‘Míaƒe Lɔlɔ̃ Gade To Ðe Edzi’

LE Fiɖa, March 31, 2000, dzi la, Dzoto aɖe si woyɔna be Usu, si le Hokkaido, Japan, wó le anyinɔnɔ kpoo ƒe 23 megbe. Eƒoe ɖe afima nɔla akpe geɖe nu be woasi le afɔkuteƒea. Ame geɖe ƒe aƒewo kple dɔwɔɖuiwo bu, gake dzidzɔtɔe la, wo dometɔ aɖeke meku o. Yehowa Ðasefo 46 hã nɔ sisilawo dome, gake womebu mɔkpɔkpɔ o.

Le ŋkeke si tututu dzi toa wó la, Kristotɔ dzikpɔla mɔzɔla aɖe si nɔ subɔsubɔm le nuto ma me na wowɔ ɖoɖo ɖe kpekpeɖeŋunana ŋu. Eteƒe medidi o, kpekpeɖeŋunanuwo te vava tso hame siwo te ɖe nutoa me gbɔ. To alɔdzedɔwɔƒe si le Japan ƒe mɔfiafia te la, woɖo kpekpeɖeŋunakɔmiti enumake, eye Yehowa Ðasefo siwo le Japan katã ɖo nunana geɖe ɖa. Woɖo Yehowa Ðasefowo ƒe ɣeyiɣiawo katã ƒe subɔlawo ɖe hame siwo ŋu nu gblẽ le wu la be woava do alɔ woƒe gbɔgbɔmedɔwo, eye woƒe nutome sue dzikpɔla yi teƒea edziedzi ɖasrã wo kpɔ be wòado ŋusẽ wo le seselelãme kple gbɔgbɔ me.

Ðasefo siwo le nuto si me afɔkua dzɔ le la yi edzi wɔ woƒe Kristotɔwo ƒe kpekpewo le aƒe siwo le dedienɔƒe wu me le ɣeyiɣi sesẽ ma me. Esi woɖe mɔ be woagate ŋu atrɔ ayi nuto si me woʋu le si nye afisi Fiaɖuƒe Akpataa nɔ la, nɔviawo kpɔ be xɔa vĩa, gliawo fe, eye wògblẽ. Dzoto yeye aɖe si ganɔ dzudzɔ tum kɔlikɔli gbɔ medidi tso Fiaɖuƒe Akpata gbɔ o. Ðasefoawo bia wo ɖokui be, ‘Ðe wòanye nusi me nunya le be míaganɔ kpekpewo wɔm le afisia? Ðe míagate ŋu adzra Fiaɖuƒe Akpataa ɖoa?’

Wotso nya me be yewoatu Fiaɖuƒe Akpata yeye ɖe teƒe si le dedie si gbɔ medidi o. Nutome Xɔtukɔmiti na kpekpeɖeŋu siwo hiã. Ga si Ðasefo siwo le dukɔa me godoo dzɔ lae wozã ɖe xɔtudɔ sia ŋu. Woƒle anyigba enumake, eye to lɔlɔ̃nufaa dɔwɔla alafa nanewo ƒe kpekpeɖeŋu me la, wowu Fiaɖuƒe Akpata yeyea tutu nu le ɣeyiɣi kpui aɖe me. Le Kwasiɖa, July 23, 2000, dzi la, ame 75 ye de kpekpe gbãtɔ si wowɔ le Fiaɖuƒe Akpa yeye si wotu la me. Kpekpea valawo dometɔ geɖe fa dzidzɔvi. Esime wonɔ Fiaɖuƒe Akpataa ŋu kɔm le ƒe ma ke ƒe October me la, eʋã hamemegã aɖe si le hamea me wògblɔ be: “Toa ƒe wowó he nɔnɔme sesẽ kple fukpekpewo vɛ. Gake xɔ sia tutu trɔ míaƒe vɔvɔ̃ wòzu dzidzɔ. Míaƒe lɔlɔ̃ na Yehowa kple na nɔvi Kristotɔ lɔlɔ̃tɔwo gade to ɖe edzi!”

[Nɔnɔmetata Tsoƒe si le axa 19]

Eruption of Mount Usu: AP Photo/Koji Sasahara