Amekae Wòle Be Nàwɔ Nuteƒe Na?

“Mía dedukɔ: . . . Etɔ nenye dzɔdzɔea ɣesiaɣi; etɔ ɖanye dzɔdzɔea alo meɖanyee o, mía dedukɔe.”—Stephen Decatur, United States ƒudzisrafomegã, 1779-1820.

AME geɖe bua nuteƒewɔwɔ na wo dedukɔ le nusianu me be enye yewoƒe agbanɔamedzi gãtɔ kekeake. Ame bubuwo agbugbɔ Stephen Decatur ƒe nyaa agblɔ be, ‘Nye subɔsubɔha, etɔ nenye dzɔdzɔea ɣesiaɣi; etɔ ɖanye dzɔdzɔea alo meɖanyee o, nye subɔsubɔhae.’

Ne míagblɔe tututu la, dukɔ alo subɔsubɔha si wòle be míawɔ nuteƒe na la nɔa te ɖe afisi wodzi mí ɖo dzi, gake amesi wòle be míawɔ nuteƒe na ŋuti nyametsotso le vevie ale gbegbe be míate ŋu abui ɖewoɖewoe o. Ke hã ebia dzinɔameƒo be woate ŋu awɔ nusiwo ame wɔa nuteƒe na tso keke eƒe ɖevime ke la ŋuti numekuku eye ewɔwɔ hea kuxiwo vɛ.

Nuteƒewɔwɔ ƒe Dodokpɔwo

Nyɔnu aɖe si tsi le Zambia gblɔ be: “Metsia dzi ɖe mawusubɔsubɔ ŋu tso ɖevime ke. Gbedodoɖa le ƒomea ƒe vɔsaxɔa me gbesiagbe, subɔsubɔŋkekenyuiwo ɖuɖu, kple gbedoxɔ me  dede edziedzi nye hehe siwo wonam la dometɔ aɖewo. Nye subɔsubɔ kple tadedeagu do ka kplikplikpli kple míaƒe dekɔnu, nuto si me metso, kple ƒome si me metso.”

Gake esi wònɔ eƒe ƒewuiwo ƒe nuwuwu la, ete Biblia sɔsrɔ̃ kple Yehowa Ðasefowo eye eteƒe medidi o etso nya me be yeaɖɔ li yeƒe subɔsubɔ. Ðe esia nye nuteƒemawɔmawɔa?

Wonyi Zlatko le Bosnia, eye ekpɔ gome le aʋa si nɔ edzi yim le wo dedukɔa me la me hena ɣeyiɣi aɖe. Eya hã te Biblia sɔsrɔ̃ kple Yehowa Ðasefowo. Fifia la, egbe be yemagatsɔ lãnuwo ɖe ame aɖeke ŋu o. Ðe wòle nuteƒemawɔmawɔ ɖem fiaa?

Alesi nàɖo nya mawo ŋui la nɔ te ɖe wò nukpɔsusu dzi. Nyɔnu si míeyɔ do ŋgɔ gblɔ be: “Le míaƒe nutoa me la, ŋukpe si womaŋlɔ be akpɔ o ye wodoa amesi ɖɔ li eƒe subɔsubɔ; wobunɛ be enye nuteƒemawɔmawɔ, anukwaremaɖimaɖi na ame ƒe ƒometɔwo kpakple eƒe nutoa.” Nenema kee asrafoha si me Zlatko nɔ tsã me tɔwo bua amesiame si gbe be yemakpe ɖe wo ŋu awɔ aʋa o la be enye yomemɔfiala. Gake nyɔnu ma kple Zlatko siaa bui be nuteƒewɔwɔ si de ŋgɔ wu ɖesiaɖe—si nye nuteƒewɔwɔ na Mawu—ye ʋã yewo yewowɔ nu nenema. Vevietɔ wu la, aleke Mawu bua amesiwo dina be yewoawɔ nuteƒe nɛ lae?

Nuteƒewɔwɔ Vavãtɔ—Enye Lɔlɔ̃ Ðeɖe Fia

Fia Dawid gblɔ na Yehowa Mawu be: “Èwɔa nuteƒe na amesi nye nuteƒewɔla.” (Samuel II, 22:26, NW ) Hebrigbe me nya si gɔme woɖe be “nuteƒewɔwɔ” le afisia fia dɔmenyonyo si nana wokuna ɖe nane ŋu vaseɖe esime tameɖoɖo si le nua ŋu va eme. Abe alesi wònɔna le vidada kple via si wòle no namee gome ene la, Yehowa kuna ɖe amesiwo wɔa nuteƒe nɛ la ŋu. Yehowa gblɔ le eƒe subɔla nuteƒewɔla siwo nɔ blema Israel ŋu be: “Ðe nyɔnu aŋlɔ eƒe vidzĩe be, eye eƒe dɔme agbe tɔtrɔ ɖe eƒe dɔmevi ŋua? Ne woawo ŋlɔe be hã, nyea nyemaŋlɔ wò be o!” (Yesaya 49:15) Amesiwo le lɔlɔ̃m faa be yewoatsɔ nuteƒewɔwɔ na Mawu aɖo ŋgɔ na nusianu ate ŋu aka ɖe edzi be akpɔ yewo ta lɔlɔ̃tɔe.

Lɔlɔ̃ dzie wotua nuteƒewɔwɔ na Yehowa ɖo. Eʋãa ame be wòalɔ̃ nusi Yehowa lɔ̃na ahalé fu nu vɔ̃ɖi siwo Yehowa lé fui. (Psalmo 97:10) Esi Yehowa ƒe nɔnɔme vevitɔe nye lɔlɔ̃ ta la, nuteƒewɔwɔ na Mawu xea mɔ na ame be wòagawɔ nu ŋutasesẽtɔe ɖe ame bubuwo ŋu o. (Yohanes I, 4:8) Eyata ne nuteƒewɔwɔ na Mawue na ame aɖe ɖɔ li eƒe subɔsubɔdzixɔsewo la, mefia be megalɔ̃ eƒe ƒomea o.

Nuteƒewɔwɔ na Mawu —Enye Viɖenu Gã Aɖe

Nyɔnu si ƒe nya míegblɔ do ŋgɔ ɖe eƒe nuwɔnawo me ale: “To nye Biblia sɔsrɔ̃ me la, meva dze si Yehowa be eyae nye Mawu vavãtɔ la, eye metu mía kplii dome ƒomedodo kplikplikpli ɖo. Yehowa to vovo kura tso mawu siwo mesubɔna tsã la gbɔ; eda sɔ pɛpɛpɛ le lɔlɔ̃, dzɔdzɔenyenye, nunya, kple ŋusẽ me. Esi Yehowa di be woasubɔ ye ɖeɖeko ta la, ehiã be maɖe asi le mawu bubuwo ŋu.

“Dzinyelawo gblɔ nam enuenu be yewomekpɔ dzidzɔ ɖe ŋunye kura o eye be mele ŋukpe dom yewo. Esi ŋudzedze si dzinyelawo akpɔ ɖe ŋunye nɔ vevie nam ta la, esia sesẽ nam ŋutɔ. Gake esi menɔ tsitsim le Biblia me nyateƒe ŋuti sidzedzea me la, tiatiaa me va kɔ nam ƒã. Nyemate ŋu agbe Yehowa o.

“Tiatia be mawɔ nuteƒe na Yehowa tsɔ wu be mawɔe na subɔsubɔkɔnyinyiwo mefia be nyemele nuteƒe wɔm na nye ƒomea o. Medzena agbagba be mana woanya to nye nyawo kple nuwɔnawo me be mese alesi sem wole le wo ɖokui me la gɔme. Gake ne nyemewɔ nuteƒe na Yehowa o la, ekema maxe mɔ ɖe nye ƒomea nu be woagava nya eyama o, eye ema anye nuteƒemawɔmawɔ ŋutɔŋutɔ.”

Nenema kee womate ŋu agblɔ be ame aɖe nye yomemɔfiala ne nuteƒewɔwɔ na  Mawu bia be wòagade akpa aɖeke dzi le dunyahehe me o eye be wòaƒo asa na aʋawɔwɔ o. Alesi Zlatko ɖe eƒe nuwɔnawo me enye si: “Togbɔ be megblɔna be Kristotɔe menye tsɔ tsii hã la, menye Kristotɔe meɖe o. Esi aʋaa dzɔ la, akpa evea siaa bia be ele be mawɔ nuteƒe na yewo. Wozii ɖe dzinye be matia akpa si dzi made. Mewɔ aʋaa ƒe etɔ̃ kple afã sɔŋ. Mlɔeba, mía kple srɔ̃nye míesi yi Croatia, afisi míedo go Yehowa Ðasefowo le.

“Le míaƒe Biblia sɔsrɔ̃ me la, míeva se egɔme be Yehowae nye amesi ko wòle be míawɔ nuteƒe na eye be edi tso mía si be míalɔ̃ mía havi metsɔ le subɔsubɔha si me wòtso alo ameƒomevi si wònye o. Fifia la, mía kple srɔ̃nye míewɔ ɖeka le míaƒe tadedeagu na Yehowa me, eye mesrɔ̃e be nyemate ŋu anye nuteƒewɔla na Mawu aganɔ aʋa wɔm kple hanyevi o.”

Nuteƒewɔwɔ si Sɔ Ðe Sidzedze Vavãtɔ Nu

Esi Yehowae nye mía Wɔla ta la, nuteƒewɔwɔ na eyamae wòle be wòaxɔ nɔƒe gbãtɔ na nuteƒewɔwɔ bubu ɖesiaɖe. (Nyaɖeɖefia 4:11) Gake be míagana nuteƒewɔwɔ na Mawu natrɔ zu zazɛ̃nyahehe kple nusi gblẽa nu o la, ele be wòasɔ ɖe sidzedze vavãtɔ nu. Biblia xlɔ̃ nu mí be: “Mina woawɔ mi yeye le miaƒe tamesusu ƒe gbɔgbɔ la me, eye mido ame yeye, si wowɔ le Mawu ƒe nɔnɔme nu la, le [nuteƒewɔwɔ vavãtɔ, NW ] me.” (Efesotɔwo 4:23, 24) Dzi nɔ ŋutsu xɔŋkɔ si ŋlɔ nya mawo siwo tso gbɔgbɔ me la ƒo wòtsɔ ku nuteƒewɔwɔ si ƒomevi wotsɔ nyii la me. Eƒe numedzodzroa na wòwɔ tɔtrɔ ɖevi aɖe.

Ẽ, Saul dze ŋgɔ nuteƒewɔwɔ ƒe dodokpɔwo, abe alesi ame geɖe hã dze ŋgɔe le míaƒe ɣeyiɣia me ene. Wotsɔ Saul ƒe ƒomea ƒe kɔnyinyi siwo ŋu womefena le kura o la nyii wòtsi, eye wòva xɔ ŋkɔ le nuteƒewɔwɔ me na subɔsubɔha si me wodzi ɖo. Eƒe nuteƒewɔwɔ siae ʋãe be wòwɔ ŋutasẽnuwo ɖe amesiwo ƒe nukpɔsusu mewɔ ɖeka kple etɔ o la ŋu gɔ̃ hã. Saul xɔ ŋkɔ le Kristotɔwo ƒe aƒewo dzi dzedze kple wo léle ayii be woahe to na wo ahawu wo gɔ̃ hã me.—Dɔwɔwɔwo 22:3-5; Filipitɔwo 3:4-6.

Gake, esi Biblia ŋuti sidzedze vavãtɔ nya su Saul si ko la, ewɔ nusi ehati geɖewo bu bometsinui. Eɖɔ li subɔsubɔha si me wònɔ. Saul, si wova yɔ emegbe be apostolo Paulo la, tiae be yeawɔ nuteƒe na Mawu tsɔ wu be yewɔe na kɔnyinyiwo o. Nuteƒewɔwɔ na Mawu si wotu ɖe sidzedze vavãtɔ dzie ʋã Saul wòzu amesi ɖea mɔ ɖe nu ŋu faa, helɔ̃a ame, kple amesi dea dzi ƒo na ame, si to vovo na zazɛ̃nyahehe ƒe nɔnɔme gblẽnu si nɔ esi tsã la.

Nukatae Wòle Be Nàwɔ Nuteƒe?

Nana be míaƒe nuteƒewɔwɔ nasɔ ɖe Mawu ƒe dzidzenuwo nu hea viɖe ɖedzesiwo vɛ. Le kpɔɖeŋu me, ƒe 1999 nyatakaka aɖe si tso Australiatɔwo ƒe Ƒome Ŋuti Nusrɔ̃ƒe gblɔ be nu siwo naa srɔ̃ɖeɖe nɔa anyi didina eye dzidzeme nɔa eme la dometɔ aɖewo nye “kakaɖeamedzi, anukwareɖiɖi na ame nɔewo . . . [kple] gbɔgbɔmemenyenye ƒe amesinɔnɔ.” Numekuku ma  ke va kpɔe be “srɔ̃ɖeɖe siwo li ke eye dzidzeme le wo me” naa ŋutsuwo kple nyɔnuwo kpɔa dzidzɔ, nɔa lãmesẽ me, henɔa agbe didi wu eye srɔ̃ɖeɖe like mawo naa mɔnukpɔkpɔ nyui sua ɖeviwo si be woakpɔ dzidzɔ le agbe me.

Le egbexexe si me mele dedie o me la, nuteƒewɔwɔ le abe ka si le tsiƒula aɖe si tsi lé kple tɔdziʋu si va ɖee la dome ene. Ne “tsiƒula” la meku ɖe kaa ŋu nuteƒewɔwɔtɔe o la, ƒutsotsoeawo kple ya anɔ eƒom anɔ yiyim anɔ gbɔgbɔmee. Gake ne wòku ɖe nu bubu aɖe ŋu la, ɖeko wòle abe tɔdziʋu si le nyɔnyrɔm ŋue wotsi kae ɖo ene. Abe Saul ene la, ekpɔe be wole ye hem de nuwɔna gbegble me. Gake nuteƒewɔwɔ na Yehowa, si wotu ɖe sidzedze vavãtɔ dzi, nye ka si naa míelia ke eye wòkplɔa mí yia ɖeɖekpɔkpɔ gbɔe.—Efesotɔwo 4:13-15.

Yehowa do ŋugbe sia na amesiwo wɔa nuteƒe nɛ be: “Yehowa lɔ̃a nya dzɔdzɔe, eye megblẽa eƒe mawumemewo ɖi o; akpɔ wo ta tegbee.” (Psalmo 37:28) Eteƒe madidi o, woakplɔ amesiwo katã wɔ nuteƒe na Yehowa ayi ɖe paradisonyigba dzi, afisi woavo tso konyifafa kple vevesese me le ahase vivi le ƒomedodo si anɔ anyi tegbee siwo me subɔsubɔhawo kple dunyahehe me mama manɔ o.—Nyaɖeɖefia 7:9, 14; 21:3, 4.

Fifia gɔ̃ hã la, ame miliɔn geɖe siwo le xexeame godoo de dzesii be nuteƒewɔwɔ na Yehowa ɖeɖekoe hea dzidzɔkpɔkpɔ vavã ma vɛ. Nukatae màna Yehowa Ðasefowo nakpe ɖe ŋuwò nàtsɔ nyateƒe siwo le Biblia me adzro wò nukpɔsusu ku ɖe nuteƒewɔwɔ ŋu me o? Biblia gblɔ na mí be: ‘Miyi edzi mianɔ mia ɖokui dom kpɔ be miele xɔse la mea; miyi edzi mianɔ amesi ƒomevi mienye la ɖem fia!’—Korintotɔwo II, 13:5.

Ebia dzinɔameƒo be míaku xɔse si le mía si kple nusitae míelé eme ɖe asi la me, gake viɖe ate ŋu anɔ míaƒe agbagbadzedzewo ŋu ne wote mí ɖe Yehowa Mawu ŋu. Nyɔnu si míeyɔ do ŋgɔ la ɖe ame geɖe ƒe seselelãme gblɔ esime wògblɔ be: “Mesrɔ̃e be nuteƒewɔwɔ na Yehowa kple eƒe dzidzenuwo me léle ɖe asi kpena ɖe mía ŋu míedana sɔna le míaƒe nuwɔwɔ kple míaƒe ƒometɔwo me eye míezua ame ɖɔʋuwo le nutoa me. Aleke kee nuteƒewɔwɔ ƒe dodokpɔa ɖasesẽ o, ne míewɔa nuteƒe na Yehowa la, awɔ nuteƒe na mí ɣesiaɣi.”

[Picture Credit Lines on page 4]

Churchill, upper left: U.S. National Archives photo; Joseph Göbbels, far right: Library of Congress

[Nɔnɔmetata siwo le axa 6]

Sidzedze vavãtɔe ʋã Saul be wòɖɔ li nusi wònɔ nuteƒe wɔm na

[Nɔnɔmetata si le axa 7]

Nukata màtsɔ Biblia me nyateƒea adzro wò nuteƒewɔwɔ me o?