“Mienya Nusitae Megbugbɔ Miaƒe Gaa Vɛa?”

NANA, si nye vidada ɖekɛ si si ŋutsuvi etɔ̃ le, si le Kaspi le Republic of Georgia, ŋlɔ bena: “Oo, mehiã ga ale gbegbe!” Ŋdi aɖe la, afisi wòakpɔ ɖe le ƒe didia va eme nɛ. Efɔ lari 300 le afisi te ɖe kpovitɔwo ƒe dɔwɔƒe ŋu. Ame aɖeke menɔ afima o. Ga gbogbo aɖee wònye. Le nyateƒe me la, le ƒe atɔ̃ si lari va zu dukɔa ƒe ga si wozãna me la, Nana mekpɔ lari 100 ƒe gagbalẽ kpɔ o. Ne asitsala siwo le afima wɔ dɔ ƒe geɖe hã la, woƒe ga made nenema o.

Nana bia eɖokui be: ‘Nukae matsɔ ga sia awɔe nenye be ana nye xɔse, mawuvɔvɔ̃, kple gbɔgbɔmemenyenye me nagblẽ?’ Etu Kristotɔwo ƒe nɔnɔme siawo ɖo eye wòdo dzi le yometiti sesẽwo kple ƒoƒowo me gɔ̃ hã, le eƒe dzixɔse ta.

Esi Nana yi ɖe kpovitɔwo ƒe dɔwɔƒea la, ekpɔe be kpovitɔ atɔ̃ nɔ nane dim vevie. Ekpɔe dze sii be wonɔ gaa dim, eyata ete ɖe wo ŋu hebia wo be: “Ðe míebu nanea?”

Woɖo eŋu be: “Gae míebu.”

“Ho nenie?”

“Lari 300!”

Nana gblɔ be: “Mefɔ miaƒe gaa.” Emegbe ebia be: “Mienya nusita megbugbɔ miaƒe gaa vɛa?” Womenyae o.

Eyi edzi be: “Esi menye Yehowa Ðasefo tae. Ne menye nenema o la, anye ne nyemagbugbɔ miaƒe gaa vɛ o.”

Kpovitɔwo ƒe amegã si ƒe ga bu la tsɔ lari 20 na Nana tsɔ da akpe nɛ ɖe eƒe anukwareɖiɖi ta.

Nyaa kaka ɖo Kaspi nutoa katã me enumake. Le ŋufɔke la, nyɔnuvi si woxɔ be wòanɔ kpovitɔwo ƒe dɔwɔƒea dzram ɖo yi ɖagblɔ na Nana be: “[Amegã la] xɔa miaƒe agbalẽwo kɔna ɖe eƒe ɔfis ɣesiaɣi. Fifia ya ɖewohĩ akpɔ dzidzɔ ɖe wo ŋu geɖe wu.” Kpovitɔawo dometɔ ɖeka gblɔ gɔ̃ hã be: “Ne ɖe amewo katã nye Yehowa Ðasefowo la, amekae awɔ nu vlo?”