Alesi Amewo Dina Vevie Egbea be Woaɖo Amewo “Ame Kɔkɔewoe”

“Èɖo ŋku ɣeaɖeɣi si ame xɔŋkɔwo ŋu nya sese ti wò la dzia? Ewɔ abe ema mewɔa naneke na Amerikatɔ miliɔn 4.2 siwo kpɔ Dada Teresa ƒe kunuwɔwɔ teƒe le Sept. 13 dzi la o ene. Tso esime wòku le Sept. 5 dzi la, ame gbogbo aɖewo bia be Vatican naɖoe ame kɔkɔe le woƒe ɖoɖoa nu. Ame ʋɛ aɖewo koe ke ɖi be womawɔe.”—SUN-SENTINEL, UNITED STATES, OCTOBER 3, 1997.

AME geɖe bua kpekpeɖeŋunana kple dɔmenyowɔwɔ ƒe dɔ si Katoliko mawunyadɔgbedela Dada Teresa wɔ la be enye nusita wòsɔ be woaɖoe ame kɔkɔe. Ame xɔŋkɔwo le subɔsubɔha bubuwo hã me. Gake ɖewohĩ womesea wo dometɔ aɖeke ŋkɔ tsɔ wu esiwo Roma Katoliko Ha ɖona o.

Papa John Paul II ɖo amesiwo wu 450 ame kɔkɔewo le eƒe papa ɖuɣi, si sɔ gbɔ wu ame xexlẽme si papa siwo katã nɔ anyi le ƒe alafa 20 lia me ɖo la ƒe ƒuƒoƒo. * Nukatae amewo kpɔa ŋudzedze ɖe “ame kɔkɔewo,” siwo dometɔ geɖe womenya le Katolikotɔ akpa gãtɔ dome o, ŋu alea gbegbe ɖo?

Mawunyaŋununyala Lawrence Cunningham si le Notre Dame Yunivɛsiti ɖe eme be: “Tamesusu si li be kɔkɔenyenye anɔ xexeame ye nyɔa amewo ƒe ɖetsɔleme. Ame kɔkɔewo ƒe anyinɔnɔ nyea kpeɖodzi be agbe tɔxɛ aɖe anya nɔ, egbea kura gɔ̃ hã.” Gakpe ɖe eŋu la, wobunɛ be “ame kɔkɔewo” te ŋu toa mɔnu tɔxɛ aɖe dzi tena ɖe Mawu ŋu, si na wonyea domenɔla nyuiwo na agbagbeawo. Ne woke ɖe “ame kɔkɔe” aɖe ƒe nuzazãwo alo eƒe ŋutinu aɖe ŋu la, wotsɔa subɔsubɔ ƒe bubu naa nusiawo le esi woxɔe se be ŋusẽ le wo me ta.

Wotso nya me le Trent ƒe Aɖaŋuɖotakpekpe ƒe katekismo, si wota le ƒe alafa 16 lia me be woagbugbɔ atsɔ aɖo kpe Katolikohaa ƒe nufiafia dzi me be: “Mía tɔ dzɔ be míaƒo nya ta be, le esi bubudede ame kɔkɔe ‘siwo ku le Aƒetɔ la me ŋu,’ wo biabia be woaxɔ nya ɖe akɔ na ame, kple subɔsubɔ ƒe bubu tsɔtsɔ na woƒe nuzazã kple afi kɔkɔeawo naɖe Mawu ƒe ŋutikɔkɔe dzi akpɔtɔ teƒe la, ɖee wodzinɛ ɖe edzi boŋ le esi wòdo ŋusẽ Kristotɔa ƒe mɔkpɔkpɔ eye ŋusẽ ɖoa eŋu, eye wònyea dzidzɔ na eya ŋutɔ be wòasrɔ̃ woƒe nyuiwɔwɔ la ta.” (The Catechism of the Council of Trent, 1905) Le nyateƒe me la, Kristotɔ vavãwo di be yewoanɔ agbe nyui, be yewoate ɖe Mawu ŋu le mɔ nyuitɔ nu, ahaxɔ Mawu ƒe kpekpeɖeŋu. (Yakobo 4:7, 8) Eyata le Mawu ƒe Nya nu la, amekawoe dze anye ame kɔkɔe vavãwo? Eye akpa kae wowɔna?

[Etenuŋɔŋlɔ]