Ðo Ŋu Ðe Yehowa Mawu Vavã la Ŋu

Èlé ŋku ɖe dziŋgɔli si me kɔ nyuie ŋu le zã me hekpɔ ɣletivi alafa geɖewo kpɔa? Amekae nègblɔna be eyae wɔ wo?

LE Zà ƒe ɖoɖoeziɣi la, ɣletiviwo ƒo nu, le kpɔɖeŋunyagbɔgblɔ nu, na blema Israel Fia Dawid, si ʋãe wòŋlɔ be: “Dziƒowo le Mawu ƒe bubu xlẽm fia, eye dziŋgɔli le gbeƒã ɖem eƒe asinudɔwɔwɔ.” (Psalmo 19:2) Ẽ, Wɔla lae dze be wòaxɔ “ŋutikɔkɔe kple bubu kple ŋusẽ” ke menye nuwɔwɔwoe o.—Nyaɖeɖefia 4:11; Romatɔwo 1:25.

Biblia gblɔ be: ‘amesi wɔ nuwo katã enye Mawu.’ (Hebritɔwo 3:4) Nyateƒee, Mawu vavã, ‘si ŋkɔe nye Yehowa ɖeɖe koe ɖo kpo ɖe anyigba blibo la dzi.’ (Psalmo 83:19) Eye menye ameflula—bleziblezi—aɖee wònye o. Yesu Kristo gblɔ tso Fofoa, Yehowa, si le dziƒo ŋu be: ‘Amesi dɔm ɖa la nye nyateƒetɔ.’—Yohanes 7:28.

Yehowa—Amesi Naa Eƒe Tameɖoɖowo Vaa Eme

Mawu ƒe ŋkɔ ɖedzesi Yehowa, dze le Hebri Ŋɔŋlɔawo ɖeɖe me ade zi gbɔ zi 7,000 sɔŋ. Ŋkɔ ma ɖeɖe ɖee fia be eli vavã. Mawu ƒe ŋkɔa gɔme le nyaa ŋutɔŋutɔ nu enye “Enaa Wòvaa Eme.” Eyata Yehowa Mawu ɖɔ eɖokui be yenye Amesi naa yeƒe tameɖoɖowo vaa eme. Esi Mose bia Mawu eƒe ŋkɔ la, Yehowa ɖe ŋkɔa gɔme ale: ‘Mava nye amesi mava nye.’ (Mose II, 3:14) Rotherham ƒe Biblia gɔmeɖeɖea ɖe eme kɔte be: “Mava Nye nusianu si dze ŋunye.” Yehowa va nyea, alo tiana be yeazu nusianu si hiã bene wòana eƒe tameɖoɖo kple ŋugbedodo dzɔdzɔewo nava eme. Eyata dzesideŋkɔ wɔdɔɖeamedzi geɖewoe le esi, siwo dometɔ aɖewoe nye, Wɔla, Fofo, Aƒetɔ Dziɖulagã, Alẽkplɔlagã, Aʋakɔwo ƒe Yehowa, Gbedodoɖasela, Ʋɔnudrɔ̃la, Nufialagã, Xɔnametɔ.—Ʋɔnudrɔ̃lawo 11:27; Psalmo 23:1; 65:3; 73:28; 89:27; Yesaya 8:13; 30:20; 40:28; 41:14.

Mawu vavã ɖeka la koe ate ŋu atɔ ŋkɔ Yehowa wòasɔ, elabena amegbetɔwo mate ŋu aka ɖe edzi bliboe be yewoƒe ɖoɖowo ava eme gbeɖe o. (Yakobo 4:13, 14) Yehowa ɖeɖe koe ate ŋu agblɔ be: “Alesi tsidzadza kple sno dzana tso dziƒo, eye megagbugbɔna yina o, ke boŋ wòdea tsi anyigba wònana wòmiea nu heʋãa nu, eye wònaa nuku nuƒãla kple abolo, ne woaɖu la, nenema ke nye nya, si do tso nye nu me la anɔ: Magbugbɔ va gbɔnye ƒuƒlu o, negbe ɖeko wòawɔ nye lɔlɔ̃nu, eye wòawɔ nusi gbe meɖoe ɖo la hafi.”—Yesaya 55:10, 11.

Yehowa naa eƒe tameɖoɖowo vaa eme pɛpɛpɛ ale gbegbe be nusi adze na amegbetɔwo abe womate ŋu ava eme ene o la nyea nu ŋutɔŋutɔ le egbɔ. Yesu yɔ Abraham, Isak, kple Yakob siwo ku xoxoxo va yi hegblɔ be: ‘Ke Yehowa la, menye ame kukuwo ƒe Mawu wònye o, ke boŋ ame gbagbewo tɔe; elabena wo katã  wole agbe nɛ.’ (Luka 20:37, 38) Blemafofo etɔ̃ mawo ku, gake kakaɖedzi le Mawu ƒe tame si wòɖo be yeafɔ wo ŋu ale gbegbe be le egbɔ la, ɖeko wòle abe ɖe wole agbe ŋutɔŋutɔ ene. Blema subɔla wɔnuteƒe siawo fɔfɔ va agbe me masesẽ na Yehowa o abe alesi mesesẽ nɛ esime wòtsɔ anyi me ame gbãtɔ o ene.—Mose I, 2:7.

Apostolo Paulo wɔ kpɔɖeŋu bubu si fia be Mawu naa nusi ƒe tame wòɖo la vaa eme. Woyɔ Abraham le Ŋɔŋlɔawo me be “dukɔ geɖewo fofo.” (Romatɔwo 4:16, 17) Esime vi menɔ Abram si o la, Yehowa trɔ eƒe ŋkɔ wòzu Abraham, si fia “Amehawo Fofo (Ame geɖe).” Yehowa na ŋkɔ ma ƒe gɔmesese va eme ŋutɔŋutɔ esi wògbɔ agbe Abraham si nye amegãɖeɖi kple srɔ̃a Sara si nye nyagã ƒe vidzidziŋutetewo nukutɔe.—Hebritɔwo 11:11, 12.

Esi ŋusẽ geɖe nɔ Yesu Kristo si ta la, eƒo nu tso nu ŋutɔŋutɔwo ŋu wògbɔ amegbetɔwo ƒe nugɔmesese ŋu. Togbɔ be exɔlɔ̃ Lazaro ku hã la, Yesu gblɔ na eƒe nusrɔ̃lawo be: “Mía xɔlɔ̃ Lazaro le alɔ̃ dɔm; gake la meyina, bena maɖanyɔe atso alɔ̃ me.” (Yohanes 11:11) Nukatae Yesu ƒo nu tso amesi ku ŋu be ɖeko wòle alɔ̃ dɔm?

Esi Yesu ɖo Lazaro dedu Betania me la, eyi ɖe yɔdoa gbɔ eye wògblɔ be woaɖe kpe si wotsɔ xe enu la ɖa. Esi wòdo gbe ɖa sesĩe vɔ la, eɖe gbe be: “Lazaro lee, do go!” Eye le eteƒekpɔla siwo fɔ ŋku ɖe yɔdoa dzi gã ƒe ŋkume la, “ame kuku, si ƒe afɔwo kple asiwo le babla la, do go kple ameɖivɔwo, eye taku bla ŋku me nɛ.” Yesu gblɔ bena: “Mitui, eye mina wòayi.” (Yohanes 11:43, 44) Yesu fɔ Lazaro—egbugbɔ amesi ku ŋkeke etɔ̃ la va agbe me! Menye ame blem Kristo nɔ esi wògblɔ be ye xɔlɔ̃ Lazaro le alɔ̃ dɔm o. Le Yehowa kple Yesu ƒe nukpɔsusu nu la, ɖeko wòle abe ɖe Lazaro si ku la le alɔ̃ dɔm ene. Ẽ, nu ŋutɔŋutɔwoe Yesu kple Fofoa si le dziƒo wɔna.

Yehowa Ate Ŋu Ana Míaƒe Mɔkpɔkpɔwo Nava Eme

Vovototo gã kae nye si le alakpa legbawo kple Mawu vavã la dome! Legba subɔlawo gblɔna madzemadze be ŋusẽ siwo tri akɔ wu amegbetɔwoe le nusiwo yewosubɔna la si. Gake bubu deto ka ke wotsɔ naa legba siawo o, mate ŋu ana nukunuwɔwɔ ŋutetewo nasu wo si o. Gake Yehowa Mawu ya ate ŋu aƒo nu tso esubɔla siwo ku xoxoxo ŋu abe ɖe wole agbe ene wòasɔ, elabena agate ŋu ana agbe wo ake. “Yehowa enye Mawu vavã,” eye meblea eƒe amewo o.—Yeremya 10:10.

Aleke gbegbe enyanya be le Yehowa ƒe ɣeyiɣiɖoɖi si gbɔna kpuie dzi la, afɔ amesiwo katã le eƒe susu me—agbugbɔ wo ava agbe me—la faa akɔ na amee nye esi! (Dɔwɔwɔwo 24:15) Ẽ, tsitretsitsia bia be woagatrɔ amesi ku la ava eƒe nɔnɔmewo me le agbe me. Ŋkuɖoɖo nɔnɔme siwo le amewo si hafi woku dzi kple wo fɔfɔ ɖe tsitre manye nu sesẽ kura na Wɔla, si si nunya kple ŋusẽ geɖe le la o. (Hiob 12:13; Yesaya 40:26) Esi lɔlɔ̃ le Yehowa si ale gbegbe ta la, azã eƒe ŋkuɖoɖonudzi debliboa atsɔ agbɔ agbe ame kukuwo ava paradisonyigba dzi eye wòagatsɔ amenyenye si nɔ wo si hafi woku la ana wo.—Yohanes I, 4:8.

Esi Satana ƒe xexea ƒe nuwuwu le gogom la, etsɔmemɔkpɔkpɔ nyui aɖe le amesiwo katã  ɖoa ŋu ɖe Mawu vavã la ŋu lalam. (Lododowo 2:21, 22; Daniel 2:44; Yohanes I, 5:19) Hakpala la ka ɖe edzi na mí be: “Ekpɔtɔ vie ko ame vɔ̃ɖi la maganɔ anyi o . . . Ke ame ɖihiãwo anyi anyigba la dome, eye dzi adzɔ wo ɖe ŋutifafa gbogbo la ŋuti.” (Psalmo 37:10, 11) Nuvlowɔwɔ kple ŋutasesẽ azu gbaɖegbenyawo. Dzɔdzɔenyenye anɔ afisiafi, eye ganyawo ƒe amemiamiã nu ayi. (Psalmo 37:6; 72:12, 13; Yesaya 65:21-23) Woaɖe hadome, ŋutigbalẽ, to, kple gbevovovodolawo dome vovototodedeameme ƒomevi ɖesiaɖe ɖa keŋkeŋ. (Dɔwɔwɔwo 10:34, 35) Aʋawɔwɔwo kple aʋawɔnuwo maganɔ anyi o. (Psalmo 46:10) Ɣemaɣi la, “duametɔ aɖeke magblɔ be, yele dɔ lém o.” (Yesaya 33:24) Amesiame anɔ lãmesẽ deblibo me. (Nyaɖeɖefia 21:3, 4) Eteƒe madidi o anyigba dzi paradiso ava ŋutɔŋutɔ. Yehowae ɖo tame ɖe eŋu!

Ẽ, Biblia me mɔkpɔkpɔwo katã ava eme kpuie. Nukatae míana woatsɔ xexe sia me nu siwo wotsɔ wɔ legbae naflu mí le esime míate ŋu aɖo ŋu ɖe Yehowa ŋu bliboe? Enye Yehowa ƒe didi be “woaxɔ amewo katã, bene woava nyateƒe ƒe sidzedze la me.” (Timoteo I, 2:3, 4) Le esi míanɔ míaƒe ɣeyiɣi kple nunɔamesiwo gblẽm ɖe nuɖoanyi sia ƒe nuwo kple eƒe mawu siwo nye ameflunuwo, alo blezibleziwo ŋu teƒe la, mina míadzi Mawu vavã la ŋuti sidzedze ɖe edzi eye míaɖo ŋu ɖe eŋu tso dzi blibo me.—Lododowo 3:1-6; Yohanes 17:3.

[Nɔnɔmetata si le axa 6]

Le Yehowa kple Yesu ƒe nukpɔsusu nu la, ɖeko Lazaro si ku la le alɔ̃ dɔm

[Nɔnɔmetata siwo le axa 7]

Eteƒe madidi o anyigba dzi paradiso ava ŋutɔŋutɔ