“Tɔwo Nu Wòkplɔm Yii”

LE Biblia-nyigba xɔdzowo dzi la, ehiãna be alẽwo nano tsi gbesiagbe. Eyata alẽkplɔla ƒe dɔ ƒe akpa vevi aɖee nye be wòana tsi eƒe lãhawo. Ɣeaɖewoɣi la, alẽkplɔlawo kua tsi le vudo me kɔna ɖe tsinonu me na woƒe lãhawo be alẽawo nate ŋu ano. (Mose I, 29:1-3) Gake le tsidzaŋɔli koŋ la, nuto siwo me tɔʋuwo kple tɔsisiwo le la nyea “gbɔɖemeƒe tɔwo nu” si wonɔna le tomefafa me.—Psalmo 23:2.

Ele na alẽkplɔla nyui be wòanya afisi wòakpɔ tsi kple gbedamawo siaa le na eƒe lãhawo. Alesi gbegbe wònya nutoa mee awɔe be eƒe alẽawo natsi agbe. Dawid, amesi tsɔ ƒe geɖe kplɔ alẽwo le Yudea ƒe togbɛwo dzi, tsɔ Mawu ƒe gbɔgbɔmemɔfiafia sɔ kple alẽkplɔla aɖe si kplɔa eƒe alẽwo yia gbedamawo kple agbetsidzidziwo gbɔe. Dawid gblɔ be: “Tɔwo nu wòkplɔm yii.”—Psalmo 23:1-3.

Le ƒe aɖewo megbe la, Yehowa to eƒe nyagblɔɖila Xezekiel dzi wɔ kpɔɖeŋu ma tɔgbe. Edo ŋugbe be yeaƒo yeƒe amewo nu ƒu tso anyigba siwo dzi wokaka wo ɖo la dzi, abe alesi alẽkplɔla ƒoa eƒe alẽwo nu ƒui ene. Eka ɖe edzi na wo be: “Makplɔ wo . . . ava woƒe anyigba dzi, eye manyi wo le Israel ƒe towo dzi kple baliwo me.”—Xezekiel 34:13.

Yehowa Mawu hã tsɔ ɖe le gbɔgbɔmetsi nana me vevie. Nyaɖeɖefia ƒe agbalẽa ƒo nu tso “agbetsitɔsisi aɖe” si le dodom tso Mawu ƒe fiazikpui me ŋu. (Nyaɖeɖefia 22:1) Wole amewo katã kpem be woava no tsi le tɔsisi sia me. “Amesi lɔ̃ la, [ate ŋu axɔ] agbetsi la no faa.”—Nyaɖeɖefia 22:17.

Kpɔɖeŋu ƒe agbetsi sia tsi tre ɖi na ɖoɖo si Mawu wɔ hena agbe mavɔ kpɔkpɔ. Amesiame ate ŋu adze tsi sia nono gɔme to ‘Mawu vavã ɖeka kolia la kple Yesu Kristo si wòdɔ ɖa la ŋuti sidzedze xɔxɔ’ me.—Yohanes 17:3.