‘Mitsɔ Ke Mia Nɔewo Faa’

ÈXƆE se be Mawu tsɔ wò nuvɔ̃wo ke wòa? Edze abe ame tsitsi ɖesiaɖe xɔe se nenema ene le United States. Ðk. Loren Toussaint, si nye ame gbãtɔ si ŋlɔ nu tso numekuku aɖe si wowɔ le Hadomegbenɔnɔ Ŋuti Numekuƒe si le Michigan Yunivɛsiti me ŋu, ka nya ta be, le Amerikatɔ 1,423 siwo wobia gbee dome la, ame tsitsi siwo xɔ wu ƒe 45 dometɔ siwo ade 80 le alafa me gblɔ be Mawu tsɔ yewoƒe nuvɔ̃wo ke yewo.

Gake ewɔ nuku be amesiwo wobia gbee la dometɔ 57 le alafa me koe gblɔ be yewotsɔa amewo ƒe vodadawo kea wo. Akɔntabubu ma na míeɖo ŋku Yesu ƒe Todzimawunyaa me nyawo dzi be: “Ne mietsɔ amewo ƒe vodadawo ke wo la, ekema mia Fofo, si le dziƒo la, atsɔe ake miawo hã.” (Mateo 6:14, 15) Ẽ, nusiwo dzi Mawu ƒe tsɔtsɔke nɔ te ɖo dometɔ aɖee nye míaƒe lɔlɔ̃ faa be míatsɔ ake ame bubuwo.

Apostolo Paulo ɖo ŋku gɔmeɖose sia dzi na Kristotɔ siwo nɔ Kolose. Exlɔ̃ nu wo bena: “Mihe adodo kple mia nɔewo, eye mitsɔ ke mia nɔewo, ne nya aɖe le ame aɖe si ɖe ame aɖe ŋuti la, alesi Kristo hã tsɔ ke mii la, miawo hã miwɔ nenema ke!” (Kolosetɔwo 3:13) Le nyateƒe me la, menye ɣesiaɣie esia nya wɔna bɔbɔe o. Le kpɔɖeŋu me, ne ŋuwòe wogblɔ nya tɔame siwo ŋu womebu o ɖo la, asiɖeɖe le wo ŋu ate ŋu asesẽ.

Ke hã vodadawo tsɔtsɔ ake ƒe viɖewo sɔ gbɔ ŋutɔ. Ðk. David R. Williams, si nye hadomegbenɔnɔŋutinunyala gblɔ tso numekuku si wòwɔ ŋu be: “Míekpɔe be ƒomedodo sẽŋu tɔxɛ aɖe le vodadawo tsɔtsɔ ke amewo kple tagbɔdɔ malémalé dome le Amerikatɔ tsitsiwo kple esiwo xɔ wu ƒe 40 dome.” Nya sia wɔ ɖeka kple Fia nyanu Salomo ƒe nyawo, amesi ŋlɔ ƒe 3,000 aɖewoe nye si va yi be: “Dzi nyodɔme enye agbe le lã me.” (Lododowo 14:30) Esi tsɔtsɔke ƒe gbɔgbɔ naa ƒomedodo nyui nɔa mía kple Mawu kpakple mía haviwo dome ta la, susu nyuiwo li si ta wòle be míanye amesiwo tsɔa vodada kena faa tso dzime.—Mateo 18:35.