“Agbalẽ Sia Gblẽ Dowòme!”

Biblia ƒe nyateƒea ʋu ŋku na mí. Míekpɔ Papa ƒe Biblia xoxo aɖe hedze esɔsrɔ̃ gɔme, eye zi geɖe la, bosomikaɖie míesina tsɔ wɔa nusɔsrɔ̃ae. Esi wònye nye ɖeka koe nye ɖetugbi si tsɔ ɖe le Biblia me le nutoa me ta la, womena mewɔ ɖeka kple Ðasefo ʋɛ siwo le mía gbɔ le woƒe dɔwɔnawo me o. Hena ɣeyiɣi aɖe la, mexɔe se vevie—togbɔ be enye vodada hã—be ŋutsuwo ko ƒe subɔsubɔhae wònye.

Fonye ƒe dzonɔameme ɖe gbeƒãɖeɖedɔa ŋu de dzi ƒo nam ale gbegbe. Eteƒe medidi o kpovitɔwo te ŋkuléle ɖe míaƒe ƒomea ŋu, woɖia tsa srãa mí kpɔ edziedzi gaƒoƒo ɖesiaɖe ŋkeke kple zã nɔa Emmanuel kple eƒe agbalẽwo dim. Meɖo ŋku edzi nyuie be nunɔla aɖe va be yeable mía nu míagbugbɔ va sɔlemeha la me. Esi Emmanuel fia nunɔla la le Biblia me be Mawu ƒe ŋkɔe nye Yehowa la, nunɔlaa xɔ Biblia hetsɔe do ɖe fonye ƒe ŋkume adãtɔe kple ɣli be, “Agbalẽ sia gblẽ dowòme!”

Le ƒe 1940 me esime Emmanuel gbe be yemawɔ asrafodɔ o la, wolée heɖoe ɖe Albaniatɔwo ƒe aʋagbedzi. Míegase eŋkɔ kpɔ o eye míesusu be eku. Gake nukutɔe le ƒe eve megbe la, eɖo lɛta ɖe mí tso gaxɔ me. Enɔ agbe henɔ lãmesẽ me! Ŋɔŋlɔ siwo wòyɔ le lɛta ma me dometɔ ɖeka tsi susu me nam ɖikaa tso ɣemaɣi: “Yehowa ƒe ŋku kpɔa anyigba blibo la dzi, eye wòdoa ŋusẽ amesiwo ku ɖe eŋu kple woƒe dzi blibo.” (Kronika II, 16:9) Aleke gbegbe míehiã dzideƒonamenya mawo tɔgbe vevie nye si!

 Emmanuel te ŋu nɔ gaxɔa me wɔ ɖoɖo be nɔviŋutsu aɖewo nava srãm kpɔ. Enumake wowɔ ɖoɖo be míawɔ Kristotɔwo ƒe kpekpe le adzame le agblekɔƒe aɖe me le dua godo. Míenya kuraa be wonɔ ŋku lém ɖe mía ŋu o! Le Kwasiɖagbe aɖe la, kpovitɔwo va ƒo xlã mí kple tu. Wolɔ mí de agbatsɔʋu aɖe me heku to dua mee. Alesi amewo nɔ alɔme ɖem le mía ŋu nɔ vlo dom míi gale nye ŋku dzi kokoko, gake Yehowa to eƒe gbɔgbɔ dzi na míekpɔ ŋutifafa le mía me.

Wokplɔ mí yi du bubu me ɖakɔ mí ɖe gaxɔ ƒoɖi doviviti ŋutɔ aɖe me. Tɔkpo nuvo aɖe mee wodea nugodo ɖo le nye gaxɔa me eye zi ɖekae wotsɔnɛ gbesiagbe. Wotso afia nam be manɔ gaxɔ me ɣleti enyi elabena wobu be nyee nye ƒuƒoƒoa ƒe “nufiala.” Gake nɔviŋutsu aɖe si wode mɔ le afima wɔ ɖoɖo eƒe senyala ʋli míaƒe nyaa na mí eye wòna woɖe mí le gaxɔa me.

Agbe Yeye

Esi woɖe Emmanuel le gaxɔ me la, ewɔ dzikpɔla mɔzɔla ƒe dɔ nɔ hamewo srãm kpɔ le Athens. Meʋu yi afima le ƒe 1947 me. Meva do go Ðasefowo ƒe ƒuƒoƒo gã aɖe mlɔeba—meganye ŋutsuwo ɖeɖeko o, ke nyɔnuwo kple ɖeviwo hã nɔ eme. Mlɔeba le July 1947 me la, metsɔ nyɔnyrɔxɔxɔ ɖe tsi me ɖo kpe nye adzɔgbeɖeɖe na Yehowa dzii. Edzrom zi geɖe be mava zu dutanyanyuigblɔla eye mete fiẽsuku dede be masrɔ̃ Eŋlisigbe. Le ƒe 1950 me la, meva zu mɔɖela. Dada va nɔ gbɔnye eye eya hã va xɔ Biblia ƒe nyateƒea. Ekpɔtɔ nye Yehowa Ðasefo vaseɖe esime wòku le ƒe 34 megbe.

Le ƒe ma ke me la, medo go John Marks (Markopoulos), si nye gbɔgbɔmeme aɖe si tso United States, si ŋu wodea bubui vevie. Ɣetoɖoƒe Albaniae wodzi John le, eye eva zu Yehowa Ðasefo le eƒe ʋuʋu yi United States megbe. Le ƒe 1950 me la, enɔ Greece nɔ agbagba dzem be yeaxɔ Albania dukɔmenɔgbalẽ—afisi Kɔmiunisttɔnyenye xɔ aƒe ɖo vevie ɣemaɣi eye womeɖea mɔ be amedzrowo nava o. Togbɔ be tso ƒe 1936 me John megakpɔ eƒe ƒometɔwo kpɔ o hã la, womeɖe mɔ nɛ be wòage ɖe Albania o. Dzo si gbegbe nɔ eme ɖe Yehowa ƒe subɔsubɔdɔa wɔwɔ ŋu kple lɔlɔ̃ deto si le eme na nɔviwo ƒe habɔbɔa wɔ dɔ ɖe dzinye ŋutɔ. Míeɖe mía nɔewo le April 3, 1953, dzi. Emegbe míeʋu yi afisi va zu míaƒe  aƒe yeye me le New Jersey, U.S.A.

Be mía kple John míate ŋu akpɔ mía ɖokui dzi le ɣeyiɣiawo katã ƒe gbeƒãɖeɖedɔa wɔwɔ me la, míeɖo dɔwɔƒe sue aɖe ɖe New Jersey ƒuta, nɔ ŋdinuɖuɖu wɔm na ɖɔkplɔlawo. Dzomeŋɔli ɣletiwo me koe míewɔa dɔ, tso fɔŋli va ɖo ŋdi 9:00. To agbe tsɛ nɔnɔ kple gbɔgbɔmedɔwo ɖoɖo nɔƒe gbãtɔ me la, míete ŋu zã míaƒe ɣeyiɣi akpa gãtɔ ɖe gbeƒãɖeɖedɔa ŋu. Le ƒeawo me la, wobia tso mía si be míaʋu ayi du vovovowo me, afisiwo wohiã gbeƒãɖelawo le geɖe. Míekpe ɖe ɖetsɔlemetɔwo ŋu, míeɖo hamewo, eye míekpe asi ɖe Fiaɖuƒe Akpatawo tutu ŋu le teƒe mawo, to Yehowa ƒe kpekpeɖeŋu me.

Kpekpeɖeŋunana Mía Nɔvi Siwo Nu Hiã

Gake eteƒe medidi o mɔnukpɔkpɔ dodzidzɔname aɖe ʋu na mí. Nɔvi tsitsiwo di be yewoanɔ hati Kristotɔ siwo le Balkan-nyigbawo dzi, afisiwo woxe mɔ ɖe míaƒe dɔwɔwɔ nu le la ŋkɔ sem. Ƒe geɖe enye ma si kadodo meganɔ Yehowa Ðasefo siwo le dukɔ mawo me kple dukɔwo dome nɔviwo ƒe habɔbɔa dome o eye gbɔgbɔmenuɖuɖu sue aɖe alo ɖeke kura mesua wo si o, eye wonɔ yometiti sesẽwo me tom. Ŋku nɔ wo dometɔ akpa gãtɔ ƒe zɔzɔme ŋu vevie, eye wode wo dometɔ geɖe gaxɔ me alo ɖo wo ɖe dɔsesẽwɔsaɖawo me. Wohiã Biblia-srɔ̃gbalẽwo, mɔfiafia, kple dzideƒo vevie. Le kpɔɖeŋu me, gbedasi aɖe si míexɔ tso Albania xlẽ ale: “Mido gbe ɖa na Aƒetɔ la ɖe mía ta. Wotsa tso aƒeme yi aƒeme xɔ agbalẽwo. Womeɖea mɔ na mí be míawɔ nusɔsrɔ̃ o. Wode ame etɔ̃ gaxɔ me.”

Eyata le November 1960 me la, míedze ɣleti ade ƒe mɔ legbe aɖe zɔzɔ gɔme be míasrã dukɔ mawo dometɔ aɖewo kpɔ. Edze ƒã be míahiã  ‘ŋusẽ si gbɔ dzɔdzɔmetɔ ŋu,’ Mawu ƒe dzideƒoname, dzinɔameƒo, kple aɖaŋudzedze na míaƒe dɔdasia wɔwɔ. (Korintotɔwo II, 4:7) Teƒe gbãtɔ si míeɖo tae nye Albania. Míeƒle lɔri aɖe le Paris hedze mɔ. Esi míeɖo Rome la, John ɖeɖekoe wona Albania dukɔmenɔgbalẽe. Ehiã be mayi mɔzɔzɔa dzi ayi Athens, Greece, ava nɔ elalam.

John ge ɖe Albania le February ƒe nuwuwu le ƒe 1961 me eye wònɔ afima vaseɖe March ƒe nuwuwu. Edo go nɔvi 30 le Tiranë. Dzidzɔ ka gbegbee nye si wònye na wo esime wokpɔ agbalẽ siwo wohiã vevie la kpakple dzideƒoname! Ƒe 24 sɔŋ enye ma ame aɖeke metso duta va srã wo kpɔ o.

Nɔvi mawo ƒe nuteƒewɔwɔ kple dzidodo wɔ dɔ ɖe John dzi ale gbegbe. Wogblɔ nɛ be dɔ ge le wo dometɔ geɖe si eye wode wo gaxɔ me esi womekpɔ gome le Kɔmiunist-dukɔa ƒe nuwɔnawo me o ta. Nusi gawɔ dɔ ɖe edzi vevie nye nɔviŋutsu eve siwo le woƒe ƒe 80-awo me siwo nae nudzɔdzɔ si ade United States dɔlar 100 be woatsɔ awɔ gbeƒãɖeɖedɔae. Ƒe geɖee wotsɔ dzra ga ma ɖoe tso ga sue si dukɔa xena na dzudzɔxɔlawo me.

March 30, 1961—si nye ɣletiŋkeke si dzi Yesu ƒe ku ƒe Ŋkuɖodzia dze lae nye John ƒe ŋkeke mamlɛa le Albania. John ye ƒo Ŋkuɖodzinuƒoa, si ame 37 se. Le nuƒoa ƒe nuwuwu vɔ megbe la, nɔviawo wɔ kaba kplɔ John to megbeʋɔtrua nu dee ʋu kui yi Durrës melidzeƒee, afisi wòɖo asitsala Turkeytɔwo ƒe meli si yina Piraiévs (Piraeus), Greece le.

Dzi dzɔm esi mekpɔe wòtrɔ gbɔ dedie. Fifia míagate ŋu ayi míaƒe afɔkumɔzɔzɔa dzi. Míaƒe mɔzɔzɔa kplɔ mí to Balkan-dukɔ etɔ̃ bubu siwo xe mɔ ɖe míaƒe dɔa nu me—afɔku nɔ eme ŋutɔ elabena míetsɔ Biblia-srɔ̃gbalẽwo, nuŋlɔmɔ̃wo, kple nuzazã bubuwo ɖe asi. Mɔnukpɔkpɔ su mía si míekpɔ nɔviŋutsu kple nɔvinyɔnu nuteƒewɔla aɖewo siwo le klalo be yewoatsɔ yewoƒe dɔwɔɖuiwo, yewoƒe ablɔɖe, kple yewoƒe agbe gɔ̃ hã ade afɔku me ɖe Yehowa ta. Woƒe dzonɔameme kple lɔlɔ̃ vavã la de dzi ƒo na ame ale gbegbe. Azɔ hã ewɔ dɔ ɖe mía dzi ŋutɔ be Yehowa na ‘ŋusẽ si gbɔ dzɔdzɔmetɔ ŋu’ la mí vavã.

Le míaƒe mɔzɔzɔa nu wuwu dzidzedzetɔe megbe la, míetrɔ yi United States. Le ƒe siwo kplɔe ɖo me la, míeyi edzi zã mɔnu vovovowo dze agbagba ɖo agbalẽwo ɖe Albania eye míexɔ nyatakakawo tso mía nɔviwo ƒe dɔwɔnawo ŋu.

Mɔzɔzɔ Enuenu, le Afɔkuwo Me

Ƒewo va yi, eye John ƒe ku le ƒe 1981 me, esime wòxɔ 76, na metsi akogo. Nye dadaɖiayɔvi Evangelia kple srɔ̃a George Orphanides kplɔm dɔmenyotɔe va wo ɖokui gbɔe, eye tso ɣemaɣi la, wowɔ nu geɖe tsɔ kpe ɖe ŋunyee le seselelãme kple nye nuhiahiãwo gbɔ kpɔkpɔ me. Woa ŋutɔwo wokpɔ alesi Yehowa kpe ɖe wo ŋui esime wonɔ subɔsubɔm le mɔxeɖenu te le Sudan. *

Mlɔeba la, eva hiã be woate mɔnu yeye aɖe kpɔ be woase mía nɔvi siwo le Albania la ŋkɔ. Esi srɔ̃nye ƒe ƒometɔwo le afima ta la, wobia tso asinye be malɔ̃ azɔ mɔ ayi dukɔ ma me hã. Mayi godoo!

Le agbagbadzedze vevie ɣleti geɖe megbe la, mete ŋu va xɔ Albania dukɔmenɔgbalẽ le dukɔ ma ƒe dutadɔwɔƒe le Athens le May 1986 me. Dutadɔwɔlaawo xlɔ̃ num vevie be ne meyi eye dzɔgbevɔ̃e aɖe dzɔ la, kpekpeɖeŋu aɖeke meli makpɔ mɔ be woanam le duta o. Esi mete ɖe mɔzɔzɔɖoɖowɔla aɖe ŋu be maƒle yameʋutikit ayi Albania la, ewɔ nuku nɛ ŋutɔ. Nyemeɖe mɔ vɔvɔ̃ na megbugbɔ ɖe megbe o, eye eteƒe medidi o mege ɖe yameʋu ɖeka pɛ si tsoa Athens yia Tiranë kwasiɖa siaa kwasiɖa la me. Albaniatɔ tsitsi etɔ̃ pɛ koe nɔ yameʋu ma me; wova Greece ɖe lãmesẽnyawo ta.

Esi yameʋua nya dze ko la, wona mege ɖe agbadɔ aɖe si me amewo menɔ o la te, afisi adzɔxɔdɔwɔlawo tsɔ wɔ woƒe dɔwɔƒee. Togbɔ be srɔ̃nye nɔviŋutsu kple nyɔnu menye Yehowa  Ðasefowo o hã la, wolɔ̃ faa kpe ɖe ŋunye meke ɖe dua me nɔvi ʋɛ aɖewo ŋu. Se bia be woana nutoa me fia nanya nu tso nye vava ŋu. Esia wɔe be kpovitɔwo ƒe ŋku nɔ ŋunye vevie. Eyata ƒonyemetɔawo ɖo aɖaŋu nam be manɔ yewoƒe aƒeme eye yewoayi aɖadi nɔviŋutsu siwo nɔ Tiranë la dometɔ eve akplɔ va gbɔnyee.

Ɣemaɣi la, nɔvi ɖeadzɔgbe asieke koe wonya be wole Albania-dukɔ bliboa me. Mɔxexe ɖe wo nu, wo yometiti, kple ŋkuléle ɖe wo ŋu vevie ƒe geɖe na be wova dze aye ŋutɔ. Woƒe ŋkume si kesekaba keŋ. Esi nɔviŋutsu eveawo va ka ɖe dzinye vɔ la, nya gbãtɔ si wobiam enye be: “Gbetakpɔxɔawo Ðe?” Agbalẽ xoxo eve koe nɔ wo si ƒe geɖe—Biblia gɔ̃ hã menɔ wo si o.

Wogblɔ nya geɖe tso ŋutasẽnu geɖe si dziɖuɖua le wɔwɔm ɖe wo ŋu la ŋu. Woƒo nu tso nɔviŋutsu lɔlɔ̃tɔ aɖe si ɖoe kplikpaa be yemade akpa aɖeke dzi o le akɔ aɖe si da ge wogbɔna me ƒe nya ŋu. Esi wònye Dziɖuɖua si mee nusianu le ta la, esia fia be womana nuɖuɖu aɖeke eƒe ƒomea o. Woade via siwo ɖe srɔ̃ kpakple woƒe ƒometɔwo gaxɔ me, togbɔ be eƒe subɔsubɔdzixɔsewo mele wo si o hã. Woka nya ta be le vɔvɔ̃ ta la, nɔviŋutsu sia ƒe ƒometɔwo wui le zã si do ŋgɔ na akɔdagbea hetsɔ eƒe kukua ɖada ɖe vudo aɖe me heva gblɔ be vɔvɔ̃ ɖoe wòwu eɖokui.

Koɖoɖo si me hati Kristotɔ mawo nɔ wɔ nublanui ale gbegbe. Gake esi mete kpɔ be mana dɔlar 20 wo dometɔ ɖesiaɖe la, wogbe hegblɔ be, “Gbɔgbɔmenuɖuɖu ko dimee míele.” Nɔvi lɔlɔ̃tɔ siawo nɔ ŋutasẽdziɖuɖu si te ŋu na dukɔa me tɔ akpa gãtɔ va zu mawudzimaxɔselawo dzidzedzetɔe la te ƒe geɖe. Gake woƒe xɔse kple tameɖoɖo kplikpaa kpɔtɔ sẽŋu abe Ðasefo siwo le teƒe bubuwo tɔ ene. Le nyateƒe me kaka madzo le Albania le kwasiɖa eve megbe la, Yehowa ƒe ŋutete le ‘ŋusẽ si gbɔ dzɔdzɔmetɔ ŋu’ nana le nɔnɔme sesẽtɔ kekeawo gɔ̃ hã me la na nye nu ku ale gbegbe.

Azɔ hã mɔnukpɔkpɔ gasu asinye meɖi tsa yi Albania le ƒe 1989 me eye megayi le ƒe 1991 me. Esi nuƒoƒo kple subɔsubɔ ƒe ablɔɖe le dzidzim ɖe edzi le dukɔ ma me vivivi la, Yehowa subɔlawo ƒe xexlẽme le agbɔ sɔm kabakaba ŋutɔ. Kristotɔ ɖeadzɔgbe ʋɛ siwo nɔ afima le ƒe 1986 me la dzi ɖe edzi gbɔ gbeƒãɖela 2,200 ŋu. Wo dometɔ ɖekae nye Melpo, si nye srɔ̃nye nɔvinyɔnu. Ðe ɖikeke aɖe ate ŋu anɔ eŋu be Yehowa ƒe yayra nɔ ƒuƒoƒo wɔnuteƒe ma dzia?

Menɔ Agbe si me Dzidzeme Le, le Yehowa ƒe Ŋusẽ Me

Ne metrɔ kpɔ megbe la, dzideƒo le asinye be míaƒe dɔ—mía kple John tɔ—mezu dzodzro o. Míewɔ míaƒe ɖekakpui kple ɖetugbi me ŋusẽ ŋudɔ le mɔ nyuitɔ kekeake nu. Ɣeyiɣiawo katã ƒe subɔsubɔdɔ si míewɔ la ɖe vi ŋutɔ wu dɔ bubu ɖesiaɖe si míawɔ. Enye dzidzɔ nam ŋutɔ be mekpe ɖe lɔlɔ̃tɔ geɖe ŋu wosrɔ̃ Biblia ƒe nyateƒea. Fifia si mezu ame tsitsi la, mate ŋu ade dzi ƒo na sɔhɛwo kple dzi blibo be ‘woaɖo ŋku wo Wɔla dzi le woƒe ɖekakpuiŋkekewo me.’—Nyagblɔla 12:1.

Togbɔ be mexɔ ƒe 81 hã la, mekpɔtɔ nye ɣeyiɣiawo katã ƒe nyanyuigbeƒãɖela kokoko. Mefɔna kaba yi ɖaɖia ɖase na amewo le ʋuɖoƒewo, ʋudaɖoƒewo, le mɔdodowo dzi, le fiasewo me, alo le modzakaɖebɔwo me. Tsitsimekuxiwo na agbenɔnɔ va sẽ fifia, gake nye gbɔgbɔ me nɔviŋutsu kple nɔvinyɔnuwo—si nye nye gbɔgbɔmeƒome gã la—kpakple nye dadaɖiayɔvi kple eƒe ƒomea nye kpekpeɖeŋu ŋutɔŋutɔ nam. Ƒo wo katã ta la, mesrɔ̃e be ‘ŋusẽ si gbɔ dzɔdzɔmetɔ ŋu la, nye Mawu tɔ, eye menye mía gbɔ wòatso o.’—Korintotɔwo II, 4:7.

[Etenuŋɔŋlɔwo]

[Nɔnɔmetata si le axa 25]

Etame: John, (le miame ɖaa), nye, le titina, nɔvinyeŋutsu Emmanuel si le nye miame kple mía dada le eƒe miame, kpakple Betel-dɔwɔlawo ƒe ƒuƒoƒo aɖe, le Athens, ƒe 1950

[Nɔnɔmetata si le axa 25]

Miame: Mía kple John le míaƒe dɔwɔƒe le New Jersey ƒuta, ƒe 1956

[Nɔnɔmetata si le axa 26]

Nutome gã takpekpe le Tiranë, Albania, ƒe 1995

[Nɔnɔmetata si le axa 26]

Betel-ƒe, le Tiranë, Albania. Wowu enu le ƒe 1996 me

[Nɔnɔmetata si le axa 26]

Mía kple nye dadaɖiayɔvi Evangelia Orphanides (ɖusime), kple srɔ̃a, George

[Nɔnɔmetata si le axa 26]

Etame: Ƒe 1940 me “Gbetakpɔxɔ” me nyati aɖe si gɔme woɖe ɖe Albaniagbe me le adzame