Xexe si me Nuteƒewɔwɔ Ŋuti Nukpɔsusu Totro Le

LE FIÐA fiẽ xɔdzo aɖe me le Tel Aviv, Israel la, ɖekakpui aɖe yi ɖawɔ ɖeka kple sɔhɛwo ƒe ƒuƒoƒo aɖe si nɔ lalam le zãmodzakaɖeƒe aɖe godo. Le aɖabaƒoƒo ʋɛ aɖewo megbe la bɔmb aɖe wó ŋɔdzitɔe le ameha la dome.

Bɔmbdala ameɖokuiwula bubu hãe de eƒe agbe afɔku me heɖe sɔhɛ 19 bubuwo ƒe agbe ɖa ŋutasesẽtɔe. Kɔdzidɔwɔla aɖe gblɔ na nyadzɔdzɔŋlɔlawo emegbe be: “Amegbetɔ ƒe ŋutilã kaka ɖe afisiafi, wo katã nye sɔhɛwo, ɖevi dzaawo—enye nudzɔdzɔ si dziŋɔ wu esiwo katã teƒe mekpɔ kpɔ.”

Thurstan Brewin ŋlɔ le Lancet me be: “Enye nɔnɔme si nyoa amesiame ŋu, ele abe nuteƒewɔwɔ . . . , si ate ŋu ana aʋa nadzɔ bɔbɔe eye enutsitsi asesẽ ŋutɔ ene.” Ẽ, tso Kristodukɔa ƒe Atitsogaʋawo dzi vaseɖe amewo tsɔtsrɔ̃ le Nazi Germany dzi la, amegbetɔwo ƒe ŋutinya me yɔ fũ kple amesiwo wowu le nuteƒewɔwɔ ƒe ŋkɔ me la ƒe ʋu.

Amesiwo Ŋu Nuteƒemawɔmawɔ Le Nu Gblẽm le Le Dzidzim Ðe Edzi

Ðikeke mele eme o be nuteƒewɔwɔ me zazɛ̃nyahehe ate ŋu agblẽ nu, gake nuteƒemawɔmawɔ hã ate ŋu agblẽ amegbetɔƒomea dome. Webster’s New Encyclopedic Dictionary gblɔ be nuteƒewɔla nyenye fia be ‘woaɖi anukware na ame alo awɔ ɖe ɖoɖo aɖe dzi pɛpɛpɛ’ eye “efia ame ŋutɔ ƒe tenɔnɔ sesĩe le tetekpɔ ɖesiaɖe si adze ŋgɔe eye wòadi be yeagblẽ edome la nu.” Togbɔ be ame akpa gãtɔ gblɔna be nuteƒewɔwɔ sia nyoa yewo ŋu hã la, nuteƒemawɔmawɔ ƒe dzidziɖedzi le nu gblẽm le amegbetɔƒomea ƒe akpa vevitɔ kekeake—si nye ƒomea ŋu ale gbegbe. Srɔ̃gbegbe dzi ɖe edzi ŋutɔ, eye nusiwo gbɔ tsom wòle enye ame ŋutɔ ƒe dzidzemekpɔkpɔ didi, gbesiagbe gbenɔnɔ me hloloetsotsowo, kple anukwaremaɖimaɖi le gbɔdɔdɔnyawo me ƒe dzidziɖedzi me tsonuwo. Eye abe alesi wònɔ le bɔmb si wó le Tel Aviv la metsilawo gome ene la, sɔhɛwoe nyea ame maɖifɔ siwo ŋu wògblẽa nu le zi geɖe.

Nyatakaka aɖe gblɔ be: “Zi geɖe la, ɖevi ƒe sukudede enye nusiwo ŋu ƒome ƒe kemalimali, si tsoa srɔ̃gbegbe, kaklã, kple dzilaɖeka nyenye gbɔ, gblẽa nu le la dometɔ ɖeka.” Edze abe ŋutsuvi siwo le vidada dzilaɖekaƒomewo me koŋ ƒe suku mee te ŋu gblẽna, woawoe wua wo ɖokui wu, eye woawoe nye ɖevi siwo wɔa nuvlowo wu ene. Ƒe sia ƒe la, ɖevi miliɔn ɖeka siwo le United States dzilawo gbea wo nɔewo, eye le ƒe ɖesiaɖe me la, kaka ɖevi siwo wodzina ɖe dzila srɔ̃tɔwo ƒe ƒomewo me le dukɔ ma me ƒe afã naxɔ ƒe 18 la, wova zua amesiwo dzilawo gbe wo nɔewo. Akɔntabubuwo ɖee fia be dzigbãnya sia  ƒomevie dzɔna ɖe sɔhɛ geɖewo dzi le xexeame ƒe akpa bubuwo.

Nuteƒewɔwɔ —Dzidzenu si Kɔkɔ Akpae Wònyea?

Nuteƒe si meganya le wɔwɔm le ŋkeke sia me o la na Fia Dawid ƒe nyawo sɔ fifia wu ɣeyiɣi ɖesiaɖe be: “Yehowa, xɔ na ame, elabena mawumemewo nu tso, eye anukwaretɔwo bú le amegbetɔviwo dome!” (Psalmo 12:2) Nukatae nuteƒemawɔmawɔ bɔ alea gbegbe ɖo? Roger Rosenblatt ŋlɔ ɖe Time magazine me be: “Togbɔ be nuteƒewɔwɔ nye dzidzenu nyui hã la, vɔvɔ̃ fũ akpa, ɖikeke le ame ɖokui me, ɖokuitɔdidi nuwɔnawo kple ŋkɔxɔxɔ didi le mía me ale gbegbe be míate ŋu anɔ agbe ɖe enu o.” Esi Biblia nɔ nu ƒom tso ɣeyiɣi si me míele ŋu la, egblɔe tẽ be: “Amewo anye ɖokuilɔ̃lawo, . . . ame mawɔnuteƒewo, amesiwo melɔ̃a ame ƒe nya o.”—Timoteo II, 3:1-5, NW.

Esi míekpɔ ŋusẽ sẽŋu si nuteƒewɔwɔ—alo nuteƒemawɔmawɔ—kpɔna ɖe ame ƒe tamebubu kple nuwɔnawo dzi la, míabia be, ‘Ameka koŋue wòdze be míawɔ nuteƒe na?’ Kpɔ nusi nyati si kplɔe ɖo gblɔ ku ɖe biabia sia ŋu ɖa.

[Nɔnɔmetata Tsoƒe si le axa 3]

Photo above: © AFP/CORBIS