Wotsrɔ̃ Xexeme Bliboa!

Lé ŋku ɖe xexe si me nèle, eƒe dugãwo, eƒe dekɔnuwo, eƒe dzɔdzɔmeŋutinunya ƒe ŋgɔyiyiwo, kple ame biliɔn nane siwo le eme ŋu kpɔ. Ele bɔbɔe be alesi wòdze nusi anɔ anyi ɖaae la awɔ dɔ ɖe dziwò godoo, alo menye nenemae oa? Èbu eŋu kpɔ be xexe sia ate ŋu abu keŋkeŋ gbeɖekaa? Ema ŋu bubu ate ŋu asesẽ. Gake ènya be nyatakakatsoƒe aɖe si ŋu kakaɖedzi le gblɔ be xexe aɖe nɔ anyi do ŋgɔ na esia si wotsrɔ̃ ɖa keŋkeŋua?

MENYE ame aɖewo siwo nɔ anyi le ŋkumaʋumaʋu ƒe xexe aɖe me ŋu nya gblɔm míele o. Ŋkuʋuʋu nɔ xexe si tsrɔ̃ kple eƒe dugãwo me, eye wòkpɔ dzidzedze le aɖaŋudɔwo kple dzɔdzɔmeŋutinunya me. Gake Biblia ƒe nuŋlɔɖia gblɔ na mí be, le ɣleti 2 lia ƒe ŋkeke 17 lia dzi, le ƒe 352 do ŋgɔ na blemafofo Abraham dzidzi la, tsiɖɔɖɔ aɖe dze egɔme le vome si kplɔ xexeame katã yii. *

 Ðe nuŋlɔɖi ma le eteƒea? Ðe nu ma dzɔ ŋutɔŋutɔa? Ðe blema xexe aɖe si me nu dze edzi na amewo le la nɔ anyi do ŋgɔ na esi li fifia eye wotsrɔ̃ea? Ne nenemae la, ekema nukatae enu yi? Nuka gbɔe wòtso? Eye ɖe míate asrɔ̃ nane tso eƒe tsɔtsrɔ̃a mea?

Ðe Wotsrɔ̃ Blema Xexeame Ŋutɔŋutɔa?

Ne ele eme be afɔku dziŋɔ ma tɔgbe dzɔ ŋutɔŋutɔ la, womaŋlɔe be keŋkeŋ akpɔ gbeɖe o. Eyata le dukɔ geɖewo me la, ŋkuɖodzinya aɖewo li ku ɖe tsɔtsrɔ̃ ma ŋu. Le kpɔɖeŋu me, de ŋugble le ŋkeke si woyɔ tẽ le Ŋɔŋlɔawo me la ŋu kpɔ. Ɣleti evelia si le blema ɣletigbalẽ dzi la dzea egɔme tso ɣleti si míeyɔna egbea be October ƒe domedome va ɖo November ƒe domedome. Eyata ŋkeke 17 lia sɔ kple November ƒe ŋkeke gbãtɔ lɔƒo. Ekema menye nudogoɖenunue azã siwo woɖuna na ame kukuwo le ƒea ƒe ɣeyiɣi ma me le dukɔ geɖewo me nye o.

Tsiɖɔɖɔ ŋuti kpeɖodzi bubuwo gakpɔtɔ le amegbetɔwo ƒe xotutuwo me. Ame tsitsi ɖesiaɖe kloe tua xo be yewo tɔgbuiwo tsi agbe le xexeame katã ƒe tsiɖɔɖɔ aɖe me. Xotutu ɖeka ƒomevie le Afrika ƒe Ame Kpuiwo, Celttɔ siwo le Europa, Inkatɔ siwo le Anyiehe Amerika—katã si, abe alesi wòle amesiwo le Alaska, Australia, China, India, Lithuania, Mexico, Micronesia, New Zealand, tsɔ kpe ɖe Dziehe Amerika ƒe akpa aɖewo ŋu si ene.

Ele eme be esi ɣeyiɣiwo va nɔ yiyim la, wova ɖe ami ɖe xotutuawo ya, gake nya vevi geɖe le wo me si ɖee fia be nu ɖeka ko fiamee wo katã le, be: Mawu do dziku ɖe amegbetɔwo ƒe vɔ̃ɖivɔ̃ɖi ŋu. Ehe Tsiɖɔɖɔ gã aɖe vɛ. Wotsrɔ̃ ameƒome bliboa katã. Gake wokpɔ ame dzɔdzɔe ʋɛ aɖewo ta. Amesiawo kpa tɔdziʋu aɖe si wotsɔ kpɔ amegbetɔwo kple lãwo siaa tae. Le ɣeyiɣi aɖe megbe la, wodɔ xeviwo be woava di anyigba ƒuƒui. Mlɔeba la, tɔdziʋua va tsi to aɖe tame. Esi agbetsilawo do la, wosa vɔ.

Nuka dzie esia ɖo kpee? Nusiwo sɔ kple wo nɔewo alea mate ŋu anye nudogoɖenunu o. Xotutu siawo ƒo ƒu ɖo kpe ɖase si Biblia ɖi le blema ŋu be amegbetɔwo katã dzɔ tso amesiwo tsi agbe le tsiɖɔɖɔ si tsrɔ̃ ameƒomea ƒe xexeame la dzi. Eyata mahiã be míaɖo ŋu ɖe xotutuwo alo nyakpakpawo ŋu be míato wo dzi anya nusi dzɔ o. Nuŋlɔɖi si ta wokpɔ nyuie la le mía si le Biblia ƒe Hebri Ŋɔŋlɔawo me.—Mose I, ta 6-8.

Agbe ƒe gɔmedzedze ŋuti nuŋlɔɖi si tso gbɔgbɔ me la le Biblia me. Gake ɖaseɖiɖiwo ɖo  kpe edzi be menye ŋutinya dzro koe wònye o. Eƒe nyagblɔɖi siwo medoa kpo eme vava o kple nunya deto ɖee fia be nusi wògblɔna be eyae yenye lae wònye—Mawu ƒe nya si wòtsɔ na ameƒomea. To vovo na nyakpakpawo la, Biblia yɔa ŋkɔwo kple ŋkekewo kpakple dzidzime kple anyigba ƒe teƒeteƒewo pɛpɛpɛ le eƒe ŋutinyamenuŋlɔɖiwo me. Ena míekpɔ alesi agbe nɔ do ŋgɔ na Tsiɖɔɖɔa eye wòɖe nusita xexeme bliboa va eƒe nuwuwu kpata la me na mí.

Nukae gblẽ le ame mawo siwo nɔ agbe do ŋgɔ na tsiɖɔɖɔa ŋu? Nyati si kplɔe ɖo dzro nyabiabia ma me. Enye nyabiabia vevi aɖe na amesiwo ade ŋugble le alesi míaƒe egbegbe ŋkuʋuʋu ƒe dedienɔnɔ ava nɔ le etsɔme ŋu.

[Etenuŋɔŋlɔ]

[Nyaɖoɖo si le 4]

(For formatted text, see publication)

Tsiɖɔɖɔ Ŋuti Xotutuwo le Xexeame Katã

Dukɔ Nya Siwo Ði Wo Nɔewo 1 2 3 4 5 6 7 8 9 10

Greece 7 ◆ ◆ ◆ ◆ ◆ ◆ ◆

Rome 6 ◆ ◆ ◆ ◆ ◆ ◆

Lithuania 6 ◆ ◆ ◆ ◆ ◆ ◆

Assyria 9 ◆ ◆ ◆ ◆ ◆ ◆ ◆ ◆ ◆

Tanzania 7 ◆ ◆ ◆ ◆ ◆ ◆ ◆

India - Hindu 6 ◆ ◆ ◆ ◆ ◆ ◆

New Zealand - Maori 5 ◆ ◆ ◆ ◆ ◆

Micronesia 7 ◆ ◆ ◆ ◆ ◆ ◆ ◆

Washington U.S.A. - Yakima 7 ◆ ◆ ◆ ◆ ◆ ◆ ◆

Mississippi U.S.A. - Choctaw 7 ◆ ◆ ◆ ◆ ◆ ◆ ◆

Mexico - Michoacan 5 ◆ ◆ ◆ ◆ ◆

South America - Quechua 4 ◆ ◆ ◆ ◆

Bolivia - Chiriguano 5 ◆ ◆ ◆ ◆ ◆

Guyana - Arawak 6 ◆ ◆ ◆ ◆ ◆ ◆

1: Mawu do dziku le nuvɔ̃ɖiwɔwɔ ta

2: Wotsɔ Tsiɖɔɖɔ tsrɔ̃ amewo

3: Etso Mawu gbɔ

4: Mawu xlɔ̃ nu amewo

5: Ameƒome ʋɛ aɖe koe tsi agbe

6: Wokpɔ wo ta le tɔdziʋu aɖe me

7: Wokpɔ lãwo ta

8: Wodɔ xevi alo nuwɔwɔ bubu aɖe ɖa

9: Eva tsi to aɖe tame mlɔeba

10: Wosa vɔ esi wodo go