‘Wɔ Nusi Ana Nàdze Nunya le Etsɔme’

“Ameƒomea ƒe akpa gãtɔ zãa woƒe sɔhɛmenɔɣi le mɔ si va wɔnɛ be woƒe nu va wɔa nublanui le woƒe tsitsime nu.” Aleae ƒe alafa 17 lia me Franse nuŋlɔla Jean de La Bruyère gblɔ. Le nyateƒe me la, sɔhɛ si mete ŋu tɔa afɔ to wɔa nusi hiã ŋuti nyametsotso o va sea veve emegbe ɖe emawɔmawɔ ta alo va nyea dzidzɔmakpɔla. Le go bubu me la, sɔhɛ ɖekematsɔlemetɔ anɔ movinu aɖe wɔwɔ dzi wòava zu vevesese nɛ le etsɔme. Le go evea siaa me la, nusi hiã mawɔmawɔ ɖe ɣeyiɣia dzi alo nusi gblẽ wɔwɔ ate ŋu ahe nuxaxa geɖe vɛ.

Aleke woate ŋu aƒo asa na nyadzɔɖeamedzi siae? Esime Mawu ƒe Nya la nɔ nu xlɔ̃m ku ɖe nyametsotso si wometɔ afɔ to wɔ o ŋu la, eɖo aɖaŋu na sɔhɛwo be: “Ðo ŋku wɔwòla dzi le wò ɖekakpuiŋkekewo me, hafi ne ŋkeke vɔ̃wo nava, eye ƒe, siwo ŋu nèle gbɔgblɔ ge le be, womedze ye ŋu o la, nagogo.” (Nyagblɔla 12:1) Ne sɔhɛe nènye la, wɔ afɔɖeɖe nyuiwo nàsrɔ̃ nu tso “Wɔwòla” ŋu le wò sɔhɛmenɔɣi.

Ekema aleke Biblia kpena ɖe sɔhɛwo ŋu be woaƒo asa na sɔhɛmenɔɣi movinuwo wɔwɔ? Egblɔ be: “Se aɖaŋuɖoɖo, eye naxɔ amehehe na ɖokuiwò, ne nadze nunya le ɣeyiɣi, siwo gbɔna me.” (Lododowo 19:20) Biblia ɖee fia wòdze ƒã hã be mawumenunya maxɔmaxɔ le ɖekematsɔleme alo aglãdzedze le sɔhɛmenɔɣi, alo ƒe ɖesiaɖe xɔxɔ, me hea nɔnɔme wɔnublanuiwo vɛ na ame. (Lododowo 13:18) Gake wɔwɔ ɖe Mawu ƒe mɔfiamewo dzi ‘hea agbenɔnɔ didi, ƒe nyuiwo kple ŋutifafa vɛ,’ si nye agbe si me dzidzeme kple dzɔdzɔ le.—Lododowo 3:2.