Nukatae Wotsrɔ̃ Blema Xexeame?

MENYE dzɔdzɔmefɔkue xexeame katã ƒe Tsiɖɔɖɔa nye o. Enye ʋɔnudɔdrɔ̃ si tso Mawu gbɔ. Wona nuxlɔ̃ame, gake ame akpa gãtɔ ŋe aɖaba ƒu edzi. Nukatae? Yesu ɖe eme be: “Le ŋkeke, si dze ŋgɔ na tɔɖɔɖɔ me, wole nu ɖum, eye wole nu nom, wole srɔ̃ ɖem, eye wole wo tsɔm na, bena woaɖe, vaseɖe ŋkeke, si dzi Noa yi ɖe aɖakaʋua me, eye womedze sii o, vaseɖe esime tɔɖɔɖɔ va, eye wòkplɔ wo katã yii.”—Mateo 24:38, 39.

Ŋkuʋuʋu aɖe si Kpɔ Dzidzedze

Le go aɖewo me la, ŋkuʋuʋu si nɔ anyi do ŋgɔ na Tsiɖɔɖɔa dze edzi le nu vovovo aɖewo gome, siwo mele mía si egbea o. Le kpɔɖeŋu me, ameƒomea katã do gbegbɔgblɔ ɖeka. (Mose I, 11:1) Esia ate ŋu ana woawɔ ŋgɔyiyi geɖe le aɖaŋudɔwo kple dzɔdzɔmeŋutinunyawo me si abia ame geɖewo ƒe agbagbadzedze kple woƒe aɖaŋu vovovoawo tsɔtsɔ ƒo ƒui. Azɔ hã, agbe didi si ame akpa gãtɔ nɔ ɣemaɣi fia be woate ŋu ayi edzi atu nusiwo wosrɔ̃ le ƒe alafa siwo va nɔ yiyim me la ɖe edzi.

Ame aɖewo gblɔ be menye ɖe agbe si amewo nɔ ɣemaɣi la didi nenema gbegbe o eye be ɣletiwoe ƒe siwo woyɔ le Biblia me nuŋlɔɖiawo me la nye. Ðe ema nye nyateƒea? De ŋugble le Mahalalel ŋu kpɔ. Biblia gblɔ be: “Esi Mahalalel xɔ ƒe blaade vɔ atɔ̃ la, edzi Yered. . . . Mahalalel ƒe agbe me ŋkekewo katã nye ƒe alafa enyi kple blaasieke vɔ atɔ̃, eye wòku.” (Mose I, 5:15-17) Ne ƒe ɖeka fia ɣleti ɖeka la, ke ƒe atɔ̃ koe Mahalalel xɔ esime wòdzi viŋutsuvi!  Kpao, amesiwo nɔ agbe ɣemaɣi te ɖe blibodede si nɔ ŋutsu gbãtɔ, Adam, si la ŋu. Wonɔ agbe ƒe alafawo ŋutɔŋutɔ. Nukawoe wote ŋu wɔ?

Ƒe alafa geɖewo do ŋgɔ na Tsiɖɔɖɔa la, anyigbadzinɔlawo va sɔ gbɔ ale gbegbe be Adam viŋutsu Kain te ŋu tso du, si wòna ŋkɔe be Henox. (Mose I, 4:17) Le ƒe siwo do ŋgɔ na Tsiɖɔɖɔa me la, woɖo dɔ vovovowo wɔƒewo. ‘Dɔwɔnu ɖesiaɖe si wotsɔa akɔbli kple gayibɔ tunɛ la’ tuƒewo nɔ anyi. (Mose I, 4:22) Ðikeke mele eme o be wozã dɔwɔnu siawo le xɔtutu, atikpakpa, nutɔtɔ, kple agbledede me. Woyɔ dɔ siawo katã le anyigbadzinɔla gbãtɔwo ŋuti nuŋlɔɖiwo me.

Sidzedze gbogbo si wotu ɖoe anya wɔe be wònɔ bɔbɔe na dzidzime siwo kplɔe ɖo be wobi ɖe gakpoŋutinunya, nukugbledede, alẽwo kple nyihawo nyinyi, nuŋɔŋlɔ, kple nutata me. Le kpɔɖeŋu me, Yubal “nye saŋkuƒolawo kple dzekulawo fofo.” (Mose I, 4:21) Ŋkuʋuʋua de ŋgɔ ŋutɔ. Gake nusianu va nuwuwu zi ɖeka le vome. Nukae dzɔ?

Nukae Gbɔe Wòtso?

Togbɔ be nuwo dze edzi na amesiwo nɔ anyi do ŋgɔ na Tsiɖɔɖɔa hã la, nuwo dze egɔme le mɔ gbegblẽ nu. Ameƒomea gɔmeɖoanyila, Adam, nye aglãdzela ɖe Mawu ŋu. Kain, si nye du gbãtɔ tsola la, wu eya ŋutɔ nɔviaŋutsu. Eyata mewɔ nuku o be vɔ̃ɖivɔ̃ɖi dzi ɖe edzi kabakaba! Domenyinu gbegblẽ si Adam gblẽ ɖi na eƒe dzidzimeviwo me tsonuwo nɔ dzidzim ɖe edzi.—Romatɔwo 5:12.

Edze ƒã be nuwo va nɔ eme gbɔm esime Yehowa ɖoe be ƒe 120 koe yeaɖe mɔ le nɔnɔmea ŋu wòaganɔ anyi. (Mose I, 6:3) Biblia gblɔ be: “Amegbetɔwo ƒe vɔ̃ɖivɔ̃ɖi va sɔ gbɔ le anyigba dzi, eye woƒe tamesusuwo kple dzimedidiwo nye vɔ̃ ko ɖaa. . . . Nuvlowɔwɔ xɔ anyigba la dzi.”—Mose I, 6:5, 11.

Mlɔeba la, Mawu gblɔ na Noa kaŋ be yeatsrɔ̃ ŋutilãwo katã le tsiɖɔɖɔ aɖe me. (Mose I, 6:13, 17) Togbɔ be Noa va zu “dzɔdzɔenyenye ƒe gbeƒãɖela” hã la, edze ƒã be esesẽ na amewo be woaxɔe ase be nusianu si ƒo ɣla yewo la awu enu. (Petro II, 2:5) Ame enyi koe wɔ ɖe nuxlɔ̃amea dzi eye wokpɔ wo ta. (Petro I, 3:20) Nukatae nusia le vevie na mí egbea?

Gɔmesese Kae le Eŋu na Mí?

Míele ɣeyiɣi siwo sɔ kple Noa tɔ me. Míesea ŋɔdzidonamelawo ƒe nuvlowɔwɔ dziŋɔwo, ameƒomevi aɖewo tsɔtrɔ̃, tudada ame gbogbo aɖewo le tameɖoɖo maɖɔʋu aɖe ko ta, kple ŋutasesẽnuwɔna wɔmoya siwo yia edzi le aƒeme ŋu nya geɖe. Ŋutasẽnuwɔwɔwo gaxɔ anyigba dzi ake, eye abe alesi wònɔ do ŋgɔ ene, wole nyanya nam xexeame ku ɖe ʋɔnudɔdrɔ̃ aɖe si gbɔna ŋu. Yesu ŋutɔ gblɔ be yeava abe Ʋɔnudrɔ̃la si Mawu tia ene ava ma amewo me abe alesi alẽkplɔla maa alẽwo kple gbɔ̃wo mee ene. Yesu gblɔ be amesiwo medze o la “[ayi] ɖe tsɔtsrɔ̃ mavɔ me.” (Mateo 25:31-33, 46) Gake Biblia gblɔ be le ɣeɣiɣi sia me la, ame miliɔn gbogbo aɖewoe atsi agbe—si nye ameha gã aɖe siwo subɔ Mawu vavã la. Le xexe si gbɔna me la, amesiawo ase agbe ƒe vivi le ŋutifafa kple dedienɔnɔ si tɔgbe menɔ anyi kpɔ o me ɖaa.—Mixa 4:3, 4; Nyaɖeɖefia 7:9-17.

Ame geɖe ɖua fewu le Biblia me nya siawo kple ʋɔnudɔdrɔ̃a ŋuti nuxlɔ̃ame siwo fia be nya mawo nye nyateƒe la ŋu. Gake apostolo Petro gblɔ be fewuɖula mawo le aɖaba ŋem ƒu nyateƒenyawo dzi. Eŋlɔ be: “Le ŋkeke mamleawo dzi la fewuɖulawo lava . . . eye woagblɔ be: ‘Afika eƒe anyinɔnɔ si ŋugbe wodo la le?’ . . . Elabena ɖe woɣlae ɖe wo, esi wole edim nenema, bena dziƒowo li tso blema ke, eye anyigba hã li hedo tso tsi me, eye wòto tsi me le Mawu ƒe nya nu; nusiawo na tsiɖɔɖɔ yɔ xexe kema me, eye wòtsrɔ̃. Ke wotsɔ nya ma ke dzra fifi dziƒo kple anyigba la ɖo, eye woda wo ɖi na dzo, vaseɖe ame mavɔ̃mawuwo ƒe ʋɔnudɔdrɔ̃ kple gbegblẽ la ƒe ŋkeke la dzi.”—Petro II, 3:3-7.

 Wole nuxlɔ̃ame si ku ɖe ʋɔnudrɔ̃ŋkeke si gbɔna kple ŋutifafa si akplɔe ɖo la ŋuti nyanyui gbeƒã ɖem dzonɔamemetɔe wònye se si Yesu de le nyagblɔɖi me la dzi wɔwɔ. (Mateo 24:14) Mele be woabu nuxlɔ̃ame sia nu tsɛ o. Mawu ŋusẽkatãtɔ wɔna ɖe eƒe nya dzi.

Xexe si Gbɔna

Ne míebu tɔtrɔ vevi siwo gbɔna ŋu la, etsɔme kae li na ameƒomea? Yesu do ŋugbe le eƒe Todzimawunya xɔŋkɔa ƒe ŋgɔdonya me be: “Woayra amesiwo nye ame fafawo la; elabena woawoe anyi anyigba la ƒe dome.” Emegbe eyi edzi fia eƒe nusrɔ̃lawo be woado gbe ɖa na Mawu be: “Wò fiaɖuƒe nava! Woawɔ wò lɔlɔ̃nu le anyigba dzi, sigbe alesi wowɔna le dziƒo ene!” (Mateo 5:5; 6:10) Ẽ, Yesu ŋutɔ fia nu be etsɔme wɔnuku aɖe le ameƒomea me tɔ wɔnuteƒewo lalam le anyigba sia dzi. Eyɔe be “nuwo ƒe gbugbɔgadzi.”—Mateo 19:28.

Eyata esi nèle ŋugble dem le etsɔme ŋu la, mègaɖe mɔ na fewuɖulawo be woana nàke ɖi Mawu ƒe nuxlɔ̃amea o. Nyateƒee wònye be xexe si me míele la adze abe nusi anɔ anyi ɖaa ene, eye egbegbe xexea li tso gbaɖegbe ke. Ke hã mele be míaɖo ŋu ɖe eŋu o. Wodrɔ̃ ʋɔnu ameƒomea ƒe xexea va yi. Eyata na apostolo Petro ƒe lɛta ƒe nuwunyawo nade dzi ƒo na wò be:

“Azɔ esi woalólo nusiawo katã la, ameka ƒomeviwo wòle na mi be, mianye le anyinɔnɔ kɔkɔe kple mawusosroɖa me, eye mialala, eye miadi Mawu ƒe ŋkeke la ƒe vava vevie, . . . esi miele nusiawo lalam ŋuti la, mido vevie, bena woakpɔ mi le ŋutifafa me ɖimaƒomaƒo kple mokaka manɔŋui le eƒe ŋku me, . . . mitsi le mía Aƒetɔ kple xɔla Yesu Kristo ƒe amenuveve kple sidzedze la me.” (Petro II, 3:11, 12, 14, 18) Eyata srɔ̃ nu tso nusi dzɔ le Noa ƒe ŋkekea me la me. Te ɖe Mawu ŋu. Dzi Yesu Kristo ŋuti sidzedze ɖe edzi. Tu mawusosroɖa ɖo, eye nànɔ ame miliɔn geɖe siwo le tiatia wɔm be yewoatsi agbe le xexe sia ƒe nuwuwu age ɖe ŋutifafa ƒe xexe si gbɔna me la dome.

[Nɔnɔmetata si le axa 5]

Wonya nu tso gakpo ŋuti dɔwo ŋu do ŋgɔ na Tsiɖɔɖɔa

[Nɔnɔmetata si le axa 7]

Xexe wɔnuku aɖe le ŋgɔ gbɔna