Àlé Wò Nuteƒewɔwɔ Me Ðe Asia?

ATSUTSRƆE nenie ku etsɔ si va yi? Ame aɖeke menya o, eye ɖewohĩ ame ʋɛ aɖewo koe abu esia ŋu—le esi xevi geɖewo li ta. Gake Yehowa ya tsɔa ɖe le eme. Yesu gblɔ le xevi siawo siwo dze abe ɖee asixɔxɔ mele wo ŋu o na eƒe nusrɔ̃lawo be: “Ne menye mia Fofo ƒe lɔlɔ̃nu o la, wo dometɔ aɖeke mele dzedze ge ɖe anyigba o.” Eye wògblɔ kpee be: “Eyaŋuti migavɔ̃ o! Mia tɔ vena wu atsutsurɔe geɖewo tɔ.”—Mateo 10:29, 31.

Emegbe Yesu ƒe nusrɔ̃lawo va se alesi gbegbe Yehowa dea asixɔxɔ wo ŋue gɔme nyuie wu. Apostolo Yohanes, si nye wo dometɔ ɖeka ŋlɔ bena: “Esia me woɖe Mawu ƒe lɔlɔ̃ la ɖe go fia le le mía me bena, Mawu dɔ eƒe Tenuvi ɖo ɖe xexeame, bena míanɔ agbe to eyama me.” (Yohanes I, 4:9) Menye tafea koe Yehowa na o ke boŋ eka ɖe edzi na esubɔlawo dometɔ ɖesiaɖe be: “Nyemele asi ɖe ge le mia ŋu o, eye nyemele mia gblẽ ge ɖi akpɔ o.”—Hebritɔwo 13:5.

Edze ƒã be Yehowa ƒe lɔlɔ̃ na esubɔlawo sẽ ŋutɔ. Gake biabiae nye be, ‘Ðe míeku ɖe Yehowa ŋu ale gbegbe be míagblẽ eyama ɖi gbeɖegbeɖe oa?’

Agbagba Siwo Satana Dzena be Yeagblẽ Míaƒe Nuteƒewɔwɔ Me

Esi Yehowa he Satana ƒe susu yi Hiob ƒe nuteƒewɔwɔ dzi la, Satana ɖo eŋu dzikutɔe be: “Dzodzroe Hiob vɔ̃a Mawua?” (Hiob 1:9) Nusi fiam wònɔ enye be amegbetɔwo ƒe nuteƒewɔwɔ na Mawu nɔ te ɖe ‘viɖe siwo woate ŋu akpɔ tso eme’ koŋ dzi. Ne esia nye nyateƒe la, ekema Kristotɔ ɖesiaɖe ate ŋu aɖe asi le eƒe nuteƒewɔwɔ ŋu—ne nusi wòakpɔ la lolo ŋutɔ ko.

Le Hiob gome la, Satana gblɔ gbã be Hiob ƒe nuteƒewɔwɔ na Mawu nu ate ŋu atsi ne eƒe nunɔamesi siwo wòlɔ̃na vevie la dome gblẽ. (Hiob 1:10, 11) Esi vlodoamenya sia meva eme o la, Satana gblɔ be: “Amegbetɔ atsɔ nusiwo katã le esi la, ana ɖe eƒe agbe ta.” (Hiob 2:4) Togbɔ be nya si Satana gblɔ ate ŋu ava eme le ame aɖewo gome hã la, Hiob gbe be yemaɖe asi le yeƒe nuteƒewɔwɔ me léle ɖe asi ŋu o. Ŋutinyamenuŋlɔɖiwo ɖo kpe nya ma dzi. (Hiob 27:5; 42:10-17) Nuteƒewɔwɔ ma tɔgbe le asiwòa? Alo ɖe nàna Satana nagblẽ wò nuteƒewɔwɔ mea? De ŋugble le ɖokuiwò ŋu esi míele nyateƒenya aɖewo siwo ku ɖe Kristotɔ ɖesiaɖe ŋu la me dzrom.

Apostolo Paulo xɔe se be Kristotɔ vavã ƒe nuteƒewɔwɔ me ate ŋu asẽ ŋutɔ. Eŋlɔ be: “Menyae keŋ bena, eɖanye ku o, eɖanye agbe o; . . . eɖanye nusi le fifi o, eɖanye nusi le vava ge o; . . . alo nuwɔwɔ bubu aɖe o, mate ŋu amã mí atso Mawu ƒe lɔlɔ̃, si le Kristo Yesu, mía Aƒetɔ me la gbɔ o.” (Romatɔwo 8:38, 39) Kakaɖedzi ma tɔgbe ate ŋu anɔ mía si ne lɔlɔ̃ si le mía si na Yehowa sẽ. Lɔlɔ̃ ma nye nublanu sẽŋu aɖe si dzi ku kura gɔ̃ hã mate ŋu aɖu o.

Ne ƒomedodo ma tɔgbe le mía kple Mawu dome la, míabia gbeɖe o be, ‘Ðe magakpɔtɔ  anɔ Yehowa subɔm le ƒe ʋɛ siwo gbɔna mea?’ Ðikeke sia afia be míaƒe nuteƒewɔwɔ na Mawu nɔ te ɖe nusi ate ŋu adzɔ ɖe mía dzi le míaƒe agbemeŋkekewo me la dzi. Nudzɔdzɔwo mekpɔa ŋusẽ aɖeke ɖe nuteƒewɔwɔ vavãtɔ dzi o. Enɔ te ɖe amesi ƒomevi míenye le ememe dzi. (Korintotɔwo II, 4:16-18) Ne míelɔ̃ Yehowa kple míaƒe dzi blibo la, míado ŋukpee gbeɖe o.—Mateo 22:37; Korintotɔwo I, 13:8.

Gake ele be míaɖo ŋku edzi be Satana le didim ɣesiaɣi be yeagblẽ míaƒe nuteƒewɔwɔ me. Ate mí akpɔ be míaƒo mía ɖokui ɖe ŋutilã ƒe nudzodzrowo me, ana ta hatiwo ƒe nyaƒoɖeamenuwo, alo ana fukpekpe aɖe ƒomevi nana míagbe nyateƒea. Togbɔ be mía ŋutɔwo ƒe blibomademadewo nana Satana te ŋu dzea mía dzi bɔbɔe hã la, xexe si ɖe eɖokui ɖe aga tso Mawu ŋu koŋue nye eƒe kpeɖeŋutɔ vevitɔ le eƒe tameɖoɖoa dzi wɔwɔ me. (Romatɔwo 7:19, 20; Yohanes I, 2:16) Ke hã nu nyui geɖewo le mía si le aʋa sia wɔwɔ me, siwo dometɔ vevi ɖekae nye nyateƒe si wònye be Satana ƒe ayemɔwo mele ɣaɣla na mí o.—Korintotɔwo II, 2:11.

Nukawoe nye Satana ƒe ayemɔwo? Paulo ɖɔ wo le eƒe lɛta si wòŋlɔ ɖo ɖe Efesotɔwo me be “aɖaŋu vɔ̃wo,” alo “ayemɔwo.” (Efesotɔwo 6:11) Satana toa ayemɔwo dzi be yeatsɔ agblẽ míaƒe nuteƒewɔwɔ me. Dzidzɔtɔe la, míate ŋu akpɔ ayemɔ siawo adze sii, esi wònye woŋlɔ Abosam ƒe aɖaŋuawo ɖe Mawu ƒe Nya la me na mí ta. Agbagba si Satana dze be yeagblẽ Yesu kple Hiob ƒe nuteƒewɔwɔ me ɖe mɔ siwo dzi wòdina be yeato agblẽ Kristotɔwo ƒe nuteƒewɔwɔ me la dometɔ aɖewo fia.

Womete Ŋu Gblẽ Yesu ƒe Nuteƒewɔwɔ Me O

Le Yesu ƒe subɔsubɔdɔa gɔmedzeɣi la, dzi nɔ Satana ƒo wòte Mawu ƒe Vi la kpɔ gblɔ nɛ tẽ be wòatrɔ kpe wòazu abolo. Ayedzedze kae nye esi! Ŋkeke 40 sɔŋ enye ma si Yesu meɖu nu o, eyata ɖikeke mele eme o be dɔ nɔ ewum vevie. (Luka 4:2, 3) Satana doe ɖe Yesu gbɔ be wòaɖi kɔ na eƒe dzɔdzɔme dzodzroa enumake, le mɔ si tsi tre ɖe Yehowa ƒe lɔlɔ̃nu ŋu nu. Nenema kee egbea la, xexeame ƒe ameflunyawo dea kɔɖiɖi na ame ƒe dzodzrowo enumake ƒe dzi ƒo, emetsonuawo ŋu mabumabu boo alo wo ŋu mabumabu kura. Nya si wogblɔna enye si be, ‘Ele be wòasu asiwò fifia,’ alo kpuie ko be ‘Wò ya wɔe ko!’

Ne ɖee Yesu ɖi kɔ na dɔ si nɔ ewum vevie emetsonuawo ŋu mabumabui la, anye ne Satana kpɔ dzidzedze le Yesu ƒe nuteƒewɔwɔ me gbegblẽ me. Yesu tsɔ gbɔgbɔmeŋkuwo kpɔ nuawoe, heɖo eŋu dzinɔameƒotɔe be: “Woŋlɔ ɖi bena: ‘Menye abolo ɖeɖeko ŋuti ame lanɔ agbe ɖo o.’ ”—Luka 4:4; Mateo 4:4.

Emegbe Satana trɔ eƒe aɖaŋua. Abosam ɖe Ŋɔŋlɔawo, si me Yesu yɔ nyawo tsoe la, me bubui hede dzi ƒo na Yesu be wòadzo tso gbedoxɔa ƒe tsutsuẽƒe. Satana gblɔ be: ‘Mawudɔla aɖe axe wò.’ Susu aɖeke menɔ tame na Yesu be yeabia ametakpɔkpɔ nukutɔe ƒe ŋusẽ ye Fofo atsɔ ahe amewo ƒe susu ava eɖokui dzi ko o.  Yesu gblɔ be: “Megate Aƒetɔ, wò Mawu la kpɔ o!”—Mateo 4:5-7; Luka 4:9-12.

Ayemɔ mamlɛ si Satana zã ya nɔ tẽ wu. Ete kpɔ be yeaƒo asi kple Yesu to xexeame katã kple eƒe ŋutikɔkɔe tsɔtsɔ nɛ nenye be wòadze klo ade ta agu zi ɖeka pɛ ko na ye. Nusiwo katã nɔ Satana sie wòdi be yeatsɔ nɛ. Gake aleke Yesu ade ta agu na Fofoa ƒe futɔ gãtɔ? Mawɔ ema gbeɖe o! Yesu ɖo eŋu be: “Aƒetɔ, wò Mawu la, nade ta agu na, eye eya ɖeka ko nasubɔ.”—Mateo 4:8-11; Luka 4:5-8.

Esi Satana do kpo nu le agbagba etɔ̃ mawo dzedze me la, ‘ete ɖa le Yesu gbɔ vaseɖe ɣeyiɣi nyui bubu dzi.’ (Luka 4:13) Esia fia be Satana yi edzi nɔ mɔnu dim ɣesiaɣi be yeado Yesu ƒe nuteƒewɔwɔ akpɔ. Ɣeyiɣi nyuia va le ƒe eve kple afã megbe esime Yesu te eƒe nusrɔ̃lawo dzadzra ɖo ɖe eƒe ku si gogo la ŋu. Apostolo Petro gblɔ be: “Mawu nehe esia ɖa xaa tso gbɔwò, Aƒetɔ; esia nagava dziwò gbeɖe o!”—Mateo 16:21, 22.

Ðe wòate ŋu adzɔ be aɖaŋuɖoɖo ma si dze abe susu nyui le eme ene gake wònye vodada la adzɔ dzi na Yesu, vevietɔ esi wònye eƒe nusrɔ̃lawo dometɔ ɖekae gblɔe ta? Yesu dze sii enumake be Satana ƒe didiwoe dze le nya mawo me, ke menye Yehowa tɔ o. Kristo ɖo eŋu dzinɔameƒotɔe be: “Te ɖa yi megbenye, Satana! Nuɖiaɖia nènye nam, elabena menye Mawu tɔ nèsusu o, negbe nusi nye amegbetɔwo tɔ ko.”—Mateo 16:23.

Le lɔlɔ̃ sẽŋu si nɔ Yesu si na Yehowa ta la, Satana mete ŋu gblẽ eƒe nuteƒewɔwɔ me o. Naneke meli si Abosam tsɔ ɖo Yesu ŋkume, eɖanye tetekpɔ ka ke o, alekee ke wòɖa sẽe o, mete ŋu gblẽ eƒe nuteƒewɔwɔ na Fofoa si le dziƒo me o. Ðe tameɖoɖo kplikpaa ma tɔgbi anɔ mía si ne nɔnɔmewo na míaƒe nuteƒewɔwɔ sesẽ na mía? Hiob ƒe kpɔɖeŋua akpe ɖe mía ŋu míase kuxi siwo míate ŋu ado goe la me nyuie wu.

Nuteƒewɔwɔ le Nɔnɔme Sesẽwo Me

Abe alesi Hiob kpɔe ene la, nɔnɔme sesẽwo ate ŋu ava mía dzi ɣesiaɣi. Enye srɔ̃ŋutsu kpɔdzidzɔ si si vi ewo nɔ eye wòtsɔa ɖe le gbɔgbɔmenyawo me ɣesiaɣi. (Hiob 1:5) Gake Hiob ƒe nuteƒewɔwɔ na Mawu va zu nyaʋiʋli le dziƒoʋɔnu le eƒe manyamanya me, eye Satana ɖoe kplikpaa be yeato mɔ sia mɔ si yeate ŋui dzi agblẽ nu le eŋu.

Emegbe kpuie la, Hiob ƒe kesinɔnuwo bu. (Hiob 1:14-17) Ke hã Hiob ƒe nuteƒewɔwɔ nɔ te ɖe dodokpɔa nu elabena meɖo ŋu ɖe ga ŋu gbeɖe o. Esi Hiob ɖo ŋku esime wònye kesinɔtɔ dzi la, egblɔ be: “Ne meɖo dzi ɖe sika ŋu, . . . ne mekpɔ dzidzɔ be, nye kesinɔnuwo sɔ gbɔ, . . . ekema esia hã anye se me dzedze; . . . elabena meda alakpa na Mawu le dzi.”—Hiob 31:24, 25, 28.

Egbea la, ate ŋu adzɔ be nusianu si le mía si la katã kloe nabu le zã ɖeka me. Wofi asitsala aɖe si nye Yehowa Ðasefowo ƒe ga gbogbo aɖe, si na wòɖu agba keŋkeŋ kloe. Egblɔ anukwareɖiɖitɔe be: “Mexɔ dzidɔ kloe. Le nyateƒe me, ne menye ƒomedodo si le mía kple Mawu dome yee o la mebu be anye ne mexɔe. Ke hã nudzɔdzɔ sia na mekpɔ nyateƒe si wònye be gbɔgbɔmenuwo menɔ nɔƒe gbãtɔ le nye agbe me o la dze sii. Gadidi ƒe dzodzro vu tsyɔ nusianu dzi.” Tso ɣemaɣi la, Ðasefo sia ɖe eƒe asitsanyawo dzi kpɔtɔ, eye wowɔa kpekpeɖeŋu mɔɖeɖedɔa edziedzi, zãa gaƒoƒo 50 alo esi wu nenema ɣleti sia ɣleti le Kristotɔwo ƒe subɔsubɔdɔa me. Gake kuxi bubuwo ate ŋu agblẽ nu le ame ŋu vevie wu ame ƒe kesinɔnu siwo abu.

Hiob mekpɔ nya nusi wòawɔ le eƒe kesinɔnu siwo dome gblẽ ŋu o hafi wova gblɔ nɛ be via ewoawo ku. Gake egblɔ be: “Woakafu Yehowa ŋkɔ!” (Hiob 1:18-21) Ðe míalé míaƒe nuteƒewɔwɔ me ɖe asi ne míaƒe ƒomea me tɔ geɖewo ku zi ɖekaa? Francisco, si nye Kristotɔ hamemegã le Spain, ƒe vi eve ku le ʋufɔku wɔnublanui aɖe me. Ekpɔ akɔfafa to tete ɖe Yehowa ŋu kple eƒe Kristotɔwo ƒe subɔsubɔdɔa dzidzi ɖe edzi me.

Le Hiob ƒe viwo ƒe ku ƒodzidziamea megbe gɔ̃ hã la, eƒe fukpekpea metɔ ɖe afima o.  Satana kplɔ dɔléle vɔ̃ɖi aɖe si vena ŋutɔ la ƒui. Ɣemaɣi tutu me la, Hiob xɔ aɖaŋuɖoɖo gbegblẽ aɖe tso srɔ̃a gbɔ. Eƒoe ɖe enu be: “Gbe Mawu, ne naku!” Hiob ŋe aɖaba ƒu eƒe aɖaŋuɖoɖoa dzi, eye “mewɔ nuvɔ̃ kple eƒe nuyiwo o.” (Hiob 2:9,10) Menye eƒe ƒomea ƒe kpekpeɖeŋu dzie eƒe nuteƒewɔwɔa nɔ te ɖo o, ke ɖe ƒomedodo si nɔ eya kple Yehowa dome dzi.

Flora, amesi srɔ̃ŋutsu kple viaŋutsu tsitsitɔ gbe Kristotɔwo ƒe agbenɔnɔmɔa ƒe ewo kple edzivɔ enye esi la, se seselelãme si me Hiob anya to la gɔme. Egblɔ be: “Ne wò ƒomea me tɔwo gbe wò zi ɖeka kpoyi la, dzi te ŋu gbãna na ame. Gake menyae be nyemakpɔ dzidzɔ le Yehowa ƒe habɔbɔa godo o. Eyata menɔ te sesĩe hetsɔ Yehowa ɖo nɔƒe gbãtɔ eye le ɣeyiɣi ma ke me la, menɔ agbagba dzem be makpɔtɔ anye srɔ̃nyɔnu kple vidada nyui. Medoa gbe ɖa ɣesiaɣi, eye Yehowa do ŋusẽm. Menye amesi le dzidzɔ kpɔm elabena, togbɔ be srɔ̃nye ɖoe kplikpaa be yeatsi tre ɖe ŋunye hã la, mesrɔ̃ alesi maɖo ŋu ɖe Yehowa ŋu bliboe.”

Ayemɔ si Satana gazã ɖe eyome be yeatsɔ agblẽ Hiob ƒe nuteƒewɔwɔa me enye eƒe zɔhɛ etɔ̃awo. (Hiob 2:11-13) Aleke wòado nuxaxa nɛ enye esi esime wote fɔbubui. Ne ɖee wòlɔ̃ ɖe woƒe nyahehewo dzi la, anye magaka ɖe Yehowa Mawu dzi o. Woƒe aɖaŋuɖoɖo ɖedzileameƒoa ate ŋu agbã dzi nɛ ahagblẽ eƒe nuteƒewɔwɔ me, eye wòana Satana ƒe tameɖoɖo nava eme.

Gake Hiob gblɔ dzinɔameƒotɔe be: “Nyemasẽ nu le nye fɔmaɖimaɖi ŋu, vaseɖe esime mamia nu o.” (Hiob 27:5) Megblɔ be ‘Nyemaɖe mɔ miana masẽ nu le nye fɔmaɖimaɖi ŋu o!’ Hiob nyae be yeƒe nuteƒewɔwɔa nɔ te ɖe ye ŋutɔ kple lɔlɔ̃ si le ye si na Yehowa dzi.

Ayemɔ Xoxo si Wòtsɔ Léa Ame Yeyewoe

Satana gakpɔtɔ wɔa xɔlɔ̃wo kple haxɔsetɔwo ƒe aɖaŋu alo nyagbɔgblɔ eŋumabumabui ŋudɔ. Dziɖeleameƒo si tsoa hamea me la ate ŋu aɖe míaƒe kakaɖedzi dzi akpɔtɔ bɔbɔe wu yometiti si atso egodo. Kristotɔ hamemegã aɖe si nye asrafo si de aʋa kpɔ la tsɔ aʋa siawo sɔ kple veve si wòse le hati Kristotɔ aɖewo ƒe nyagbɔgblɔ eŋumabumabui kple nuwɔna aɖewo ta la. Egblɔ tso nyagbɔgblɔ eŋumabumabuiŋu be: “Eyae nye nu sesẽtɔ si me meto kpɔ.”

Le go bubu me la, haxɔsetɔwo ƒe blibomademade ate ŋu ado dziku na mí ale gbegbe be míadzudzɔ nuƒoƒo na ame aɖewo alo ate Kristotɔwo ƒe kpekpeawo dada ɖe eme gɔ̃ hã. Akɔfafa kpɔkpɔ azu nusi le vevie wu na mí. Gake nublanuinya kae nye si wòanye be ɣeyiɣi kpui aɖe ko ƒe nukpɔsusu nasu mía si ahaɖe mɔ nusi ame bubuwo wɔna alo gblɔna nagbɔdzɔ míaƒe nu xɔasitɔ kekeake—míaƒe ƒomedodo kple Yehowa—me. Ne míeɖe mɔ ema dzɔ la, Satana ƒe ayemɔ xoxoawo dometɔ ɖeka alé mí.

Eme kɔ ƒã be míedia dzidzenu kɔkɔwo le Kristo-hamea me. Gake ne míedia nusi gbɔ eme tso hati tadeagula, siwo gakpɔtɔ nye ame madeblibowo si la, míado kpo nu godoo. Yehowa ya dana sɔna le nusi wòbiana tsoa esubɔlawo si ŋu. Ne míesrɔ̃ eƒe kpɔɖeŋu la, míate ŋu anɔ te ɖe woƒe blibomademadewo nu. (Efesotɔwo 4:2, 32) Apostolo Paulo ɖo aɖaŋu sia be: “Mibi dzi, eye migawɔ nuvɔ̃ o; ɣe la nagaɖo to ɖe miaƒe dzibibi o; eye migana mɔ Abosam hã o!”—Efesotɔwo 4:26, 27.

Abe alesi Biblia ɖee fia eme kɔ ƒãe ene la, Satana zãa ayemɔ vovovowo kple susu be—ne yeate ŋui la—yeake ɖe alesi yeawɔ agblẽ Kristotɔwo ƒe nuteƒewɔwɔ me ŋu. Eƒe aɖaŋuawo dometɔ aɖewo dzroa nuvɔ̃ŋutilã la, bubuwo hea vevesese vɛ. Le numedzodzro sia me la, àte ŋu kpɔ nusitae mele be nàɖe mɔ wòalé wò le vome gbeɖe o. Esi lɔlɔ̃ si le asiwò na Mawu la sẽ le wò dzi me ta la, ɖoe kplikpaa be yeana Abosam nanye alakpatɔ eye nàdo dzidzɔ na Yehowa ƒe dzi. (Lododowo 27:11; Yohanes 8:44) Ðo ŋku edzi be, mele be Kristotɔ vavã ƒe nuteƒewɔwɔ me nagblẽ o, tetekpɔ ka kee ɖatso mɔ na mí o.