Nyabiabia Siwo Tso Exlẽlawo Gbɔ

• Ðe Lucifer nye ŋkɔ si Biblia yɔna na Satana?

Zi ɖeka koe ŋkɔ Lucifer dze le Ŋɔŋlɔawo me eye Biblia gɔmeɖeɖe aɖewo me koe wòdze le. Le kpɔɖeŋu me, King James Version ɖe Yesaya 14:12 gɔme be: “Aleke gbegbe nège tso dziƒo enye si, O Lucifer, agudzevi la!”

Hebrigbe me nya si gɔme woɖe be “Lucifer” fia “amesi le keklẽm.” Septuagint zã Helagbe me nya si fia “amesi naa agu dzena.” Le esia ta, gbegɔmeɖela aɖewo ɖe Hebrigbe gbãtɔa gɔme be “ŋdiɣletivi” alo “Ŋukeɣletivi.” Gake Jerome ya zã “Lucifer” (akaɖitsoƒe) le eƒe Latingbe me Vulgate me, eye afisiae nyagbe sia tso ge ɖe Biblia gɔmeɖeɖe vovovowo me.

Amekae nye Lucifer? Míakpɔ nyagbɔgblɔ “ŋukeɣletivi” alo “Lucifer” le se si Yesaya de na Israel-viwo le nyagblɔɖi me be ‘woado hamelo ɖe Babel-fia ŋu’ me. Eyata enye nya aɖe si wogblɔ tẽ ɖe Babilontɔwo ƒe fiaƒome ŋu ƒe akpa aɖe. Be nusi ɖɔm wòle be “ŋukeɣletivi” la nye amegbetɔ ke menye gbɔgbɔmenuwɔwɔ o la dze le nya si nye, “Woatutu wò aƒu tsiẽƒe” me. Tsiẽƒe enye ameƒomea ƒe yɔdo—menye Satana Abosam ƒe nɔƒee o. Gawu la, amesiwo kpɔ eteƒe wohe Lucifer va nɔnɔme sia mee la bia be: ‘Ŋutsu, si na anyigba dzo nyanyanya, enye esia?’ Edze ƒã be amegbetɔ aɖe yɔmee wole be “Lucifer,” ke menye gbɔgbɔmenuwɔwɔ aɖee o.—Yesaya 14:4, 15, 16.

Nukatae woɖɔ Babilontɔwo ƒe fiaƒomea wòɖe dzesi alea? Ele be míaɖo ŋku edzi be woayɔ Babel-fia la be ŋukeɣletivi vlodoametɔe le eƒe anyidzedze vɔ megbe. (Yesaya 14:3) Ðokuitɔdidi ƒe dada ƒoe ɖe Babilon fiawo nu be woado wo ɖokui ɖe dzi wu amesiwo dome wole. Fiaƒomea ƒe ɖokuidodoɖedzi gbɔ eme ale gbegbe be woɖɔe be eƒo adegbe be: “Malia dziƒo, mali nye fiazikpui ɖe Mawu ƒe ɣletiviwo ta me, eye mabɔbɔ nɔ takpeto la dzi le anyiehe kekeake; . . . mía kple dziƒoʋĩtɔ la míanɔ tasɔsɔ me.”—Yesaya 14:13, 14.

‘Mawu ƒe ɣletiviawoe’ nye fia siwo tso Dawid ƒe fiaƒomea me. (Mose IV, 24:17) Tso Dawid dzi la, ‘ɣletivi’ siawo ɖu dzi le Zion-to dzi. Esi Salomo tu gbedoxɔa ɖe Yerusalem megbe la, ŋkɔ Zion va le tsitre ɖi na du bliboa. Wobia tso Israel-ŋutsuwo katã si le Se ƒe nubablaa me be woayi Zion zi etɔ̃ le ƒe ɖeka me. Esia wɔe be wòva zu “takpeto.” Esi Nebukadnezar ɖoe kplikpaa be yeaɖu Yudea fiawo dzi ahaɖe wo ɖa le to ma dzi la, enɔ tame si wòɖo be yeaɖo ye ɖokui ‘ɣletivi’ mawo tame la ɖem fia. Le esi wòatsɔ wo dzi ɖuɖu ƒe kafukafu ana Yehowa teƒe la, etsɔ eɖokui ɖo Yehowa teƒe dadatɔe boŋ. Eyata Babilontɔwo ƒe fiaƒomea mumu ƒu anyi megbee woyɔe alɔmeɖeɖetɔe be “amesi le keklẽm” la.

Le nyateƒe me la, Babilon dziɖulawo ƒe dada ɖe “xexe sia me mawu”—Satana Abosam—ƒe nɔnɔme fia. (Korintotɔwo II, 4:4) Ŋusẽtɔnyenye dzroa eya hã vevie eye wòdina vevie be yeaƒo Yehowa Mawu ta. Gake Lucifer menye ŋkɔ si wona Satana le Ŋɔŋlɔawo ƒe nya nu o.

 • Nukatae Kronika I, 2:13-15 yɔ Dawid be Isai viŋutsu adrelia, evɔ Samuel I, 16:10, 11 ya gblɔ be eyae nye enyilia?

Esi blema Israel-fia Saul gbe tadedeagu vavãtɔ megbe la, Yehowa Mawu dɔ nyagblɔɖila Samuel be wòayi aɖasi ami na Isai-viŋutsuwo dometɔ ɖeka. Blema nudzɔdzɔ sia si Mawu ƒe gbɔgbɔ ʋã Samuel ŋutɔ wòŋlɔ le ƒe alafa 11 lia D.M.Ŋ. me la yɔ Dawid be eyae nye Isai ƒe viŋutsu enyilia. (Samuel I, 16:10-13) Gake nusi nunɔla Ezra va ŋlɔ le ƒe 600 megbe lɔƒo la gblɔ be: “Isai dzi Eliab, amesi nye eƒe ŋgɔgbea, evelia nye Abinadab, etɔ̃lia nye Simea, enelia nye Netaneel, atɔ̃lia nye Radai, adelia nye Ozem, adrelia nye Dawid.” (Kronika I, 2:13-15) Nukae dzɔ ɖe Dawid nɔviŋutsuwo dometɔ ɖeka dzi, eye nukatae Ezra ɖe eƒe ŋkɔ le eme?

Ŋɔŋlɔawo gblɔ be “viŋutsu enyi le” Isai si. (Samuel I, 17:12) Edze ƒã be viawo dometɔ ɖeka menɔ agbe wòdidi te ŋu ɖe srɔ̃ hedzi vi o. Esi dzidzimeviwo mele esi o ta la, domenyinyi aɖeke manɔ esi le toa me o eye eƒe ƒome aɖeke meli anɔ Isai ƒe dzidzimeviwo ŋuti nuŋlɔɖiwo me hã o.

Azɔ mina míatrɔ ɖe Ezra ŋɔli ŋu. Bu nɔnɔme si me wòŋlɔ Kronika ƒe agbalẽawo le ŋu kpɔ. Yudatɔwo gbɔ tso Babilon ƒe aboyome anye ƒe 77 do ŋgɔ heva le wo denyigba dzi. Persia-fia bia tso Ezra si be wòaɖo ʋɔnudrɔ̃lawo kple Mawu ƒe Sea fialawo eye be woaɖo atsyɔ̃ na Yehowa ƒe aƒe la. Ehiã be woaŋlɔ dzidzimea ɖi pɛpɛpɛ be woaɖe amesiwo si domenyinyi le le toa me afia ahakpɔ egbɔ be amesiwo dze la koe asubɔ le nunɔlanyenye ƒe nɔƒewo. Eyata Ezra ŋlɔ dukɔa ƒe ŋutinya bliboa, hekpe ɖe Yuda kple Dawid ƒe dzidzime ŋuti nuŋlɔɖi siwo me kɔ eye kakaɖedzi le wo ŋu la ŋuti. Esia fia be Isai ƒe viŋutsu si medzi vi aɖeke hafi ku o la ƒe ŋkɔ mahiã o. Esiae na Ezra ɖe eƒe ŋkɔ le eme.