Ati si “Faa Avi” Kple Eƒe “Aɖatsi” si Ðea Vi Geɖe

Yeremya 51:8 gblɔ be: ‘Mitsɔ atimitsi vɛ woawɔ atike nɛ eƒe vevesesea nu nafa.’ Vevesesenutsitike kple dɔyɔnu vevi sia tsoƒewo dometɔ ɖeka didi kplɔ mí yi Chios-ƒukpo, si le Aegea Ƒua me dzi.

NE DZOMEŊƆLI dze egɔme la, agbledela siwo le Chios dzrana ɖo ɖe nuŋeŋe ŋu le mɔ wɔnuku aɖe nu. Ne wokplɔ anyigba vɔ la, wokaa anyi ɣi ɖona ɖe anyigba hezrɔ̃a edzi wònɔa gbadzaa ɖe ati dama aɖe si nye mitsiti aɖe ƒomevi la te godoo. Emegbe agbledelaawo dzaa atiawo ŋuti keŋ, si naa atiawo ‘toa tsi.’ ‘Atimitsi’ ɣi aɖe tɔgbe tea dodo le wo ŋu. Le kwasiɖa eve alo etɔ̃ megbe la, atimitsi siwo do la blana eye agbledelawo ɖea wo le atiawo ŋu loo alo fɔa esiwo ge ɖe anyigba. Wozãa “aɖatsi” sia, si wogayɔna be atimitsi tsɔ wɔa atikee.

Gake ebia dzigbɔɖi kple kutrikuku geɖe hafi atimitsia fɔɣi ɖona. Atia ŋutɔ si trona gɔdɔ̃gɔdɔ̃ hefuna la metsina kabakaba kura o. Exɔna tso ƒe 40 yi 50 hafi tsina—eƒe kɔkɔme nyena tso meta 2 va ɖo 3.

Le atia ŋuti dzadza kple “aɖatsiawo” fɔfɔ megbe la, dɔ bubuwo gali woawɔ hafi akpɔ atimitsi. Ne agbledelaawo fɔ “aɖatsiawo” vɔ la, wotiaa eme, woklɔnɛ, eye woɖea wo ɖe vovo le woƒe lolome kple nyonyome nu. Emegbe wogaɖea ɖi le atimitsiawo me hafi wònyona wozãna le mɔ geɖewo nu.

Ati Xɔasi la Ŋutinya

Helagbe me nya si wozãna na “atimitsi” fia “be woaɖo aɖu aɖu dzi.” (Mateo 8:12; Nyaɖeɖefia 16:10) Ŋkɔ sia ate ŋu afia be tso blemaɣeyiɣiwo me la, woɖua atimitsi abe aŋekpetike ene be ame ƒe nume nagaɖe ya o.

Atimitsi ŋuti nyatakaka xoxotɔ kekeake si li la tso ƒe alafa atɔ̃lia D.M.Ŋ. me Hela ŋutinyaŋlɔla Herodotus gbɔ. Blema nuŋlɔla kple atikewɔla bubuwo—hekpe ɖe Apollodorus, Dioscorides, Theophrastus, kple Hippocrates ŋu—ƒo nu tso atimitsi ƒe atikewɔmɔnuwo ŋu. Togbɔ be mitsitiwo wɔna le Mediterranea Ƒuta godoo hã la, tso ƒe 50 M.Ŋ. la, Chios koŋ ye wowɔa atimitsi le. Eye atimitsi koŋ tae amesiwo va xɔ Chios la xɔe ɖo, tso Romatɔwo dzi va Genoatɔwo dzi yi Ottomatɔwo dzi.

Atimitsi si Ðea Vi Geɖe

Blema Egipte tikewɔlawo zã atimitsi le dɔ vovovo, siwo me mitsinyenye kple ŋuɖui le, dada me. Wotsɔnɛ doa dzudzɔ ʋeʋẽe eye wozãnɛ le atike sisi na ame kukuwo me hã. Mitsiti  ate ŋu anye ati siwo me wokpɔa ‘Gilead-dɔyɔtike,’ si woyɔ le Biblia me dometɔ ɖeka, si wozãna tsɔ yɔa dɔe, wotsɔna wɔa atsyɔ̃ɖomii, eye wotsɔnɛ wɔa atike si wosina na ame kukuwo. (Yeremya 8:22; 46:11) Wobui be ati si me wokpɔa lifi lãhɛtɔ, si wozãna na dzudzɔ ʋeʋẽe dodo le subɔsubɔdɔ kɔkɔewo ko wɔwɔ me, anya nye mitsiti ƒomevi aɖe.—Mose II, 30:34, 35.

Egbea la, atimitsi le nusiwo wotsɔ wɔa aŋɔ siwo wosina na atinuwo kple haƒonuwo me. Wozãnɛ le aŋe siwo wofana ɖe elektrikkawo ŋu kple nusiwo me tsi metona o wɔwɔ me, eye wobui be enye atike nyuitɔ kekeake siwo naa ama siwo wodena nudodowo kple aŋɔ siwo nutalawo zãna megblẽna o la dometɔ ɖeka. Wozãa atimitsi le nutreŋɔwo kple lãgbalẽwo wɔwɔ me. Le alesi atimitsi ʋẽna lilili kple eƒe nɔnɔme bubuwo ta la, wozãnɛ le adzalẽ, atsyɔ̃ɖomiwo, kple ami ʋeʋẽwo wɔwɔ me.

Woyɔ atimitsi le atike vovovo 25 siwo dzi woda asi ɖo le xexeame katã la wɔnuwo me. Arabtɔwo kpɔtɔ le ezãm vevie le wo gbɔ tikewo wɔwɔ me. Wogazãa atimitsi le aɖutikewo kple nusiwo wofana ɖe goe siwo me wodea atikewoe me la wɔwɔ me.

Ƒe alafa geɖee nye sia si “aɖatsi” si ɖea vi geɖe si wokpɔna le mitsiti si “faa avi” me la le vevesese nu tsim eye wòle dɔ yɔm. Ekema susu nyui aɖe tae Yeremya ƒe nyagblɔɖia gblɔ be: ‘Mitsɔ atimitsi vɛ woawɔ atike nɛ eƒe vevesesea nu nafa’ ɖo.

[Nɔnɔmetata siwo le axa 31]

Chios

Atimitsi fɔfɔ

Ŋuɖɔɖo bliboe wotsɔ fɔa mitsiti ƒe “aɖatsiwoe”

[Afi Si Míexɔ Mɔɖeɖe Tso]

Chios and harvest line art: Courtesy of Korais Library; all others: Kostas Stamoulis