“Esia Ya Vena”

ÈSE nya mawo kpɔa? Ðewohĩ ɖɔkta alo dɔnɔdzikpɔla aɖee gblɔ wo hafi do atike si wobia tso esi la na wò.

Anɔ eme be mègbe be woagado atikea na ye o kple susu be yeaƒo asa na veve si yease ta ko o. Ke boŋ ènɔ te ɖe vevesesea nu kple susu be yeava kpɔ lãmesẽ le etsɔme. Ɣeaɖewoɣi ne dɔ sesẽwo lé ame la, atike vevewo xɔxɔ alo wo gbegbe ate ŋu anye agbe kple ku ƒe nya.

Togbɔ be menye ɣesiaɣie wòabia be dɔdalawo nakpɔ míagbɔ o hã la, mí katã míenye amegbetɔ madeblibowo eye míate ŋu agbe amehehe, alo ɖɔɖɔɖo, siwo dometɔ aɖewo vena ɣeaɖewoɣi la xɔxɔ o. (Yeremya 10:23) Esi Biblia nɔ gbe tem ɖe alesi esia hiãe le ɖeviwo gome dzi la, egblɔ be: “Ne bometsitsi bla ɖe ŋutsuvi ƒe dzi ŋu la, ameƒoti afee ɖa le afima.”—Lododowo 22:15.

Le go sia me la, ameƒotia nye ŋusẽ si le dzilawo si ƒe dzesi. Enye nyateƒe be ɖevi ʋɛ aɖewo koe lɔ̃a amehehe. Ne ebia tohehe aɖe ƒomevi la, wote ŋu doa dziku ɖe eŋu. Gake dzila nyanu siwo si lɔlɔ̃ le medaa susu ɖe veve si ɖevia ase dzi o, boŋ ɖe viɖe si wòava kpɔ emegbe dzi. Dzila Kristotɔ nyae be nyateƒee Mawu ƒe Nya la to esime wògblɔ be: “Le fifi ɣeyiɣi me la míebua tohehe katã dzidzɔe o, ke veve boŋ; gake emegbe la etsɔa dzɔdzɔenyenye ƒe ŋutifafakutsetse na amesiwo wòmã la.”—Hebritɔwo 12:11; Lododowo 13:24.

Le nyateƒe me la, menye ɖeviwo ɖeɖe koe hiã na amehehe o. Ame tsitsiwo hã hiã nɛ. Ame tsitsiwoe Biblia nɔ nu ƒom na esime wògblɔ be: “Lé amehehe ɖe asi sesĩe, megage le asiwò o, dzɔ eŋu, elabena wò agbee wònye.” (Lododowo 4:13) Ẽ, nunyalawo—ɖeviwo kple ame tsitsiwo—siaa axɔ amehehe si wotu ɖe Mawu ƒe Nya, Biblia, dzi, elabena esia wɔwɔ akpɔ woƒe agbe ta mlɔeba.