Dzi Dzɔ Wo be Yewosrɔ̃ Nuxexlẽ!

LE Solomon Islands ƒe akpa aɖewo la, amesiwo nye Yehowa Ðasefowo fifia dometɔ 80 le alafa me lɔƒoe menya nuxexlẽ o. Menye ɖeko esia ɖe woƒe gomekpɔkpɔ le kwasiɖa sia kwasiɖa ƒe kpekpewo me dzi kpɔtɔ o ke ena wòsesẽ na wo be woafia Fiaɖuƒea ƒe nyateƒeawo hã ame bubuwo. Ðe wòanya wɔ na ame tsitsi siwo melé nuŋlɔti kpɔ gbeɖe o be woava nye agbalẽnyalawoa?

Wozã agbalẽ gbadza si nye Apply Yourself to Reading and Writing, si Yehowa Ðasefowo ta, le agbalẽsrɔ̃sukuwo me le Yehowa Ðasefowo ƒe hame ɖesiaɖe kloe si le Solomon Islands me. Nuteƒekpɔkpɔ siwo gbɔna la ɖe alesi woto ɖoɖo yeye sia dzi kpe ɖe ame alafa geɖe ŋu wotu ŋutete yeyewo ɖo la fia. Vevietɔ wu la, nuxexlẽ sɔsrɔ̃ kpe ɖe wo ŋu be wote ŋu ɖia ɖase nyuie na amewo tso woƒe xɔse ŋu.—Petro I, 3:15.

Dutanyanyuigblɔla si woɖo ɖe hame aɖe si me Fiaɖuƒegbeƒãɖela alafa ɖeka kple edzivɔ le de dzesii be le kwasiɖa sia kwasiɖa ƒe Biblia-nusɔsrɔ̃ si wozãa Gbetakpɔxɔ tsɔ wɔnae me la, ame ʋɛ aɖewo ko sie magazine sia nɔna eye esiwo le ʋɛ wu koe ɖoa nyawo ŋu. Nuka gbɔe wòtso? Agbalẽmanyamanyae. Esi woɖe gbeƒã le hamea me be woaɖo suku aɖe si me woafia nuxexlẽ kple nuŋɔŋlɔ le la, dutanyanyuigblɔla la tsɔ eɖokui na faa be yeafia nu. Gbã la, sukuvi ʋɛ aɖewo koe vana, gake eteƒe medidi o ame 40 kple edzivɔ siwo xɔ ƒe vovovowoe dena.

Nukae do tso eme? Dutanyanyuigblɔlaa gblɔ be: “Le agbalẽsrɔ̃sukua gɔmedzedze ɣeyiɣi kpui aɖe megbe la, meyi ɖe asime le ŋdi ga ade me be maƒle nuɖuɖu na dutanyanyuigblɔlawo ƒe ƒomea. Mekpɔ sukuviawo dometɔ aɖewo, kple ɖevi suewo gɔ̃ hã, le afima wonɔ yevune kple detsiƒonuwo dzram. Nukatae? Elabena  wodi be yewoakpɔ ga atsɔ aƒle nuŋlɔti kple agbalẽ si yewoazã le agbalẽsrɔ̃sukua me! Azɔ hã alesi Gbetakpɔxɔ anɔ wo dometɔ ɖesiaɖe si tae wole sukua vam ɖo.” Egblɔ kpee be: “Fifia le hamea ƒe Gbetakpɔxɔ Nusɔsrɔ̃ me la, ɖeviwo kple tsitsiawo siaa kpɔa gome le eme, eye agbe nɔa míaƒe numedzodzroa me.” Dutanyanyuigblɔla sia gakpɔ dzidzɔ ŋutɔ esime sukuviawo dometɔ ene bia nenye be yewoate ŋu akpɔ gome le dutoƒogbeƒãɖeɖedɔa me elabena, abe alesi woa ŋutɔwo gblɔe ene la, ‘womegavɔ̃na o.’

Ŋusẽ nyui si esia kpɔ ɖe agbalẽsrɔ̃sukua delawo dzi la de ŋgɔ wu nuxexlẽ kple nuŋɔŋlɔ sɔsrɔ̃ ko. Le kpɔɖeŋu me, ƒe geɖee nye ma si hamea tsi dzi ɖe Ðasefo aɖe si srɔ̃nyɔnu menye Ðasefo o ŋu. Ne amewo do dziku nɛ vie ko la, eƒua kpe wo eye wòtsɔa ati ɖe nyɔnu bubuwo gɔ̃ hã ŋu. Ne eyi Kristotɔwo ƒe kpekpewo kple srɔ̃ŋutsua ɣeaɖewoɣi la, eʋãa ŋu ɖe srɔ̃ŋutsua nu ale gbegbe be ɖeko ŋutsua te gaŋkui yibɔ ɖɔɖɔ ale be nyɔnua nagabu fɔe be ele nyɔnu bubuwo kpɔm o.

Gake esi wodze agbalẽsrɔ̃sukua gɔme emegbe kpuie la, nyɔnu sia wɔ dzaa bia be: “Mate ŋu ade sukua mahã?” Woɖo eŋu nɛ be ẽ. Tso ɣemaɣi la, sukua alo hamea ƒe kpekpewo meto eŋu ŋkeke ɖeka kpɔ o. Eku kutri le eƒe nuxexlẽ sɔsrɔ̃a me eye wòwɔ ŋgɔyiyi nukutɔe, si na wòkpɔa dzidzɔ vevie. Nusi wòbia ɖe eyome enye: “Mate ŋu asrɔ̃ Biblia kple mi mahã?” Srɔ̃ŋutsua lɔ̃ faa dze nusɔsrɔ̃ gɔme kplii, eye wòyi edzi wɔ ŋgɔyiyi le eƒe nuxexlẽ kple nuŋɔŋlɔ sɔsrɔ̃ kpakple Biblia ŋuti sidzedzea me.

Le amesi xɔ ƒe 50, si melé nuŋlɔti kpɔ gbeɖe o gome la, nuŋlɔti lelé atsɔ aŋlɔ ŋɔŋlɔdzesiwoe le gɔmedzedzea me ate ŋu anye kuxi gã aɖe. Alesi wo dometɔ aɖewo léa nuŋlɔtia sesĩe ɖe agbalẽa dzi le gɔmedzedzea me na woƒe asibidɛwo nu ɖo loholoho. Le agbagbadzedze kwasiɖa geɖe be woalé nuŋlɔti megbe la, sukuviawo dometɔ aɖewo gblɔ kple dzidzɔ gã aɖe be: “Mate ŋu aʋã asi le agbalẽa dzi bɔbɔe!” Sukuviawo ƒe ŋgɔyiyi wɔwɔ kpɔkpɔ hã doa dzidzɔ na nufialaawo. Nufiala ɖeka gblɔ be: “Nufiafia sukuviwo nyea nusi doa dzidzɔ geɖe na ame, eye sukuviawo ɖea alesi wokpɔa ŋudzedze ɖe nunana sia si tso Yehowa gbɔ fiana to akpe sisi le nusɔsrɔ̃ ɖesiaɖe ƒe nuwuwu me.”

Ðasefo siawo siwo va nya nuxexlẽ azɔ tsɔ kpe ɖe dutanyanyuigblɔlawo ŋu le dzidzɔ kpɔm. Nukatae? Elabena woate ŋu azã woƒe nuxexlẽ kple nuŋɔŋlɔ ŋutete atsɔ ade bubu Yehowa ŋu azɔ.

[Nɔnɔmetata siwo le axa 8, 9]

Ðeviwo kple tsitsiawo siaa kpɔ ŋudzedze ɖe agbalẽsɔsrɔ̃sukua ŋu