Èɖo Ŋku Wo Dzia?

Ðe Gbetakpɔxɔ ƒe tata siwo do nyitsɔ laa xexlẽ do dzidzɔ na wòa? Ke kpɔe ɖa be yeate ŋu aɖo biabia siwo gbɔna ŋu hã:

• Nukae nye veveseseɖeamenu, eye nukatae wòle be Kristotɔwo natui ɖo?

Enye ame ɖokui tsɔtsɔ ɖo ame bubu teƒe ase veve si sem amea le la le míaƒe dzi me. Woxlɔ̃ nu Kristotɔwo be ‘ame nu nawɔ nublanui na wo, woaɖe havilɔlɔ̃, kple dɔmetɔtrɔ afia.’ (Petro I, 3:8) Yehowa ɖo veveseseɖeamenu ƒe kpɔɖeŋu ɖi na mí be míasrɔ̃. (Psalmo 103:14; Zaxarya 2:12) Míate ŋu adzi míaƒe ŋudzɔnɔnɔ le go sia me ɖe edzi to toɖoɖo, ŋkuléle ɖe nu ŋu, kple nukpɔkpɔ le susume me dzi.—4/15, axa 24-6.

• Be woakpɔ dzidzɔ vavãtɔ la, nukatae wòle be gbɔgbɔmedɔdada nado ŋgɔ na ŋutilã me nuwɔametɔnyenye gbɔ kpɔkpɔ mlɔeba?

Kuxiwo ƒe agbogbododo wɔe be dzi mele ame geɖe siwo le lãmesẽ me dzɔm o. Ke hã Kristotɔ geɖe siwo nye wɔametɔwo le ŋutilã me le Yehowa subɔm dzidzɔtɔe. Mɔnukpɔkpɔ asu amesiwo wole gbɔgbɔmedɔ dam na la si be woada ŋutilãmedɔwo na wo le xexe yeyea me.—5/1, axa 6-7.

• Nukatae Hebritɔwo 12:16 yɔ Esau de ahasiwɔlawo dome?

Biblia me nuŋlɔɖia ɖee fia be Esau ɖe viɖe siwo wòakpɔ enumake ƒe tamesusu ƒe nɔnɔme fia, eye mede bubu nu kɔkɔewo ŋu o. Ne ame aɖe ɖe mɔ tamesusu ma tɔgbe ge ɖe eme la, ate ŋu akplɔe ade nuvɔ̃ gã, abe ahasiwɔwɔ ene, me.—5/1, axa 10-11.

• Amekae Tertullian nye, eye nuka mee wòxɔ ŋkɔ le?

Enye agbalẽŋlɔla kple mawunyaŋununyala si nɔ anyi le ƒe alafa evelia kple etɔ̃lia M.Ŋ. me. Exɔ ŋkɔ le agbalẽwo ŋɔŋlɔ be woatsɔ aʋli amesiwo gblɔna be Kristotɔwo yewonye la ta me. Esime wònɔ wo ta ʋlim la, eto nukpɔsusuwo kple xexemenunya ƒe susu si va zu nufiafia gbegblẽwo, abe Mawuɖekaetɔ̃ ene, ƒe gɔmeɖokpe vɛ.—5/15, axa 29-31.

• Nukatae menye agbedomenyiŋusẽ ɖeɖe gbɔe amegbetɔwo ƒe dɔlélewo, agbenɔnɔ, kple ku tso o?

Dzɔdzɔmeŋutinunyalawo ƒo nya ta be edze ƒã be agbedomenyiŋusẽ wɔa akpa aɖe le amegbetɔwo ƒe dɔlélewo me, eye wo dometɔ aɖewo xɔe se be domenyiŋusẽfianuwo kpɔa ŋusẽ ɖe amewo ƒe agbenɔnɔ dzi. Gake Biblia na ameƒomea ƒe dzɔtsoƒe ŋuti numekɔkɔ, tsɔ kpe ɖe alesi nuvɔ̃ kple blibomademade wɔ va ɖo ameƒomea dome ŋu. Togbɔ be domenyiŋusẽfianuwo awɔ akpa aɖe le ameƒomevinyenye me hã la, míaƒe blibomademade kple nuto si me míele hã kpɔa ŋusẽ geɖe ɖe mía dzi.—6/1, axa 9-11.

• Aleke Papyrus kakɛ si wofɔ le Oxyrhynchus, Egypt, kɔ alesi wozã Mawu ƒe ŋkɔ mee?

Hebrigbe me ŋɔŋlɔdzesi ene siwo wotsɔ ŋlɔa Mawu ƒe ŋkɔe la dze le Hiob 42:11, 12 me le Helatɔwo ƒe Septuagint ƒe kakɛa me. Esia nye kpeɖodzi bubu be alesi woŋlɔa Mawu ƒe ŋkɔ le Hebrigbe me la dze le Septuagint, si me Kristotɔwo ƒe Hela Ŋɔŋlɔawo ŋlɔlawo yɔ nya tsoe zi geɖe la me.—6/1, axa 30.

• Egbeŋkekea me kamedefefe xɔŋkɔ kawoe woate ŋu atsɔ asɔ kple Roma Fiaɖuƒea me yivuwɔwɔ dziŋɔwo?

Wɔna aɖe si wowɔ nyitsɔ laa tsɔ ɖe nudzɔdzɔ aɖewo fia le Roma Fefewɔƒe le Italy, hekpe ɖe video ɖeɖefia aɖe ŋu la ɖe egbegbe nusiwo sɔ kple avuwɔwɔ kple nyitsuwo, kɔdada, dzokeke kple gasɔ hoʋiʋli, dzre dziŋɔ siwo dona mo ɖa le kamedefefewo me egbea la fia. Kristotɔ gbãtɔwo lɔ̃ ɖe edzi be Yehowa melɔ̃a ŋutasesẽ alo ŋutasẽnuwɔlawo o, eye mele be Kristotɔwo hã nalɔ̃e egbea o. (Psalmo 11:5)—6/15, axa 29.

• Esi míele agbagba dzem be míazu nufiala bibiwo la, nukae míate ŋu asrɔ̃ tso Ezra ƒe kpɔɖeŋua me?

Ezra 7:10 ƒo nu tso nu ene siwo Ezra wɔ, siwo míate ŋu adze agbagba asrɔ̃, ŋu. Egblɔ be: ‘Ezra ŋutɔ [1] dzra eƒe dzi ɖo, [2] bene yeadzro Yehowa ƒe se la me, [3] bene yeawɔ edzi, eye [4] bene yeafia ɖoɖowo kple dzɔdzɔenyenye le Israel.’—7/1, axa 20.

• Nuwɔna eve kawo mee wòasɔ le be Kristotɔ nyɔnu nabla ta?

Ðekae nye le nɔnɔme siwo ado mo ɖa le ƒomea me la me. Eƒe tababla ɖenɛ fiana be enyae be ye srɔ̃ŋutsuae wòle be wòaxɔ ŋgɔ le gbedodoɖa kple Biblia fiafia me. Eveliae nye le hamea ƒe dɔwɔwɔwo me, afisi wòɖenɛ fiana le be ŋutsu xɔnyɔnyrɔwoe Ŋɔŋlɔawo na ŋusẽe be woafia nu ahana mɔfiafia. (Korintotɔwo I, 11:3-10)—7/15, axa 26-7.

• Nukatae Kristotɔwo lɔ̃na ɖe edzi be yoga lɔ nu geɖe ɖe eme wu kamedede dzro aɖe ko eye afɔku le eme?

Taɖodzinu si le yoga ƒe hehea ŋue nye be wòakplɔ ame ade ƒomedodo kple gbɔgbɔ aɖe si tri akɔ wu amegbetɔ me. Etsi tre ɖe Mawu ƒe mɔfiafia ŋu le go sia me hã be yoga lɔ eɖoɖo koŋ atsi tamebubu nu ɖe eme. (Romatɔwo 12:1, 2) Yoga ate ŋu akplɔ ame ade gbɔgbɔyɔyɔ kple vivimenuwɔwɔwo ƒe afɔkuwo me. (Mose V, 18:10, 11)—8/1, axa 20-2.