Míesu Te Blibo Be Míanye Mawu Ƒe Nya Fialawo
Míesu Te Blibo Be Míanye Mawu Ƒe Nya Fialawo
‘Mawu wɔ mí míedze be, míanye subɔlawo.’—KORINTOTƆWO II, 3:5, 6.
1, 2. Agbagba kawoe amewo dzena ɣeaɖewoɣi be yewoaɖe gbeƒã, gake nukatae wodoa kpo nu zi geɖe?
ÀDI be woana dɔ aɖe si wɔwɔ ŋu mènya naneke le o la yea? Wò ya bu eŋu kpɔ: Wokɔ nusiwo nèhiã la ɖe ŋkuwò me, eye dɔwɔnuawo hã li. Gake mènya naneke kura tso alesi nàwɔ dɔae ŋu o. Esi gavloe kura enye be dɔ sia hiã kpata. Amewo le asiwònu kpɔm. Aleke nàtsi dzodzodzoe enye si!
2 Nɔnɔme teɖeamedzi sia menye nususugblɔ aɖe ko o. Bu kpɔɖeŋu sia ŋu kpɔ. Ɣeaɖewoɣi la, Kristodukɔa me sɔlemeha aɖe ate kpɔ be yewoawɔ ɖoɖo awɔ ʋɔtru nu yi ʋɔtru nu subɔsubɔdɔa. Zi geɖe ɖeko ɖoɖo siawo tsia akpo dzi, eye wonu va yina le kwasiɖa alo ɣleti aɖewo ko me. Nukatae? Kristodukɔa mekpe ɖe eƒe hameviwo ŋu be woadze na dɔa wɔwɔ o. Sɔlemehakplɔlaawo ŋutɔ gɔ̃ hã medze awɔ gbeƒãɖeɖedɔ ma o, togbɔ be wotsɔ ƒe geɖe de sukuwo kple osɔfosukuwo zi geɖe hã. Nukatae míate ŋu agblɔe alea?
3. Nyagbɔgblɔ kae dze zi gbɔ zi etɔ̃ le Korintotɔwo II, 3:5, 6, eye egɔme ɖe?
3 Mawu ƒe Nya ɖe nusi naa ame dzena be wòanye nyanyuigbeƒãɖela vavã la me. Gbɔgbɔ ʋã apostolo Paulo wòŋlɔ bena: “Menye bena [míedze bliboe, NW] le mía ɖokui si, be míasusu nane abe mía ŋutɔwo mía ɖokui mee wòtso ene o; ke [míaƒe dzedze bliboe] la tso Mawu gbɔ boŋ, amesi hã wɔ mí [míedze bliboe] be, míanye . . . subɔlawo.” (Korintotɔwo II, 3:5, 6) De dzesi nyagbɔgblɔ si wozã zi etɔ̃ sɔŋ le afisia—be “míedze bliboe.” Egɔme ɖe? Vine’s Expository Dictionary of Biblical Words gblɔ be: “Ne nuwo ŋue wogblɔe le la, [Helagbe me nya sia] fia ‘alesi dze’ . . . ; ne amewo ŋue wogblɔe le la, efia be ‘esu te,’ ‘edze.’ ” Eyata amesi “dze bliboe” la bi eye wòsu te, awɔ dɔ si wode asi nɛ. Ẽ, nyanyuia ƒe subɔla vavãwo dze awɔ dɔ sia. Wobi, wosu te, alo wodze aɖe gbeƒã.
4. (a) Aleke Paulo ƒe kpɔɖeŋua fia be menye ame tiatia ʋɛ aɖewo koe dze na Kristotɔwo ƒe subɔsubɔdɔa wɔwɔ o? (b) Mɔ etɔ̃ kawo dzie Yehowa tona naa míedzena nyea subɔlawo?
4 Gake ameka gbɔe dzedze sia tso? Ame ŋutɔ ƒe ŋutetewo mee wòtsoa? Nunyanya ade ŋgɔ gbɔe wòtsoa? Nu tɔxɛ aɖewo sɔsrɔ̃ le suku xɔŋkɔwo mee nanaa? Edze ƒã be ɖoƒe siawo katã nɔ apostolo Paulo si. (Dɔwɔwɔwo 22:3; Filipitɔwo 3:4, 5) Ke hã elɔ̃ ɖe edzi ɖokuibɔbɔtɔe be yeƒe dzedze anye subɔla tso Yehowa Mawu gbɔ, metso suku kɔkɔwo dede me o. Ame tiatia ʋɛ aɖewo koe dze le mɔ sia nua? Paulo ŋlɔ nu tso “míaƒe dzedze bliboe” la ŋu ɖo ɖe Korinto-hamea. Ema fia be Yehowa kpɔa egbɔ be esubɔla wɔnuteƒewo katã su te, be woate ŋu awɔ dɔ si yede wo si. Aleke Yehowa naa Kristotɔ vavãwo dzena egbeae? Mina míadzro mɔ etɔ̃ siwo dzi wòtona me: (1) eƒe Nya, (2) eƒe gbɔgbɔ kɔkɔea, kple (3) eƒe anyigba dzi habɔbɔa.
Yehowa ƒe Nya Naa Míedzena
5, 6. Ŋusẽ kae Ŋɔŋlɔ Kɔkɔeawo kpɔna ɖe Kristotɔ vavãwo dzi?
5 Gbã la, aleke Mawu ƒe Nya naa míedzena nyea subɔlawo? Paulo ŋlɔ bena: “Ŋɔŋlɔ sia ŋɔŋlɔ, si tso Mawu ƒe [gbɔgbɔ] me la, enyo hã na nufiafia, na mokaka, na ɖɔɖɔɖo, na amehehe, si le dzɔdzɔenyenye me, bene Mawu ƒe ame la [nasu te blibo, NW ] eye wòanɔ dzadzraɖoɖi hena dɔ nyui sia dɔ nyui wɔwɔ.” (Timoteo II, 3:16, 17) Eyata Ŋɔŋlɔ Kɔkɔeawo ate ŋu ana ‘míasu te blibo, eye míanɔ dzadzraɖoɖi’ awɔ “dɔ nyui” si nye Mawu ƒe Nya la fiafia amewo ade goe. Ke amesiwo katã nye Kristodukɔa ƒe sɔlemehawo me tɔwo ya ɖe? Biblia le wo si. Aleke agbalẽ ɖeka aɖe ate ŋu akpe ɖe ame aɖewo ŋu woanye subɔla bibiwo eye mate ŋu akpe ɖe ame bubuwo ya ŋu o? Nɔnɔme si le mía si ɖe Biblia ŋu ŋue wòku ɖo.
6 Nublanuitɔe la, sɔlemedela geɖe mexɔa Biblia ƒe gbedasi be enye “Mawu ƒe nya vavã” o. (Tesalonikatɔwo I, 2:13) Kristodukɔa ƒe nuwɔna le go sia me menya se kura o. Le sɔlemehakplɔlawo ƒe ƒe geɖe tsɔtsɔ de mawunyasrɔ̃sukuwo megbe la, ɖe wosu te bliboe anye Mawu ƒe nya fialawoa? Kura o. Sukua delawo dometɔ aɖewo xɔ Biblia dzi se hafi yi osɔfosukua gake wova zua Biblia dzi maxɔselawo ne wowu enu! Le esia megbe la, le esi teƒe be woaɖe gbeƒã Mawu ƒe Nya—si dzi wo dometɔ geɖe megaxɔ se kple dzi blibo o—la, wotrɔa woƒe subɔsubɔdɔa ɖe nu bubuwo ŋu, va nɔ nu dem dunyahenyawo me, heva léa nusi wobe enye hadomekpekpeɖeŋunana me ɖe asi goŋgoŋ, alo nɔa gbe tem ɖe xexe sia me nunya dzi le woƒe mawunyagbɔgblɔ me. (Timoteo II, 4:3) To vovo na esia la, Kristotɔ vavãwo ya srɔ̃a Yesu Kristo ƒe kpɔɖeŋu.
7, 8. Aleke Yesu ƒe nɔnɔme ɖe Mawu ƒe Nya la ŋu to vovo tso eŋɔlime subɔsubɔhakplɔlawo tɔ gbɔe?
7 Yesu meɖe mɔ eŋɔlime subɔsubɔhakplɔlawo kpɔ ŋusẽ ɖe eƒe tamesusu dzi o. Eɖanye ameha sue aɖe, abe eƒe apostolowo ene, alo ameha gãe Yesu le nu fiamee o, ewɔa Ŋɔŋlɔ kɔkɔeawo ŋudɔ nyuie. (Mateo 13:10-17; 15:1-11) Eƒe nuwɔna sia na wòto vovo tso subɔsubɔhakplɔla siwo nɔ anyi ɣemaɣi gbɔ. Womedea dzi ƒo na ame tsɛwo le go aɖeke me be woaku Mawu ƒe nu goglowo me akpɔ o. Le nyateƒe me la, enye nusi bɔ be nufiala si nɔ anyi le ŋkeke mawo me nagblɔ be Ŋɔŋlɔa ƒe akpa aɖewo me goglo akpa be yeadzro eme kple amesi menye yeƒe nusrɔ̃vi vevi o—eye ema hã negbe ɖeko yeabɔbɔ gbe ahatsyɔ nu ta ko hafi. Aʋatsodzixɔse si nɔ subɔsubɔhakplɔla mawo si ku ɖe Mawu ƒe ŋkɔ yɔyɔ ŋu tɔgbee nɔ wo si ɖe Biblia ƒe akpa aɖewo me dzodzro ŋu!
8 Kristo menɔ nenema o. Exɔe se be ehiã be amewo katã nade ŋugble le ‘nya sia nya, si dona tsoa Mawu ƒe nu me la ŋuti,’ ke menye ame ʋɛ aɖewo ko o. Menye Ŋɔŋlɔa nyala tiatia aɖewo si mee Yesu tsɔ sidzedze ƒe safuia dee o. Egblɔ na eƒe nusrɔ̃lawo be: “Nusi gblɔm mele na mi le viviti me la, migblɔe le kekeli me, eye nusi ke sem miele ɖe to me la, miɖe gbeƒãe le xɔwo ta me.” (Mateo 4:4; 10:27) Yesu di vevie be yeagblɔ Mawu ŋuti sidzedze na ame gbogbowo ŋutɔ alesi wòanya wɔe.
9. Aleke Kristotɔ vavãwo zãa Bibliae?
9 Mawu ƒe Nya dzie wòle be míatu míaƒe nufiafia ɖesiaɖe ɖo. Le kpɔɖeŋu me, ne míele nuƒo ƒom le Fiaɖuƒe Akpata me la, nu geɖe hiã wu be míatia mawunyakpukpui aɖewo tso Biblia me ahaxlẽ dzaa ko. Ahiã be míaɖe Ŋɔŋlɔawo me, awɔ kpɔɖeŋuwo, ahafia mɔ siwo nu míate ŋu awɔ wo ŋudɔe le. Míaƒe taɖodzinue nye be míaɖe Biblia ƒe gbedasia tso agbalẽ si dzi wotae ɖo dzi ade míaƒe nyaselawo ƒe dzi me. (Nexemya 8:8, 12) Ele hã be woazã Biblia ne ehiã be woaɖo aɖaŋu na ame aɖe alo ana tohehee. Togbɔ be Yehowa ƒe amewo doa gbe vovovowo hetso teƒe vovovowo hã la, mí katã míedea bubu agbalẽ si ƒo agbalẽwo katã ta—si nye Biblia—ŋu.
10. Ŋusẽ kae Biblia ƒe gbedasi si tso gbɔgbɔ me la ate ŋu akpɔ ɖe mía dzi?
10 Ne míewɔ Biblia ƒe gbedasia ŋudɔ le bubumɔ sia nu la, ŋusẽ nɔa eŋu. (Hebritɔwo 4:12) Eʋãa amewo be woawɔ tɔtrɔwo, abe matrewɔwɔ, ahasiwɔwɔ, trɔ̃subɔsubɔ, ahamumu, kple fififi ene, le woƒe agbe me. Ekpe ɖe ame gbogbo aɖewo ŋu be woɖe amenyenye xoxoa ɖi hedo yeyea. (Efesotɔwo 4:20-24) Ẽ, ne míede bubu Biblia ŋu wu amegbetɔ ƒe nukpɔsusu alo kɔnyinyi ɖesiaɖe hewɔ eŋudɔ nuteƒewɔwɔtɔe la, ate ŋu ana míasu te bliboe anye Mawu ƒe Nya fialawo.
Yehowa ƒe Gbɔgbɔ Naa Míedzena
11. Nukatae woyɔ Yehowa ƒe gbɔgbɔ kɔkɔea be “nyaxɔɖakɔla” wòsɔ?
11 Evelia, mina míadzro akpa si Yehowa ƒe gbɔgbɔ kɔkɔe, alo dɔwɔŋusẽ, wɔna le mía dzadzraɖo be míasu te bliboe me. Mele be míaŋlɔ be gbeɖe be Yehowa ƒe gbɔgbɔae nye ŋusẽ gãtɔ kekeake si li o. Yehowa na ŋusẽ Via malɔ̃nugbɔa be wòazã ŋusẽ gã ma ɖe Kristotɔ vavãwo katã nu. Ekema esɔ be Yesu yɔ gbɔgbɔ kɔkɔea be “nyaxɔɖakɔla.” (Yohanes 16:7) Exlɔ̃ nu eyomedzelawo be woabia gbɔgbɔ ma Yehowa, heka ɖe edzi na wo be Yehowa ana wo faa.—Luka 11:10-13; Yakobo 1:17.
12, 13. (a) Nukatae wòle vevie be míado gbe ɖa abia gbɔgbɔ kɔkɔea be wòakpe ɖe mía ŋu le míaƒe subɔsubɔdɔa me? (b) Aleke Farisitɔwo ɖee fia be gbɔgbɔ kɔkɔea menɔ dɔ wɔm le wo me o?
12 Ele be míado gbe ɖa abia gbɔgbɔ kɔkɔea gbesiagbe, vevietɔ be wòakpe ɖe mía ŋu le míaƒe subɔsubɔdɔa me. Ŋusẽ kae dɔwɔŋusẽ ma kpɔna ɖe mía dzi? Ate ŋu akpɔ ŋusẽ ɖe míaƒe susu kple dzi dzi, akpe ɖe mía ŋu be míawɔ tɔtrɔ, be míatsi, eye be míaɖe amenyenye xoxoa ɖi ado yeyea. (Kolosetɔwo 3:9, 10) Ate ŋu akpe ɖe mía ŋu míatu Kristo ƒe nɔnɔme xɔasiwo ɖo. Mía dometɔ geɖe ate ŋu agblɔ Galatiatɔwo 5:22, 23 me nyawo tso tame. Woyɔ Mawu ƒe gbɔgbɔa ƒe kutsetsewo le kpukpui mawo me. Gbãtɔe nye lɔlɔ̃. Nɔnɔme sia hiã vevie le míaƒe subɔsubɔdɔa me. Nukatae?
13 Lɔlɔ̃e nye ameʋãnu gãtɔ. Lɔlɔ̃ na Yehowa kple na wo havi ʋãa Kristotɔ vavãwo be woagblɔ nyanyuia. (Marko 12:28-31) Lɔlɔ̃ sia manɔmee la, míate ŋu adze ŋutɔŋutɔ anye Mawu ƒe Nya fialawo o. De dzesi vovototo si nɔ Yesu kple Farisitɔwo dome. Mateo 9:36 gblɔ le Yesu ŋu be: “Ke esi wòkpɔ amehawo la, eƒe dɔme trɔ ɖe wo ŋuti; elabena woƒe lãme gbɔdzɔ, eye woka hlẽ abe alẽ, siwo kplɔla meli na o la ene.” Aleke Farisitɔwo se le wo ɖokui me le ame tsɛwo ŋu? Wogblɔ be: ‘Ameha sia, si mele se la me nyam o la, koe le wo ŋuɖinu wɔm.’ (Yohanes 7:49) Lɔlɔ̃ aɖeke menɔ Farisitɔ mawo me na ameawo o, ke vlodoamewo sɔŋ boŋ. Edze ƒã be Yehowa ƒe gbɔgbɔ menɔ dɔ wɔm le wo me o.
14. Aleke wòle be alesi Yesu ɖe lɔlɔ̃ fia le eƒe subɔsubɔdɔa me naʋã míi?
14 Yesu ƒe dɔme trɔ ɖe amewo ŋu. Enya nu tso woƒe nuxaxawo ŋu. Enya be wodo vlo wo, woka wo hlẽ abe alẽ siwo kplɔla meli na o la ene. Yohanes 2:25 gblɔ na mí be Yesu “[nya] nusi le ame me.” Esi Yesu nye Yehowa ƒe Dɔnunɔla esime wònɔ nuwo wɔm ta la, amegbetɔ ƒe dzɔdzɔme ŋuti gɔmesese deto le esi. (Lododowo 8:30, 31) Gɔmesese ma na eƒe lɔlɔ̃ de to ɖe edzi. Neva eme be lɔlɔ̃ sia nanye nusi aʋã mí ɣesiaɣi le míaƒe gbeƒãɖeɖedɔa wɔwɔ me! Ne míese le mía ɖokui me be míate ŋu awɔ ŋgɔyiyi le go sia me la, mina míado gbe ɖa abia Yehowa ƒe gbɔgbɔ kɔkɔea ahawɔ nu wòasɔ ɖe míaƒe gbedodoɖawo nu. Yehowa aɖo eŋu na mí. Aɖo eƒe ŋusẽ si nu womate ŋu atsi o la ɖa be wòakpe ɖe mía ŋu míanɔ abe Kristo ene, amesi dze wu be wòaɖe gbeƒã nyanyuia.
15. Aleke Yesaya 61:1-3 me nyawo ku ɖe Yesu ŋu eye wògaklo nu le agbalẽfialawo kple Farisitɔwo dzi le ɣeyiɣi ma ke me?
15 Afikae Yesu ƒe dzedzea tso? Egblɔ be ‘Yehowa ƒe gbɔgbɔ le ye dzi.’ (Luka 4:17-21) Ẽ, Yehowa ŋutɔe tsɔ gbɔgbɔ kɔkɔea ɖo Yesue. Yesu mehiã ɖaseɖigbalẽ aɖeke kpee o. Gbɔgbɔ kɔkɔeae wotsɔ ɖo subɔsubɔhaŋgɔnɔla siwo nɔ anyi le eƒe ŋkekea mea? Ao. Eye womedze ne Yesaya 61:1-3 ƒe nyagblɔɖi, si Yesu xlẽ wose hetsɔe sɔ kple eɖokui la, nava eme ɖe wo dzi o. Taflatse wò ŋutɔ xlẽ mawunyakpukpui mawo, ne nàkpɔ be agbalẽfiala kple Farisitɔ alakpanuwɔlawo medze kura o. Nyanyui aɖeke menɔ wo si woagblɔ afia ame dahewo o. Ekema aleke woate ŋu aɖe gbeƒã ɖokuisinɔnɔ na aboyomewo kple nukpɔkpɔ na ŋkuagbãtɔwoe? Le gbɔgbɔmegɔmesese nu la, woa ŋutɔwo ƒe ŋkuwo gbã eye amegbetɔ ƒe kɔnyinyiwo ɖe aboyo wo! To vovo na ame mawo la, ɖe míawo míedze afia nu amewoa?
16. Kakaɖedzi kae ate ŋu anɔ Yehowa ƒe amewo si ku ɖe woƒe dzedze anye subɔlawo ŋu?
16 Enye nyateƒe be míede Kristodukɔa ƒe suku kɔkɔwo o. Menye mawunyafiafia ƒe osɔfosuku aɖekee ɖo mí nufialawoe o. Eyata ɖe míedze oa? Menye nenemae kura o! Yehowa ɖo mí eƒe Ðasefowoe. (Yesaya 43:10-12) Ne míedo gbe ɖa bia eƒe gbɔgbɔa hewɔ nu le ɖekawɔwɔ me kple míaƒe gbedodoɖa la, dzedze si ƒo ɖesiaɖe ta sua mía si. Ele eme baa be míenye ame madeblibowo eye míagogo Nufiala Gã, Yesu Kristo, ƒe kpɔɖeŋuawo kura o ya. Ke hã, ɖe míedaa akpe be Yehowa zãa eƒe gbɔgbɔa tsɔ naa míedzena hedzraa mí ɖo míenyea eƒe Nya fialawo oa?
Yehowa ƒe Habɔbɔa Nana Míedzena
17-19. Aleke kpekpe atɔ̃ si Yehowa ƒe habɔbɔa na míewɔna kwasiɖa sia kwasiɖa kpe ɖe mía ŋu míedze anye subɔlawo?
17 Azɔ mina míadzro mɔ etɔ̃lia si nu Yehowa dzraa mí ɖo le míenyea eƒe nyaa fialawo la me—si nye eƒe anyigba dzi hamea, alo habɔbɔa, si naa hehe mí be míanye subɔlawo. Le mɔ ka nu? Wò ya bu nufiame siwo míexɔna ƒe ɖoɖowo ŋu kpɔ ko! Míedea Kristotɔwo ƒe kpekpe atɔ̃ le kwasiɖa ɖesiaɖe me. (Hebritɔwo 10:24, 25) Míeƒoa ƒu le Hame ƒe Agbalẽ me Nusɔsrɔ̃a me hezãa agbalẽ si Yehowa ƒe habɔbɔa na tsɔ srɔ̃a Biblia wòdea to. Ne míeɖo to heɖo nya ŋu la, míesrɔ̃a nu tso mía nɔewo gbɔ hedea dzi ƒo na mía nɔewo. Agbalẽ me nusɔsrɔ̃ dzikpɔla hã fiaa nu mía dometɔ ɖesiaɖe henaa kpekpeɖeŋu mí. Míexɔa gbɔgbɔmenuɖuɖu dami bubuwo le Dutoƒo Kpekpea kple Gbetakpɔxɔ Nusɔsrɔ̃a me.
18 Wotrɔ asi le míaƒe Teokrasi Subɔsubɔ Sukua ŋu be míaxɔ nufiafia ŋuti mɔfiame tso eme. Le sukuviwo ƒe dɔdasiwo dzadzraɖo me la, míesrɔ̃a alesi míawɔ Mawu ƒe Nya ŋudɔ le nyati vovovowo fiafia mee. (Petro I, 3:15) Edzɔ kpɔ be wode dɔ asi na wò tso nyati aɖe si dze nyati nyanyɛe ŋu, eye kaka nàkpɔa, èsrɔ̃ nu yeyewo le emea? Edzɔna ɖe amesiame dzi. Naneke menaa sidzedze si le mía si le nyati aɖe ŋu dzina ɖe edzi wu efiafia ame bubuwo o. Ne dɔ mele mía ŋutɔwo si míawɔ le kplɔ̃a ta o hã la, míesrɔ̃a alesi míanye nufiala nyuiwoe godoo. Míekpɔa nɔnɔme nyuiwo le sukuvi ɖesiaɖe ŋu, eye míebua alesi míasrɔ̃ nɔnɔme mawoe ŋu.
19 Wotrɔ asi le Subɔsubɔ Kpekpea hã ŋu be wòadzra mí ɖo míanye Mawu ƒe Nya fialawo. Kwasiɖa ɖesiaɖe la, míesea nuƒo, numedzodzro, hekpɔa wɔwɔfia vivi siwo wodzra ɖo ku ɖe míaƒe subɔsubɔdɔa ŋu. Ðaseɖinya kae míazã? Aleke míawɔ nui ɖe kuxi tɔxɛ siwo le míaƒe dutoƒosubɔsubɔdɔa me ŋu? Gbeƒãɖeɖemɔnu kawoe ʋu ɖi na mí siwo ŋudɔ wòahiã be míawɔ? Nukawoe akpe ɖe mía ŋu míanye nufiala bibiwo ne míele tɔtrɔyiwo kple Biblia-nusɔsrɔ̃wo wɔm? (Korintotɔwo I, 9:19-22) Wodzroa biabia siawo me tsitotsito le Subɔsubɔ Kpekpea me. Wotu kpekpea ƒe akpa geɖe ɖe Míaƒe Fiaɖuƒe Subɔsubɔdɔ, si nye dɔwɔnu bubu si wonana tsɔ dzraa mí ɖoe ɖe dɔ vevi sia wɔwɔ ŋu, la me nyatiwo dzi.
20. Aleke míate ŋu aɖe vi tso kpekpewo kple takpekpewo me bliboe?
20 Ne míedzra ɖo ɖe míaƒe kpekpeawo ŋu eye míede wo hewɔ nusiwo míesrɔ̃ ŋudɔ le míaƒe nufiafiadɔa me la, enyea hehexɔxɔ deto aɖe na mí. Gake geɖe gali. Kpekpe siwo lolo wu hã le mía si—siwo nye nutome sue kple nutome gã takpekpewo—siwo ŋu wotrɔ asi le be wòadzra mí ɖo míanye Mawu ƒe Nya fialawo. Eye aleke míele mɔ kpɔm be míaɖo to nyuie ahatsɔ aɖaŋuɖoɖo siwo míaxɔ awɔ dɔe enye si!—Luka 8:18.
21. Kpeɖodzi kae ɖee fia be hehe siwo míexɔ la ɖe vi, eye amekae dze na kafukafua?
21 Ðe hehe si Yehowa na la le vi ɖema? Mina kpeɖodziawo ŋutɔ naɖe wo ɖokui nu. Wokpena ɖe ame akpe alafa geɖewo ŋu ƒe sia ƒe be woasrɔ̃ Biblia ƒe gɔmedzenufiafiawo ahanɔ agbe ɖe nusi Mawu di tso wo si nu. Míaƒe xexlẽme le dzidzim ɖe edzi, gake mía dometɔ aɖeke mate ŋu agblɔ be yee dze na kafukafua o. Alesi tututu nyaa le ko la, nenemae míatsɔe, abe alesi Yesu wɔe ene. Egblɔ be: “Ame aɖeke mate ŋu ava gbɔnye o, ne menye Fofo, si dɔm ɖa lae hee vɛ o.” Abe alesi wònɔ le apostolo siwo nɔ anyi le blema gome ene la, mía dometɔ akpa gãtɔ mede suku kɔkɔwo o. (Yohanes 6:44; Dɔwɔwɔwo 4:13) Yehowa, amesi hea dzianukwaretɔwo vaa nyateƒea gbɔ dzie míaƒe dzidzedzekpɔkpɔ nɔ te ɖo. Paulo gblɔe nyuie be: “Nye la medo nu, eye Apolo de tsii, ke Mawue nana wotsina nyuie.”—Korintotɔwo I, 3:6.
22. Nukatae mele be dzi naɖe le mía ƒo tso gomekpɔkpɔ le Kristotɔwo ƒe subɔsubɔdɔa me bliboe ŋu o?
22 Ẽ, Yehowa Mawu le akpa vevi aɖe wɔm le eƒe Nya fiafiadɔ si wɔm míele la me. Menye ɣesiaɣie míase le mía ɖokui me be míedze anye nufialawo o. Gake ɖo ŋku edzi be Yehowae hea amewo vaa eɖokui kple Via gbɔe. Yehowae toa eƒe Nya, eƒe gbɔgbɔ kɔkɔea, kple eƒe anyigba dzi habɔbɔa dzi naa míedzena nyea subɔlawo. Mina míayi edzi axɔ Yehowa ƒe amehehe to nu nyui siwo nam wòle fifia be yeatsɔ adzra mí ɖo míasu te bliboe anye Mawu ƒe Nya fialawo la ŋudɔwɔwɔ me!
Aleke Nàɖo Wo Ŋui?
• Aleke Biblia dzraa mí ɖo ɖe gbeƒãɖeɖedɔa ŋui?
• Akpa kae gbɔgbɔ kɔkɔea wɔna le nana be míadze anye subɔlawo me?
• Mɔ kawo nue Yehowa ƒe anyigba dzi habɔbɔa kpe ɖe ŋuwò be nèdze anye nyanyuia ƒe gbeƒãɖela le?
• Nukatae wòle be kakaɖedzi nanɔ mía si ne míele subɔsubɔdɔa wɔm?
[Biabiawo]
[Nɔnɔmetata si le axa 25]
Yesu nye Mawu ƒe Nya fiala si ɖe lɔlɔ̃ fia amewo